Mahungu Ya Ku Tsakisa Ya Ku Tsaliwa Hi Yohani

9 Nkama Yesu na a li ku fambeni, a vone munhu lweyi a nga psaliwa na a nga voni. 2 Kutani vadjondzisiwa va yena va mu vutisa va ku: “Rabi,*+ i xidjoho xa mani lexi nga yendla swaku munhu lweyi a psaliwa na a nga voni? I xa yena kumbe i xa vapsali va yena?” 3 Yesu a va hlamula a ku: “A hi yena a nga djoha kumbe vapsali va yena; kambe swi yendlekile leswaku mintirho ya Xikwembu yi ta voneka hi yena.+ 4 Hi fanele hi yendla mintirho ya Lweyi a nga ni rhuma na ka ha vona;+ la ta wusiku leli munhu a nga ta kala a nga ha swi koti ku tirha. 5 Ku vonakala ku ta va kona misaveni, ntsena loko na ha li kona.”+ 6 Nkama a nga gama ku vula leswo, a pshitela marhi hansi, a pfuva madaka hi marhi a gama a ma tota ka matihlo ya munhu yelweyo+ 7 kutani a ku: “Famba u ya hlamba ka mati* ya Silowama” (leswi vulaka “Murhumiwa”). Kutani a ya hlamba, a vuya se na a vona.+

8 Kutani vavhizinyu ni lava a va tolovela ku mu vona na a kombela zimola va ku: “Lweyi a hi yena wanuna lweyi a a tolovela ku kombela zimola?” 9 Van’wani a va ku: “Hi yena.” Van’wanyani va ku: “A hi yena, o fana na yena.” Kambe yena a va byela a ku: “Hi mina.” 10 Se va mu vutisa va ku: “Matihlo ya wena ma pfulekise ku yini?” 11 A va hlamula a ku: “Wanuna lweyi va nge i Yesu a pfuve madaka hi marhi, a ma tota ka matihlo ya mina a gama a ku: ‘Famba u ya hlamba Silowama.’+ Se ni famba ni ya hlamba se ni sungula ku vona.” 12 Kutani va ku: “A kwini wanuna wa kona?” A va hlamula a ku: “A ni swi tivi.”

13 Se va teka wanuna lweyi a nga pfuliwa matihlo va mu yisa ka Vafarisi. 14 Phela siku leli Yesu a nga pfuva madaka hi marhi a gama a hanyisa wanuna lweyi+ a ku li Savata.+ 15 Kutani Vafarisi na vona va sungula ku mu vutisa swaku swi kotekise ku yini leswaku a kota ku vona. Wanuna lweyi a ku: “A tote matihlo ya mina hi madaka, kutani ni ya hlamba se ni sungula ku vona.” 16 Vafarisi van’wani va ku: “Munhu lweyi a nga ti hi ka Xikwembu hikusa a nga yi hloniphi Savata.”+ Se van’wani va ku: “Munhu a nga swi kotisa ku yini ku yendla masingita ya ku fana ni lawa kuve i mudjohi?”+ Se va sungula ku nga ha twanani.+ 17 Kutani va tlhela va vutisa wanuna lweyi va ku: “Leswi u nge a ku hanyise matihlo, u li yini hi yena?” Wanuna lweyi a ku: “I muprofeta.”

18 Kambe Vayuda a va nga kholwi swaku a psaliwe na a fe matihlo ni swaku a yo hanyisiwa, va za va vitana ni vapsali va yena 19 va va vutisa va ku: “Lweyi i n’wana wa n’wina lweyi mi nge a psaliwe na a fe matihlo ke? Se swoswi a swi kotisa ku yini ku vona?” 20 Vapsali va yena va hlamula va ku: “Ha swi tiva swaku lweyi i n’wana wa hina ni swaku a psaliwe na a fe matihlo. 21 Kambe lexi nga yendla swaku swoswi a kota ku vona, a hi xi tivi; ni lweyi a nga mu pfula matihlo, a hi mu tivi. Mu vutiseni. Se a kulile, a nga tihlamulela hi yexe.” 22 Vapsali va yena va vule leswo hi ku chava Vayuda,+ hikusa Vayuda a va twanane swaku lweyi a nga ta pfumela swaku Yesu i Kreste, a fanele a hlongoliwa ka sinagoga.*+ 23 Hi leswo swi nga yendla vapsali va yena va ku: “A kulile. Vutisani yena.”

24 Se va tlhela va vitana wanuna lweyi va ku: “Dzunisa Xikwembu; ha swi tiva swaku wanuna lweyi i mudjohi.” 25 Kutani a va hlamula a ku: “Swaku i mudjohi mina a ni swi tivi. Lexi ni xi tivaka hi leswaku a ni nga voni kambe swoswi se na vona.” 26 Se va ku: “A ku yendle yini? A ma pfulise ku yini matihlo ya wena?” 27 A va hlamula a ku: “Se ni mi byelile kambe a mi ni yingisanga. Se mi lava ni mi byela kangaki? Kumbe na n’wina mo lava ku va vadjondzisiwa va yena ke?” 28 Kutani va mu menyula va ku: “Wena u mudjondzisiwa wa wanuna lwiyani, kambe hina hi vadjondzisiwa va Moxe. 29 Ha swi tiva swaku Xikwembu xi vulavule na Moxe, kambe wanuna lweyi, hina a hi swi tivi swaku a ta hi kwini.” 30 Wanuna lweyi a va hlamula a ku: “Swa ni hlamalisa! Wanuna lweyi a pfule matihlo ya mina kambe mi li a mi swi tivi swaku a ta hi kwini. 31 Ha swi tiva swaku Xikwembu a xi va yingisi vadjohi,+ kambe loko munhu a xi hlonipha hintamu Xikwembu* a tlhela a yendla ku rhandza ka xona, xa mu yingisa.+ 32 A hi se tshama hi swi twa swaku ku ni munhu lweyi a nga pfula matihlo ya munhu lweyi a nga psaliwa na a nga voni. 33 Loko wanuna lweyi a a nga ti hi ka Xikwembu, a a nga ta swi kota ku yendla leswi a nga swi yendla.”+ 34 Se va ku: “U psaliwe na u li mudjohi, se u lava ku hi djondzisa?” Kutani va mu hlongola!+

35 Yesu a swi twa swaku va mu hlongolile, kutani nkama a nga tlhangana na yena a ku: “Wa pfumela ka N’wana wa munhu?” 36 Wanuna lweyi a mu hlamula a ku: “Hosi,* i mani N’wana wa munhu swaku ni ta pfumela ka yena?” 37 Yesu a ku: “U mu vonile, phe hi yelweyi u vulavulaka na yena.” 38 Kutani a ku: “Hosi, na pfumela ka yena.” Se a khizama phambheni ka yena. 39 Kutani Yesu a ku: “Ni te misaveni swaku swilo leswi ni swi yendlaka swi ta pfula matihlo ya lava kalaka va nga voni+ ni swaku lava vonaka va ta fa matihlo.”+ 40 Loko va twa leswo, Vafarisi lava a va li na yena va ku: “U la ku vula swaku na hina hi fe matihlo?” 41 Yesu a ku: “Loko a mi fe matihlo, a mi nga ta va ni xidjoho. Kambe swoswi mi li: ‘Ha vona.’ Leswo swi vula swaku ma ha ni xidjoho.”+