NDZIMA 25

Ni Nga Wu Hlulisa Ku Yini Mukhuva Wa Ku Titsakisa Hi Ku Tikhomakhoma Phambheni?

“Ni sungule ku titsakisa hi ku tikhomakhoma phambheni na ni ni 8 wa malembe. Hi ku famba ka nkama ni djondze leswi Xikwembu xi titwisaka xiswona hi mhaka yoleyo. Ku sukela kolanu, loko ni za ni tsandzeka ku tikhoma a ni titwa nandzu, a ni tivutisa swaku Xikwembu xi nga swi kotisa ku yini ku rhandza munhu wa ku fana na mina?” — Luiz.

LOKO vanhu va kula va ya va swi navela hintamu ku famba masangu. Hi mhaka leyo, jovhem li nga sungula ku va ni mukhuva wa ku titsakisa hi ku tikhomakhoma phambheni.a Vanhu va vanyingi va pimisa swaku leswo a swi bihanga. Va li: “Leswi a swi vavisi munhu.” Kambe ku ni swivangelo swa ku tala swa ku fambela kule ni mukhuva lowu. Mupostolo Pawulo a te: “Dlayani ku navela ka swirho swa muzimbha wa n’wina . . . ku navela ka masangu ka ku kala ku nga lawuleki”. (Vakolosa 3:5) Ku titsakisa hi ku tikhomakhoma phambheni, a swi dlayi kumbe ku pumba ku navela ku famba masangu kambe swo ku yengesela. Handle ka leswo pimisa hi leswi:

● Ku titsakisa hi ku tikhomakhoma phambheni, swi yendla swaku munhu a yendla leswi rhandziwaka hi yena ntsena. Hi xikombiso, loko munhu a titsakisa hi ku tikhomakhoma phambheni o pimisa hi ku titsakisa yena ntsena.

● Ku titsakisa hi ku tikhomakhoma phambheni, swi yendla swaku munhu a vona van’wani na va li swilo swa ku titsakisa hi swona ntsena.

● Ku titsakisa hi ku tikhomakhoma phambheni, swi yendla munhu a tipimisela yena yexe funtshi swi nga yendla swaku munhu a nga tsaki hi ku famba masangu ni lweyi a nga chada na yena.

Loko u navela ku famba masangu, u nga tsutsumeli ku titsakisa hi ku tikhomakhoma phambheni, kambe lwela ku tikhoma. (1 Vatesalonika 4:4, 5) Leswaku li ku pfuna, Bibele li ku byela swaku i swa lisima ku va u fambela kule ni swiyimu leswi nga ku yendlaka u navela ku famba masangu. (Swivuriso 5:8, 9) Kambe u ta ku yini loko se u ni mukhuva wa ku titsakisa hi ku tikhomakhoma phambheni? Swi nga yendleka u zamile ku nyima, kambe u nga swi kotanga. Swi nga vevuka ku pimisa swaku a wu pfuni nchumu ni swaku u nge swi koti ku hanya hi minawu ya Xikwembu. Phela hi leswo djaha lin’wani leli vitaniwaka Pedro a li titwisa xiswona. Li li: “Loko ni za ni tsandzeka a ni vaviseka. A ni pimisa swaku a ni nge swi koti ku yendla swaswinene. A swi ni karhatela hambi ku khongela.”

Loko na wena u titwisa xileswo, u nga godoli. Wena u wa lisima. Majovhem ya manyingi ni vanhu vavakulu va swi kotile ku tshika mukhuva lowu. Na wena u nga swi kota!

U Nga Yendla Yini Loko U Titwa Nandzu?

Hi lani se hi nga swi vona hi kona, lava nga ni mukhuva wa ku titsakisa hi ku tikhomakhoma phambheni, minkama ya yinyingi va titwa nandzu. I ntiyiso swaku ‘ku vaviseka hi swilo swa ku biha leswi u nga swi yendla’ swi nga ku pfuna ku hlula mukhuva wolowo wa ku biha. (2 Vakorinto 7:11) Kambe ku titwa nandzu ku tlula mpimu, swi nga yendleka swi nga pfuni. Swi nga ku yendla u hela ntamu u tlhela u godola ku lwisana ni mukhuva lowo. — Swivuriso 24:10.

Hi mhaka leyo, zama ku vona mhaka hi ndlela yayinene. Ku titsakisa hi ku tikhomakhoma phambheni i mukhuva wa ku kala wu nga basanga. Wu nga ku yendla ‘xikarawa xa ku navela ka ku hambanahambana ni mintsaku’ swi tlhela swi ku yendla u va ni mimpimiso ya ku biha. (Tito 3:3) Kambe ku titsakisa hi ku tikhomakhoma phambheni a hi xidjoho xaxikulu, ku fana ni ku yendla wuntunga la swa masangu. (Yuda 7)Loko u ni mukhuva wa ku titsakisa hi ku tikhomakhoma phambheni, u nga pimisi swaku u yendle xidjoho xa ku kala xi nga rivaleliwi. Lexi u faneleke u xi yendla, i ku tama u lwisana ni ku navela koloko ka ku biha u tlhela u nga godoli!

U nga hela ntamu loko u tsandzeka ku tikhoma. Loko leswo swi humelela, khumbuka marito ma nga ka Swivuriso 24:16 lama nge: “Hikusa wa ku lulama a nga ha wa ka 7 kambe a ta tlhela a pfuka, Kambe lweyi a yendlaka swa ku biha a ta wisiwa hi khombo.” Ku tsandzeka ku tikhoma a swi vuli swaku u munhu wa ku biha. Hi mhaka leyo, u nga godoli. Ku hambana ni leswo, kambisisa swaku i yini swi nga ku yendla u tsandzeka ku tikhoma u tlhela u zama ku swi lulamisa.

Tinyiki nkama wa ku pimisa hi lirhandzu ni timpsalu ta Xikwembu. Mupisalema Davhida lweyi na yena a nga hela ntamu a te: “Ku fana ni leswi papayi a va kombaka timpsalu vana va yena, Yehovha a va komba timpsalu lava va mu chavaka. Hikusa wa swi tiva kahle swaku hi yendlisiwe ku yini, wa swi khumbuka swaku hi wuthulu.” (Tipisalema 103:13, 14) Impela Yehovha wa swi tiva swaku hi ni xidjoho funtshi a “lunghekele ku rivalela.” (Tipisalema 86:5) Yehovha a lava swaku hi zama ku hlula mikhuva ya ku biha. Se u nga yendla yini swaku u hlula mukhuva lowu wa ku biha?

Kambisisa leswi u hungataka hi swona. U sixtira mafilmi kumbe maprograma ya televhizawu kumbe u nghena ka ma site ya interneti lawa ma ku yendlaka u navela ku famba masangu? Mutsali wa Tipisalema a yendle kahle hi ku khongela ka Xikwembu a ku: “Yendla swaku matihlo ya mina ma nga txuvuki minchumu ya ku kala yi nga pfuni nchumu.”b — Tipisalema 119:37.

Pimisa hi timhaka tin’wani. Mukreste mun’wani lweyi a vitaniwaka William a vula leswi: “Na u nge se yetlela, lerha nchumu lexi nga tiyisaka wunghanu la wena na Yehovha. I swa lisima hintamu ku va mimpimiso ya wugamu ya siku yi fambisana ni Bibele.” — Vafilipiya 4:8.

Bula ni munhu hi xikarhatu lexi u nga na xona. Tingana ti nga yendla swaku swi ku karhatela ku bula ni munhu hi mhaka leyi, kambe ku yendla leswo swi nga ku pfuna ku hlula mukhuva wa ku titsakisa hi ku tikhomakhoma phambheni. Hi leswo swi nga yendliwa hi David lweyi a nga Mukreste. A li: “Ni bule ni papayi wa mina. A ni nge ma khohlwi marito lawa a nga ma vula. Na a mbonyozela, a ni txuvukile a gama a ku: ‘Na tibyela hi wena!’ A a swi tiva swaku a swi lava ni tiya swaku ni vulavula hi mhaka leyi. Leswo swi ni tiyise hintamu, swi tlhela swi ni pfuna swaku ni tinyimisela ku yendla leswi ni nga swi kotaka.”

“Papayi a ni kombe tindzimana ka Bibele leti nga ni pfuna ku vona swaku leswi ni nga swi yendla a ku nga li xidjoho xaxikulu. Kambe a ni kombe tindzimana tin’wani leti nga ni pfuna ku vona swaku leswi ni nga swi yendla a swi bihile. A ni byele swaku ku sukela kolanu, a ni fanele ni zama ku lwisana ni mukhuva wa mina wa ku biha ni swaku hi ku famba ka nkama a hi ta tlhela hi bula hi yona mhaka leyi. A tlhele a ni byela swaku a ni fanelanga ni godola loko ni tshuka ni phazama, kambe a ni fanele ni heta nkama wa wunyingi na ni nga wu yendli mukhuva lowu.” David a vula yini? A li: “Ku bula ni munhu hi xikarhatu xa mina ni ku pfumela ku pfuniwa ku ve nchumu xaxinene ni nga xi yendla.”c

[Ntlhamuselo wa le hansi]

NDZIMANA YA NHLOKOMHAKA LEYI

“Baleka ku navela ka wujovhem, kambe lavetela ku lulama, lipfumelo, lirhandzu, ku rhula xikan’we ni lava vitanaka Hosi hi mbilu ya ku basa.” — 2 Timotiya 2:22.

ZAMA KU YENDLA LESWI

Na u nge se swi navela hintamu ku yendla swa ku biha khongela u kombela Yehovha swaku a ku nyika “matimba ya makulu lama tlulaka hinkwaswu” swaku u hlula ku navela koloko. — 2 Vakorinto 4:7.

A WU SWI TIVA . . . ?

Munhu lweyi a kalaka a nga swi koti ku tikhoma a landzelela ku navela ka yena. Kambe wansati kumbe wanuna wamunene hi lweyi a tivaka ku tikhoma hambiloko a li yexe.

NI TA YENDLA LESWI!

Ni nga tshamela ku pimisa hi minchumu leyi nga basa loko ni ․․․․․

Ku hambana ni ku yendla leswi ni swi navelaka ni ta ․․․․․

Ni navela ku va vutisa leswi vapsali va mina hi mhaka leyi ․․․․․

U SWI VONISA KU YINI?

● Hi mhaka muni swi li swa lisima ku khumbuka swaku Yehovha a “lunghekele ku rivalela”? — Tipisalema 86:5.

● Leswi Xikwembu lexi nga yendla swaku vanhu va navela ku famba masangu xi vulaka swaku u fanele u tikhoma, u pimisa swaku xi tshemba swaku u ta yendla yini?

[Marito ka Pajina]

“Leswi ni nga kota ku hlula xikarhatu lexi, ni ni lipfalu la ku basa. Phela a ku na nchumu xa ku yampsa ku tlula leswo!” — Sarah

[Mufoto wa pajina 180]

Loko u wa na u li ka mpalisanu wa ku tsutsuma a swi vuli swaku u fanele u tlhela u sungulisa. Hi ku fana, loko u tsandzeka ku tikhoma a swi vuli swaku minzamu leyi se u nga yi yendla swaku u hlula mukhuva wa ku biha a hi ya nchumu