Karta La Ntlawa Lowu Rhangelaka

Vamakwerhu Va Ku Rhandzeka:

Ka Murindzi wa 1 ka Janeiro wa 2008, ku sungule ku humesiwa xiyenge xa nyuwani lexi nga ni nhlokomhaka leyi nge: “Tekelela Lipfumelo La Vona.” Ku sukela kolanu, loko ku za ku hundza 3 wa tiwheti, a hi yamukela nhlokomhaka ya nyuwani!

Va titwise ku yini vanhu hi ku lerha xiyenge lexi xa nyuwani? Mun’wani lweyi a nga lerha xitoriya xa Marta a vule leswi: “Phela ni hlekile noxe nkama ni nga lerha hi Marta. Phela mina na yena ha fana! Hikusa ni swi rhandza hintamu ku yamukela van’wani. Kambe loko se ni li na vona, ni khoma lani ni tshika lani. Ni khohlwa swaku ni fanele ni tinyika nkama wa ku bula ni vanghanu va mina.” Ntombhi yin’wani nkama yi nga lerha xitoriya xa Estere yi vule leswi: “Phela hi nga karhateka hintamu hi mpahla leyi hi yi yambalaka, hi zama ku yambala mpahla ya moda. I ntiyiso swaku hi fanele hi yambala mpahla yayinene kambe a hi fanelanga hi tlulisa mpimu. A xa lisima ka Yehovha hi leswi hi nga swona hi le ndzeni ku nga li mpahla ya hina.” Makwerhu mun’wani a tsake hintamu nkama a nga lerha hi xitoriya xa Pedru. Yena a te: “Phela nkama ni nga djondza hi Pedru, ni tivone na ni li kohala na yena! Ni djondze minchumu ya lisima hintamu leyi ka Bibele yi kalaka yi nga vulavuliwi hi ku kongoma.”

Vamakwerhu lava, ni vanhu van’wani lava lerhaka mabuku ya hina va tsale leswi va titwisaka swona akuva va kombisa ku khensa hi mhaka ya xiyenge lexi. Leswi va titwisaka xiswona swa yelana ni leswi mupostolo Pawulo a nga swi vula loko a te: “Hinkwaswu leswi nga tsaliwa khale swi tsaleliwe ku djondzisa hina.” (Rom. 15:4) Yehovha a yendle swaku switoriya leswi, swi tsaliwa ka Bibele leswaku swi hi djondzisa swilo swa lisima. Se hinkwerhu ku nga na mhaka swaku hi ni malembe mangaki na hi li ka ntiyiso hi nga djondza swilo swa swinyingi ka switoriya leswi.

Hi ku kutxa swaku u tekela ku li lerha buku leli. Loko mi li tirhisa ka wugandzeli la n’wina la ndjangu, vana va ta li rhandza swinene! Loko buku leli li djondziwa bandleni yendla hinkwaswu swaku u nga choti mintlhanganwini. Nkama lowu u li lerhaka u nga tsutsumi li lerhi hi wunyaminyami, naswona tirhisa mimpimiso ya wena nkama u lerhaka. Loko u lerha xitoriya xa munhu wa le Bibeleni, zama ku titwisa leswi yena a nga titwisa xiswona ni ku vona leswi yena a nga swi vona. Fananisa leswi a nga swi yendla ni leswi wena a wu ta va u swi yendlile.

I nkateko wawukulu ku humesa buku leli. Hi navela swaku buku leli li va nkateko ka wena ni ndjangu wa wena. Hi lirhandzu,

Ntlawa Lowu Rhangelaka Wa Timboni Ta Yehovha