Xingheniso

1, 2. Mudjikelezi mun’wani a a va vonisa ku yini vanhu lava ku vulavuliwaka hi vona ka Bibele, naswona hi mhaka muni hi nga vulaka swaku a va ta va vanghanu va kahle ka hina?

MAKWERHU mun’wani wa xisati loko a gamile ku twa dixkursu leli nga vekiwa hi mudjikelezi lweyi se a a gugile a vule leswi: “Ndlela leyi a nga vulavula hi yona hi vanhu va le Bibeleni, a swo maha ingaku o vulavula hi vanghanu va yena vavakulu.” Phela makwerhu lweyi wa xisati a a vula ntiyiso hikusa mudjikelezi lweyi, se a ku li malembe ni malembe na a djondza Bibele ni ku djondzisa van’wani hi lona lakakuva loko a vulavula hi vanhu van’wani va le Bibeleni lava nga kombisa lipfumelo a swo fana ni loko o vululavula hi vanghanu va yena vavakulu.

² Phela a swi ta tsakisa hintamu ku va munghanu wa vanhu lava ku vulavuliwaka hi vona aBibeleni! Indjhe vanhu volavo u va vona na va li vanhu va ntiyiso? Pimisa hi swaku a swi ta va ndjhani ku bula, ku famba, u hungata u tlhela u heta nkama wa wunyingi ni vanhu va ku fana na Nowa, Abrahamu, Ruti, Eliya na Estere. Pimisa hi ndlela leyi a va ta ku pfuna hi yona. Phela a va ta ku byela marito ya wutlharhi va tlhela va ku tiyisa! — Lerha Swivuriso 13:20.

3. a) Hi nga pfunekisa ku yini loko hi djondza hi swikombiso swa vanhu va lipfumelo lava ku vulavuliwaka hi vona ka Bibele? b) Hi swini swivutiso leswi hi nga ta bula hi swona?

³ I ntiyiso swaku loko ku ta pfuxiwa “lava va ku lulama”, swi ta koteka swaku hi va ni vanghanu vavanene va ku fana ni lava ku vulavuliwaka hi vona ka Bibele. (Min. 24:15) Kambe hambi hi namuntlha swi nga koteka swaku hi djondza swilo swa swinyingi ka vavanuna ni vavasati va lipfumelo lava ku vulavuliwaka hi vona ka Bibele. Hi nga swi kotisa ku yini? Mupostolo Pawulo a hlamula xivutiso lexo hi ku vula a ku: ‘tekelelani lava dlaka tshomba la switshembiso hi mhaka ya lipfumelo ni ku lehisa mbilu.’ (Heb. 6:12) Se na hi nga se sungula ku djondza hi vavanuna ni vavasati va lipfumelo, a hi sunguleni hi ku hlamula swivutiso leswi hi nga tivutisaka swona loko hi lerha marito ya Pawulo lawa ma nge: I yini lipfumelo, naswona hi mhaka muni swi li swa lisima swaku hi va na lona? Hi nga va tekelelisa ku yini vavanuna ni vavasati va ku tshembeka lava ku vulavuliwaka hi vona ka Bibele?

I Yini Lipfumelo, Naswona Hi Mhaka Muni Swi Li Swa Lisima Swaku Hi Va Na Lona?

4. Vanhu va vanyingi va li vonisa ku yini lipfumelo, naswona hi mhaka muni mavonelo ya vona ma hoxile?

⁴ A lipfumelo i wumunhu la ku saseka hintamu. Vanhu lava hi nga ta bula hi vona ka buku leli, a va li nyika lisima hintamu lipfumelo. Namuntlha vanhu va vanyingi va pimisa swaku loko munhu a li ni lipfumelo a kholwa ka xin’wani ni xin’wani na ku nga na lexi xi mu tiyisekisaka swaku leswi a swi kholwaka i ntiyiso kumbe na a nga na wumboni la swoleswo. Kambe leswo a hi ntiyiso. Ku kholwa ka nchumu na u nga na wumboni la swona swi ni nghozi hintamu. Hikusa ndlela leyi munhu a titwaka hi yona namuntlha yi nga ha txintxa. Naswona ku kholwa swaku Xikwembu xi kona a swi xegi hikusa hambi hi “madimoni na wona ma kholwa [leswaku Xikwembu xi kona] ma tlhela ma rhurhumela.” — Yak. 2:19.

5, 6. a) A lipfumelo la hina li patsa swilo swini swimbirhi leswi hi kalaka hi nga swi voni? b) Lipfumelo la hina li fanele li tiya ku fikela kwini? Tlhamusela.

⁵ A lipfumelo la ntiyiso i likulu hintamu ku tlula swilo leswi. Khumbuka leswi Bibele li swi vulaka hi lipfumelo. (Lerha Vaheberu 11:1.) Pawulo a vule swaku lipfumelo li patsa swilo swimbirhi leswi hi kalaka hi nga swi voni. Xa ku sungula, li patsa ku kholwa ka swilo leswi nga kona kambe hi kalaka “hi nga swi voni”. Matihlo ya hina a ma nge swi koti ku vona swilo leswi nga matilweni swa ku fana na Yehovha Xikwembu, Yesu Kreste ni Mfumu wa Xikwembu lowu se wu fumaka tilweni. Xa wumbirhi, lipfumelo li patsa ‘swilo leswi hi swi nyimelaka’ leswi swi kalaka swi nga se yendleka. Swoswi a hi nge swi koti ku vona misava ya nyuwani leyi nga ta tisiwa hi Mfumu wa Xikwembu ku nga li khale. Se ku nga va leswaku a ku na lexi xi hi tiyisekisaka swaku swilo leswi hi kalaka hi nga swi voni ni leswi hi swi nyimelaka swi ta yendleka?

⁶ Nada! Pawulo a tlhamusele swaku a lipfumelo la ntiyiso li ni masungulu ya ku tiya. Nkama Pawulo a nga vulavula hi lipfumelo a vule swaku “lipfumelo i ku tshemba loku tiyeke”, marito lawa ma nga tlhela ma hundzuluxeliwa ma va “papela leli tiyisekisaka swaku a nchumu xa ku karhi i xa wena.” Pimisa hi munhu lweyi a lavaka ku ku nyika munti. Swi nga yendleka a ku nyika papela leli tiyisekisaka swaku a munti lowuyani i wa wena, a gama a vula leswi: “Hi lowu munti wa wena.” I ntiyiso swaku a nga lavi ku vula swona swaku papela leliyani hi wona munti wa wena, kambe a lava ku vula swaku papela leliyani la tshembeka naswona li tiyisekisiwe hi mfumu swaku a munti lowuyani i wa wena. Se hi lani ku fanaka leswi swi hi yendlaka hi kholwa kumbe wumboni leli yendlaka hi va ni lipfumelo, li tiyile lakakuva swi nga fanisiwa ni lipfumelo hi loxe.

7. Lipfumelo la ntiyiso li patsa yini?

⁷ A lipfumelo la ntiyiso li patsa swilo leswi nga tshama swi hi yendlekela leswi yendlaka hi tshemba Yehovha hi ku helela hi tlhela hi va ni lipfumelo ka yena. Lipfumelo li hi yendla hi vona Yehovha na a li Papayi wa hina wa lirhandzu hi tlhela hi tshemba swaku hinkwaswu leswi a hi tshembisaka swona swi ta yendleka. Kambe lipfumelo la ntiyiso li patsa swilo swin’wani. Ku fana ni leswi nchumu lexi hanyaka xi lavaka ku hlayisiwa swaku xi tama xi hanya, na lona lipfumelo leswaku li nga fi hi fanele hi tama hi li kombisa hi mintirho. — Yak. 2:26.

8. Hi mhaka muni lipfumelo li li la lisima?

⁸ Hi mhaka muni lipfumelo li li la lisima? Pawulo a vule leswi hi pfunaka ku kuma nhlamulu. (Lerha Vaheberu 11:6.) Se lipfumelo i la lisima leswaku hi kota ku hetisisa xikongomelo lexi Yehovha a nga hi yendlela xona, ku nga ku va vanghanu va yena, hi mu tsakisa ni ku mu dzunisa.

9. I mpsini leswi Yehovha a nga swi yendla swaku a hi pfuna swaku hi va ni lipfumelo?

⁹ Yehovha wa swi tiva swaku hi hanya ka masiku lawa vanhu va vanyingi va kalaka va nga na lipfumelo, ni leswaku hina hi lava lipfumelo swaku hi tama hi mu tirhela. Hi mhaka leyo, a hi nyike swikombiso swa vanhu lava hi nga va tekelelaka lava va nga ni lipfumelo lalikulu. Abandleni hi ni madoda lawa ma nga swikombiso swaswikulu swa lipfumelo. Funtshi a tlhela a hi kutxa a ku: “Tekelelani lipfumelo la vona.” (Heb. 13:7) Kambe a hi bandleni ntsena lani ku nga ni swikombiso swaswikulu swa lipfumelo. Mupostolo Pawulo ka buku la Vaheberu ndzima 11 a vulavule hi “rhefu lalikulu la timboni,” ku nga vavanuna ni vavasati va ku tshembeka va khale lava nga kombisa lipfumelo lalikulu swinene. (Heb. 12:1) Funtshi ka Bibele u ta kuma swikombiso swa vavanuna ni vavasati, vanhu vavakulu, vavatsongo ni va ku guga lava nga kombisa lipfumelo hi ndlela ya ku hlamalisa hintamu. Swikombiso hinkwaswu leswi, swi tsaliwe ka Bibele swaku swi hi pfuna kuva na hina hi va ni lipfumelo.

Hi Nga Li Tekelelisa Ku Yini Lipfumelo La Vanhu Van’wani?

10. Ku djondza Bibele swi nga ku pfunisa ku yini swaku u tekelela vanhu lava ku vulavuliwaka hi vona ka Bibele lava nga kombisa lipfumelo?

¹⁰ Phela a wu nge swi koti ku tekelela munhu na u nga zanga u txuvukisela leswi a swi yendlaka. Ku yendliwe mapexkiza ya manyingi swaku buku leli li ku pfuna akuva u va tiva ku yampsa vanhu lava nga kombisa lipfumelo, lava Bibele li vulavulaka hi vona. Se swi ngo yini na wena u pexkizara hi vanhu volavo ka djondzo ya wena wexe ya Bibele. Nkama u djondzaka hi vanhu volavo zama ku tivona na u li na vona ka tindhawu leti va nga ka tona, leswi va swi twaka, leswi va titwisisa swona ni ku zama ku twa ku nun’hwela loku va ku twaka. Phela leswo swi ta ku pfuna swaku vanhu volavo va va vanhu va hikakunene ka wena. Naswona swi nga yendleka hi wugamu van’wani va vona va va vanghanu va wena vavakulu.

11, 12. a) U nga yendla yini swaku Abrahamu na Sara va va vanghanu va wena? b) U nga pfunekisa ku yini ka xikombiso xa Ana, Eliya na Samuwele?

¹¹ Loko u va tiva ku yampsa vanhu lava va lipfumelo, u ta lava ku va tekelela. Hi xikombiso, pimisa hi loko nhlengeletanu ya Yehovha yi ku rhamba swaku u yengesela ntirho wa wena wa ku chumayela. Swi nga yendla yi ku rhamba swaku u rhurha u ya ka ndhawu leyi ku lavekaka vachumayeli kumbe u nyikiwa ntirho lowu swi nga yendlekaka u nga wu tolovelanga kumbe wu nga ku tsakisi. Se nkama lowu u pimisaka u tlhela u khongela hi xiyavelo xa wena u nga ha pimisa hi xikombiso xa Abrahamu. Yena na Sara a va tinyimiselile ku tshika wutomi la vona la ku yampsa leli a va li na lona aUra naswona Yehovha a va katekisile hi mhaka ya leswo. Se loko u tekelela xikombiso xa vona, ha tiyiseka swaku u ta va tiva ku yampsa.

¹² A hi nge munghanu wa wena kumbe xaka la wena li ku kwatisile. Se u sungula ku godola funtshi u nga swi lavi hambi hi ku ya mintlhanganwini. Phela loko leswo swi yendleka, ku pimisa hi Ana ni leswi a nga swi yendla nkama a nga hluphiwa hi Penina swi ta ku pfuna swaku u yendla xiboho xaxinene, funtshi Ana a ta va munghanu wa wena. U ta ku yini loko u godola, u titwa na u nga pfuni nchumu? Ku pimisa hi xikombiso xa Eliya nkama lowu a nga titwa na a nga pfuni nchumu ni ndlela leyi Yehovha a nga mu tiyisa hi yona, swi nga ku pfuna hintamu. Naswona majovhem lawa ma xengeteliwaka ku yendla swilo swa ku biha axikola, ma nga pfuneka loko ma pimisa hi xikombiso xa Samuwele ni leswi a nga swi yendla nkama a a vona vana va Eli lava a va yendla swilo swa ku biha ka tabernakela.

13. Ku tekelela vanhu va lipfumelo va le Bibeleni swi yendla swaku lipfumelo la hina li nga vi la lisima ka Yehovha? Tlhamusela.

¹³ Indjhe ku tekelela lipfumelo la vanhu lava ku vulavuliwaka hi vona ka Bibele, swi yendla swaku lipfumelo la hina li nga vi la lisima ka Yehovha? Nada! Khumbuka swaku Bibele li hi kutxa swaku hi tekelela lipfumelo la vanhu va ku fana ni volavo. (1 Ko. 4:16; 11:1; 2 Tes. 3:7, 9) Handle ka leswo, vanhu lava hi faneleke hi va tekelela na vona va tekelele lipfumelo la vanhu van’wani lava nga hanya na vona va nga se hanya. Hi xikombiso ka Ndzima 17 ya buku leli, hi kuma swaku ingaku marito lawa Mariya a nga ma vula a ma tshame ma vuliwa hi Ana. Leswi swi kombisa swaku Mariya a a vona Ana na a li xikombiso xaxinene xa ku xi tekelela. Leswo a swi lavi ku kombisa swaku lipfumelo la Mariya a li nga tiyanga! Xikombiso xa Ana xi pfune Mariya swaku a va ni lipfumelo la ku tiya a tlhela a yendla hinkwaswu leswi a nga swi kota swaku a va munghanu wa Yehovha.

14, 15. Li tshamise ku yini buku leli, naswona hi nga yendla yini swaku hi pfuneka?

¹⁴ A xikongomelo xa buku leli, i ku ku pfuna swaku u tiyisa lipfumelo la wena. A tindzima leti landzelaka ti susiwe ka xiyenge xa “Tekelela Lipfumelo La Vona” lexi nga kombisiwa ka Murindzi wa 2008 anze 2013. Kambe ku yengeteliwe swilo swin’wani. Ku yengeteliwe swivutiso naswona ku yengeteliwe mafoto ya ku xonga lawa ma tlhamuselaka swilo swin’wani leswi nga yendliwa. Handle ka leswo ku yengeteliwe minchumu yin’wani ya ku fana ni nkama lowu vanhu volavo va nga hanya hi wona ni mimapa. A buku leli nge: Tekelela Lipfumelo La Vona li yendleliwe ku pfuna ka djondzo ya munhu hi xi yexe, ka wugandzeli la ndjangu ni ka djondzo ya Bibele ya bandla. Handle ka leswo, swi nga yendleka mindjangu ya yinyingi yi swi tsakela ku lerha switoriya leswi nga ka buku leli hi rito la le henhla.

¹⁵ Onge buku leli li nga ku pfuna ku tekelela lipfumelo la vanhu va ku tshembeka lava nga tirhela Yehovha. Li tlhela li ku pfuna ku tiyisa lipfumelo la wena ni ku tlhela u va munghanu wa Papayi wa hina wa lirhandzu Yehovha!