6 Wa Makhombo Lawa Ma Nga Tlhela Ma Humelela

Moxe na Aroni va tlhele va ya vulavula na Faru va ku Yehovha a te:

— Tshika vanhu va mina va famba, loko u nga va tshiki ni ta rhumela mabawa ka tiko la Gibita.

Se mabawa ma tate tiyindlo ta Vagibita. Kambe a ma nghenanga ka tiyindlo ta Vayisrayele. Wa swi tiva swaku i yini mabawa? I minchumu ya ku fana ni tinhongani kambe swona i swikulunyana funtshi swa lumana. Khombo leli ni lawa ma nga landzela a ma hambanile ni ya ku sungula hikusa lawa ma yo humelela ntsena ka Vagibita. Loko Faru a vone leswo a byele Moxe a ku:

— Ni kombela u ni kombelela ka Yehovha swaku a susa mabawa lawa, ni ta mi tshika mi famba.

Se Yehovha a helise mabawa hinkwawu ka tiko la Gibita, kambe Faru a tlhela a yala leswaku Vayisrayele va famba.

Se Yehovha a rhuma Moxe a ku:

— Famba ka Faru u ya mu byela swaku loko a nga tshiki vanhu va mina va famba, swiharhi hinkwaswu swa Gibita swi ta fa.

Leswo swi yendlekile ka siku leli li nga landzela, kambe swiharhi swa Vayisrayele a swi fanga. Faru a swi tivile leswo, kambe leswi a a ni nkanu a tlhele a yala swaku Vayisrayele va famba.

Yehovha a byele Moxe a ku:

— Teka nkuma u famba na wona ka Faru se loko u fika, wu txukumeteli henhla phambheni ka yena.

Moxe a yendle leswi Yehovha a nga mu byela swona se ku gama ku tala hi wuthulu, nkama lowu li yaka li wa hansi Vagibita hinkwavu ni swifuyu swa vona va sungule ku humetela swilondza leswi a swi vava hintamu. Hambileswo, Faru a nga va tshikanga Vayisrayele va famba.

Se Yehovha a game a byela Moxe swaku a ya vulavula na Faru a ku:

— Leswi u kalaka u nga lavi ku tshika vanhu va mina va famba, mundzuku ni ta nisa mpfula ya marhalala, ku nga mpfula ya ma pedra de gelo ka tiko hinkwalu la Gibita.

Hi mundzuku ka kona, Yehovha a yendle leswaku ku na mpfula yayikulu, ku hatima, ku dzindza ku tlhela ku va ni marhalala atikweni hinkwalu la Gibita. A ku nga se tshama ku humelela swa ku fana ni leswi ka tiko la Gibita. Se a marhalala ma dlaye byanyi hinkwalu ma tlhela ma tshovelela ni minsinya hinkwayu, kambe lomu Vayisrayele a va tshama kona a ma zanga ma ba marhalala.

Se Faru a byela Moxe a ku:

— Na ku kombela, byela Yehovha leswaku a nyimisa mpfula leyi, ni ta mi tshika mi famba.

Moxe a kombele ka Yehovha leswaku a nyimisa mpfula. Kambe Faru a tame a yala.

Se Moxe a ku:

— Minsinya hinkwayu leyi nga siyiwa hi marhalala yi ta dliwa hi mintete.

Se mintete yi sungule ku tata tiko hinkwalu la Gibita yi sungula ku dla maplanta ni minsinya leyi nga siyiwa hi marhalala.

Se Faru a ku:

— Kombela ka Yehovha leswaku a ni susela mintete leyi.

Yehovha a yendla leswaku mintete yi nyamalala yi nga ha li kona, kambe Faru a nga va tshikanga Vayisrayele va famba.

Se Yehovha a byela Moxe a ku:

— Tlakusa voko la wena.

Nkama lowu a nga yendla leswo ku tekela ku mphuma hintamu se Vagibita va nga ha koti ku vona nchumu. Phela ku hele masiku manharhu na va nga koti ku vona munhu hambi ku li nchumu ni wun’we. Kambe Vayisrayele a va swi kota ku vona, lomu a va li kona a ku nga mphumanga.

Se Faru a gama a vitana Moxe a ku:

— Hiswona Moxe, wena ni vanhu va wena mi nga famba kambe tihomu ni tinyempfu ta n’wina swi fanele swi sala.

Se Moxe a hlamula a ku:

— A hi nge swi siyi, hi fanele hi ya nyikela swifuyu swa hina ka Yehovha swi va magandzelo.

Se Faru a va kwatela a va bongela a ku:

— Sukani phambheni ka mina! Mi nga ha tshuki mi vuya lani. Siku leli mi nga ta tlhela mi vuya lani ni ta mi dlaya.