Khombo La Wu 10

Moxe a tshembise Faru leswaku a a nga ha ta tlhela a vuya. Kambe na a nga se famba, Moxe a byele Faru a ku:

— Hi xikarhi ka wusiku, vana va matevula va Vagibita va ta fa, ni mun’we ka vona a nga ta sala, hambi hi wa vatirhi va wena ni wa wena.

Se Yehovha a byela Vayisrayele leswaku a va fanele va mu yendlela Paxkwa hi siku lolelo. A va byela a ku:

— Dlayani nyempfu kumbe mbuti leyi nga ni lembe lin’we, mi teka ngatinyana ya kona mi yi n’wan’wasela ka swipfalu swa n’wina. Woxani nyama ya kona mi yi dla ni pawu la ku kala fermentu. Tshamani na mi lunghile hikusa namuntlha niwusiku ni ta mi susa ka tiko la Vagibita.

Pimisa hi leswi Vayisrayele va nga tsakisa xiswona, phela se a va ta suka aGibita. Hi xikarhi ka wusiku, ntsumi ya Yehovha yi fambafambile ka miminti hinkwayu aGibita, lomu yi nga kuma swaku ku n’wan’waseliwe ngati ka xipfalu a yi nga ngheni, kambe lomu a ku nga n’wan’waseliwanga ngati a yi nghena yi dlaya n’wana wa matevula. Phela ku dlayiwe vana hinkwavu va matevula va Gibita, ku sukela ka mindjangu leyi a yi ganyile hintamu ku ya fikela ka mindjangu ya swisiwana. Kambe ka mindjangu ya Vayisrayele a ku dlayiwanga ni n’wana ni mun’we.

Phela hambi hi n’wana wa matevula wa Faru a file. Se Faru a a nga ha gwenti hi swilo leswi a swi mu humelela. A gama a rhuma wanuna leswaku a ya vitana Moxe na Aroni hi ku hantlisa, a fika a va byela a ku:

— N’wina ni vanhu va n’wina sukani lani. Fambani mi ya gandzela Xikwembu xa n’wina. Tekani swifuyu swa n’wina hinkwaswu mi suka lani!

Se hi ku hantlisa, ka wusiku leliyani, Vayisrayele va huma Gibita hi mintlawa. A ku ni 600.000 wa vavanuna ni vavasati ni vana. Naswona a ku ni vanhu lava a va nga li Vayisrayele, va nga famba na vona swaku va ya gandzela Yehovha. Vayisrayele se a va chunsiwile aGibita.

Leswaku va nga khohlwi leswi Yehovha a nga va ponisisa xiswona aGibita, Vayisrayele lembe ni lembe a va hamba fexta leli a va li vitana swaku i Paxkwa.