Yeremiya A Chumayele Na A Nga Chavi Nchumu

Yehovha a lange Yeremiya leswaku a va muprofeta aYuda. Se a swi ta lava swaku Yeremiya a chumayela vanhu a tlhela a va byela swaku va tshika ku yendla swilo swa ku biha. Kambe Yeremiya a byele Yehovha a ku:

— Yehovha phela mina na ha li jovhem a ni nge swi koti ku vulavula ni xitshungu lexi.

Se Yehovha a byele Yeremiya a ku:

— U nga chavi Yeremiya, ni ta ku byela leswi u faneleke u swi vula, mina ni ta ku pfuna.

Siku lin’wani Yehovha a rhume Yeremiya leswaku a ya hlengeleta vavanuna va lisima va Yuda, a gama a dlaya khuwani phambheni ka vona! Wa swi tiva swaku i yini khuwani? I jaru la ku hambiwa hi vumba. Loko se a li dlayile, a a fanele a va byela leswi:

— Yerusalema a ta humeleliwa hi swa ku fana ni leswi.

Yena a yendle leswo, kambe vavanuna va le Yuda va mu kwatele hintamu. Muprista mun’wani lweyi a vitaniwaka Paxahuri a be Yeremiya a gama a mu boha mavoko ni minenge ka xigodo. Yeremiya a tshame wusiku hinkwalu na a nga swi koti ku timexa. Ka siku leli nga landzela va mu tlhantlhile. Phela yena a a kwate hintamu lakakuza a vula leswaku a a nga ha ta chumayela. Kambe swi lava ku vula swaku Yeremiya a nyimile ku chumayela? Nada. Yena a pimise hi swona a gama a ku:

— Marito ya Yehovha ma fana ni ndzilu ndzeni ka mina, a ni nge swi koti ku tshika ku chumayela.

Hi ku famba ka nkama, ku ve ni hosi ya nyuwani aYuda. Vaprista ni vaprofeta va mavunhwa, a va swi nyenya leswi Yeremiya a a swi chumayela. Se va byele varhangeli va Yuda leswaku va dlaya Yeremiya, kambe Yeremiya a te:

— Loko mi ni dlaya, mi ta va na mi dlaya munhu wa ku kala a nga na nandzu. Hikusa leswi ni swi chumayelaka a swi ti hi ka mina, swi ta hi ka Yehovha.

Nkama lowu varhangeli va Yuda va nga twa leswo va te:

— Wanuna lweyi a nga faneliwi hi ku dlayiwa.

Yeremiya a tame a chumayela. Kambe hi ku famba ka nkama, hambi hi varhangeli va sungule ku mu nyenya Yeremiya. Se vona va kombele hosi swaku yi dlaya Yeremiya. Hosi yi byele varhangeli swaku va yendla leswi va swi lavaka. Varhangeli va lave ku dlaya Yeremiya. Vona va mu khome va mu txukumeta ka xikhele xa ku yenta lexi a xi tale hi madaka. Se Yeremiya a sungule ku mbombomela hi kutsongokutsongo.

Nkama lowu wanuna lweyi a a vitaniwa Ebedimeleki a nga tiva leswi nga yendleka a byele hosi a ku:

— Varhangeli va pete Yeremiya ka xikhele xa madaka, se loko a nga humesiwi lomuyani a ta fa.

Hosi yi rhume Ebedimeleki ni 30 wa vavanuna leswaku va ya humesa Yeremiya ka xikhele xa madaka. Phela hambi leswi Yeremiya a nga kumana ni swikarhatu hinkwaswu leswo, yena a tame a chumayela na a nga chavi nchumu. Se wena ke, wa swi lava ku fana na yena?