Ku Helisiwa Ka Yerusalema

Vanhu va Yuda a va tshamela ku tshika Yehovha va gandzela swikwembu swa mavunhwa. Ku ringana malembe ya manyingi Yehovha a a rhuma vaprofeta swaku va ya va pfuna. Kambe vanhu a va nga na mhaka ni vaprofeta, funtshi a va patsa ni ku va hleka. Se, i mpsini leswi Yehovha a a ta swi yendla leswaku a helisa wugandzeli leliyani la mavunhwa?

Ka nkama lowuyani, Nebukadinazara hosi ya Babilona a a dumela ni ku teka madoropa ya ku hambanahambana. Yena a dumele Yerusalema a teka Hosi Yoyakimi ni varhangeli, masonchwa ni vavanuna va vanyingi va Yuda leswaku va ya Babilona. Nebukadinazara a teke swilo swa lisima leswi a swi li ka tempele ya Yehovha. A gama a yendla Zedekiya a va hosi ya Yuda leswaku a ta pfaleta Yoyakimi.

A ku sunguleni, Zedekiya a a yingisa hosi ya Babilona. Kambe vaprofeta va mavunhwa ni vanhu van’wani va vulavule na Zedekiya leswaku a nga ha yi yingisi hosi ya Babilona. Kambe Yeremiya a mu byele a ku:

— Loko u tshika ku yingisa hosi ya Babilona ku ta yendleka swilo swa ku biha aYuda, a ku nga ta va ni swakudla, vanhu va ta vabya va tlhela va fa.

Loko se ku hundze 8 wa malembe, Zedekiya a lange ku kala a nga ha yingisi hosi ya Babilona. A lange ku pfuniwa hi masonchwa ya Gibita. Se, Nebukadinazara a rhumele masonchwa ya yena leswaku ma ya dumela Yerusalema. Yeremiya a byele Zedekiya a ku:

— Tinyikele ka Vababilona, Yehovha a te loko u yendla leswo wena ni doropa hinkwalu mi ta pona. Kambe, loko u nga swi yendli leswo, Vababilona va ta hisa doropa hinkwalu va tlhela va ku khoma va famba na wena.

Kambe Zedekiya a te:

— Ni ti nyikela, a ni nge swi yendli leswo!

Loko se ku hundze lembe ni hafu Vababilona va nghenile ka doropa la Yerusalema va li hisa. Va hise tempele, va dlaya vanhu va vanyingi, va tlhela va teka vanhu van’wani va famba na vona aBabilona.

Zedekiya a balekile aYerusalema, kambe Vababilona va swi kotile ku mu khoma va mu yisa ka Hosi Nebukadinazara. Se a hosi yi rhumele leswaku va dlaya vana va Zedekiya phambheni ka yena. Loko se a yendle leswo a mu dlaye matihlo Zedekiya a tlhela a mu pfalela a djele. Zedekiya a tshame djele anze a fa. Kambe Yehovha a tshembise vanhu va Yuda a ku:

— Loko ku hundza 70 wa malembe ni ta mi tlhelisela aYerusalema.

Indjhe a wu swi tiva swaku majovhem man’wini lawa a ma rhandza Yehovha na wona ma tekiwile ma ya Babilona? A ku ta humelela yini hi wona? Indjhe a ma ta tama ma tshembeka ka Yehovha?