Yesu A Hanyisa Wanuna Wa Ku Fa Matihlo

Vafarisi a va mu nyenya hintamu Yesu. Hi mhaka leyo minkama hinkwayu a va lavetela tindlela ta ku mu khoma. Se vona va vule leswaku Yesu a a nga fanelanga a hanyisa munhu hi Sabadu. Kambe siku lin’wani hi Sabadu, Yesu a vone wanuna wa ku fa matihlo na a kombela male. Se Yesu a byele vadjondzisiwa va yena swaku a a ta mu hanyisa wanuna lwiyani hi matimba ya Xikwembu. Yesu a game a patsa misava ni marhi, se a chela wanuna lwiyani ka matihlo, a gama a mu byela a ku:

— Famba u ya hlamba ka mati ya Silowama.

Wanuna lweyi a yendle leswi Yesu a nga mu byela swona, a gama a sungula ku vona. Phela a a nga se tshama a vona ka wutomi la yena.

A vanhu a va nga kholwi swaku wanuna lwiyani hi yena lweyi a nga psaliwa na a nga voni. Kambe minkama hinkwayu wanuna lweyi a a va byela swaku hi yena lweyi a a nga voni. A vanhu a va mu vutisa swaku swi yendlekise ku yini swaku a vona. Loko a va tlhamusele leswi swi nga yendlekisa xiswona, va mu tekile va mu yisa ka Vafarisi.

A tlhamusele Vafarisi ndlela leyi a nga hanyisiwa hi yona hi Sabadu. A Nawu wa Xikwembu a wu vula leswaku a ku nga fanelanga ku tirhiwa hi Sabadu, hi mhaka leyo Vafarisi van’wani va te:

— I ntiyiso leswaku Yesu a hanyise munhu hi Sabadu? Swi lava ku vula swaku a hi Xikwembu xi mu nyikaka matimba lawa.

Se Vafarisi va vitane vapsali va wanuna lwiyani, va va vutisa swaku swi kotekise ku yini swaku a vona. Kambe vapsali va yena a va chava hintamu. Vona a va nga swi lavi ku hlongoliwa hi Vafarisi ka ndhawu leyi a ku gandzeliwa ka yona. Hi mhaka leyo va te a va nga swi tivi swaku a swi kotisa ku yini ku vona. Se Vafarisi va tlhele va mu yendla swivutiso wanuna lwiyani. Yena a hlamule a ku:

— Se ni mi byelile ndlela leyi ni nga hanyisiwa hi yona, kambe n’wina a mi kholwi.

Se Vafarisi va kwate hintamu va tlhela va hlongola wanuna lweyi ka ndhawu leyi a ku gandzeliwa ka yona Xikwembu.

Nkama Yesu a nga twa leswi nga yendlekela wanuna lwiyani, a fambe a ya vulavula na yena. A fike a mu vutisa a ku:

— U ni lipfumelo ka Mesiya?

Wanuna lwiyani a vutise a ku:

— I mani Mesiya Hosi ya mina?

Se Yesu a ku:

— Hi mina Mesiya.

Ha tiyiseka swaku nkama wanuna lwiyani a nga twa leswo a sungule ku va ni lipfumelo. Phela Yesu a a li munhu wamunene hintamu. A ngo yo mu hanyisa ntsena wanuna lwiyani, kambe a tlhele a mu pfuna swaku a va ni lipfumelo.