Yesu A Tlhelela Tilweni

Yesu a fambe a ya tlhangana ni vadjondzisiwa va yena aGalileya. Kohala Yesu a nyike vadjondzisiwa va yena ntirho wa lisima hintamu, yena a te:

— Fambani mi ya pfuna vanhu va tindhawu hinkwatu swaku va va vadjondzisiwa va mina. Mi va djondzisa swilo hinkwaswu leswi ni nga mi djondzisa swona mi tlhela mi va tsakamisa. Na mi tshembisa swaku ni ta va na n’wina minkama hinkwayu.

Ka 40 wa masiku, Yesu a humelele ka vadjondzisiwa va yena aGalileya ni Yerusalema. Yena a va djondzise swilo swa lisima hintamu a tlhela a yendla swilo swa ku hlamalisa. Yesu a byele vapostolo va yena a ku:

— Mi nga suki aYerusalema, tamani mi nyimela Xikwembu swaku xi yendla leswi xi nga swi tshembisa.

Vapostolo a va swi twisisanga kahle leswi Yesu a nga swi vula. Yesu a game a tlhangana ni vapostolo va yena ka wugamu ka Ntshava ya Mawolivhera. Se vona va mu vutisile va ku:

— Swi lava ku vula leswaku u ta va Hosi ya Israyele?

Yesu a va tlhamuselile a ku:

— Ka Yehovha a wu se fika nkama wa leswaku ni va Hosi. Kambe ku nga li khale, n’wina mi ta yamukela moya wa ku kwetsima leswaku mi va timboni ta mina, mi fanele mi chumayela aYerusalema, Yudiya, Samariya ni ka tindhawu ta le kule ta misava.

Se Yesu a sungula ku tlhatuka a ya tilweni, se rhefu li mu pfalile. Vadjondzisiwa a va nga ha swi koti ku mu vona. Se vadjondzisiwa va sukile ka Ntshava ya Mawolivhera va ya Yerusalema. Minkama hinkwayu vona a va tlhangana ni ku tlhela va khongela, na va nyimela swaku Yesu a va byela leswi a va fanele va swi yendla.