Karta La Ntlhawa Lowu Rhanghelaka

Vamakwerhu Va Ku Rhandzeka:

Hinkwerhu hi tirhelaka Yehovha hi li rhandza hintamu Bibele. Ha kholwa swaku switoriya leswi ku vulavuliwaka hi swona ka Bibele swi yendlekile hikakunene, naswona leswi li hi djondzisaka swona swa pfuna hikakunene. Leswi nga ka Bibele swi kombisa lirhandzu leli Yehovha a nga na lona hi hina. (Tipisalema 119:105; Luka 1:3; 1 Yohani 4:19) Hi swi lava hintamu ku pfuna vanhu hinkwavu swaku va twisisa ntiyiso lowu nga ka Bibele. Hi mhaka leyo, hi yendle buku leli nge: “Djondza Ka Switoriya Swa Bibele.” Vonanyana leswi li nga tshamisa xiswona.

Buku leli li yendleliwe ngopfungopfu vatsongwani. Kambe, hambi hi vanhu vavakulu lava va navelaka ku tiva switoriya swa Bibele va nga pfuneka hi lona. Phela, hambi hi hina se hi swi tivaka switoriya swoleswo hi nga pfuneka hi buku leli. Bibele li pfuna vanhu hinkwavu naswona leswi li swi vulaka swi nga hi yendla hi tsaka.

Ka Buku leli ku tirhisiwa tindzimana ta Bibele swaku ku kontareliwa switoriya leswi ku vulavuliwaka hi swona ka Bibele. Swi kontareliwa hi ndlela ya ku vevuka ku yi twisisa. Switoriya leswi swi tlhamuseliwa ku sukela nkama ku nga yendliwa misava, naswona minkama ya yinyingi swi kontareliwa hi ku ya hi ku landzelelana ka swona.

Buku leli a lo kontara switoriya swa Bibele ntsena. Kambe tindzimana ta Bibele ni mafoto swi pfuna lweyi a lerhaka leswaku a twisisa kahle leswi a swi yendleka, ku patsa ni leswi vanhu lava ku vulavuliwaka hi vona a va titwisa xiswona.

Buku leli li hi pfuna ku vona swaku Bibele li vulavula hi vanhu lava va nga tshembeka ka Yehovha ni lava va kalaka va nga tshembekanga. Naswona li hi pfuna ku vona leswi hi nga swi djondzaka ka swikombiso swa vona. (Varoma 15:4; 1 Vakorinto 10:6) Li ni 14 wa swiyenge, naswona swiyenge hinkwaswu swi sungula hi rezumu la leswi nga ta djondziwa ka xiyenge xolexo.

Loko u li papayi kumbe mamani, lerhela n’wana wa wena switoriya ka buku leli. Bula na yena hi mafoto lama kombisiwaka, leswaku a twisisa ku yelana ka mafoto ni xitoriya. U nga ha lerha tindzimana ta Bibele leti kumekaka magamu ka xitoriya, mi gama mi bula hi tona. Leswo u nga ha swi tirhisa hambiloko u pfuna munhu lweyi se a nga kula leswaku a tiva switoriya swa Bibele.

Hi navela swaku buku leli li pfuna vatsongwani ni vanhu vavakulu leswaku va swi twisisa kahle leswi Bibele li swi djondzisaka. Loko hi tirhisa leswi swi nga ka buku leli, swi ta hi pfuna swaku hi tsakisa mbilu ya Yehovha hi tlhela hi lumba ndjangu wa yena lowu a wu rhandzaka hintamu.