Maio

Vakreste va nkama lowuyani va khumbekile nkama lowu a ku ni ndlala “ya yikulu amisaveni hinkwayu.” A hi kanakani swaku tinhloko ta mindjangu ti karhatekile hintamu hi swaku a ti ta swi kuma kwini swakudla swa ku nyika mindjangu ya tona. Pimisa hi ndlela leyi majovhem lawa a ma lava ku yengesela ntirho wa wona wa ku chumayela ma nga karhateka hi yona, swi nga yendleka ma pimise ni ku txintxa maplanu. Hambileswi swiyimu a swi hambanile ka mun’wani ni mun’wani, va titwananise ni xiyimu. Va tame va chumayela hilani va nga kota hi kona. Va tlhele va tsaka hi ku yavelana swilo leswi a va li na swona ni vamakwerhu va le Yudiya. (Min. 11:29, 30) Vakreste lava nga pfuniwa hi ku nyikiwa swakudla ni swilo swin’wani leswi a va swi lava va swi vonile swaku Yehovha a a nga va tshikanga. (Mat. 6:31-33) Ha tshemba swaku va ve vanghanu vavakulu va vamakwerhu lava va nga va pfuna. Naswona Vakreste lava nga nyikela hi male ya vona swaku va pfuna vamakwerhu lavayani, va tsake hintamu hi ku tiva swaku va va pfunile hintamu. — Min. 20:35. Murindzi 04/23 paj. 16 mapar. 12-13

Minkama yin’wani Yehovha a nga hlamula swikhongelo swa hina hi ku yendla swaku vanhu lava va kalaka va nga mu gandzeli va hi pfuna. Hi xikombiso, Yehovha a yendle swaku Hosi Artaxexe a pfumelela Nehemiya swaku a tlhela a ya Yerusalema a ya pfuxeta mimuru ya doropa. (Neh. 2:3-6) Ni namuntlha Yehovha a nga yendla swaku vanhu lava va kalaka va nga mu gandzeli va pfuna malandza va yena. Yehovha a nga toloveli ku hlamula swikhongelo swa hina hi ndlela ya ku hlamalisa, kambe a hlamula swikhongelo swa hina hi ndlela leyi nga ta hi pfuna ku tama hi tshembeka ka yena. Hi mhaka leyo hi fanele hi pfula matihlo, hi vona ndlela leyi Yehovha a swi hlamulaka hi yona swikhongelo. Swi kahle kuva nkama ni nkama hi nyima hi pimisa hi ndlela leyi Yehovha a swi hlamulaka hi yona swikhongelo swa hina. (Ps. 66:19, 20) A hi kombisi lipfumelo hi ku khongela ka Yehovha ntsena, kambe ni ku yamukela nhlamulu ya swikhongelo swa hina ku nga na mhaka swaku hi swona leswi a hi swi nyimelile kumbe a hi swona. — Heb. 11:6. Murindzi 05/23 paj. 12 mapar. 13, 15; paj. 13 par. 16

Nkama hi nga tinyiketela ka Yehovha hi tshembise swaku hi ta mu tirhela hi tlhela hi yendla ku rhandza ka yena. Swi lava hi xi hetisisa xitshembiso lexi. Phela ku hetisisa xitshembiso xa hina xa ku tirhela Yehovha a swi karhati hikusa Yehovha a hi yendle leswaku hi yendla ku rhandza ka yena. (Nhl. 4:11) Yena a hi yendle na hi navela ku mu tirhela naswona a hi yendle hi xifaniso xa yena. Hi mhaka leyo, hi nga swi kota ku va vanghanu va yena hi tlhela hi tsaka hi ku yendla ku rhandza ka yena. Handle ka leswo, loko hi yendla ku rhandza ka Xikwembu hi tlhela hi landzela N’wana wa xona hi ta pepisiwa. (Mat. 11:28-30) Se, tama u kulisa lirhandzu la wena hi Yehovha, hi ku pimisa hi swilo hinkwaswu swaswinene leswi Yehovha a ku yendlelaka swona ni minkateko leyi a nga ta ku nyika ka nkama lowu taka. Loko lirhandzu la wena hi Xikwembu li ya li kula, swi ta ya swi ku vevukela ku xi yingisa. (1 Yo. 5:3) Yesu a swi kotile ku yendla ku rhandza ka Xikwembu hikusa a a khongela ka xona a kombela ku pfuniwa a tlhela a pimisa hi minkateko leyi a a ta nyikiwa yona. (Heb. 5:7; 12:2) Ku fana na Yesu, khongela ka Yehovha u kombela swaku a ku tiyisa u tlhela u tshamela ku pimisa hi xitshembiso xa wutomi la ku kala li nga heli. Murindzi 08/23 mapaj. 27-28 mapar. 4-5

Swa tsakisa ku hanya ni vanhu va ku lehisa mbilu. Phela ha va hlonipha vanhu va ku tshamisa xileswo lava hambiloko nchumu lexi va xi nyimelaka xi hlwela, va kalaka va nga hantliseli ku kwata. Funtshi swa hi tsakisa ku hanyisana ni vanhu lava va hi lehiselaka mbilu hambiloko minkama yin’wani hi pfana hi phazama. Phela hambi hi lava va nga hi djondzisa Bibele, swi lave swaku va hi lehisela mbilu naswona ha va tlangela hi ku va va yendle leswo loko minkama yin’wani hi nga swi twisisi leswi a va hi djondzisa swona, kumbe swi hi karhatela ku pfumela kumbe ku swi tirhisa ka wutomi la hina. Xa lisima ku tlula hinkwaswu, ha mu tlangela Yehovha hileswi a hi lehiselaka mbilu. Ha va rhandza vanhu va ku lehisa mbilu, kambe swi nga ha hi karhatela ku lehisa mbilu. Hi xikombiso, swi nga ha hi karhatela ku lehisa mbilu loko hi li ka engarafamentu, ngopfungopfu loko hi xwelile lomu hi yaka kona. Naswona swi nga ha hi karhatela ku lehisa mbilu loko munhu a hi kwatisa. Naswona minkama yin’wani, ku nyimela swaku xitshembiso xa Yehovha xa misava ya nyuwani xi yendleka, swi nga ha yendleka swi nga vevuki. Kambe ka swiyimu leswi hinkwaswu hi fanele hi lehisa mbilu. Murindzi 08/23 paj. 20 mapar. 1-2

Nkama lowu Yehovha a nga rhuma Gidiyoni swaku a tlhelisa masonchwa ya manyingi kaya, Gidiyoni a nga ha va a pimise leswi: ‘Indjhe swi ta pasa? Indjhe leswi hi tlhelisaka masonchwa kaya hi ta swi kota ku hlula?’ Hambiloko ku li leswaku a pimisile leswo, Gidiyoni a yingisile leswi a nga byeliwa swona. Namuntlha madoda ma tekelela xikombiso xa Gidiyoni hi ku longoloka ni nhlengeletanu loko ku ni leswi swi faneleke swi txintxiwa. (Heb. 13:17) Gidiyoni a yingise Yehovha hambiloko a pfana a chavanyana kumbe a swi vona swaku wutomi la yena li le nghozini. (Vay. 9:17) Nkama lowu Yehovha a nga mu tiyisa, Gidiyoni a swi vonile swaku impela Yena a a ta mu pfuna swaku a vhikela vanhu va yena. Madoda lawa ma hanyaka ka tindhawu leti ntirho wa hina wu tsimbisiwaka, na wona ma xi tekelela xikombiso xa Gidiyoni. A ma chavi ku rhangela ka nhlengeletanu ya Yehovha, ma lunghiselela mintlhanganu ni ntirho wa ku chumayela, hambiloko ku yendla leswo swi ta ma veka ka nghozi ya ku ma petiwa djele, ma thethisiwa, ma heleliwa hi ntirho kumbe ma hluphiwa. Phela ka nhlomulu wawukulu swi ta lava madoda ma nga chavi ku yingisa nkongomiso lowu Yehovha a nga ta hi nyika wona, hambiloko leswo swi tshuka swi va veka nghozini. Murindzi 06/23 mapaj. 5-6 mapar. 12-13

Yehovha a tsale rungula la Yoyada ka Bibele leswaku hi djondza ka lona. (Rom. 15:4) Funtshi nkama Yoyada a nga fa, a lahliwe ‘ka doropa la Davhida, lomu a ku lahliwa kona tihosi hikusa a yendle minchumu yayinene aIsrayele hi mhaka leswi a a hlonipha Xikwembu xa ntiyiso ni yindlo ya xona.’ (2 Tik. 24:15, 16) Xikombiso xa Yoyada xi nga hi pfuna kuva hi tama hi mu chava Yehovha. Madoda ma nga tekelela Yoyada hi kuva minkama hinkwayu ma lavetela tindlela ta ku vhikela bandla. (Min. 20:28) Lava se va nga guga, va nga tekelela xikombiso xa Yoyada hi ku tama va hlonipha Yehovha va tlhela va tshembeka, na va tiyiseka swaku Yehovha a nga va tirhisa swaku a yendla ku rhandza ka yena. Majovhem ma nga djondza ka leswi Yehovha a nga mu khomisa xiswona Yoyada, hi ku tama ma hlonipha vamakwerhu lava va nga guga, ngopfungopfu lava se va nga ni malembe ya manyingi na va tirhela Yehovha. (Swiv. 16:31) Naswona hinkwerhu hi fanele hi seketela “lava rhangelaka” hi tlhela hi va yingisa minkama hinkwayu. — Heb. 13:17. Murindzi 06/23 paj. 17 mapar. 14-15

Pimisa hi makhambi lawa u lavaka ku hlamula mintlhanganwini. Loko u tshamela ku tlakusa voko nkama ni nkama swi nga yendla swaku lweyi a fambisaka djondzo kumbe xiyenge a boheka ku vitana wena hambiloko ku ni lava va kalaka va nge se hlamula. Se leswo swi nga yendla swaku van’wanyani va godola ku tlakusa mavoko swaku va hlamula. (Ekl. 3:7) Loko ku li ni vamakwerhu va vanyingi lava va tlakusaka mavoko ka djondzo yoleyo, swi nga ha yendleka lweyi a fambisaka djondzo a nga hi langi swaku hi hlamula makhambi lawa a hi ma navela kumbe hambi hi ku hi langa swi nga koteki swaku a hi langa. Leswo minkama yin’wani swi nga ha hi godolisa kambe a hi fanelanga hi sungula ku vaviseka hi mhaka ya swona kumbe hi veketela xiviti hileswi hi kalaka hi nga langiwanga swaku hi hlamula. (Ekl. 7:9) Loko ku li swaku a wu kombetiwanga swaku u hlamula hilani a wu tsakela hi kona, swi ngo yini u yingisela tinhlamulu ta vamakwerhu van’wani u gama u va khensa hi swoleswo. Swi nga yendleka vamakwerhu va ta tiyisiwa hintamu hi leswi u nga va khensa ku fana ni loko a wu nyikele nhlamulu. Murindzi 04/23 mapaj. 23-24 mapar. 14-16

Djondza Bibele u tlhela u pimisa hi leswi u swi djondzaka. Ku fana ni leswi nsinya wu tiyaka loko timintsu ta wona ti ya ti yenta, na hina loko hi djondza Rito la Xikwembu a lipfumelo la hina li ta ya li tiya. Se leswo swi ta yendla swaku hi nyima hi tiyile, hi seketela Yehovha minkama hinkwayu. Phela loko hi djondza hi tlhela hi pimisa hi leswi hi swi djondzaka ka Bibele, hi ta ya hi tiyiseka swaku leswi Yehovha a swi kombelaka ka hina i swinene naswona swi ta hi pfuna. (Kol. 2:6, 7) Hi mhaka leyo, pimisa hi minkongomiso ya Yehovha ni leswi yi nga va pfunisa xiswona vanhu va khale lava va nga yi landzela. Hi xikombiso, ka khambi lin’wani, Yehovha a yendle leswaku Ezekiyele a vona ntsumi leyi a yi pima tempele. A nkama Yehovha a a mu tlhamusela hinkwaswu leswi, Ezekiyele a a yingiselisisa kahle a tlhela a txuvukisisa kahle. Leswo swi mu pfunile hintamu swinene naswona swi nga hi pfuna ku vona swaku i mpsini leswi hi nga swi yendlaka swaku hi nyimelela minawu ya Yehovha hi tlhela hi mu gandzela hi ndlela ya kona. (Eze. 40:1-4; 43:10-12) Xin’wani hi nga xi yendlaka, i ku djondza swilo swa ku yenta swa Rito la Xikwembu ni ku tlhela hi pimisa hi swona. Na hina hi nga nyima hi tiyile hi tshemba Yehovha hi ku helela. — Ps. 112:7. Murindzi 07/23 paj. 18 mapar. 15-16

A Bibele li ni swikombiso swa swinyingi leswi majovhem ma nga swi tekelelaka. Swikombiso swoleswo i swa vavanuna lava a va mu rhandza Yehovha naswona va nga swi kota ku yendla mintirho leyi a va li na yona leswaku va hlayisa vanhu va yena. Se, na wona majovhem ma nga swi kuma swikombiso swaswinene amabandleni ya wona hambi hi kaya ka wona. (Heb. 13:7) Naswona ma nga ha tlhela ma tekelela xikombiso xa ku hetiseka xa Yesu Kreste. (1 Pe. 2:21) Nkama u djondzaka hi swikombiso swoleswo, pimisa hi wumunhu lalinene leli vavanuna volavo a va li na lona. (Heb. 12:1, 2) Loko se u djondze hi swona, zama ku swi tekelela. Wanuna lweyi a swi kotaka ku pimisa kahle, a rhanga hi ku swi kambela kahle swilo leswi a lavaka ku swi yendla. Se loko u li jovhem, lwela ku va u pimisa kahle na u nge se yendla swilo. U fanele u sungula hi ku djondza Bibele u tlhela u pimisa hileswaku hi mhaka muni leswi swi nga tsaliwa ka Bibele swi li swinene ka wena. Se loko u yendle leswo, lwela ku va u tirhisa hinkwaswu leswi swi nga ka Bibele leswaku u yendla swiboho leswi swi nga ta tsakisa Yehovha. (Ps. 119:9) Phela loko u yendla leswo u ta swi kota ku va Mukreste wa ku wupfa. — Swiv. 2:11, 12; Heb. 5:14. Murindzi 12/23 mapaj. 24-25 mapar. 4-5

A vapsali va fanele va pfuna vana va vona kuva va kota ku hlamula hi ndlela ya ku rhula loko vanhu va va vutisa leswi va kholwaka ka swona. (Yak. 3:13) Se vapsali van’wani leswaku va yendla leswo, va hamba matrenu ka wugandzeli la ndjangu. Va djondza hi timhaka leti djondzisiwaka kumbe ku buliwaka hi tona xikolweni. Va tlhela va trenara swaku a va ta hlamulisa ku yini ka wugandzeli la vona la ndjangu. Leswo swi pfuna vana kuva va swi vona swaku va nga hlamulisa ku yini hi ndlela ya ku rhula ni ku yendla swaku vanhu van’wani va tsakela ku djondza swin’wani hi Bibele. Akuva majovhem ma trenara swaku ma nga va hlamulisa ku yini vanhu van’wanyani swi nga ma pfuna swaku ma kholwa ma tlhela ma tiyiseka swaku leswi ma swi djondzaka ka Bibele i ntiyiso. Hi xikombiso, ka site la hina ku ni xiyenge lexi nge “Vampsha Va Vutisa”; ka ndhawu leyi ku ni tinhlokomhaka leti nga ni makwadru lawa ma nga pfunaka majovhem ya hina. Makwadru lawa ma yendleliwa ku pfuna majovhem leswaku ma tiyiseka hi leswi ma kholwaka ka swona ma tlhela ma ma pfuna ku lunghekela ku hlamula swivutiso swa vanhu van’wanyani kambe hi marito ya wona vinyi. Se loko mindjangu yi tinyika nkama wa kuva yi djondza hi tinhlokomhaka ta ku fana ni leti na yi li xikan’we, swi nga pfuna swaku va nyimelela lipfumelo la vona hi ndlela ya ku rhula ni leyi tsakisaka lava va yingisaka. Murindzi 09/23 paj. 17 par. 10; mapaj. 18-19 mapar. 15-16

Swi nga yendleka se u li na swona swilo leswi u lavaka ku swi yendla ka ntirho wa Yehovha, kambe ku nga va swaku swa ku karhatela ku swi fikelela swilo swoleswo? Loko leswo swi ku yendlekela, a wu wexe. Hi xikombiso, Philip a a lava ku yampsisa swikhongelo swa yena ni ku tlhela a khongela makhambi ya manyingi, kambe a swi mu karhatela ku tinyika nkama wa ku yendla swoleswo. Erika a a lava ku hantla a fika ka ntlhanganu wa ntirho wa nsimu, kambe a a tshamela ku xwela. Loko ku li swaku u yendla minzamu ya ku fikelela nchumu wa ku karhi lowu u nga tivekisela swaku u wu yendla kambe u nga swi koti, u nga pimisi swaku a wu wa nchumu. Phela swi lava nkama ni minzamu leswaku u fikelela nchumu lexi u nga tivekisela xona hambiloko swi tikomba ingi a xi karhati. Naswona kuva u yendla minzamu ya leswaku u fikelela leswi u swi lavaka swi kombisa leswaku u li nyika lisima wunghanu leli u nga na lona na Yehovha, naswona u lava ku yendla hinkwaswu leswi u nga swi kotaka leswaku u mu tsakisa. Se tiva leswaku Yehovha na yena a yi nyika lisima minzamu leyi u yi yendlaka, naswona a nga nyimeli leswaku u yendla swilo leswi a swi tivaka swaku a wu nge swi koti. (Ps. 103:14; Mik. 6:8) Se nkama lowu u tivekiselaka nchumu wa ku karhi lowu u lavaka ku wu fikelela, u nga langi nchumu lexi u swi tivaka swaku a wu nga ta swi kota ku xi fikelela. Murindzi 05/23 paj. 26 mapar. 1-2

Vanhu lava kalaka va nga chavi nchumu minkama yin’wani va nga ha chava, kambe a va pfumeleli nchumu xi va pfalela ku yendla swaswinene. Daniyele a a li jovhem la ku kala li nga chavi nchumu. Yena a djondze wuprofeta la linyingi ku patsa ni wuprofeta la Yeremiya. Ka djondzo yoleyo, Daniyele a kote ku twisisa swaku a wukarawa la Vayuda aBabilona a li li kusuhi ni ku hela. (Dan. 9:2) Ha tiyiseka swaku ku va Daniyele a vone ku hetiseka ka wuprofeta la Bibele swi yendle swaku a ya a mu tshemba hintamu Yehovha. Se leswo swi yendle swaku a nga chavi nchumu hikusa lava tshembaka Yehovha a va chavi nchumu. (Vona Varoma 8:32, 37-39.) Xa lisima hintamu, Daniyele a a khongela hintamu ka Papayi wa yena wa le matilweni. (Dan. 6:10) Yena a tlhele a mu byela hi swihoxo swa yena, leswi a a titwisa xiswona ni ku tlhela a mu kombela swaku a mu pfuna. (Dan. 9:4, 5, 19) Ku fana na hina, a nga psaliwanga na a li munhu wa ku kala a nga chavi. Kambe ku va a djondza, a khongela ni ku tshemba Yehovha swi mu pfunile kuva a nga chavi nchumu. Murindzi 08/23 paj. 3 par. 4; paj. 4 par. 7

I swinene ku yingisa mimfumu hikusa leswo swi pfuna hina swi tlhela swi pfuna ni vanhu van’wani. Hi mhaka muni hi vula leswo? Xin’wani hi leswaku loko hi yingisa lava va fumaka a hi nga ta khatisiwa ku fana ni lava va khatisiwaka hi ku kala va nga swi lavi ku yingisa minawu ya mfumu. (Rom. 13:1, 4) Funtshi loko hi yingisa lava va fumaka swi nga yendla swaku mimfumu yi vona Timboni ta Yehovha hinkwatu na ti li vanhu vavanene. Hi xikombiso, ka malembe lawa ma nga hundza aNigéria, a masonchwa ma nghene ka Yindlo ya Wugandzeli na ku famba mintlhanganu na ma lavetela vanhu lava a va nga pfumeli ku hakela rhesa. Kambe a xefi ya masonchwa wolawo yi byele masonchwa lawayani swaku ma huma ka Yindlo ya Wugandzeli yi tlhela yi ku: “A Timboni ta Yehovha minkama hinkwayu ta hakela rhesa.” Se, minkama hinkwayu loko u yingisa minawu ya mfumu swi ta yendla leswaku a Timboni ta Yehovha ti voniwa hi ndlela yayinene naswona swi nga ha yendla swaku ka nkama lowu taka swi vhikela vamakwerhu va hina. Murindzi 10/23 paj. 9 par. 13

Vanhu va Yehovha se i khale na va nyimelile swaku misava leyi yi helisiwa. Hi mavonelo ya munhu, hi nga ha pimisa swaku switshembiso swa Xikwembu swa hlwela swaku swi hetiseka, kambe Yehovha wa swi tiva leswi vanhu va yena va titwisaka xiswona. A tshame a vula leswi ka muprofeta Habakuku: “Hikusa xivono xa ha li xa nkama lowu nga vekiwa, naswona xi hantlisela a ku hetisekeni, a xi nge hembi. Hambiloko xo hlwela, tshama na u xi nyimelile!Hikusa xi ta hetiseka, a xi nge te hlwela!” (Hab. 2:3) Ku nga va swaku marito lawa Yehovha a nga ma byela Habakuku ma yo tiyisa yena ntsena, kumbe ma tirha ni le ka hina namuntlha? Mupostolo Pawulo na yena a ma tirhisile marito lawa ka Vakreste lava a va nyimela misava ya nyuwani. (Heb. 10:37) Se hambiloko ho vona ingi xitshembiso xa Xikwembu xa hlwela ku hetiseka, “xi ta hetiseka, a xi nge te hlwela!” Murindzi 04/23 paj. 30 par. 16

Vayisrayele va vanyingi a va mu yingisanga Yehovha, hambileswi a swi tikomba swaku i Yehovha lweyi a a va kongomisa hi ku tirhisa Moxe. (Tin. 14:10, 11) Hi ku phindhaphindha va yale ku yingisa leswi Moxe a a va byela swona. Hi mhaka leyo, Vayisrayele lavayani a va nghenanga ka Tiko la Xitshembiso. (Tin. 14:30) Kambe ku ve ni Vayisrayele van’wani lava va nga landza nkongomiso wa Yehovha. Hi xikombiso, Yehovha a te: ‘Kalebe . . . a ni yingise hi mbilu hinkwayu.’ (Tin. 14:24) Naswona Yehovha a mu katekisile Kalebe hi ku mu tshika a langa ndhawu leyi yena a a lava ku tshama ka yona ka Tiko la Xitshembiso. (Yox. 14:12-14) Phela Vayisrayele lava va nga swi kota ku nghena ka Tiko la Xitshembiso na vona va yendle swilo swaswinene hi ku yingisa nkongomiso wa Yehovha. A buku la Yoxuwa 4:14 li kombisa swaku Yoxuwa a hloniphiwile nkama hinkwawu lowu a nga rhangela tiko la Israyele, loko Moxe se a file. Hi mhaka leyo Yehovha a va katekisile Vayisrayele hi ku va nyika hinkwaswu leswi a a va tshembise swona. — Yox. 21:43, 44. Murindzi 02/24 paj. 21 mapar. 6-7

Ku fana ni leswi dotori a nga vonaka leswi mbilu yi tirhisaka xiswona hi ku kamba voko la hina, na hina hi nga vona ndlela leyi lirhandzu la hina hi Yehovha li nga likulu hi yona hi ku vona ndlela leyi hi va rhandzisaka xiswona vamakwerhu. Loko hi vona swaku a hi va rhandzi kahle vamakwerhu, swi nga kombisa swaku na Yehovha a hi mu rhandzi kahle. Kambe loko minkama hinkwayu hi va komba lirhandzu vamakwerhu, lexi xi ta va xikombiso xa leswaku hi mu rhandza hintamu Yehovha. Loko hi vona swaku a hi va rhandzi kahle vamakwerhu hi fanele hi karhateka, hikusa leswo swi lava ku vula swaku a wunghanu la hina na Yehovha a li tiyanga. Naswona mupostolo Yohani a swi kombisile leswo nkama a nga hi khumbukisa swaku “lweyi a kalaka a nga mu rhandzi makwavu lweyi a mu vonaka, a nge swi koti ku rhandza Xikwembu lexi a kalaka a nga se tshama a xi vona.” (1 Yo. 4:20) Hi djondza yini ka mhaka leyo? Hi djondza swaku Yehovha a to hi rhandza ntsena loko hi rhandzana. — 1 Yo. 4:7-9, 11. Murindzi 11/23 paj. 8 par. 3; paj. 9 mapar. 5-6

Nkama lowu na a ha li mutsongo, Yehowaxi a yendle swiboho swaswinene. Yena a wundliwe hi Yoyada lweyi a a li Muprista Wamukulu wa ku tshembeka. Naswona Yoyada a mu wundle ku fana ni n’wana wa yena. Yena a yingise leswi Yoyada a a mu djondzisa swona. Se hi mhaka leyo, a yendle xiboho xa ku tirhela Yehovha, a tlhela a pfuna tiko swaku na lona li tirhela Yehovha. Funtshi a tlhele a pfuxeta tempele ya Yehovha. (2 Tik. 24:1, 2, 4, 13, 14) Loko ku li swaku ku ni munhu lweyi a ku djondzisaka Bibele, kumbe loko vapsali va wena va ku djondzisa minawu ya Bibele tsaka hi swona. Phela lowo i nkateko wawukulu hintamu swinene. (Swiv. 2:1, 10-12) Funtshi minkama yin’wani vapsali va wena va nga ha ku djondzisa hi tindlela tin’wani. Vapsali va wena va ta tsaka hintamu loko u hanya hi minawu ya Bibele leyi va ku nyikaka yona. Kambe xa lisima hintamu ku tlula leswo, hi leswaku Yehovha a ta tsaka hintamu loko u mu yingisa, funtshi wunghanu la n’wina li ta ya li tiya hintamu. (Swiv. 22:6; 23:15, 24) Leswo i swivangelo swaswinene leswi swi faneleke swi ku yendla u navela ku tekelela xikombiso lexi Yehowaxi a nga hi vekela xona nkama na a ha li jovhem. Murindzi 09/23 mapaj. 8-9 mapar. 3-5

Yehovha a tshembisa ku yingisa swikhongelo swa hina. Yehovha wa va rhandza vanhu va yena va ku tshembeka naswona a tinyimisele ku yingisa swikhongelo swa vona. (Ps. 10:17; 37:28) Hambileswo, leswi a swi lavi ku vula leswaku Yehovha a ta hlamula xin’wani ni xin’wani lexi hi mu kombelaka xona. Minkama yin’wani swi ta lava hi nyimela misava ya nyuwani swaku Yehovha a hi nyika leswi hi swi lavaka. Na a nge se hlamula swikhongelo swa hina, Yehovha a rhanga hi ku vona swaku swa fambelana ni xikongomelo xa yena. (Esa. 55:8, 9) Xikongomelo xa Yehovha i ku va vanhu lani misaveni va hanya na va tsakile va tlhela va twanana na va fumiwa hi Mfumu wa yena. Kambe Sathana a vula swaku a vanhu swi ta va fambela kahle loko va tifuma hi xivona. (Gen. 3:1-5) Leswaku Yehovha a kombisa swaku Sathana o hemba, a pfumelele swaku vanhu va fuma vanhu van’wani. Leswo swi yendla swaku ku va ni swikarhatu swa swinyingi lani misaveni swoswi. (Ekl. 8:9) Leswo swi hi yendla hi twisisa swaku Yehovha a nge ngheneleli ka swikarhatu hinkwaswu leswi hi kumanaka na swona swoswi. Murindzi 11/23 paj. 21 mapar. 4-5

Yehovha a tshembise Abrahamu swaku matiko ya manyingi a ma ta katekisiwa hi yena. Phela malembe a ma ya ma hundza, yena se a a ni 100 wa malembe, nsati wa yena a a ni 90, kambe ni ku va ni n’wana a va nga na n’wana. Hi ku ya hi mavonelo ya vanhu, leswiyani a a tshembisiwe swona a swi tikomba ingaku swi nga ta za swi yendlekile. Kambe Bibele li vula swaku: “Hi mhaka ya lipfumelo Abrahamu a kholwile swaku a ta va papayi wa matiko ya manyingi.” (Rom. 4:18, 19) Hi wugamu leswi a nga tshembisiwa swona swi game swi yendleka. Abrahamu a ve ni n’wana lweyi a nga mu chula Izaki. (Rom. 4:20-22) Hilani hi nga swi vona hi kona swi nga koteka swaku hi voniwa na hi li va ku lulama hi Yehovha, ku fana na Abrahamu. Ku vula ntiyiso Pawulo a vulavule hintamu hi leswi, loko a te: “Marito lama nge: ‘A voniwe na a lulamile’ a ma nga tsaleliwanga yena [Abrahamu] ntsena, kambe ma tsaleliwe na hina hi nga ta voniwa na hi lulamile hi mhaka ya leswi hi pfumelaka ka Lweyi a nga pfuxa Hosi ya hina Yesu.” (Rom. 4:23, 24) Se, ku fana na Abrahamu, na hina swi lava hi va ni lipfumelo, mintirho ni ntshembo. Murindzi 12/23 paj. 7 mapar. 16-17

Loko ku ni nchumu lexi ku yendlaka u chava, khumbuka swaku Yehovha wa swi vona leswi ku karhataka ni swaku wa swi twisisa leswi u titwisaka xiswona. Hi xikombiso, nkama lowu Yehovha a nga vona swaku Vayisrayele va hluphiwa hintamu aGibita, a vavisekile. (Eks. 3:7) Minkama yin’wani loko hi kumana ni xikarhatu xaxikulu hintamu, swi nga hi karhatela ku vona swaku Yehovha wa hi pfuna. I mpsini leswi hi nga swi yendlaka? Hi nga khongela hi kombela Yehovha swaku a hi pfuna hi vona voko la yena ka xikarhatu lexi hi kumanaka na xona. (2 Tih. 6:15-17) Xin’wani lexi hi nga xi yendlaka i ku va hi pimisa hi mintlhanganu leyi hi nga na yona, tinhlamulu leti vamakwerhu va ti nyikelaka, mabuku lawa hi nga na wona, mavhidiyo kumbe tinsimu ta broadcasting leti hi nga na tona. Loko hi nyima hi pimisa hi swilo leswi, hi ta swi vona swaku Yehovha wa swi tirhisa swaku a hi tiyisa. (Esa. 65:13; Mar. 10:29, 30) Funtshi swilo leswi swi kombisa swaku Yehovha a ni mhaka na hina. (Esa. 49:14-16) Leswo swi tlhela swi kombisa swaku hi nga mu tshemba ka xikarhatu xin’wani ni xin’wani lexi hi kumanaka na xona. Murindzi 01/24 mapaj. 4-5 mapar. 9-10

Na ka ha sale katsongo swaku Yesu a tlhela a ya tilweni, a khumbukise vadjondzisiwa va yena swaku a va fanele va chumayela hi yena “aYerusalema ni le tikweni hinkwalu la Yudiya ni Samariya, ku ya fika ni le ka magamu ya misava.” (Min. 1:8; Luk. 24:46-48) Hi ku famba ka nkama varhangeli va wukhongeli la Xiyuda va pfalele mupostolo Pedru na Yohani va tlhela va va yisa Tribunali. Loko va fikile Tribunali va fike va va tsimbisa ku chumayela va tlhela va va chavisela. (Min. 4:18, 21) Pedru na Yohani, va te: “Loko mi pimisa swaku Xikwembu xi swi vona swi lulamile swaku hi yingisa n’wina ku tlula ku yingisa xona, swi li n’wina leswo. Kambe hina a hi nge tshiki ku vulavula hi leswi hi nga swi vona ni leswi hi nga swi twa.” (Min. 4:19, 20) Nkama Pedru na Yohani va nga chunsiwa, vadjondzisiwa va Yesu va khongelile ka Yehovha va kombela swaku a va pfuna ku tama va yendla ku rhandza ka yena. Naswona Yehovha a xi hlamulile xikhongelo xolexo. — Min. 4:31. Murindzi 05/23 paj. 5 mapar. 11-12

Yehovha na Yesu se va hete malembe ya manyingi hintamu na va hanya xikan’we naswona va rhandzana hintamu swinene. Phela a wunghanu leli va nga na lona hi lona la khale hintamu swinene. Funtshi Yehovha a swi kombise hi ku helela leswi a mu rhandzisaka xiswona N’wana wa yena ka ndzimana ya hina ya namuntlha. Phela ka ndzimana leyi, loko Yehovha a a swi lavile a a ta vula leswi: ‘Lweyi hi lweyi ni mu yamukelaka.’ Kambe ku hambana ni leswo, Yehovha a a lava swaku hinkwerhu hi swi tiva swaku a mu rhandza hintamu N’wana wa yena. Hi mhaka leyo, Yehovha a te: “Lweyi i N’wananga, lweyi ni mu rhandzaka.” Phela Yehovha a a tsaka hintamu hi Yesu, ngopfungopfu hileswi a a ta nyikela hi wutomi la yena. (Efe. 1:7) Naswona Yesu a a nga kanakani swaku Yehovha Papayi wa yena wa mu rhandza. Funtshi a vule hi ku phindhaphindha na a tiyiseka leswaku Papayi wa yena wa mu rhandza. — Yoh. 3:35; 10:17; 17:24. Murindzi 01/24 paj. 28 par. 8

Pimisa hi leswi: A hi nge munhu lweyi u mu rhandzaka hintamu a vulavula swilo swa ku biha hi wena. Hambileswi wena u swi tivaka swaku swilo leswi a nga swi vula i mavunhwa, vanhu lava a nga famba a va byeletela mavunhwa wolawo va ma kholwa. Xa ku biha hintamu hi leswaku vanhu volavo na vona va ma hangalasa va ma byela vanhu van’wani lava na vona va ma kholwaka. A wu ta titwisa ku yini loko leswo a swo ku yendlekela? Phela leswo a swi ta ku vavisa hintamu. Xikombiso lexi xi hi pfuna ku twisisa leswi Yehovha a nga titwisa xiswona nkama vito la yena li nga chimisiwa. Mun’we wa vana va yena va le tilweni a vulavule swilo swa ku biha hi Yena ka wansati wa ku sungula ku nga Evha, naswona Evha a ma kholwile mavunhwa wolawo. Hi mhaka ya leswo, yena na Adamu va tshike ku yingisa Yehovha, leswi nga yendla swaku ku nghena xidjoho amisaveni, se namuntlha hi fa hi mhaka ya swoleswo. (Gen. 3:1-6; Rom. 5:12) Hinkwaswu swikarhatu leswi hi swi vonaka amisaveni namuntlha swa ku fana ni lifu, tinyimpi ni ku hlupheka swi kona hi mhaka ya mavunhwa lawa Sathana a nga ma vula. Se Yehovha a titwisa ku yini loko a vona swikarhatu hinkwaswu leswi nga kona namuntlha hi mhaka ya mavunhwa wolawo? I ntiyiso swaku swa mu vavisa, hambileswo a nga tshami na a kwatile. Bibele li vula swaku yena i “Xikwembu lexi nga tsaka”. — 1 Tm. 1:11. Murindzi 02/24 paj. 8 mapar. 1-2

Hi nga mu tekelelisa ku yini Yosefa? Xin’wani hi nga xi yendlaka swaku hi tekelela Yosefa i ku va hi pimisa hi leswi hi nga swi yendlaka na ndzingo wu nge se fika. Hi fanele hi djondza ku hantla hi yala loko hi ringeka ku yendla swilo leswi Yehovha a swi nyenyaka hi tlhela hi nga tami hi pimisa hi swona. (Ps. 97:10; 119:165) Loko hi yendla leswo swi ta hi vevukela ku kala hi nga yendli xidjoho. Swi nga yendleka u tiyiseka swaku lowu i ntiyiso u tlhela u swi lava ku tirhela Yehovha hi mbilu ya wena hinkwayu, kambe ka ha ni nchumu lexi ku sivelaka swaku u tinyiketela u tlhela u tsakamisiwa. Se loko ku li swona swi yendlekaka ka wena, ku pimisa hi marito lawa Hosi Davhida a nga ma vula swi nga ku pfuna. Yena a te: “Ni kambisise, wena Xikwembu xanga, u tiva mbilu ya mina. Ni kambisise, u tiva mimpimiso ya mina leyi karhatekaka. Vona loko ku ni ndlela ya ku biha ndzeni ka mina, u ni fambisa ka ndlela leyi kalaka yi nga na magamu.” (Ps. 139:23, 24) Minzamu leyi u yi yendlaka swaku u tinyiketela u tlhela u tsakamisiwa yi kombisa swaku wa swi lava ku tirhela Yehovha hi mbilu hinkwayu, se Yehovha a ta ku katekisa hi mhaka ya leswo. — Heb. 11:6. Murindzi 03/24 paj. 6 mapar. 13-14; paj. 7 par. 15

Muprista wamukulu a a nyimelela vanhu ka Yehovha. Aroni ku ve yena muprista wamukulu wa ku sungula lweyi a nga vekiwa hi Yehovha. Naswona hi ku ya hi leswi mupostolo Pawulo a nga swi vula, “vaprista va vanyingi va boheke ku txintxana hikusa lifu li yendle swaku va nga tami va yendla ntirho wa vona.” (Heb. 7:23-26) Naswona leswi a va nga hetisekanga a va fanele va yendla magandzelo leswaku va rivaleliwa swidjoho swa vona. Se lani hi vona ku hambana ka vaprista va nkama wa Vayisrayele ni Muprista Wamukulu Yesu Kreste. Leswi Yesu a nga Muprista Wamukulu “a tirha ka . . . tabernakela ya ntiyiso leyi nga nyimisiwa hi Yehovha, ku nga li hi munhu.” (Heb. 8:1, 2) Mupostolo Pawulo a hlaye swaku leswi Yesu a kalaka a nga fi, muprista wamukulu ko va yena ntsena, naswona “a nga txintxiwi hi munhu ka ntirho wa yena wa wuprista.” A tlhele a vula swaku leswi Yesu a kalaka a nga na xidjoho a swi zi swi lava a tshamela ku nyikela magandzelo siku ni siku leswaku a rivaleliwa swidjoho, ku fana ni leswi vaprista vavakulu ankameni wa Vayisrayele a va swi yendla. Murindzi 10/23 paj. 26 mapar. 8-9

“Tilo la ku sungula” i mimfumu ya ku biha leyi fumaka swoswi leyi kongomisiwaka hi Sathana ni madimoni ya yena. (Mat. 4:8, 9; 1 Yo. 5:19) Minkama ya yinyingi loko Bibele li vulavula hi “misava” li vulavula hi vanhu lava tshamaka ka yona. (Gen. 11:1; Ps. 96:1) Hi mhaka leyo, “misava ya ku sungula” ku vuliwa vanhu va ku biha lava nga kona misaveni namuntlha. Phela Yehovha a nga to lunghisa “matilo” kumbe “misava,” kambe a ta yi helisa a yi txintxa hi yin’wani. Leswi vulaka swaku ku ta va ni Mfumu wa nyuwani lowu nga ta fuma vanhu va ku lulama. Yehovha a ta yendla swaku vanhu hinkwavu amisaveni va va va ku hetiseka va tlhela va va ni wutomi la ku hetiseka. Hilani Esaya a nga swi vula hi kona, misava hinkwayu yi ta va paradesi ku fana ni jardim la Edeni. Phela na hina hi ta pfuneka hi leswo hikusa hi ta va va nyuwani, hi ta pfuxetiwa, leswi vulaka swaku hi ta dahiwa ka swilo hinkwaswu leswi hi vavaka. Hambi hi vanhu va ku limala, va ku fa matihlo ni timbheveve phela va ta hanyisiwa, va tlhela va va ni wutomi lalinene la ku hetiseka. Ni vanhu lava va nga fa va ta pfuxiwa. — Esa. 25:8; 35:1-7. Murindzi 11/23 paj. 4 mapar. 9-10

A “nhlomulu wa wukulu” wu ta fika na hi nga swi nyimelanga. (Mat. 24:21) Kambe ku hambana ni tinghozi tin’wani leti hi kalaka hi nga swi tivi swaku ti ta fika, ha swi tiva swaku nhlomulu wawukulu wa ta. Hi swi tivisa ku yini? Hi swi tiva hi mhaka ya leswi Yesu a nga swi vula kolomu ka 2.000 wa malembe lama nga hundza, loko a byela vadjondzisiwa va yena leswaku va lunghekela siku leli. Loko hi tilunghiselela swi ta hi vevukela kuva hi tiyisela nkama wolowo wa ku karhata swinene hi tlhela hi pfuna van’wani swaku va yendla leswi fanaka. (Luk. 21:36) Se swi ta lava hi tiyisela swaku hi mu yingisa Yehovha hi tlhela hi nga kanakani leswaku a ta hi vhikela. A nchumu xin’wani lexi lavekaka i ntwelawusiwana. Phela swi nga yendleka ka nhlomulu wawukulu vamakwerhu va hina va ta luzekeliwa hi swin’wani swa swilo swa vona kumbe swilo swa vona hinkwaswu. Se a ntwelawusiwana wu ta hi pfuna leswaku hi yendla hinkwaswu leswi hi nga swi kotaka leswaku hi ya va pfuna. (Hab. 3:17, 18) Naswona swi ta lava hi kombisa swaku ha va rhandza vamakwerhu va hina ka nkama wolowo wa ku karhata swinene. Hi xikombiso, swi nga yendleka loko matiko ma hi hlasela swi ta lava leswaku hi tshama ni vamakwerhu va hina ka ndhawu yin’we yayitsongo swinene. Se hi ta ku yini hi nkama wolowo loko hi nga li na lona lirhandzu? — Eze. 38:10-12. Murindzi 07/23 paj. 2 mapar. 2-3

Lava nga chada va nga pfuneka hi xikombiso xa Akila na Prisila, ku nga nuna na nsati lava a va rhandziwa hi Vakreste va nkama wa vapostolo. (Rom. 16:3, 4) Vona a va tirha, va chumayela va tlhela va pfuna van’wani, naswona mintirho leyi, a va yi yendla xikan’we. (Min. 18:2, 3, 24-26) Minkama hinkwayu loko Bibele li vulavula hi Akila na Prisila li vulavula hi vona na va li xikan’we, a li va hambanisi. Nuna na nsati mi nga xi tekelelisa ku yini xikombiso xa vona? Pimisani hi mintirho leyi mi nga yi yendlaka xikan’we. Hi xikombiso, mi nga ha tivekela planu la leswaku mi huma nsimu xikan’we nkama ni nkama. Phela Akila na Prisila a va tlhela va tirha xikan’we mintirho ya siku ni siku. Se na n’wina hambiloko mi nga na ntirho wa ku fana, mi nga ha yendla mintirho ya le kaya na mi li xikan’we, ya ku fana ni ku basisa kumbe swin’wanyani. (Ekl. 4:9) Loko mi pfunana, mi ta titwa mi li ntlawa wun’we naswona leswo swi ta mi pfulela ndlela ya leswaku mi bula. Murindzi 05/23 mapaj. 22-23 mapar. 10-12

Hinkwerhu ha chava minkama yin’wani. Hi xikombiso, nkama Sawulo a a lava ku dlaya Davhida, a balekile a ya tumbela ka doropa la Vafilista la Gati. Hosi ya Gati yi game yi twa swaku Davhida lweyi a a tumbele ka tiko la yona a a li wanuna wa matimba hintamu swinene lweyi vanhu vanyingi a va yimbelela va vula swaku a dlaye Vafilista va vanyingi. Se a nkama Davhida a nga tiva swaku a hosi ya Gati ya swi tiva leswo, a sungule ku chava. A a chava yini? A a chava swaku hosi ya Gati yi nga tshuka yi mu yendlela swa ku biha. (1 Sa. 21:10-12) Se i ntxini xi nga pfuna Davhida swaku a nga ha chavi? Ka buku la Tipisalema 56, Davhida a vulavula hi leswi a a titwisa xiswona nkama na a ha li Gati. Davhida a vula swaku i mpsini leswi a swi mu yendla a chava ni swaku a swi kotise ku yini ku swi hlula. Phela nkama lowu Davhida a a chava a a mu tshemba hintamu Yehovha. (Ps. 56:1-3, 11) Naswona hi ku pfuniwa hi Yehovha Davhida a kote ku yendla nchumu lexi a xi nga tolovelekanga swaku a ponisa wutomi la yena. Davhida a tiyendle ingi wa hlanya. Se leswo swi yendle hosi ya Gati yi pimisa swaku Davhida i nhlanyi. Yi gama yi mu hlongola ka tiko la yona. Se Davhida a ponisa swoleswo. — 1 Sa. 21:13–22:1. Murindzi 01/24 paj. 2 mapar. 1-3

I vamani lava ku vulavuliwaka hi vona ka tsalwa la namuntlha? I Vakreste va ku totiwa. Se loko mutotiwa wa wugamu lweyi a nga ta va a salile lani misaveni a ya matilweni na nhlomulu wawukulu wu li kusuhi ni ku hela, nchumu wa ku sungula lowu vatotiwa va nga ta wu yendla ku ta va ku lwa. Loko va ta ya matilweni va ta va na Yesu va tlhela va va ni tintsumi naswona va ta lwa nyimpi ya wugamu, leyi va nga ta yi lwa ni valala va Xikwembu. Pimisa hi leswi! Namuntlha, van’wani ka vatotiwa lava va nga lani misaveni se va gugile naswona a va ha na matimba. Kambe loko se va ta pfuxiwa va ya hanya matilweni, va ta va ni matimba, a va nga ha ta fa naswona va ta va ni Hosi ya vona Yesu Kreste leyi na yona yi nga ni matimba swaku va lwa nyimpi. Loko nyimpi ya Armajedoni yi ta va se yi gamile, vatotiwa va ta tirhisana na Yesu leswaku va pfuna vanhu swaku va hetiseka hi kutsongokutsongo. A hi kanakani swaku loko vatotiwa va ta va matilweni, va ta swi kota ku pfuna vamakwerhu va vona va xisati ni va xinuna lava va va rhandzaka hintamu, lava va nga ta va lani misaveni. Phela va ta va pfuna swinene ku tlula leswi a va va pfunisa xiswona nkama lowu a va li lani misaveni na va nga hetisekanga. Murindzi 02/24 mapaj. 6-7 mapar. 15-16

Vanhu van’wani lava nga lunghekela ku tinyiketela ka Yehovha swaku va tsakamisiwa, va nga ha kanakana ku yendla leswo. Vona va nga ha chava ku yendla xidjoho xaxikulu ivi va susiwa bandleni. Se loko na wena u titwisa xileswo, tiyiseka swaku Yehovha a ta ku nyika hinkwaswu leswi u swi lavaka leswaku “u famba hi ndlela leyi fanelaka ka yena ni ku mu tsakisa hi ku helela.” (Kol. 1:10) Yena a ta tlhela a ku nyika matimba ya ku yendla leswi nga swinene. Ha swi tiva leswo hikusa yena wa va pfuna vanhu van’wanyani leswaku va tama va tshembeka ka yena. (1 Ko. 10:13) Hi mhaka leyo, loko ku fanisiwa vanhu lava tamaka va va kona amabandleni, i vatsongo lava susiwaka. Leswo swi kombisa swaku Yehovha wa va pfuna vanhu va yena swaku va tama va tshembeka ka yena. Leswi hi nga ni xidjoho, hinkwerhu hi nga ha ringeka ku yendla swilo swa ku biha. (Yak. 1:14) Kambe a swaku hi ta swi yendla swilo swoleswo swa ku biha kumbe a hi nga ta swi yendla swi le ka hina; hikusa a xiboho xa ndlela leyi hi faneleke hi hanya hi yona xi le ka hina. Hambileswi vanhu van’wani va vulaka swaku a hi nge swi koti ku tikhoma loko hi ringeka ku yendla swilo swa ku biha, a hi ntiyiso leswi va swi vulaka. Hambi ko humelela nchumu xin’wani ni xin’wani lexi hi kutxaka ku yendla swilo swa ku biha, hina hi nga swi kota ku tikhoma. Murindzi 03/24 mapaj. 5-6 mapar. 11-12