Dezembro

Ku nga va swaku Yehovha a na wona matimba ya ku pfuxa lava nga fa? Ha tiyiseka swaku a na wona, hikusa i Xikwembu xa “Matimba Hinkwawu.” (Nhl. 1:8) Yehovha a ni matimba ya ku helisa valala va yena hinkwavu ku patsa ni lifu. (1 Ko. 15:26) Xivangelo xin’wani lexi hi yendlaka hi kholwa swaku Yehovha a nga swi kota ku pfuxa lava nga fa hileswaku mimpimiso ya yena a yi pimiwanga ku fana ni ya hina funtshi a nga na xikhohlwisani. Hi xikombiso, wa swi kota ku vitana nyeleti yin’wani ni yin’wani hi vito la yona. (Esa. 40:26) Handle ka leswo, a khumbuka vanhu hinkwavu lava va nga fa. (Yob. 14:13; Luk. 20:38) Swa mu vevukela Yehovha ku khumbuka swilo hinkwaswu swa lava a nga ta va pfuxa; leswi a va tshamise xiswona, wumunhu la vona ni swilo hinkwaswu leswi nga va humelela awuton’wini. Hi nga tiyiseka swaku Yehovha a ta va pfuxa lava nga fa hikusa wa swi lava naswona a na wona matimba ya ku yendla leswo. Xin’wani xi hi kholwisaka swaku Yehovha a nga swi kota ku pfuxa vafi, hileswaku a tshame a va pfuxa. Ka minkama ya khale Yehovha a nyike matimba vanhu va yena, ku patsa na Yesu ya ku pfuxa lava nga fa. Murindzi 04/23 mapaj. 9-10 mapar. 7-9

Loko hi bula ni vanhu hi ndlela yayinene ni ya ku rhula va nga ha navela ku tama va hi yingisela ni ku bula na hina. I ntiyiso swaku loko munhu a lava ku hi holovisa kumbe ku poyila leswi hi kholwaka ka swona, a hi boheki ku tama hi bula na yena. (Swiv. 26:4) Kambe ha tiyiseka swaku vanhu va vanyingi va ta lava ku hi yingisela. Se, swa tikomba swaku ku va munhu wa ku rhula swa pfuna hintamu. Kutani khongela ka Yehovha swaku a ku pfuna kuva u tama u va munhu wa ku rhula ngopfungopfu loko u kumana ni xiyimu xa ku tika, lani munhu a ku vutisaka, a ku kritikaraka kumbe a solasolaka leswi u kholwaka ka swona. Khumbuka swaku loko u hlamula munhu na u rhulile, mabulu ya n’wina a ma nga ta gamela ka ku holova. Funtshi mahlamulela ya wena ya ku rhula ma nga yendla leswaku van’wani va tsakela ku twa swin’wanyani hi Bibele ni ku tlhela va txintxa mavonelo ya vona hi hina ni Bibele. Se minkama hinkwayu ‘tshama u lunghekele ku tihlamulela ka lweyi a lavaka ku tiva hi ta ntshembo lowu u nga na wona, kambe u swi yentxa na u rhulile ni hi xihlonipho xa xikulu.’ (1 Pe. 3:15) Loko u yendla leswo, u ta va u kombisa swaku u munhu wa ku rhula ni leswaku a wu mathanga! Murindzi 09/23 paj. 19 mapar. 18-19

Vona 4 wa tindlela leti hi nga kombisaka hi tona swaku hi vanhu va ku lehisa mbilu. Ya ku sungula, munhu wa ku lehisa mbilu a nga hantli a kwata. Loko vanhu van’wani va mu kwatisa, a tama a rhula naswona a nga tlheliseli. Naswona hambiloko a li ka xiyimu xa ku karhata, a va khoma kahle van’wani. (Eks. 34:6) Ya wumbirhi, munhu lweyi a lehisaka mbilu hambiloko a xi nyimele hintamu nchumu, a nga karhateki kumbe a nyenyentseka, kambe a tama a rhula anze xi fika. (Mat. 18:26, 27) Ya wunharhu, munhu lweyi a lehisaka mbilu a rhanga hi ku pimisa na a nga se yendla swilo. Loko munhu lweyi a lehisaka mbilu a ni swilo swa lisima swa ku swi yendla a nga swi yendli hi ku tsutsumatsutsuma swaku a hantla a heta kumbe a swi yendla na a nga rhanganga hi ku pimisa. A tinyika nkama wa ku pimisa hi ndlela leyi a nga ta swi yendla hi yona swilo, a gama a swi yendla hi nawu wa kona. Ya wu 4, munhu lweyi a lehisaka mbilu hambiloko a kumana ni swikarhatu swa ku tika hintamu swinene a nga tshami hi ku tikhalakhala. Kambe a tshamela ku pimisa hi swilo swaswinene leswi yendlekaka ka wutomi la yena funtshi a yendla hinkwaswu leswi a nga swi kotaka swaku a tama a tirhela Yehovha na a tsakile. (Kol. 1:11) Se lava tirhelaka Yehovha va fanele va lehisa mbilu ka swiyimu hinkwaswu leswi hi nga bula hi swona. Murindzi 08/23 mapaj. 20-21 mapar. 3-6

Lexi xi yendlaka hi vhikela mbilu ya hina hileswaku Yehovha wa kambisisa timbilu ta hina. Leswo swi vula swaku ku hambana ni vanhu lava va vonaka leswi hi nga tshamisa xiswona hi handle, Yehovha a vona leswi hi nga xiswona hi ndzeni. Loko hi tata mimpimiso ya hina hi swilo swaswinene leswi kumekaka ka Rito la yena, a ta hi rhandza a tlhela a hi nyika wutomi la ku kala li nga heli. (Yoh. 4:14) Funtshi a hi nga ta xengiwa hi mahanyelo ya ku biha ya misava leyi ni mavunhwa ya Sathana Davulosi. (1 Yo. 5:18, 19) Loko hi yendla hinkwaswu leswaku hi tiyisa wunghanu la hina na Yehovha, hi ta ya hi mu rhandza naswona hi ta ya hi mu hlonipha. Funtshi leswi hi kalaka hi nga lavi ku kwatisa Yehovha, hi ta fambela kule ni xin’wani ni xin’wani lexi xi nga hi yendlaka hi djoha. Marta makwerhu wa xisati wa le Croácia lweyi a a lava ku wa ka ntlhamu wa ku yendla wuntunga la swa masangu a vule leswi: “A swi ni karhatela ku pimisa kahle ni ku lwa ni ku navela loku a ni li na kona ka ku yendla minchumu ya ku biha, kambe ku chava Yehovha swi ni vhikelile.” Ku chava Yehovha swi mu vhikelise ku yini Marta? Marta a vule leswaku kuva a pimisile hi minchumu ya ku biha leyi a yi ta mu yendlekela ka wutomi la yena loko o wa ka xidjoho, swi mu pfunile kuva a yendla xiboho xaxinene. Se na hina ku chava Yehovha ku nga hi pfuna. Murindzi 06/23 mapaj. 20-21 mapar. 3-4

Yesu a a swi tiva swaku xikongomelo xa Yehovha a ku li ku kwetsimisa vito la yena ni ku li basisa ka mavunhwa lawa a va mu lumbeta hi wona. Hi mhaka leyo a djondzise vadjondzisiwa va yena ku khongela va ku: “Papayi wa hina lweyi a nga matilweni, vito la wena a li kwetsimisiwe.” (Mat. 6:9) Yesu a a swi twisisa swaku mhaka leyi yi khumba vanhu hinkwavu. A ku na mun’wani ka ntumbuluku hinkwawu a nga yendla swilo swaswikulu swaku a kwetsimisa vito la Yehovha ku tlula Yesu. Kambe Yesu nkama va nga mu khoma, valala va yena va mu lumbete swaku a a rhuka vito la Xikwembu. Yesu a a swi tiva swaku ku rhuka vito la Xikwembu a ku li xidjoho xaxikulu ku tlula hinkwaswu leswi munhu a a ta swi yendla. Se kuva va mu lumbeta hi swaku yena a a yendla leswo, swi mu karhatile swinene. Swi nga yendleka ku li leswo swi nga za swi yendla swaku Yesu a titwa a ‘tlhaveke swinene mbilwini’ na a nga se khomiwa. — Luk. 22:41-44. Murindzi 02/24 paj. 11 par. 11

Ka mpalisanu lowu wa wutomi swi lava hi rhandza Yehovha na Yesu ku tlula maxaka ya hina. (Mat. 10:37) Kambe leswo a swi lavi ku vula swaku hi fanele hi tshika ku yendla leswi swi nyimeliwaka ka hina amindjangwini ya hina. Leswaku hi tsakisa Yehovha na Yesu swi lava leswaku hi yendla tlhelo la hina. (1 Tm. 5:4, 8) Loko hi yendla leswo hi ta tsaka hintamu. Phela Yehovha wa swi tiva swaku mindjangu yi nga tsaka loko nuna na nsati va rhandzana va tlhela va hloniphana, loko vapsali va rhandza va tlhela va djondzisa vana va vona ni loko vana va yingisa vapsali va vona. (Efe. 5:33; 6:1, 4) Loko u li nuna, nsati kumbe n’wana tshemba leswi Bibele li swi vulaka. U nga landzeli mavonelo ya wena, kumbe leswi swi nga toloveleka lomu u tshamaka kona, kumbe leswi lava va tivulaka tintivi va swi vulaka. Xin’wani u nga xi yendlaka i ku tirhisa leswi swi nga tsaliwa ka mabuku ya nhlengeletanu. Phela mabuku lawa ma tlhamusela tindlela ta ku hambanahambana leti u nga tirhisaka hi tona matshinya ya minawu ya Bibele. Murindzi 08/23 paj. 28 mapar. 6-7

Tintombhi ti fanele ti djondza ku yendla swilo leswi nga ta ti pfuna ka wutomi la tona siku ni siku. Swin’wani swa swilo swoleswo ti faneleke ti swi djondza, ti fanele ti swi djondza ku sukela wutsongwanini kambe ti ta swi tirhisa ka wutomi la tona hinkwalu. Hi xikombiso, djondza ku lerha ni ku tsala kahle. Ka tindhawu tin’wani vanhu va pimisa swaku a swi sizi nchumu ku va wansati a tiva ku lerha ni ku tsala. Kambe ku yendla leswo i swa lisima ka Vakreste hinkwavu. (1 Tm. 4:13) Se, u nga pfumeleli nchumu xi ku sivela ku djondza ku lerha ni ku tsala kahle. Phela loko u tiva ku lerha u ta kuma ntirho, u ta djondza Bibele u tlhela u djondzisa ni van’wanyani; xa lisima hintamu, u ta tinyika nkama wa ku lerha Bibele u tlhela u pimisa hi leswi u swi lerhaka, leswi nga ta yendla swaku u va ni wunghanu la ku tiya na Yehovha. — 1 Tm. 4:15. Murindzi 12/23 paj. 20 mapar. 10-11

Kombela swaku Yehovha a ku pfuna ku hlula mindzingo. Leswi hi kalaka hi nga hetisekanga, swi lava hi yendla minzamu swaku hi nga yendli swa ku biha. Kambe Sathana hi hala tlhelo a zama ku hi xengetela ku yendla swilo swoleswo. Xin’wani lexi a xi yendlaka i ku hi xenga hi ku tirhisa leswi hi hungataka hi swona. A nga yendla leswaku hi hungata hi swilo swa ku biha. Swilo swoleswo swi nga ha yendla swaku mimpimiso ya hina yi tala hi swilo swa chaka. Se mimpimiso yoleyo yi nga ha yendla leswaku hi yendla xidjoho xaxikulu lexi nga ta yendla leswaku hi nga ha yamukeliwi hi Yehovha. (Mar. 7:21-23; Yak. 1:14, 15) Leswaku hi hlula mindzingo ya ku yendla minchumu ya ku biha hi lava ku pfuniwa hi Yehovha. Ka xikhongelo xa Hosi, Yesu a vule swaku swin’wani swa leswi hi nga swi vulaka hi leswi: “Hi pfuni leswaku hi nga hluliwi hi ndzingo. U hi vhikela ka Davulosi.” (Mat. 6:13) Yehovha wa swi lava ku hi pfuna. Kambe leswaku a hi pfuna swi lava hina hi kombela ku pfuniwa. A hi fanelanga hi khongela ntsena, kambe hi fanele hi tlhela hi hanya hi leswi hi nga swi kombela ka xikhongelo. Murindzi 05/23 mapaj. 6-7 mapar. 15-17

Loko nuna na nsati va li nyika lisima wunghanu leli va nga na lona na Yehovha, swi ta yendla leswaku va tirhisa leswi Yehovha a va djondzisaka swona. Hi ndlela leyo, a va nge te yendla swilo leswi nga holisaka lirhandzu la vona. Lava nga ni wunghanu la ku tiya na Yehovha va yendla hinkwaswu leswi va nga swi kotaka swaku va mu tekelela, hi ku kombisa wunene, va lehiselana mbilu va tlhela va rivalela. (Efe. 4:32–5:1) Loko nuna na nsati va yendla leswo, lirhandzu la vona li ta ya li kula. Makwerhu mun’wani lweyi a vitaniwaka Lena, lweyi a nga ni ku tlula 25 wa malembe na a chadile a li: “Swa vevuka ku rhandza ni ku hlonipha munhu lweyi a nga ni wunghanu la ku tiya na Yehovha.” Pimisa hi xikombiso lexi: Nkama Yehovha a a lava ku langa vanhu lava a va ta va vapsali va Mesiya, a a ta va a lange mun’wani ni mun’wani ka vatukulu va Davhida, kambe a ye a ya langa Yosefa na Mariya. Hi mhaka muni a lange Yosefa na Mariya? Hikusa vona a va ni wunghanu la ku tiya na Yehovha, funtshi Yena a a swi tiva swaku va ta mu rhangisa ka wutomi la vona. Murindzi 05/23 mapaj. 20-21 mapar. 3-4

Yehovha a lava leswaku hina hi yingisa lava va rhangelaka abandleni. Kambe minkama yin’wani leswo a swi vevuki hikusa vona a va hetisekanga, va phazama. Se, loko va hi kombela minchumu ya ku hina a hi swi lavi ku yi yendla, swi nga hi karhatela minkama yin’wanyani kuva hi yingisa. Hi xikombiso, hambi hi Pedru swi mu yendlekelile leswo. A ntsumi yi mu byele swaku a dla swiharhi leswi hi ku ya hi Nawu wa Moxe a swi tsimbisiwa kuva swi dliwa. A ntsumi yi mu byele swaku ‘dlana a ku na xa ku hoxeka ka swona’ kambe Pedru a yalile kanharhu, a nga pfumelanga ku dla. (Min. 10:9-16) Hi mhaka muni a yalile? Hi mhaka a a nga swi tolovelanga leswo, a ku li nchumu xa nyuwani ka yena. Kasi mupostolo Pawulo a a tinyimisele ku yingisa nkama Vakreste lava a va rhangela bandla hi nkama wolowo aYerusalema va nga mu byela swaku a famba ni 4 wa vavanuna va ya tempeleni swaku a ya tibasisa hi ku ya hi Nawu. Leswo a swi ta kombisa swaku Pawulo a a wu hlonipha Nawu wa Moxe. Pawulo a a swi tiva swaku a Vakreste a va nga ha boheki ku yingisa Nawu wa Moxe funtshi a a tiyiseka swaku a nga yendlanga nchumu xa ku biha. Hambileswo a yingisile leswi va nga mu byela swona. “Pawulo a fambe ni vavanuna volavo a ya tibasisa na vona hi ku landza Nawu.” (Min. 21:23, 24, 26) Ku va Pawulo a yingisile swi yendle swaku vamakwerhu va tama va twanana. — Rom. 14:19, 21. Murindzi 10/23 paj. 10 mapar. 15-16

U pimisa swaku ku chava munhu swa laveka swaku u va munghanu wa yena? Swi nga yendleka u nga pimisanga hi swona leswo. Kambe leswaku hi va ni wunghanu lalikulu na Yehovha, hi fanele ‘hi mu chava.’ Hambiloko se hi ni malembe manyingi na hi mu tirhela Yehovha, hi fanele hi tama hi mu hlonipha hintamu swinene. Kambe swi vula yini ku chava Yehovha? Ku chava Yehovha swi vula ku mu rhandza hintamu ni ku kala hi nga yendli nchumu lexi xi nga vekaka nghozini a wunghanu la hina na Yena. Hi xikombiso, Yesu a a chava Yehovha hi ndlela leyo. (Heb. 5:7) Leswo swi vula swaku yena a a mu rhandza hintamu Yehovha naswona a a lava ku mu yingisa. (Yoh. 14:21, 31) Ku nga li ku mu chava lokuyani ka ku rhurhumela. (Esa. 11:2, 3) Ku fana na Yesu, na hina hi mu hlonipha hintamu Yehovha funtshi ha rendera hi yena, hikusa ha swi tiva swaku yena i Xikwembu xa lirhandzu, xa wutlharhi, xa ku lulama naswona xi ni matimba hinkwawu. Ha swi tiva nakambe swaku Yehovha a hi rhandza hintamu, naswona leswi hi swi yendlaka swi nga mu kwatisa kumbe swi mu tsakisa. — Ps. 78:41; Swiv. 27:11. Murindzi 06/23 paj. 14 mapar. 1-2; paj. 15 par. 5

Nkama swilo swi nga sungula ku mu fambela kahle Hosi Uziya a tlhela a va ni matimba, a game a khohlwa swilo hinkwaswu swaswinene leswi Yehovha a a mu yendlele swona. Hina hi djondza yini ka mhaka leyi? Hi djondza swaku i swa lisima ku va minkama hinkwayu hi khumbuka swaku minkateko kumbe mintirho leyi hi nga na yona ka nhlengeletanu i Yehovha a nga hi nyika yona. Hi mhaka leyo, a hi fanelanga hi tshamela ku tibyela hi mhaka ya swilo leswi hi kotaka ku swi yendla, kambe hi fanele hi dzunisa Yehovha hi swona. (1 Ko. 4:7) Naswona hi fanele hi tiveka hansi, hi pfumela swaku leswi hi nga ni xidjoho swi ta lava hi kawukiwa minkama yin’wani. Makwerhu mun’wani a nga ni kolomuyani ka 60 wa malembe a te: “Ni djondze ku kala ni nga kwati kumbe ku hela ntamu loko van’wani va vona swihoxo leswi ni swi yendlaka. Minkama yin’wani ni yendla swihoxo swa wutsongwani naswona van’wani va ni kawuka hi mhaka ya leswo, kambe ni yendla hinkwaswu leswi ni nga swi kotaka swaku ni yampsisa ni tlhela ni tama ni mu yendlela hinkwaswu leswi ni nga swi kotaka Yehovha.” Se, loko hi yingisa Yehovha hi tlhela tama hi tiveka hansi hi ta tsaka hikakunene. — Swiv. 22:4. Murindzi 09/23 paj. 10 mapar. 10-11

Vakreste va nkameni wa mupostolo Pawulo a va kumana ni swiyimu leswi a swi lava leswaku va tiyisela swinene. Phela vona a va kumana ni swikarhatu leswi vanhu hinkwavu a va kumana na swona. Kambe leswi vona a va li Vakreste a va kumana ni swikarhatu swin’wanyani swa ku tika. Hi xikombiso, a va hluphiwa hi varhangeli va wukhongeli la Xiyuda, hi mimfumu ya Roma naswona a va hluphiwa hi maxaka ya vona. (Mat. 10:21) A ndzeni ka bandla, minkama yin’wani a swi lava leswaku va lwa hi matimba leswaku va nga xengeteliwi hi mavunhwa lawa a ma hangalasiwa hi vanhu lava a va djikela nhlengeletanu, lawa a ma ta yendla leswaku bandla li yavana. (Min. 20:29, 30) Impela, Vakreste lavayani va tiyiselile. (Nhl. 2:3) Se i ntxini xi nga va pfuna swaku va tiyisela? Vona a va pimisa hi swikombiso swa khale swa vanhu lava va nga tiyisela va ku fana na Yobo. (Yak. 5:10, 11) A va khongela va kombela Yehovha leswaku a va nyika ntamu. (Min. 4:29-31) Naswona vona a va pimisa hi minkateko leyi a va ta yi kuma loko va tama va tiyisela. (Min. 5:41) Na hina hi nga swi kota ku tiyisela loko nkama ni nkama hi djondza hi tlhela hi pimisa hi swikombiso leswi nga ka Bibele ni ka mabuku ya hina, swa vanhu lava va nga tiyisela. Murindzi 07/23 paj. 3 mapar. 5-6

Yehovha na Yesu a va nga ta tshuka va hi tshika. Loko mupostolo Pedru a yale Yesu, swi lave a yendla xiboho xa lisima hintamu. Indjhe a a ta tshika ku va mulandzeli wa Yesu kumbe a a ta tama a tirhela Yehovha? Yesu a khongelile a kombela Yehovha swaku a pfuna Pedru swaku a nga heleliwi hi lipfumelo. Loko a yendle leswo, a game a byela Pedru swaku a a mu khongelelile ka Yehovha naswona a a tshemba swaku a a ta swi kota ku tama a tiyisa vamakwavu. (Luk. 22:31, 32) Swi nga yendleka marito ya Yesu a ma mu tiyisa Pedru minkama hinkwayu loko a ma khumbuka. Hilani ku fanaka, loko swi lava hi yendla xiboho xa lisima hintamu ka wutomi la hina, ha tshemba swaku Yehovha a ta hi pfuna swaku hi tama hi tshembeka. (Efe. 4:8, 11) Ku fana ni leswi Yehovha a nga hlayisa mupostolo Pedru ni vadjondzisiwa van’wani, a ta tama a hi hlayisa na hina loko hi rhangisa Mfumu wa yena ku sungula. Murindzi 09/23 mapaj. 24-25 mapar. 14-15

Yehovha wa swi vona swilo leswi hi swi yendlelaka vamakwerhu, hambi swi tikomba ku li nchumu wawutsongo hintamu swinene. A swi vona na swi li xikweneti, naswona a titwa na a sindziseka ku va a xi hakela. Se loko ku li swaku a khale u tshame u va mupfunisi wa bandla kumbe doda, Yehovha wa wu khumbuka ntirho lowu u nga wu yendla ka nkama lowu nga hundza, ni lirhandzu leli nga ku susumetela leswaku u tama u wu yendla ntirho wolowo. (1 Ko. 15:58) Naswona Yehovha wa swi vona swaku wa ha tama u li kombisa lirhandzu lolelo. Yehovha a lava swaku hi kulisa lirhandzu leli hi nga na lona hi yena ni vanhu van’wani. Hi nga ya hi mu rhandza hintamu Yehovha loko hi djondza Bibele, hi pimisa hi leswi hi swi djondzaka ni ku tlhela hi khongela. Hi nga kulisa lirhandzu leli hi nga na lona hi vamakwerhu hi ku lavetela tindlela ta ku va pfuna. Loko lirhandzu la hina li ya li kula, hi ta ya hi tshinela kusuhi na Yehovha ni vamakwerhu naswona wunghanu la hina na Yehovha ni vamakwerhu li ta tshama hi masiku ni masiku. Murindzi 07/23 paj. 10 par. 11; paj. 11 par. 13; paj. 13 par. 18

Mukreste mun’wani ni mun’wani a fanele a yendla xiboho xa madahelo lawa a nga ta ma tirhisa. Loko a yendla xiboho xolexo a fanele a yingisa nawu wa Bibele wa ku fambela kule ni ngati ni wungoma. (Min. 15:20; Gal. 5:19, 20) Loko ma nga tluli minawu yin’wani ya Bibele, mun’wani ni mun’wani a nga tilangela madahelo lawa a ma lavaka. Ku nga na mhaka swaku hi titwisa ku yini hi madahelo ya xilandi kumbe ya xilungu, a xa lisima i ku va hi hlonipha xiboho lexi van’wani va xi yendlaka. Leswi nga hi pfunaka ka mhaka leyi i 4 wa tipontu leti landzelaka: 1) Hi fanele hi khumbuka swaku i Mfumu wa Xikwembu ntsena lowu nga ta swi kota ku helisa mavabyi hinkwawu amisaveni. (Esa. 33:24) 2) Mukreste mun’wani ni mun’wani a fanele a “tiyiseka” hi leswi swi nga swinene ka yena. (Rom. 14:5) 3) A hi fanelanga hi yavanyisa van’wani kumbe ku yendla nchumu lexi nga ta yendla swaku van’wani va khunguvanyeka. (Rom. 14:13) 4) Vakreste va kombana lirhandzu, naswona a va pfumeleli leswaku leswi vona va swi pimisaka hi mhaka yoleyo swi yendla leswaku bandla li yavana, hikusa a ku twanana ka bandla hi kona ku nga ka lisima ku tlula mavonelo ya vona. — Rom. 14:15, 19, 20. Murindzi 07/23 paj. 25 par. 15

Indjhe wa li nyika lisima wunghanu leli u nga na lona na Yehovha? A hi kanakani swaku wa li nyika! Ku sukela khale hintamu vanhu va vanyingi na vona va li nyike lisima wunghanu leli a va li na lona na Yehovha. (Ps. 104:33, 34) Funtshi ku tala ka vona va tikarhate hintamu swaku va kota ku gandzela Yehovha. Van’wani ka vona ku ve Vayisrayele lava a va li Vanaziri kumbe lava va nga tinyiketela. Vanaziri a ku li Vayisrayele va ku hiseka lava a va tikarhata hintamu swaku va tirhela Yehovha hi ndlela ya ku hlawuleka. Nawu wa Moxe a wu pfumelela swaku wanuna kumbe wansati a langa ku va Munaziri hi nkama wa ku karhi swaku a tirhela Yehovha hi ndlela ya ku hlawuleka. (Tin. 6:1, 2) Loko Muyisrayele a yendla xiboho xa ku va Munaziri, a ku ni minawu leyi a a fanele a yi landzela leyi Vayisrayele van’wani a va nga boheki ku yi landzela. Kambe i ntxini lexi a xi ta yendla Muyisrayele a langa ku va Munaziri? Swi nga yendleka hi mhaka ya leswi a a mu rhandza hintamu Yehovha a tlhela a mu khensa hi mbilu hinkwayu hi swilo swaswinene leswi Yehovha a mu yendlelaka swona. — Det. 6:5; 16:17. Murindzi 02/24 paj. 14 mapar. 1-2

Ka Bibele, loko ku vulavuliwa hi rito leli nge “ku tshembeka” kumbe “lirhandzu la ntiyiso” ku vulavuliwa hi lirhandzu leli Xikwembu xi li kombisaka ka vanhu lava va xi tirhelaka. Ku tlhela ku vulavuliwa hi lirhandzu leli vanhu va Xikwembu va kombanaka hi xivona. (2 Sa. 9:6, 7) Loko nkama wu ya wu famba, swi nga yendleka hi ya hi va vanhu va ku tshembeka hintamu. Vona swaku leswo swi yendlekise ku yini ka muprofeta Daniyele. Ka wutomi la yena hinkwalu, Daniyele a kumane ni swikarhatu swa ku hambanahambana leswi ka swona a a fanele a kombisa swaku wa tshembeka ka Yehovha kumbe nada. Xikarhatu xin’wani xaxikulu lexi a nga kumana na xona xi humelele hi nkama lowu a a ni ma 90 wa malembe. Lava a va tirha ka yindlo ya wuhosi a va nga mu rhandzi Daniyele funtshi a va nga mu hloniphi Yehovha. Se hi mhaka leyo, va hambe planu la ku va Daniyele a dlayiwa. Va swi yendlise ku yini? Va yendle swaku hosi yi humesa nawu lowu a wu tsimbisa vanhu hinkwavu swaku va nga khongeleli xikwembu xin’wani loko ku nga li hosi. Se ka xiyimu lexi Daniyele a a fanele a swi kombisa swaku a a ta tshembeka ka Yehovha kumbe a a ta nyima ku khongela ka Yehovha ku nga leswi se a a ta na a swi yendla masiku ndzhaku. Phela nawu lowu a wu to tirha ntsena ka 30 wa masiku. Kambe Daniyele a nga zanga a nyima ku gandzela Yehovha. A tame a tshembeka ka yena. — Dan. 6:12-15, 20-22. Murindzi 08/23 paj. 5 mapar. 10-12

Yehovha a lava leswaku hi tiyisela hi ku komba vamakwerhu va hina swaku ha va rhandza. Loko makwerhu a hi kwatisa a hi fanelanga hi pimisa swaku a yendle hi maxivomu, kambe a yo phazama naswona wa swi lava ku yendla leswi Yehovha a ngo i swinene. (Swiv. 12:18) Phela Yehovha wa hi rhandza naswona a nga tshiki ku va munghanu wa hina, hambiloko minkama yin’wani hi mu hoxela. (Ps. 103:9) Se i swa lisima hintamu kuva hi tekelela Yehovha Xikwembu xa hina lweyi a rhandzaka ku rivalela van’wani! (Efe. 4:32–5:1) Khumbuka swaku leswi magamu ma nga kusuhi ni ku fika, swi lava leswaku hi tshama hi li kusuhi ni vamakwerhu. Swi nga yendleka ka nkama lowu taka hi hluphiwa hintamu hi tlhela hi petiwa djele hi mhaka lipfumelo la hina. Se loko leswo swi tshuka swi yendleka hi ta swi lava hintamu swaku vamakwerhu va hi pfuna. — Swiv. 17:17. Murindzi 03/24 mapaj. 15-16 mapar. 6-7

Bibele li vulavula hi majovhem man’wani lawa ma nga tiyisa wunghanu la wona na Yehovha, ma nga katekisiwa hi yena ma tlhela ma tsaka. Mun’we wa majovhem lawa i Davhida. A nkama a wa ha li mutsongo, Davhida a lange ku va munghanu wa Yehovha, naswona hi ku famba ka nkama Yehovha a mu vekile swaku a va hosi. (1 Tih. 3:6; 9:4, 5; 14:8) Se u swi vonisa ku yini kuva u djondzanyana hi wutomi la Davhida? Tiyiseka swaku loko u yendla leswo u ta tiyisiwa hintamu swinene naswona xikombiso xa yena xi ta ku pfuna swaku u tama u tirhela Yehovha hi ku tshembeka. Xikombiso xin’wani lexi u nga ha xi djondzaka i xa Marku na Timotiyu. Na vona va sungule ku tirhela Yehovha na va ha li majovhem naswona va tame va tshembeka wutomi la vona hinkwalu. Yehovha a tsakile hi vona. Leswi u li tirhisisaka xiswona wutomi la wena swoswi swi ta khumba leswi u nga ta li tirhisisa xiswona ka nkama lowu taka. Loko u nga titshembi, kambe u tshemba Yehovha, a ta ku pfuna swaku u yendla swiboho swaswinene. U ta va ni wutomi la ku tsakisa funtshi la ku tala hi minchumu ya ku tsakisa swinene. Kambe khumbuka swaku Yehovha a swi nyika lisima leswi wena u swi yendlelaka yena. Phela loko u yendla xiboho xa ku tirhela Yehovha swoswi, u ta va u yendle xiboho xaxinene, hikusa a ku na nchumu xin’wani wuton’wini lexi yampsaka ku tlula ku va u langa ku tirhela Yehovha. Murindzi 09/23 paj. 13 mapar. 18-19

Mupostolo Pawulo a a swi tiva swaku vamakwerhu a va hetisekanga. Hi xikombiso, vamakwerhu van’wani aYerusalema a va mu chava hikusa a va nga kholwi swaku hikakunene se a a li Mukreste. (Min. 9:26) Hi ku famba ka nkama van’wani va vulavule swilo swa ku biha hi yena swaku va mu wonha vito. (2 Ko. 10:10) Pawulo a tlhele a vona doda na li yendla xiboho xa ku kala xi nga li xinene, lexi a xi ta tshuka xi yendla van’wani va tshika ku tirhela Yehovha. (Gal. 2:11, 12) Funtshi Marka lweyi a a tirha na Pawulo a yendle swilo leswi nga mu kwatisa. (Min. 15:37, 38) Phela Pawulo a a ta va a pfumelele swaku swiyimu leswi swi mu yendla a fambela kule ni vamakwerhu hinkwavu lava nga mu kwatisa. Kambe handle ka leswo, a tame a vona swilo swaswinene leswi vamakwerhu a va swi yendla a tlhela a tama a tirhela Yehovha hi ku tshembeka. Kambe i ntxini xi nga pfuna Pawulo swaku a tiyisela ka swiyimu leswi? Pawulo a a va rhandza vamakwerhu. Lirhandzu lelo li mu pfune leswaku a nga pimisi hi swihoxo leswi a va swi yendla, kambe a pimisa hi swilo swaswinene leswi a va swi yendla. Lirhandzu lelo li tlhele li mu pfuna Pawulo swaku a yendla leswi swi nga tsaliwa ka ndzimana ya namuntlha. Murindzi 03/24 paj. 15 mapar. 4-5

Bibele li ni swikombiso swa swinyingi leswi kombisaka swaku ku va munhu wa ku rhula i swa lisima hintamu. Pimisa hi xikombiso xa Izaki. Nkama a nga rhurha a ya tshama ka tiko la Gerara, a vavhizinyu va yena lava a va li Vafilista va sungule ku mu kweleta va gama va selethela swihlovo hinkwaswu leswi vatirhi va papayi wa yena a va swi txelile. Kambe ku hambana ni ku lwa na vona, Izaki a yo teka ndjangu wa yena va rhurha va ya tshama kule, lani va nga txela swihlovo swin’wani. (Gen. 26:12-18) Kambe Vafilista va vule swaku mati ya swihlovo swa nyuwani leswi a va swi txelile a ma li ya vona. Hambileswo, Izaki a tame a rhula. (Gen. 26:19-25) A swi kotise ku yini Izaki ku tama a rhula hambiloko van’wani va yendla hinkwaswu swaku va mu holovisa? A hi kanakani swaku lexi nga mu pfuna i xikombiso xa papayi wa yena Abrahamu lweyi a a rhulile, ni mamani wa yena Sara lweyi a a li munhu wa ‘ku rhula a tlhela a vevuka.’ — 1 Pe. 3:4-6; Gen. 21:22-34. Murindzi 09/23 paj. 15 par. 4

Yehovha a tlhele a rhumela a N’wana wa yena Yesu Kreste leswaku a ta lani misaveni kuva a djondzisa vanhu hi Mfumu wa yena, ni ku tlhela a nyikela wutomi la yena leswaku hi suseliwa xidjoho ni lifu. Ndzhaku ka leswo, Yesu a game a pfuxiwa ivi a tlhelela tilweni swaku a ta fuma ka Mfumu wa Xikwembu. A nhlokomhaka ya Bibele i ku kwetsimisiwa ka vito la Yehovha, naswona leswo swi ta yendleka nkama lowu Yehovha a hetisisaka xikongomelo xa yena hi misava hi ku tirhisa Mfumu wa yena lowu ku fumaka Yesu Kreste. A nga kona lweyi a nga txintxaka xikongomelo xa Yehovha. Ku nga na mhaka swaku ku yendleka yini, hi wugamu xikongomelo xa yena xi ta hetiseka. (Esa. 46:10; Heb. 6:17, 18) Hi nkama wa kona a misava yi ta va paradesi, naswona hinkwavu vatukulu va Adamu na Evha va ta tshama ka yona hi masiku ni masiku. (Ps. 22:26) Xikongomelo xin’wani xaxikulu lexi Xikwembu xi nga na xona i kuva tintsumi hinkwatu ni vanhu hinkwavu va twanana. Loko leswo swi yendleka, vanhu hinkwavu lani misaveni ni tintsumi atilweni va ta va na va yingisa Yehovha va tlhela va tshembeka ka yena. (Efe. 1:8-11) A swi ku hlamalisi ku vona xikongomelo xa Yehovha xi ya xi hetiseka hi kutsongokutsongo? Murindzi 10/23 paj. 20 mapar. 7-8

Nkama Vayuda va nga fika Yerusalema na va vuya hi Babilona, swi va karhatelile van’wani ka vona kuva va hlayisa mindjangu ya vona. Handle ka leswo mfumu wa Persiya ni matiko lawa a ma tshama kusuhi na vona a ma va tikisela wutomi lakakuva swi va karhatelile ku tama va pfuxeta tempele ya Yehovha. Se leswo swi yendle leswaku va nyima ku yaka tempele. Kambe Yehovha a tirhise muprofeta Hagayi na muprofeta Zakariya leswaku va pfuna tiko leswaku li tlhela li yaka tempele. Vona va yendle ntirho wa kahle hikusa tiko li tlhele li sungula ku yaka. (Hag. 1:1; Zak. 1:1) Kambe ndzhaku ka kolomuyani ka 50 wa malembe Vayuda lava va tlhele va godola. Se Ezra a game a suka Babilona a ya Yerusalema swaku a ya va tiyisa hi ku va pfuna ku tama va rhangisa ku gandzela Yehovha ka wutomi la vona. (Ezr. 7:1, 6) Ku fana ni leswi wuprofeta la Hagayi na Zakariya li nga pfuna vanhu va Yehovha ka nkama wa khale swaku va tama va tshemba Yehovha hambileswi a va hluphiwa, wuprofeta leli li nga hi pfuna na hina swaku hi tama hi tshemba Yehovha hambiloko hi kumana ni swikarhatu. — Swiv. 22:19. Murindzi 11/23 mapaj. 14-15 mapar. 2-3

Hi nga swi kombisa swaku ha va rhandza vamakwerhu hi ku va tiyisa loko va kumana ni swikarhatu. Phela xin’wani xi nga ta hi pfuna kuva hi tama hi tiyisa vamakwerhu va hina i “ku va twela wusiwana”. (1 Tes. 4:18) Kambe i yini xin’wani xi nga hi pfunaka ku tiyisa lirhandzu leli hi nga na lona hi vamakwerhu? I ku yendla hinkwaswu leswi hi nga swi kotaka swaku hi va rivalela loko va hi djohela. Hi mhaka muni swi li swa lisima ku va hi tama hi kombana lirhandzu ka masiku lawa? Twana leswi mupostolo Pedru a nga swi vula. A te: “Magamu ya swilo hinkwaswu ma kusuhi, . . . rhandzanani swinene.” (1 Pe. 4:7, 8) Leswi magamu ya misava leyi ya ku biha ma yaka ma tshinela, i yini hi nga swi nyimelaka? Yesu a vule swaku a ku ta yendleka leswi hi valandzeli va yena: “Mi ta nyenyiwa hi matiko hinkwawu hi mhaka ya vito la mina.” (Mat. 24:9) Se leswaku hi tshama na hi tshembekile ka Yehovha hambiloko hi hluphiwa, swi lava hi twanana. Se loko hi twanana, minzamu leyi Sathana a yi yendlaka swaku a hi hambanisa yi ta ba hansi hikusa “lirhandzu li yendla leswaku vanhu hinkwavu va twanana hi ku helela.” — Filp. 2:1, 2. Murindzi 11/23 paj. 13 mapar. 18-19

A ntiyiso wa Bibele wu ni matimba. Loko hina hi djondzisa vanhu hi Yehovha ni hi wumunhu la yena, hi vona minchumu ya ku hlamalisa yi yendleka. Loko vanhu va ya va twisisa wumunhu la ku tsakisa la Papayi wa hina va swi vona swaku mavunhwa ya Sathana a ma twisiseki, va tlhela va hlamalisiwa hi matimba ya ku kala ma nga heli ya Yehovha. (Esa. 40:26) Va djondza ku tshemba Yehovha hi mhaka wululami la yena la ku hetiseka. (Det. 32:4) Va djondza swilo swa swinyingi ka wutlharhi la yena lalikulu. (Esa. 55:9; Rom. 11:33) Naswona va tiyisiwa hi loko va djondza hi lirhandzu leli Yehovha a nga na lona. (1 Yo. 4:8) Loko va ya va tshinela kusuhi na Yehovha va ya va tiyiseka swaku ntshembo wa vona wa ku hanya hi masiku ni masiku i wa ntiyiso. Hi ni lunghelo lalikulu la ku pfuna vanhu swaku va va kusuhi ni Papayi wa hina, naswona loko hi ya hi va djondzisa ku tiva Yehovha, Yehovha a hi vona na hi “tirha xikan’we” na yena. — 1 Ko. 3:5. Murindzi 02/24 paj. 12 par. 15

Loko ku li swaku u djondzisiwa Bibele kumbe vapsali va wena i Timboni ta Yehovha, ku nga va swaku u pimisa hi ku tsakamisiwa? Loko u pimisa hi swona, i swinene. Kambe na u nga se tsakamisiwa ku sungula u fanele u tinyiketela ka Yehovha. Kasi a munhu a tinyiketelisa ku yini ka Yehovha? Loko munhu a tinyiketela a yendla xikhongelo a tshembisa Yehovha swaku a ta gandzela yena ntsena wutomi la yena hinkwalu naswona a ku yendla ku rhandza ka Yehovha ku ta va kona ka lisima ku tlula swilo hinkwaswu. Phela ka xikhongelo xolexo a munhu a tshembisa Yehovha swaku a ta mu rhandza ‘hi mbilu ya yena hinkwayu, hi wutomi la yena hinkwalu, hi mimpimiso ya yena hinkwayu ni hi matimba ya yena hinkwawu.’ (Mar. 12:30) Kambe ku ni ku hambana ka ku tinyiketela ni ku tsakamisiwa. Loko munhu a tinyiketela a bula na Yehovha ntsena, kambe loko se a tsakamisiwa a va a komba vanhu hinkwavu swaku a tinyiketelile ka Yehovha. A ku tinyiketela i nchumu wa ku kwetsima hintamu naswona Yehovha a nyimela swaku munhu lweyi a nga tinyiketela a hetisisa xitshembiso lexi a nga xi yendla. — Ekl. 5:4. Murindzi 03/24 paj. 2 par. 2; paj. 3 par. 5

Hinkwavu lava nga chada va ni swikarhatu. Bibele li swi kombisa kahle leswo hikusa li li hinkwavu “lava chadaka va ta va ni swikarhatu awuton’wini.” (1 Ko. 7:28) Hi mhaka muni? Hikusa wanuna ni wansati lava chadaka, hi wumbirhi ka vona a va hetisekanga, va ni wumunhu la ku hambana naswona swi nga yendleka va rhandza minchumu ya ku hambana. Handle ka leswo, swi nga yendleka va kulisiwe ka tindhawu ta ku hambana ni ka swiyimu swa ku hambana, se minkama yin’wani va nga ha vona swilo leswi nuna kumbe nsati a swi yendlaka swa ku kala swi nga va tsakisi, leswi va kalaka va nga swi vonanga na va nge se chada. Se swilo leswo swi nga yendla swaku muchadu wa vona wu nga tsakisi. Kambe van’wani handle ka kuva va tirhisana swaku va lunghisa swikarhatu leswi va kumanaka na swona ka muchadu wa vona, va sungula ku nyika nandzu lweyi va nga chada na yena, naswona xa ku biha hintamu va pimisa swaku ndlela yayinene ya ku huma ka swona i ku va va hambana kumbe va divhorsiyara. Kambe ku nga va swaku leyo hi yona ndlela yayinene ya ku lunghisa swikarhatu swa vona? Nada, Yehovha a lava swaku nuna na nsati va hlonipha lulamiselo la muchadu hambi loko swi karhata ku hanyisana ni lweyi va nga chada na yena. Murindzi 03/24 paj. 16 par. 8; paj. 17 par. 11

Hambiloko se u tsakamisiwile, u tame u djondza hi Yehovha naswona lirhandzu la wena hi yena li tame li kula. Leswo swi yendle swaku ni ntshembo wa wena wa ku hanya ka misava leyi nga paradesi wu ya wu kula. (Heb. 5:13–6:1) Swi nga yendleka u swi vonile hi wexe swaku marito lawa ma nga ka buku la Varoma 5:2-4 i ya ntiyiso. U kumane ni swikarhatu swa ku hambanahambana kambe u swi tiyiselelile u tlhela u vona swaku Yehovha Xikwembu wa ku yamukela. Ku tiva swaku Yehovha wa ku rhandza swi yendla swaku u ya u tiyiseka hi swaku switshembiso swa yena swi ta hetiseka hikakunene. Se swoswi ntshembo lowu i wa ntiyiso ka wena naswona i wa lisima funtshi wu tlhela wu ku pfuna leswaku u va khoma kahle vanhu va ndjangu wa wena, wu ku pfuna ku yendla swiboho swaswinene, wu tlhela wu ku pfuna kuva u wu tirhisa kahle nkama wa wena. Mupostolo Pawulo a tlhele a vulavula hi nchumu wun’wani wa lisima hintamu ka mhaka leyi ya ntshembo lowu hi nga na wona. Yena a hi tiyisekisa swaku a ntshembo lowu hi nga na wona wu ta hetiseka hikakunene. — Rom. 15:13. Murindzi 12/23 mapaj. 12-13 mapar. 16-19

Loko u kumana ni xikarhatu xa ku tika hintamu u nga ha karhateka u tlhela u yendla minchumu ya ku a wu nga ta yi yendla loko a wu titwa kahle kumbe u pimisa kahle. Ku fana ni boti leli kumanaka ni xidzedze a xikarhi ka lwandle naswona li biwaka hi magandlati li ya hala ni hala, na hina minkama yin’wani hi nga ha karhateka hintamu ni xa ku xi yendla hi nga xi tivi. I mpsini leswi Yehovha a nga swi yendlaka swaku a hi pfuna leswaku hi nga titwisi xileswo? Yehovha a hi tiyisekisa swaku a ta va na hina, a hi tiyisa leswaku hi nga tsekatseki. Loko boti li kumana ni xidzedze amatini, li nga ha sungula ku biwa hi magandlati li ya hala ni hala. Kambe leswaku li nga mbombomeli ku vekiwa swilo a hansi ka boti leswi swi li yendlaka swaku hambiloko li biwa hi magandlati li nga mbombomeli. Leswo swi tlhela swi yendla swaku vanhu lava va nga ndzeni ka lona va yendza na va vhikelekile va tlhela va nga swi twi hintamu swaku boti li biwa hi magandlati. Hambileswo, leswaku swilo leswi vekiwaka ka boti swi li pfuna leswaku li nga mbombomeli, a boti li fanele li tama li famba. Hi lani ku fanaka, Yehovha a ta hi pfuna swaku hi tama hi tiya hi nga tsekatseki loko hi tama hi mu tirhela hi ku tshembeka hambiloko hi kumana ni swikarhatu. Murindzi 01/24 paj. 22 mapar. 7-8

Loko ku ni nchumu lexi ku yendlaka u chava hintamu, tivutisi leswi: ‘I mpsini leswi Yehovha a nga tshama a swi yendla?’ U nga ha pimisa hi swilo leswi Yehovha a nga swi yendla lani misaveni. Hi xikombiso, loko hi languta ndlela leyi Yehovha a swi hlayisaka hi yona swinyenyani ni maflori hambileswi swilo leswi swi kalaka swi nga mu gandzeli, se hina ke a nga tsandzeka ku hi hlayisa? A nge tsandzeki. Phela loko hi tinyika nkama wa ku pimisa hi swilo leswi, swi ta yendla swaku hi tama hi tshemba swaku Yehovha minkama hinkwayu a ta hi hlayisa. (Mat. 6:25-32) Phela u nga tlhela u pimisa hi ndlela leyi Yehovha a nga tshama a va pfuna hi yona vanhu va yena. U nga ha djondza ka Bibele hi vanhu lava va nga mu tshemba hintamu Yehovha kumbe u lerha swiperiyensiya swa vamakwerhu lava na vona va nga tshemba Yehovha. U nga tlhela u pimisa hi leswi Yehovha a nga tshama a ku yendlela swona wena swaku a ku hlayisa. Funtshi u nga ha tivutisa leswi: Yehovha a ni pfunise ku yini swaku ni mu tiva? (Yoh. 6:44) Yehovha a swi hlamulisa ku yini swikhongelo swa mina? (1 Yo. 5:14) Lifu la N’wana wa yena li ni pfunisa ku yini siku ni siku? — Efe. 1:7; Heb. 4:14-16. Murindzi 01/24 paj. 3 par. 6; paj. 7 par. 17