Swivutiso Swa Valerhi

I vamani “lava kalaka va nga li vapfumeli” lava Pawulo a nga vulavula hi vona ka 2 Vakorinto 6:14?

2 Vakorinto 6:14 yi li: “Mi nga patsiwi ni lava kalaka va nga li vapfumeli.” Loko hi kambisisa marito lawa, swa tikomba swaku Pawulo a vulavula hi vanhu lava kalaka va nga lumbi bandla la Wukreste. Leswi swa twanana ni leswi tindzimana tin’wani ta Bibele ti swi vulaka leti kombisaka leswi Pawulo a a lava ku vula swona loko a vulavula hi “lava kalaka va nga li vapfumeli” kumbe “lweyi a kalaka a nga li mupfumeli.”

Hi xikombiso, Pawulo a laye Vakreste hileswi a va ya mangalela vamakwavu “ka vanhu va ku kala va nga li vapfumeli.” (1 Vakorinto 6:6) Ka mhaka leyi, lava kalaka va nga li vapfumeli a ku vuliwa vajuwiji va tribunali la Korinto. Ka karta la yena la wumbirhi Pawulo a vule swaku Sathana a dlaye mimpimiso ya “lava kalaka va nga pfumeli”. Matihlo ya vanhu volavo swo fana ni loko ma mbhonyiwe hi “nguvu” swaku va nga ma voni mahungu ya ku tsakisa. Vanhu volavo lava kalaka va nga li vapfumeli a va yendlanga nchumu swaku va tirhela Yehovha, hikusa Pawulo a vule swaku “loko munhu a tlhelela ka Yehovha, nguvu ya susiwa.” — 2 Vakorinto 3:16; 4:4.

Vanhu van’wani lava kalaka va nga li vapfumeli a va wu yingisi nawu kumbe va gandzela swifaniso. (2 Vakorinto 6:15, 16) Kambe a hi hinkwavu va lwisanaka ni minawu ya Yehovha, funtshi van’wani va wu tsakela ntiyiso. Va vanyingi va ni nuna kumbe nsati lweyi a nga Mukreste funtshi va tsaka hi ku tama va tshama na yena. (1 Vakorinto 7:12-14; 10:27; 14:22-25; 1 Pedru 3:1, 2) Hambileswo, minkama hinkwayu loko Pawulo a vulavula hi ‘lava kalaka va nga li vapfumeli’ a a vulavula hi lava kalaka va nga lumbi bandla la Wukreste leli vumbiwaka hi “lava nga pfumela ka Hosi.” — Mintirho 2:41; 5:14; 8:12, 13.

Marito lawa ma nga ka 2 Vakorinto 6:14 ma pfuna Vakreste va vanyingi ka swiyimu swa swinyingi swa wutomi la vona. Kambe ma tirhisiwa hintamu swaku ma pfuna Vakreste lava lavetelaka munhu wa ku chada na yena. (Matewu 19:4-6) Mukreste lweyi a nga tinyiketela a tlhela a tsakamisiwa a nge laveteli munhu wa ku chada na yena ka lava kalaka va nga li vapfumeli. Hikusa mahanyelo ya vona, swikongomelo swa vona ni leswi va kholwaka ka swona swi hambane hintamu ni swa Vakreste va ntiyiso.

Swi li yini hi vanhu lava hi djondzaka na vona naswona va tipatsaka ni bandla? Hi nga ku yini hi vachumayeli lava kalaka va nga tsakamisiwanga? Hi nga vula swaku na vona a hi vapfumeli? Ihim. Vanhu lava nga pfumela ntiyiso wa mahungu ya ku tsakisa va tlhela va hanya hi leswi va swi djondzaka ka Bibele swaku va ta tsakamisiwa, a va fanelanga va vitaniwa swaku a hi vapfumeli. (Varoma 10:10; 2 Vakorinto 4:13) Hambi hi Korneliyo nkama na a nga se tsakamisiwa ku vuliwe swaku i wanuna lweyi “a a gandzela Xikwembu a tlhela a xi hlonipha”. — Mintirho 10:2.

Leswi marito lama nga ka 2 Vakorinto 6:14 ma kalaka ma nga tirhi ka vachumayeli lava kalaka va nga tsakamisiwanga, a swi ta va swinene ku va Mukreste a rhandzana a tlhela a chada ni muchumayeli wa ku kala a nga tsakamisiwanga? Ihim, a swi nga ta va swinene. Hi mhaka ya leswi Pawulo a nga swi byela vavasati lava nga Vakreste lava nga feliwa hi vavanuna. A te: “A chunsekile, a nga chada ni lweyi a mu lavaka, kambe aHosini ntsena.” (1 Vakorinto 7:39) Ndzimana leyi yi kombisa swaku Vakreste lava nga tsakamisiwa, va fanele va lava munhu wa ku chada na yena “aHosini ntsena.”

Se li vula yini rito leli nge “aHosini” ni leli nge “ka Kreste”? Ka Varoma 16:8-10 ni ka Vakolosa 4:7 Pawulo a vulavule hi lava nga “ka Kreste” kumbe lava nga “Hosini.” Ka tindzimana leti hi ta vona swaku lava a ku li ‘lava tirhaka na yena ka ntirho wa Kreste’, ‘lava nga tshembeka ka Kreste,’ ‘vamakwerhu va ku rhandzeka,’ ‘vatirhi va ku tshembeka’ ni ‘lava hi tirhaka xikan’we Hosini.’

Munhu a va mutirhi wa Hosi loko swi te yini? Munhu a yendla leswo loko a tinyikela hi ku swi rhandza swaku a yendla leswi swi nga nyimeliwa ka yena, hambiloko swi lava a titsona swin’wani. Yesu a te: “Lweyi a lavaka ku ni landzela, a a titshiki, se a rhwala mhandzi ya yena ya nxaniso a ni landzela nkama hinkwawu.” (Matewu 16:24) Munhu a sungula ku landzela Yesu a tlhela a yendla ku rhandza ka Xikwembu loko a tinyiketela ka xona, a gama a kombisa ku tinyiketela koloko hi ku tsakamisiwa. Loko se a tsakamisiwile, hi kona hi nga vulaka swaku i mutirhi wa ku tshembeka aHosini naswona wa yamukeliwa hi Yehovha Xikwembu.a Hi mhaka leyo, ku ‘chada aHosini’ swi vula ku chada ni munhu lweyi se a nga swi kombisa swaku i “mutirheli wa Xikwembu ni wa Hosi Yesu Kreste”. — Yakobe 1:1.

Lweyi a djondzaka Bibele ni Timboni ta Yehovha a tlhela a tikarhatela ku hanya hi leswi a swi djondzaka a fanele a khensiwa. Hambileswo, a nga se tinyiketela ka Yehovha naswona a nga se kombisa swaku a ta mu tirhela wutomi la yena hinkwalu. Swa ha lava a txintxa wutomi la yena na a nga se tsakamisiwa funtshi a nga se pimisa hi ku chada.

A swi ta va swinene kuva Mukreste a rhandzana ni munhu lweyi a djondzaka Bibele na a pimisa swaku a ta mu nyimela anze a tsakamisiwa swaku a chada na yena? Ihim. Leswo a swi ta yendla swaku lweyi a djondzaka Bibele a tsakamisiwa hi swivangelo swa ku kala swi nga li swinene, hi ku vona swaku ku ni Mukreste lweyi a lavaka ku chada na yena naswona a to chada na yena ntsena loko a tsakamisiwile.

Minkama ya yinyingi munhu a heta nkama wawutsongo na a li muchumayeli wa ku kala a nga tsakamisiwanga, a gama a tsakamisiwa. Hi mhaka leyo, ku chada Hosini ntsena a swi karhati. Se swi li yini loko munhu a ni ntanga ya ku a nga chada naswona a kulele ka ndjangu wa Vakreste funtshi a kona minkama hinkwayu amintlhanganwini, kambe i muchumayeli wa ku kala a nga tsakamisiwanga? Loko a li ka xiyimu lexo, i yini xi mu sivelaka ku tinyiketela ka Yehovha? Hi mhaka muni a heta nkama wa wunyingi na a nga tinyiketelanga? Ku nga va swaku ku ni lexi mu kanakanisaka? Hambileswi hi nga vulaka swaku i mupfumeli a hi nge vuli swaku a “Hosini.”

Leswi mupostolo Pawulo a nga swi vula hi mhaka ya ku chada swi pfuna hina. (Esaya 48:17) Loko lava va lavaka ku chada va tinyiketelile ka Yehovha, swi yendla swaku muchadu wa vona wu tiya hikusa hi vambirhi va rhandza Yehovha funtshi hi vambirhi va ni mahanyelo ni swikongomelo swa ku fana. Leswo swi yendla swaku va twanana va tlhela va tsaka. Handle ka leswo ku chada aHosini swi kombisa swaku va tshembeka ka Yehovha naswona a ta va katekisa hintamu hikusa “[Yehovha] wa tshembeka ka lweyi a tshembekaka.” — Tipisalema 18:25.

[Ntlhamuselo]

[Mufoto ka pajina]

“[Yehovha] wa tshembeka ka lweyi a tshembekaka”