Dzunisa Mutumbuluxi Wa Wena Hi Ku Tivekela Mintirho Leyi U Lavaka Ku Mu Yendlela Yona

“LOKO wanuna lweyi a fambisaka boti a nga swi tivi swaku hi kwini lomu a yaka kona, ka yena a swi na mhaka swaku a moya wu ba wu ya kwini.” Marito lawa ma vuliwe hi ntivi yin’wani ya filozofiya ya Muroma ya nkama wa vapostolo, ma tiyisekisa ntiyiso wa leswaku ku va wutomi li va ni xikongomelo munhu a fanele a hamba maplanu.

Bibele yi vulavula hi swikombiso swa swinyingi swa vanhu lava a va ni maplanu awuton’wini. Nowa a tirhe ku ringana 50 wa malembe na a “yaka ngalava leswaku ku ta ponisiwa ndjangu wa yena.” Muprofeta Moxe a a “wu nyimele swinene nkateko lowu a a ta wu kuma.” (Vaheberu 11:7, 26) Yoxuwa lweyi a nga pfaleta Moxe a nyikiwe ntirho hi Xikwembu wa ku ya hlula tiko la Kanana. — Deteronoma 3:21, 22, 28; Yoxuwa 12:7-24.

Hi nkama wa vapostolo, mupostolo Pawulo a a tivekele mintirho leyi a a ta yi yendlela Yehovha hi ku tiyisiwa hi marito ya Yesu lama nge: “Mahungu lawa ya ku tsakisa ya Mfumu ma ta chumayeliwa amisaveni hinkwayu”. (Matewu 24:14) Hi ku tiyisiwa hi marito ni hi swivono leswi a a kombiwa swona hi Hosi Yesu, ku patsa ni ntirho wa ‘ku chumayela hi vito la [Yesu] ka matiko,’ Pawulo a pfunise swinene ka ku vekiwa ka mabandla ya manyingi ya Wukreste a Aziya Menor ni Ewuropa. — Mintirho 9:15; Vakolosa 1:23.

Hakunene, vanhu va Yehovha ku sukela khale va tivekela mintirho leyi va lavaka ku yi yendlela Yehovha ni ku yi fikelela swaku va dzunisa Xikwembu. Hi nga yendla yini swaku hi tivekela mintirho leyi hi nga yi yendlelaka Yehovha? Hi yihi mintirho leyi hi nga tivekelaka yona, naswona hi nga yendla yini swaku hi yi fikelela?

Ku Va Ni Xikongomelo Xaxinene

Hi nga tivekela maplanu ka nchumu xin’wani ni xin’wani ka wutomi la hina, funtshi ka misava leyi va kona vanhu lava na vona va tivekelaka maplanu. Kambe mintirho leyi hi lavaka ku yi yendlela Yehovha yi hambanile ni maplanu ya vanhu va misava leyi. Vanhu va vanyingi ka misava leyi va tihambela maplanu hi ku lava ku ganya, ku kuma xitshamu kumbe ku va ni matimba. Ku tivekela maplanu na u pimisa hi ndlela leyi, a swi ta va na swi bihile swinene. Maplanu lawa ma dzunisaka Xikwembu hi lawa ma yelanaka ni wugandzeli ni Mfumu wa xona. (Matewu 6:33) Se munhu a yendla maplanu wolawo hileswi a rhandzaka Xikwembu ni vanhu van’wani na a ni xikongomelo xa ku tirhela Yehovha. — Matewu 22:37-39; 1 Timotiya 4:7.

Nkama lowu hi tivekela mintirho leyi yi dzunisaka Xikwembu, xikongomelo xa hina xi fanele xi va xaxinene ku nga na mhaka swaku hi lava ku fikelela malunghelo kumbe hi lava ku kulisa wuxaka la hina na Yehovha. Kambe hambiloko hi tivekela mintirho na hi ni xikongomelo lexinene a hi minkama hinkwayu hi yi fikelelaka. Hi nga yendla yini swaku hi tivekela mintirho hi tlhela hi lwela ku yi fikelela?

Ku Tikarhatela Ku Va Ni Mintirho Hi Mbilu Hinkwayu Swi Nga Pfuna

Pimisa hi leswi Yehovha a nga swi yendla misaveni. Hi marito lama nge: “Se li pela li gama li xa,” Yehovha a yendle swaku ku va ni minkama hi ku landzelelana ka yona. (Genesa 1:5, 8, 13, 19, 23, 31) Nkama Yehovha a nga sungula ku vumba swilo a a xi tiva kahle xikongomelo ni ntirho lowu a a lava ku wu yendla hi siku lolelo. Naswona Xikwembu xi hetisise xikongomelo xa xona. (Nhlawutelo 4:11) Yobo a vule leswi hi Yehovha Xikwembu: “Loko xi lava ku yendla nchumu, xa swi yendla.” (Yobo 23:13) Phela Yehovha a tsakile hintamu nkama a nga ‘txuvuka hinkwaswu leswi a nga swi yendla’ a gama a ku “swi saseke ngopfu”! — Genesa 1:31.

Leswaku mintirho leyi hi nga tivekela yona yi yendleka, hi fanele hi swi navela hi mbilu hinkwayu ku yi fikelela. I mpsini leswi nga hi pfunaka swaku hi va ni ku navela koloko? Phela hambiloko misava yi nga se helela naswona na yi nga na nchumu, Yehovha a swi kotile ku vona leswi a yi ta tshamisa xiswona hi wugamu ku nga ndhawu ya ku xonga leyi a yi ta kumeka mpfukeni, leyi a yi ta yendla swaku a dzunisiwa. Hilaha ku fanaka, na hina leswaku hi kota ku fikelela mintirho leyi hi yi lavaka hi fanele hi pimisa hi leswi ku yi fikelela swi nga hi pfunisaka xiswona. Hi leswi swi nga yendlekela Toni wa 19 wa malembe. Yena a nga yi khohlwanga ndlela leyi a nga titwa hi yona nkama a nga yendzela Betele la Timboni ta Yehovha aEwuropa Ocidental hi khambi la ku sungula. Ku sukela hi siku lolelo, ka nhloko ya yena a a tshamela ku tivutisa leswi: ‘A swi ta va ndjhani ku tshama ni ku tirhela ka ndhawu ya ku tshamisa xileswi?’ Toni a nga zanga a tshika ku pimisa hi mhaka leyi, a tame a yendla hinkwaswu swaku a kota ku fikelela ntirho lowu. Loko se ku hundze malembenyana, Toni a titwe na a tsakile swinene loko petição la yena la ku ya tirhela Betele li hlamuliwile

Ku va munghanu wa lava se va nga fikelela mintirho leyi na wena u yi navelaka swi ta ku pfuna swaku na wena u yi fikelela. Jayson, lweyi a nga ni 30 wa malembe, a a nga swi rhandzi ku ya ka ntirho wa ku chumayela nkama na a ha li mutsongo. Kambe loko se a hete xikola, a sungule ku tirha tanihi mupfuli wa ndlela, hi ku tsongokutsongo a sungule ku va muchumayeli wa nkama hinkwawu. I yini xi nga pfuna Jayson ku va a sungula ku navela ku va mupfuli wa ndlela? Yena a vula leswi: “Ku bula ni vapfuli va ndlela ni ku tirha na vona swi ni pfune swinene.”

Ku Tsala Mintirho Leyi U Navelaka Ku Yi Fikelela Swi Nga Ku Pfuna

Minchumu leyi hi ngo yi pimisa ntsena yi sungula ku twisiseka loko hi yi tsala. Solomoni a vone swaku marito yamanene ma nga kongomisa wutomi ku fana ni nhonga ya ku khayima swifuyu. (Ekleziyaxta 12:11) Loko marito ma tsaliwa, ma nga yi khumba swinene mimpimiso ni mbilu. Hi mhaka leyo Yehovha a byele tihosi ta Israyele swaku ti tihambela makopiya ya nawu. (Deteronoma 17:18) Hi mhaka leyo i swa lisima swinene ku tsala mintirho leyi hi navelaka ku yi fikelela ni ku yendla maplanu ya leswi hi nga swi yendlaka swaku hi yi fikelela. Ku tsala swikarhatu leswi hi nga ha kumanaka naswona ni leswi hi nga swi yendlaka swaku hi kota ku swi hlula. Swin’wani leswi nga hi pfunaka i ku tiva leswi hi lavaka ku swi djondza, xiperiyensiya lexi lavekaka, ni vanhu lava nga hi pfunaka ni ku hi seketela.

Geoffrey mupfuli wa ndlela wa nkama hinkwawu, naswona lweyi a tirhelaka ka teritoriyu la le kule la Aziya a pfuniwe hintamu hi ku tivekela mintirho leyi dzunisaka Xikwembu. Kambe lexi vavisaka hi leswaku nsati wa yena a file swa kola na kola. Loko se a titwananisile ni xiyimu lexi a a li ka xona, Geoffrey a tivekele xiboho xa ku heta nkama wa wunyingi ka ntirho wa ku chumayela se a tivekela mintirho leyi a a ta yi fikelela. Loko se a gamile ku tsala maplanu ya yena, a khongelile se a yendla xiboho xa ku zama ku sungula 3 wa swidjondzo ndzeni ka wheti. Siku ni siku a a kambela ntirho wa yena, naswona loko se ku hundze 10 wa masiku, a a kambela leswi a nga kota ku swi yendla. A swi kotile ku fikelela xikongomelo xa yena? Na a tsakile a vule swaku ina hikusa a sungule ku djondza Bibele ni 4 wa vanhu!

Tivekele Mintirho Leyi U Nga Ta Yi Fikelela Hi Nkama Wawutsongo

Loko wa ha sungula, mintirho yin’wani yi nga ha tikomba na yi karhata. Ka Toni lweyi se hi nga bula hi yena, ku tirhela aBetele la Timboni ta Yehovha ka tiko la yena a swi tikomba ingaku a swi nga ta koteka. Leswi swi yendleke hileswi a a hanya wutomi leli a li nga li lalinene, naswona a nga se tinyiketela ka Yehovha. Kambe Toni a yendle xiboho xa ku hanya hi ku pfumelelana ni minawu ya Yehovha naswona a swi vone swi yampsa a tsakamisiwa. Loko se a fikelele ntirho lowu a a wu lava, a tinyimisele ku tirha tanihi mupfuli wa ndlela wa ku pfunisa, naswona hi ku famba ka nkama a tirhe tanihi mupfuli wa ndlela wa nkama hinkwawu ku tlula leswo, a a tsale ka kalendariyu nkama lowu a a lava ku sungula hi wona. Se loko a tirhe tanihi mupfuli wa ndlela hi nkamanyana, a swi vonile swaku ku navela ka yena ka ku ya tirha Betele se a swi ta koteka.

Na hina a swi ta va swinene ku hambanisa mintirho leyi hi lavaka ku yi fikelela hi nkama wa wunyingi ni mintirho leyi hi lavaka ku yi fikelela hi nkama wawutsongo. Mintirho leyi hi swi kotaka ku hantla hi yi fikelela ya nkama wawutsongo yi nga ha hi pfuna ku fikelela mintirho ya nkama wa ku leha. Ku tshamela ku kambela nkama lowu hi nga wu heta swaku hi fikelela mintirho leyi hi nga na yona swoswi, swi ta hi pfuna ku veka tihlo ka mintirho leyi hi navelaka ku yi fikelela. Ku khongela ka Yehovha nkama ni nkama hi mintirho leyi hi navelaka ku yi fikelela, swi ta hi pfuna swaku hi tama hi lava ku yi fikelela. Mupostolo Pawulo a vule leswi: “Khongelani minkama hinkwayu.” — 1 Vatesalonika 5:17.

Swi Lava U Tinyimisela Ni Ku Swi Lwela

Ku ta va ni mintirho leyi hi ta kalaka hi nga yi koti ku yi fikelela, hambiloko hi yi yendlele kahle maplanu ni ku swi lava hi mbilu hinkwayu. Mudjondzisiwa Yohani lweyi a a vitaniwa Marka swi nga yendleka swi mu karhatelile nkama mupostolo Pawulo a nga yala ku mu teka ka liyendzo la yena la wumbirhi! (Mintirho 15:37-40) Marka a swi lava a djondza ka leswi swi nga mu yendlekela ni ku yampsisa ndlela leyi a a swi lava hi yona ku fikelela mintirho yin’wani naswona a swi kotile. Hi ku famba ka nkama, mupostolo Pawulo a vulavule kahle hi Marka. Naswona hi ku famba ka nkama Marka a tirhisane swinene na mupostolo Pedru aBabilona. (2 Timotiya 4:11; 1 Pedru 5:13) Swi nga yendleka a ntirho wa lisima lowu a nga wu kuma i ku va a tsale hi leswi swi nga yendlekela Yesu nkama lowu na a li lani misaveni ni ntirho wa yena wa ku chumayela.

Nkama lowu hi lwelaka ku fikelelaka mintirho leyi yi tsakisaka Xikwembu, hi nga ha kumana ni swikarhatu. Kambe handle ka ku va hi godola, hi fanele hi tikambela ku vona lani hi nga yampsisaka kona. Hambiloko hi kumana ni swikarhatu, swi lava hi tinyimisela ni ku swi lwela. Solomoni lweyi a a li hosi ya ku tlhariha a vule leswi: “Tshemba Yehovha ka hinkwaswu leswi u swi yendlaka, kutani maplanu ya wena ma ta famba kahle.” — Swivuriso 16:3.

Kambe, minkama yin’wani ku ni swiyimu leswi swi nga hi yendlaka hi nga swi koti ku fikelela mintirho leyi hi lavaka ku yi yendlela Yehovha. Hi xikombiso, ku tshamela ku vabya, ku hlayisa ndjangu swi nga ha yendla swaku mintirho yin’wani hi nga yi koti ku yi fikelela. Kambe hi nga khohlwi swaku nkateko wa wukulu i ku kuma wutomi la ku kala li nga heli amatilweni kumbe aparadesi lani misaveni. (Luka 23:43; Vafilipiya 3:13, 14) Se hi nga wu kumisa ku yini nkateko wolowo? Mupostolo Yohani a te: “Lweyi a yendlaka ku rhandza ka Xikwembu a ta tshama hi masiku.” (1 Yohani 2:17) Hambiloko xiyimu xa hina xi nga hi pfumeleli ku fikelela mintirho yin’wani, kambe hi fanele hi tama hi hlonipha hintamu ‘Xikwembu xa ntiyiso hi tlhela hi hlayisa minawu ya xona.’ (Ekleziyaxta 12:13) Phela ku tivekela mintirho swi hi pfuna ku tama hi yendla ku rhandza ka Xikwembu. Hi mhaka leyo maplanu ya hina a ma yise ku dzuneka ka Xikwembu.

[Kwadru leli nge ka pajina]

Mintirho Leyi Hi Nga Tivekelaka Yona

○ Ku lerha Bibele siku ni siku

○ Ku lerha marevhixta hinkwawu ya Murindzi ni Khindlimuka!

○ Ku yampsisa ndlela leyi hi khongelaka hi yona

○ Ku kombisa mihandzu ya moya wa ku kwetsima

○ Ku lwela ku fanelekela mintirho yin’wani abandleni

○ Ku yampsisa machumayelelo ya hina ni ku djondzisa

○ Ku zama ku va ni xiperiyensiya xa ku chumayela swa kola na kola, hi telefoni ni mabazara