Jardim La Edeni Indjhe A A Li Kaya La Vanhu Va Ku Sungula?

TIVONI na wu li ka jardim, na ku rhulile, na ku nga na guwa leli nga kona madoropeni. Jardim la kona i likulu hintamu naswona a xi kona lexi yendlaka swaku ku nga vi na ku rhula. Xa ku tsakisa hintamu, a wu karhateki hi nchumu, a wu vabyi funtshi a wu twi ku vava. Naswona u tikhorisa hi ku helela hi swilo leswi nga kona ajardim.

Loko u txuvuka lweswi nga matlhelweni, u vona maflori ya ku saseka, minambu ni minsinya ya ku saseka. U beliwa hi swimoyani swa ku pepa u tlhela u twa ni ku nun’whela ka ku tsakisa. U twa matluka ya minsinya loko ma wa, u twa guwa la mati, u twa swinyanyani ni swiharhi swin’wani loko swi yimbelela. Loko u pimisa hi ndhawu leyi, indjhe a wu swi naveli ku hanya ka yona?

Amisaveni hinkwayu vanhu va kholwa swaku vanhu va ku sungula a va tshama ka ndhawu yoleyo. Ku sukela khale, vanhu va wukhongeli la Xiyuda, Vasurumani ni va wukhongeli lin’wani lava tivulaka swaku i vakreste va djondzisiwa swaku Xikwembu xi yendle jardim la Edeni xi gama xi veka Adamu na Evha. Hi ku ya hi Bibele Adamu na Evha a va hanya a ku rhuleni na va tsakile. A va hanyisana hi ku rhula naswona a va ni ku rhula ni swiharhi va tlhela va va ni ku rhula ni Xikwembu lexi nga va nyika ntshembo wa ku hanya hi masiku ni masiku ka ndhawu liyani ya ku saseka hintamu. — Genesa 2:15-24.

Vanhu va wukhongeli la Mahindu na vona va ni mavonelo ya vona hi paradesi leli a li li kona khale. Kasi vanhu va wukhongeli la Mabudha na vona va vula leswaku varhangeli va vona a va hanya ka ndhawu yoleyo leyi a yi fana ni paradesi. Naswona tikereke ta tinyinyi ta Afrika ti djondzisa switoriya swa swinyingi leswi hi khumbukisaka Adamu na Evha.

Phela mhaka ya leswaku ku tshame ku va ni jardim la ku saseka yi tolovelekile ka tikereke ta tinyingi ni ka mikhuva ya vanhu va vanyingi amisaveni. Mutsali mun’wani a vule leswi: “Vanhu va vanyingi va swi tiva swaku ku tshame ku va ni paradesi leyi vanhu lava a va tshama ka yona a va hetisekile, a va chunsekile, a va ni ku rhula, a va tsakile, a va ni swilo swa ku tala naswona a va hanya na va nga chavi kumbe ku holovisana. . . . Leswi swi yendle swaku vanhu va vanyingi va tlhela va navela ku hanya aparadesi naswona va yendla leswi va nga swi kotaka leswaku paradesi li tlhela li va kona.”

Indjhe switoriya leswi swa swinyingi leswi vulavulaka hi jardim la Edeni ku ni lani swi sukelaka kona? Ku nga va swaku swilo hinkwaswu leswi vanhu lava va swi vuletelaka hi jadim la Edeni, va swi vula hi mhaka ya leswi hikakunene ku nga va ni jardim? Adamu, Evha ni jardim la Edeni swi ve kona hikakunene?

Vakaneti a va nyimi na yona mhaka leyi. Leswi namuntlha vanhu va vanyingi va kholwaka ka siyensiya, va vula swaku mhaka yoleyo i xitoriya naswona a yi yendlekanga. Lexi hlamalisaka hi leswaku van’wani va vakaneti volavo i vafundhisi. Va vula leswaku a jardim la Edeni a li zanga li va kona. Va vula leswaku mhaka leyi vulavulaka hi Adamu, Evha ni jardim la Edeni i xifaniso kumbe i mavunhwa.

I ntiyiso swaku Bibele li na swona swifaniso. Hambi hi Yesu a tirhise swifaniso leswi tiviwaka hintamu. Hambileswo, loko Bibele li vulavula hi jardim la Edeni a li hi byeli swaku i xifaniso kambe li vula swaku i nchumu wa hikakunene lowu nga yendleka. Se loko hi nga swi kholwi leswi Bibele li swi vulaka hi jardim la Edeni, hi nga swi kholwisa ku yini swilo swin’wani leswi Bibele li vulavulaka hi swona? A hi voneni swaku i mpsini swi yendlaka vanhu van’wani va nga kholwi swaku jardim la Edeni li ve kona. Hi tlhela hi vona swaku swivangelo swa vona swa twala kumbe a swi twali. Ndzhaku ka leswo, hi ta vona swaku hi mhaka muni ku djondza hi mhaka leyi swi li swa lisima ka mun’wani ni mun’wani wa hina.