Timboni Ta Yehovha Ta Va Pfumelela Vavasati Swaku Va Djondzisa?

Ina, amisaveni hinkwayu ku ni Timboni ta Yehovha ta tinyingi ta vavasati leti ti djondzisaka vanhu. Vavasati lava va lumba ntlawa wawukulu lowu wu chumayelaka mahungu ya ku tsakisa ya Mfumu wa Xikwembu. Buku la Tipisalema 68:11 li vulavule hi vona loko li ku: “Vavasati lava chumayelaka mahungu ya ku tsakisa i ntlawa wawukulu wa masonchwa.”

Hambileswo, madjondzisela ya vavasati lava va nga Timboni ta Yehovha ma hambanile ni madjondzisela ya vavasati va tikereke tin’wani. A hi voneni leswi swi va hambanisaka.

Vavasati va tikereke tin’wani va rhangela va tlhela va djondzisa vanhu akerekeni, kambe Timboni ta Yehovha ta xisati ti djondzisa vanhu lava ti kalaka ti nga va tivi. Ti yendla leswo hi ku chumayela hi munti ni munti ni ka tindhawu tin’wani. Xin’wani lexi xi hambanisaka Timboni ta Yehovha ta xisati i ntirho lowu ti wu yendlaka abandleni. Vafundhisi va xisati va rhangela va tlhela va djondzisa minawu ka tikereke ta vona, ku hambana ni leswo vavasati lava va nga Timboni ta Yehovha a va djondzisi loko ku ni vavanuna lava va nga tsakamisiwa, ku djondzisa ntsena vavanuna lava va nga vekiwa swaku va yendla ntirho lowu. — 1 Timotiya 3:2; Yakobe 3:1.

Loko ku vulavuliwa hi lava a va ta rhangela ni ku djondzisa abandleni, Bibele li vulavula hi vavanuna ntsena. Loko mupostolo Pawulo a tsalele doda lin’wani ku nga Tito a te: “Ni ku siye Kreta swaku u . . . veka madoda ka doropa lin’wani ni lin’wani.” Pawulo a tlhele a yengesela a ku wanuna lweyi a vekiwaka swaku a rhangela a fanele a va “lweyi a kalaka a nga na xa ku soliwa hi xona, a nga ni nsati mun’we”. (Tito 1:5, 6) Pawulo a tlhele a byela Timotiya minchumu leyi fanaka ka karta a nga mu tsalela a ku: “Loko munhu a lava ku va doda a navela ntirho wawunene. Doda li fanele li nga na xa ku soliwa hi xona, li va ni nsati mun’we . . . li fanelekela ku djondzisa”. — 1 Timotiya 3:1, 2.

Hi mhaka muni ntirho wa ku rhangela wu nyikiwe vavanuna ntsena? Pawulo a te: “A ni mu pfumeleli wansati leswaku a djondzisa kumbe ku manda wanuna, kambe a fanele a tshama na a miyelile. Hikusa Adamu hi yena a nga rhanga a vumbiwa ku gama ku landzela Evha.” (1 Timotiya 2:12, 13) Leswi Xikwembu xi nga rhanga xi yendla wanuna swi kombisa swaku hi yena a faneleke a rhangela a tlhela a djondzisa.

Timboni ta Yehovha loko ti djondzisa ti tekelela xikombiso xa Yesu Kreste. Loko Luka a vulavula hi ntirho wa ku chumayela lowu Yesu a nga wu yendla a te Yesu a fambe “hi madoropa ni swidoropani, a chumayela mahungu ya ku tsakisa ya Mfumu wa Xikwembu.” Yesu a game a rhuma valandzeli va yena swaku va yendla ntirho lowu fanaka “va famba hi swidoropani va chumayela mahungu ya ku tsakisa ni ku hanyisa lava vabyaka.” — Luka 8:1; 9:2-6.

Ninamuntlha vavasati ni vavanuna lava va nga Timboni ta Yehovha va yendla hinkwaswu swaku va hetisisa marito ya Yesu lawa ma nge: “Naswona mahungu lawa ya ku tsakisa ya Mfumu ma ta chumayeliwa amisaveni hinkwayu leswaku ma va wumboni ka matiko hinkwawu; kutani hi kona magamu ma nga ta fika.” — Matewu 24:14.