Mavunhwa Lawa Ma Yendlaka Swaku Vanhu Va Vanyingi Va Nga Li Tivi Vito La Xikwembu

LESWI VANYINGI VA KHOLWAKA KA SWONA

“A hi tiyiseki swaku vito la Xikwembu hi fanele hi li tirhisa kumbe nada, funtshi loko ku li leswaku hi fanele hi li tirhisa a hi li tivi vito la xona.” — Profesori wa swa Wukhongeli, David Cunningham.

LESWI BIBELE LI SWI VULAKA

Xikwembu xi te: “Hi mina Yehovha. Lelo i vito la mina.” (Esaya 42:8) Hi Xiheberu vito leli nge Yehovha li vula swaku “A Yendla Leswaku Swi Va Kona.” — Genesa 2:4, ntlhamuselo.

Yehovha a lava swaku hi tirhisa vito la yena, hi mhaka leyo Bibele li li: “Mi dzunisa vito la yena, byelani vanhu mintirho ya yena! Va byeleni swaku vito la yena la hlonipheka.” — Esaya 12:4.

Yesu a li tirhisile vito la Xikwembu. Ka khambi lin’wani na a vulavula hi vadjondzisiwa va yena ka xikhongelo a te: “Ni va djondzisile vito la wena naswona ni ta tama ni va djondzisa.” Hi mhaka muni Yesu a va djondzise vito la Yehovha? Yena a yendle leswo ‘swaku va rhandza van’wani ku fana ni leswi Yehovha a nga mu rhandzisa swona, ni swaku yena ni vadjondzisiwa va yena va twanana.’ — Yohani 17:26.

HI MHAKA MUNI LESWO SWI LI SWA LISIMA?

Ntivi yin’wani ya swa wukhongeli leyi vitaniwaka Walter Lowrie yi te: “Loko munhu a nga li tivi vito la Xikwembu swi vula swaku a nga xi tivi Xikwembu. Funtshi loko a pimisa swaku xo va matimba ya ku kala ma nga voneki ntsena a swi nge koteki kuva a xi rhandza.”

Victor a a ya igreja vhiki ni vhiki kambe a a vona ingaku a nga xi tivi Xikwembu. Yena a li: “Siku leli ni nga djondza swaku vito la Xikwembu i Yehovha, a swo fana ni ku a ni yo nyima phambheni ka xona se hi byelana mavito. Phela ni sungule ku xi tiva Xikwembu lexi se a ku hundze nkama wa wunyingi na ni twa ku vulavuliwa hi xona. Ni sungule ku vona Xikwembu na xi li Munhu wa hikakunene funtshi na xi li Munghanu wa mina.”

Yehovha a kusuhi ni lava tirhisaka vito la yena hi mhaka leyo, a va tshembisa leswi lava pimisaka hi lona: “Ni ta va komba timpsalu, ku fana ni papayi lweyi a nga ni timpsalu ka n’wana wa yena lweyi a mu yingisaka.” (Malakiya 3:16, 17) Naswona Bibele li vula swaku Yehovha a katekisa lava tirhisaka vito la yena loko li ku: “Lweyi a vitanaka vito la Yehovha a ta ponisiwa.” — Varoma 10:13.