NHLOKOMHAKA YA KAPA | MAVUNHWA LAWA MA YENDLAKA SWAKU VANHU VA NGA XI RHANDZI XIKWEMBU
Hi Mhaka Muni Van’wani Swi Va Karhatela Ku Rhandza Xikwembu?
“‘U fanele u rhandza Yehovha Xikwembu xa wena hi mbilu ya wena hinkwayu, hi wutomi la wena hinkwalu ni hi mimpimiso ya wena hinkwayu.’ Lowu hi wona nawu wa lisima ni wa ku sungula ka hinkwayu.” — Yesu Kreste, 33 E.C.a
Vanhu van’wani va pimisa swaku swa karhata ku rhandza Xikwembu. Va tibyela swaku Xikwembu a xi na mhaka na vona, a xi va twisisi funtshi xi ni mona. Vona leswi van’wani va swi vulaka:
“A ni khongela ka Xikwembu ni kombela swaku xi ni pfuna kambe a ni pimisa swaku xi kule hintamu na mina. A ni tibyela swaku Xikwembu xo va matimba ya ku kala ma nga voneki ntsena funtshi a ni pimisa swaku a xi na lirhandzu.” — Marco,b Itália.
“Hambileswi a ni swi lava ku tirhela Xikwembu a swi yendla ingi xona xi kule na mina naswona a ni pimisa swaku xa karhata, xi rhandza ku khatisa vanhu funtshi a xi na ntwelawusiwana.” — Rosa, Guatemala.
“Nkama na na ha li mutsongo, a ni pimisa swaku Xikwembu xi lavetela swihoxo ka vanhu leswaku xi va khatisa kambe hi ku famba ka nkama ni sungule ku pimisa swaku a xi na mhaka ni leswi vanhu va swi yendlaka. Naswona ka mina, a xi fana ni hosi leyi yendlaka swiboho ka wutomi la vanhu kambe na yi nga na mhaka na vona.” — Roberta, Canadá.
Se wena u swi vonisa ku yini? Indjhe swa fanela ku va hi rhandza Xikwembu? Se i khale na Vakreste va tivutisa leswo naswona ka nkama wa khale, ku tala ka vona a va nga khongeli ka Xikwembu hikusa a va xi chava. Ntivi ya swa Xitoriya leyi yi vitaniwaka Will Durant yi te: “A swi ta kotekisa ku yini kuva munhu lweyi a nga mudjohi a tiya a khongela ka Xikwembu lexi nga ka xitshamu xa ku tlakuka naswona xi nga kule na hina?”
Hi mhaka muni vanhu van’wani va pimisa swaku Xikwembu xa “karhata ni leswaku xi kule na hina?” Kasi Bibele li djondzisa swaku Xikwembu xi ni wumunhu la ku tshamisa ku yini? Indjhe loko wo djondza swaku Xikwembu xi ni wumunhu la ku tshamisa ku yini, a swi nge ku pfuni leswaku u sungula ku xi rhandza?
b Mavito man’wani ma tintxiwile.