Kombisa Lipfumelo Ka Switshembiso Swa Yehovha

1. Hi mhaka muni hi fanele hi khensa Yehovha hi mhaka ya leswi a hi pfunaka leswaku hi va ni lipfumelo?

LIPFUMELO i la lisima hintamu kambe a hi vanhu hinkwavu va nga na lona. (2 Tes. 3:2) Kambe Yehovha a nyika vanhu va yena hinkwavu “lipfumelo.” (Rom. 12:3; Gal. 5:22) Hi mhaka leyo, hi fanele hi mu khensa Yehovha hileswi a hi pfunaka leswaku hi va ni lipfumelo.

2, 3. a) Hi yini minkateko leyi kumiwaka hi lava va nga li lipfumelo? b) Hi swini swivutiso leswi hi nga ta bula hi swona ka nhlokomhaka leyi?

² Yehovha hi ku tirhisa Yesu a koka vanhu lava nga ni timbilu tatinene. (Yohani 6:44, 65) Loko vanhu volavo va va ni lipfumelo ka Yesu va kota ku rivaleliwa swidjoho swa vona. Leswo swi yendla leswaku va va vanghanu va Yehovha hi masiku ni masiku. (Rom. 6:23) Phela loko a ku nga li Yehovha leswo a swi nga ta koteka, leswi hi nga vadjohi hinkwerhu a hi ta fa. (Pis. 103:10) Kambe leswi Yehovha a nga ni wunene a yendle leswaku mahungu ya ku tsakisa ma khumba timbilu ta hina. Hi mhaka leyo, hi kombisa lipfumelo ka Yesu hi tlhela hi va ni ntshembo wa ku hanya hi masiku ni masiku. — Lerha 1 Yohani 4:9, 10.

³ Kasi i yini lipfumelo? Indjhe i ku tiva switshembiso swa Xikwembu ntsena? Xa lisima hintamu, hi nga yendla yini leswaku hi kombisa leswaku hi ni lipfumelo?

VANA NI LIPFUMELO A MBILWINI

4. Hi mhaka muni lipfumelo li fambisana ni mbilu ku nga li ntsena ku tiva leswi Xikwembu xi nga ta swi yendla ka nkama lowu taka.

⁴ Ku va ni lipfumelo a hi ku tiva ntsena leswi Xikwembu xi nga ta swi yendla ka nkama lowu taka. Lipfumelo li ni matimba swinene naswona li nga yendla leswaku munhu a navela ku yendla ku rhandza ka Xikwembu. Phela lipfumelo li fambisana ni mbilu naswona li yendla leswaku munhu a lava ku byela van’wani mahungu ya ku tsakisa. Mupostolo Pawulo a te: “Hikusa loko u vula hi nomo wa wena ka vanhu swaku Yesu i Hosi, u tlhela u pfumela ka mbilu ya wena swaku Xikwembu xi mu pfuxile ka lava nga fa, u ta ponisiwa. Hikusa leswaku munhu a vuliwa wa ku lulama a fanele a pfumela mbilwini, kambe leswaku a ponisiwa a fanele a swi vula hi nomo wa yena lomu ka vanhu.” — Rom. 10:9, 10; 2 Kor. 4:13.

5. a) Hi mhaka muni swi li swa lisima ku va ni lipfumelo? b) Lipfumelo li fanisa ku yini ni xinsinyani?

⁵ Leswaku hi kuma a wutomi la ku kala li nga heli ka misava ya nyuwani swi lava hi va ni lipfumelo la ku tiya. Lipfumelo li fana ni xinsinyani. Phela xinsinyani xi lava mati. Loko xi nga hlayisiwi kahle xi nga vuna kambe loko xi hlayisiwa kahle xi nga xonga xi tlhela xi tiya. A xinsinyani hambiloko xi xongile xi tlhela xi kula kahle kambe loko xi nga ma kumi mati xi nga fa. Hi lani ku fanaka, loko na hina hi nga li hlayisi lipfumelo la hina na lona li nga fa. (Luka 22:32; Heb. 3:12) Hi fanele hi yendla hinkwaswu leswi hi nga swi kotaka leswaku lipfumelo la hina li tama li “tiya”, loko hi yendla leswo hi ta tama hi tiya a ‘lipfumelweni.’ — 2 Tes. 1:3; Tito 2:2.

I YINI LIPFUMELO?

6. Hi swini swilo swimbirhi leswi patsiwaka ka lipfumelo hi ku ya hi Vaheberu 11:1?

⁶ Bibele li vula swaku lipfumelo i yini ka Vaheberu 11:1. (Lerha.) Hi ku ya hi ndzimana leyi, a lipfumelo li patsa a minchumu yimbirhi leyi kalaka yi nga voneki: 1) “Leswi hi nga swi nyimela” 2) “leswi hi kalaka hi nga swi voni.” Swilo leswi hi nga swi nyimela, ku vuliwa swilo swa ku fana ni leswi Xikwembu xi nga swi tshembisa swaku xi ta swi yendla ka nkama lowu taka kambe swi kalaka swi nga se yendleka, swa ku fana ni ku helisiwa ka wubihi ni ku ta ka misava ya nyuwani. Swilo leswi hi kalaka hi nga swi voni ku vuliwa vanhu kumbe swilo leswi kalaka swi nga voneki kambe hi tiyisekaka leswaku swi kona ku fana na Yehovha, Yesu, tintsumi ni Mfumu wa Xikwembu. (Heb. 11:3) Hambileswi hi kalaka hi nga swi voni kambe ha tiyiseka leswaku swi kona hikakunene. A rito la Xigriki leli li nga hundzuluxeliwa li va ku “tiyiseka” ka Vaheberu 11:1 li nga tlhela li hundzuluxeliwa li va “swilo leswi kholwisaka”. Hi nga swi kombisa ku yini swaku ntshembo wa hina wa hanya ni leswaku ha kholwa ka swilo leswi kalaka swi nga voneki leswi swi vuliwaka ka Bibele? Hi nga swi kombisa hi marito ni hi leswi hi swi yendlaka. Loko hi nga yendli leswo, lipfumelo la hina li ta va li nga li la nchumu.

7. Xikombiso xa Nowa xi hi pfunisa ku yini leswaku hi twisisa swaku swi vula yini ku va ni lipfumelo? (Vona foto a ku sunguleni ka nhlokomhaka leyi.)

⁷ Ka Vaheberu 11:7 ku vulavuliwa hi lipfumelo leli Nowa a nga li kombisa. Pawulo a vule leswaku Nowa “a nkama a nga byeliwa swilo leswi a swi ta yentxeka hambi swi nge se voniwa, a xi yingisile Xikwembu kutani a yaka ngalava leswaku ku ta ponisiwa ndjangu wa yena.” Nowa a swi kombisile leswaku a a ni lipfumelo hi ku yaka ngalava yayikulu. Phela vavhizinyu va Nowa va mu vutisile leswaku hi mhaka muni a a tikarhata a yendla ntirho lowu wawukulu. Phela Nowa a nga miyelanga kumbe a va byela leswaku va tendera ta wutomi la vona kambe hi lipfumelo a va byele leswaku Xikwembu a xi ta helisa vanhu va ku biha hi ku tirhisa ndhambi. Swi nga yendleka Nowa a tirhise marito lawa ma nga vuliwa hi Yehovha lawa ma nge: “Ni lava ku helisa vanhu hinkwavu, hikusa misava yi tale hi wubihi . . . Mina ni ta tisa mati ya ndhambi kuva ni helisa vanhu ni swiharhi leswi hefemulaka hansi ka matilo. Hinkwaswu leswi hanyaka misaveni swi ta fa.” Naswona a hi kanakani leswaku Nowa a va tlhamusele leswaku akuva ta pona a va fanele va nghena ka ngalava hi ku ya hi leswi Xikwembu a xi swi vulile. Hi mhaka leyo, Nowa a kombise leswaku a a ni lipfumelo hi ku va “muchumayeli wa swa ku lulama”. — Gen. 6:13, 17, 18; 2 Ped. 2:5.

8. Yakobo a vule leswaku i yini lipfumelo la hikakunene?

⁸ Yakobo na yena a vulavulile hi lipfumelo. Swi nga yendleka a tsale karta la yena nkama Pawulo a wa ha ku tsala karta la Vaheberu. Ku fana na Pawulo, Yakobo a tlhamusele leswaku ku va ni lipfumelo la hikakunene a swi vuli ku kholwa ntsena kambe swi lava u yendla xanchumu. A te: “Ni kombi lipfumelo la wena la ku kala li nga na mintirho, se mina ni ta ku komba lipfumelo la mina hi mintirho.” (Yak. 2:18) Leswaku a kombisa ku hambana loku nga kona ka ku kholwa ni ku kombisa lipfumelo, Yakobo a vulavule hi leswi swi yendlekaka ka madimoni. Madimoni ma kholwa leswaku Xikwembu xi kona kambe a ma na lipfumelo la hikakunene. Ku vula ntiyiso, madimoni ma yendla hinkwaswu leswi ma nga swi kotaka leswaku leswi Xikwembu xi nga swi tshembisa swi nga yendleki. (Yak. 2:19, 20) Yakobo a tirhise xikombiso xa Abrahamu leswaku a tlhamusela mhaka leyi, a te: “Kasi papayi wa hina Abrahamu a nga vuliwanga swaku a lulamile hi mhaka ya mintirho ya yena, hileswi a nga nyikela n’wana wa yena Izaki ka altari ke? Wa swi vona swaku a kombise lipfumelo la yena hi mintirho naswona li hetisekile hi mhaka ya mintirho.” Leswaku a kombisa swaku a lipfumelo la ku kala li nga na mintirho a li pfuni nchumu, Yakobo a te: “Ku fana ni leswi miri lowu kalaka wu nga na wutomi wu nga fa ni lipfumelo la ku kala li nga na mintirho li file.” — Yak. 2:21-23, 26.

9, 10. Yohani a hi pfunisa ku yini ku twisisa lisima la ku kombisa lipfumelo?

⁹ Loko se ku hundze 30 wa malembe, mupostolo Yohani a tsale buku la Yohani ni 3 wa makarta. Ku fana ni vatsali van’wani va Bibele, Yohani a a swi twisisa leswaku lipfumelo la ntiyiso li vula yini. Yohani a tirhise rito la Xigriki leli minkama ya yinyingi loko li hundzuluxeliwa li vaka ku “kombisa lipfumelo” ku tlula vatsali hinkwavu va Bibele.

¹⁰ Hi xikombiso, Yohani a te: “Lweyi a pfumelaka ka N’wana a ta kuma wutomi la ku kala li nga heli, kasi lweyi a kalaka a nga mu yingisi N’wana a nge li kumi, kambe a ta kwateliwa hi Xikwembu.” (Yohani 3:36) Ku va ni lipfumelo la hikakunene swi vula ku yingisa leswi Yesu a nga hi byela swona. Ka buku la Yohani hi vona leswaku Yesu a hlaye makhambi ya manyingi leswaku hi fanele hi kombisa lipfumelo. Marito ya Yesu lama nge: “Ku kombisa lipfumelo” ma vula leswaku a hi ku kombisa kan’we kambe i ku tama u swi yendla. — Yohani 3:16; 6:29, 40; 11:25, 26; 14:1, 12.

11. Hi nga swi khensisa ku yini leswi hi tivaka ntiyiso?

¹¹ Swa tsakisa leswi Yehovha hi ku tirhisa moya wa ku kwetsima a hi pfunaka leswaku hi tiva ntiyiso a tlhela a hi pfuna leswaku hi va ni lipfumelo ka mahungu ya ku tsakisa! (Lerha Luka 10:21.) I swa lisima ku khensa Yehovha minkama hinkwayu hileswi a nga hi koka ka yena hi ku tirhisa Yesu lweyi a nga, “Murhangeli wa Mukulu ni Muhetisisi wa lipfumelo la hina.” (Heb. 12:2) Hi nga yendla yini leswaku hi kombisa ku khensa a wunene la Yehovha? Hi fanele hi tama hi tiyisa a lipfumelo la hina hi ku khongela ni ku djondza Bibele. — Efe. 6:18; 1 Ped. 2:2.

12. Hi nga li kombisa ku yini lipfumelo?

¹² Leswi hi swi yendlaka swi fanele swi kombisa leswaku hi ni lipfumelo ka switshembiso swa Yehovha. Hi xikombiso, hi fanele hi tama hi chumayela mahungu ya ku tsakisa ya Mfumu wa Xikwembu hi tlhela hi yendla ntirho wa ku yendla vanhu va va vadjondzisiwa. Naswona “a hi yentxeleni hinkwavu swa swinene, kambe ngopfungopfu lava nga na hina ku pfumeleni.” (Gal. 6:10) Naswona a hi tameni hi lwela ku hlivila a “wumunhu la khale ni mintirho ya lona” hi ku yendla hinkwaswu leswaku hi hlayisa a wunghanu la hina na Yehovha. — Kol. 3:5, 8-10.

KU VA NI LIPFUMELO KA XIKWEMBU HI SWONA LESWI SWI HI TIYISAKA

13. a) Hi mhaka muni swi li swa lisima ku va ni lipfumelo ka Xikwembu? b) Bibele li vula swaku lipfumelo i yini naswona hi mhaka muni?

¹³ Bibele li vula leswaku “loko u nga na lipfumelo a wu nge swi koti ku xi tsakisa kahle Xikwembu, hikusa lweyi a tshinelaka ka Xikwembu a fanele a kholwa swaku xi kona ni leswaku hi xona xi hakelaka lava xi lavaka hi mbilu hinkwayu.” (Heb. 11:6) Bibele li vula leswaku ku va ni “lipfumelo ka Xikwembu” hi swona leswi swi yendlaka hi “tiya” leswi hi nga Vakreste. Lipfumelo i la lisima leswaku munhu a tama a va Mukreste wa ntiyiso. (Heb. 6:1) Handle ka lipfumelo ku ni swilo swin’wani leswi hi faneleke hi swi yendla leswaku hi ‘tama hi rhandziwa hi Xikwembu.’ — Lerha 2 Pedru 1:5-7; Yuda 20, 21.

14, 15. Hi mhaka muni ku va ni lirhandzu swi li swa lisima ku tlula ku va ni lipfumelo ntsena?

¹⁴ Vatsali va Bibele va kombise leswaku lipfumelo i la lisima swinene hi ku vulavula hi lona makhambi ya manyingi ka Bibele. A ku na wumunhu lin’wani leli ku vulavuliwaka hintamu hi lona ndzeni ka Bibele ku tlula lipfumelo. Indjhe leswo swi kombisa swaku lipfumelo hi lona la lisima hintamu ku tlula wumunhu lin’wani la Wukreste?

¹⁵ Nkama na a vulavula hi lipfumelo ni lirhandzu, Pawulo a te: “Niloko ni ni lipfumelo la likulu lakakuva ni kota ku susa tinhava, kambe loko ni nga na lirhandzu, a ni wa nchumu.” (1 Kor. 13:2) Nkama Yesu a nga vutisiwa swaku “hi wihi nawu wa lisima ku tlula hinkwayu?” A hlamule leswaku i ku rhandza Xikwembu (Matewu 22:35-40) Phela lirhandzu li patsa swilo swin’wani swa lisima swa ku fana ni lipfumelo. Bibele li li: “Lirhandzu . . . li kholwa minchumu hinkwayu.” Leswo swi vula leswaku a lirhandzu li hi pfuna ku kholwa swilo hinkwaswu leswi Xikwembu xi nga swi vula ka Bibele. — 1 Kor. 13:4, 7.

16, 17. a) Nyikela swikombiso swa lani ku vulavuliwaka hi lirhandzu ni lipfumelo ka Bibele? b) I yini xa lisima ka lirhandzu ni lipfumelo naswona hi mhaka muni?

¹⁶ A lipfumelo ni lirhandzu i swa lisima hintamu. Ka Bibele, makhambi ya manyingi lani ku vulavuliwaka hi lipfumelo ku vulavuliwa ni hi lirhandzu. Hi xikombiso, Pawulo a byele vamakwavu va yena leswaku va fanele va “yambala lipfumelo ni lirhandzu swi va mpahla ya ku vhikela xifuva.” (1 Tes. 5:8) Nkama na a vulavula hi Yesu, Pedru a te: “Hambileswi mi kalaka mi nga se tshama mi mu vona, ma mu rhandza. Hambileswi mi kalaka mi nga mu voni swoswi, ma pfumela ka yena.” (1 Ped. 1:8) Yakobe a vutise vamakwavu va yena lava nga totiwa a ku: “Kasi Xikwembu a xi langanga lava nga swisiwana hi ku ya hi mavonelo ya vanhu, leswaku va ganya lipfumelweni ni leswaku va dla tshomba la Mfumu lowu xi nga wu tshembisa lava xi rhandzaka ke?” (Yak. 2:5) Yohani a te: “Nawu wa xona [Xikwembu] wu vula leswi: Hi fanele hi pfumela ka vito la N’wana wa xona Yesu Kreste hi tlhela hi rhandzana.” — 1 Yohani 3:23.

¹⁷ Hi vone leswaku lipfumelo i la lisima swinene kambe hi nga vula leswaku swilo swin’wani swi patsiwaka ka lipfumelo swi ta hela. Hi mhaka muni? Ka nkama lowu taka a swi nga ta lava leswaku hi kombisa lipfumelo ka switshembiso swa Xikwembu hikusa swi ta va se swi yendlekile. Kambe lirhandzu li ta va kona minkama hinkwayu hikusa swi ta lava leswaku hi rhandza Xikwembu ni vamakwerhu. Hi mhaka leyo Pawulo a te: “Swoswi ku sala swilo leswinharhu: Lipfumelo, ntshembo ni lirhandzu; kambe xa xikulu ka swona hinkwaswu i lirhandzu.” — 1 Kor. 13:13.

KU KOMBISIWA KA LIPFUMELO

18, 19. Vanhu va Xikwembu va swi kombisa ku yini leswaku va ni lipfumelo ka Mfumu wa Xikwembu, naswona ku fanele ku khensiwa mani hileswi vanhu va Xikwembu va twananaka ke?

¹⁸ Swoswi vanhu va Yehovha va kombisa swaku va ni lipfumelo ka Mfumu wa Xikwembu. Vanhu va ku tlula 8 milhões va hanya hi ku rhula va tlhela va twanana ingaku hi loko se va li ka paradesi hikusa va kombisa wumunhu la Wukreste. (Gal. 5:22, 23) Phela leswo swi fana ni loko va hanya ka paradesi. Swa hlamalisa ku vona leswi lipfumelo la hikakunene ni lirhandzu li swi yendlaka!

¹⁹ Ku fanele ku khensiwa mani hi mhaka ya leswi vanhu va Xikwembu va twananaka ke? Leswo a swi yendleki hi mhaka ya matimba ya munhu. Ku fanele ku khensiwa Yehovha hikusa hi yena a yendlaka leswaku swi koteka. Phela leswi swi ta yendla leswaku ‘Yehovha a tiviwa hi mhaka ya swona [naswona] swi ta va marka lowu nga ta kala wu nga helisiwi.’ (Esa. 55:13) Yehovha a lava leswaku ‘lipfumelo li hi ponisa’ naswona hi yi khensa hintamu ‘nyiko leyi ya Xikwembu.’ (Efe. 2:8) Phela ku tsaka ni ku twanana ka hina ku ta ya ku kula naswona ku ta tama ku saseka anze misava hinkwayu yi tala hi vanhu va ku kala va nga na xidjoho, va ku lulama, lava nga tsaka, va tlhela va dzunisa Yehovha hi masiku ni masiku. Hi mhaka leyo, a hi tameni hi kombisa lipfumelo ka switshembiso swa Yehovha!