Tihambanisi ni Mapimiselo Lama Lwisanaka ni Kurhandza ka Xikwembu

1. Hi xihi xitsundzuxu lexi mupostola Pawulo axi tsaleleke Vakreste lava totiweke?

MUPOSTOLA Pawulo a vule leswi: “Mingalandzeni hanyela ra nguva leyi”. (Rhom. 12:2) Marito lawa a ama byela Vakreste lava hanyeke nkameni wa yena. Hi mhaka muni a nyikele xitsundzuxu xolexo xa matimba ka vavanuna ni vavasati lava ava tinyiketelile ka Xikwembu naswona ava totiwile hi moya lowokwetsima? — Rhom. 1:7.

2-3. I mpsini leswi Sathana aswi tirhisaka leswaku ahi hambanisa na Yehovha, kambe hingaswi kotisa kuyini kususa mapimiselo yobiha lamangahavaka ma dzime timintsu ka hina?

² Lexi axi vilelisa Pawulo hi leswaku Vakreste van’wana ava tikomba va kuceteliwe hi mapimiselo lamangani khombo ni mafilozofiya lawa a ma hangalasiwa hi misava ya Sathana. (Efe. 4:17-19) Swa kufana ni leswo swingaha yendleka ka mun’wana ni mun’wana wa hina. Sathana hi yena a fumaka misava leyi naswona angaha tirhisa tindlela totala leswaku ahi kucetela. Hi xikombiso, loko hili vanhu va kurhandza ndhuma kumbe kuvoniwa na hili va lisima, angahaswi tirhisa kuva ahi hambukisa. Angaha zama kutirhisa swilo leswi hi djondzisiweke swona na hahali vatsongo, leswi hiswi djondzeke axikolweni kumbe leswi hiswi djondzeke ka vanhu van’wana leswaku ahi yendla hi pimisa hi ndlela leyi tsakisaka yena.

³ Kungava leswaku swa koteka “kuhirimuxa” swilo leswi yakeke swi tiya ka miyanakanyo ya hina? (2 Kor. 10:4) Vona nhlamulu leyi mupostola Pawulo ahi nyikaka yona: ‘Hihelisa [mapimiselo, NM] ni swihingakanyo hinkwaswu leswi switlakukeke, leswi swisivelaka vanhu kutiva Xikwembu. Hikoka miyanakanyu hinkwayu kuyingiseni ka Kriste.’ (2 Kor. 10:5) Hakunene, hi kupfuniwa hi Yehovha hingaswi kota kucinca mapimiselo ya kubiha. Kufana ni makinina lawa manga pfunaka munhu lweyi a phuzeke a veneno leswaku angafi, Rito la Xikwembu lingahi pfuna leswaku hinga dlayiwe hi veneno leli hangalasiwaka hi misava leyi ya Sathana.

‘HUNDZUKANI AKUPIMISENI KA N’WINA’

4. I kucinca kwihi loku votala va hina hi kuyendleke loko hi sungule kudjondza Bibele?

⁴ Pimisa hi kucinca loku awu fanele u kuyendla nkama unga sungula kudjondza Bibele. Leswaku hi tirhela Yehovha, votala va hina swi lave hi tshika kuyendla swilo swobiha. (1 Kor. 6:9-11) Hamu khensa swinene Yehovha hi leswi ahi pfuneke kutshika kuyendla swilo swoleswo swobiha.

5. Hi swihi swilo swimbirhi leswi Varhoma 12:2 yihi byelaka leswaku hiswi yendla?

⁵ Hambi leswo, ahi fanelanga hi tshuka hi pimisa leswaku akahana xilaveko xa kucinca swin’wana. Hambi leswi hi tshikeke kuyendla swidjoho leswi kulu leswi ahiswi yendla na hingase tsakamisiwa, swaha lava hi tirha hi matimba leswaku hi gega nchumu xin’wana ni xin’wana lexingahi yendlaka hi tlhela hi wela ka swidjoho leswi kulu. Hingaswi kotisa kuyini? Pawulo a te: ‘Mingalandzeni hanyela ra nguva leyi, kambe mipfumela kuhundzuka miva vampsha kupimiseni ka n’wina, mitakota kutwisisa leswi kurhandza lokunene ka Xikwembu, lokukhensekaka ni kuhetiseka, kunga swona.’ (Rhom. 12:2) Kulaveka hi yendla swilo swimbirhi. Xosungula: ‘Hingalandzeni’ kumbe kukuceteliwa hi misava leyi. Xawumbirhi: Hifanele “kuhundzuka” hi kucinca ndlela leyi hi pimisaka ha yona.

6. Hi yihi djondzo ya lisima leyi hiyi kumaka ka marito ya Yesu lawa ma kumekaka ka Matewu 12:43-45?

⁶ Kucinca loku Pawulo a avulavula hi kona akungali kucinca ka le handle ntsena. Kona a kuta khumba xiyenge xin’wana ni xin’wana xa wumunhu la hina. (Vona kwadru lelinge: “U Hundzukile Kumbe Uyo Cinca hi le Handle Ntsena?”) Leswo swi vula swaku hi fanele hi cinca hi kuhelela ndlela leyi hi pimisaka ha yona, matitwela ya hina, mintlhaveko ya hina ni kunavela ka hina. Kutani mun’wana ni mun’wana wa hina a fanele a tivutisa leswi: Kucinca loku ni kuyendleke leswaku ni va Mukreste kova ka le handle ntsena kumbe ni Mukreste ambilwini ni le miyanakanywini? Ka Matewu 12:43-45, Yesu ahi kombe leswi hi faneleke hiswi maha. (Yi lerhi.) Hi yihi djondzo ya lisima leyi hiyi kumaka ka marito lawa? Hi djondza leswaku hi fanele hi susa mimpimiso ya kubiha ivi hiyi pfaleta hi mimpimiso leyi tsakisaka Xikwembu.

‘KUYEHLEKETA KA N’WINA A KUHUNDZUKI KUVA LOKUMPSHA’

7. Hingaswi kotisa kuyini kucinca leswi hinga swona hi le ndzeni?

⁷ Swa koteka kuva munhu a cinca leswi anga swona hi le ndzeni? Rito la Xikwembu li li: ‘Mimoya ya n’wina ni kuyehleketa ka n’wina aswihundzuke swiva leswimpsha. Yambalani munhu lwe mumpsha lweyi avumbiweke hi xifaniso xa Xikwembu, lweyi atikombaka hi kululama ka yena ni kuhlawuleka lokunga ni ntiyiso.’ (Efe. 4:23, 24) Kutani swa koteka kucinca leswi hinga swona hi le ndzeni kambe aswi vevuki. Swi lava hi lwa hi matimba leswaku hi hlula kunavela kobiha ni ku tshika kuyendla swilo swobiha. Hi fanele hi cinca “kuyehleketa” ka hina. Leswo swi vula leswaku hi fanele hi cinca kunavela ka hina, matshamelo ya hina ni swivangelo leswihi susumetelaka kuyendla swilo hi ndlela yokarhi.

8-9. Ntokoto wa makwerhu mun’we wuswi kombisisa kuyini leswaku i swa lisima akucinca leswi hinga swona hi le ndzeni?

⁸ Ahi voneni xikombiso xa makwerhu lweyi a ani tihanyi swinene na angase djondza ntiyiso. A aphuza hintamu naswona a arhandza kulwa. Kambe aswi tshikile agama a tsakamisiwa. Leswo swi nyikele wumboni amugangeni wa yena. Kambe siku lin’wana ni madlambu na wa ha kutsakamisiwa, a ringiwile hi ndlela leyi a angayi nyimelanga. Ku te xidakwa kaya ka yena naswona axi lava kulwa na yena. Kusunguleni makwerhu a tikhomile. Kambe xigame xi sungula kuvulavula kubiha hi vito la Yehovha. Makwerhu swimu nyenyentsile kutani angahaswi kotanga kutikhoma. A humile kutani axi ba. Hi mhaka muni a yendle leswo? Hambi leswi djondzo ya yena ya Bibele yimu pfuneke leswaku ahlula kunavela ka yena ka kurhandza kulwa, kuyehleketa ka yena akungase cinca. Hi marito man’wana, a angase cinca leswi anga swona hi le ndzeni.

⁹ Hambi leswo, makwerhu lweyi anga tshikanga kulwela kucinca. (Swi. 24:16) Hi kupfuniwa hi madoda ya bandla aswi kotile kuhumelela. Hi kufamba ka nkama a fanelekele kutirha tanihi doda la bandla. Kutani siku lin’wana ni madlambu loko ali a Salão do Reino, a kumane ni xiyimo xa kufana ni lexi a tshameke a kumana na xona malembe ndzhaku. Ku te xidakwa xin’we xi fika xi lava kuba mun’wana wa madoda. Kutani i mpsini leswi makwerhu aswi maheke? Hi ndlela yorhula ni ya kutiveka hansi, a bule na xona, axi pfuna kuva xi rhula a tlhela axi heleketa a kaya ka xona. Hi mhaka muni makwerhu a yangule hi ndlela ya kuhambana ni le kusunguleni? Hi mhaka se a acincile hi le ndzeni. Se a ali munhu wa kurhula hikakunene naswona a ativeka hansi. Leswo swi yendle leswaku Yehovha a dzunisiwa.

10. I mpsini leswi hi faneleke hiswi yendla leswaku hi kota kucinca leswi hinga swona hi le ndzeni?

¹⁰ Kucinca ka muxaka lowu, a kutiyendlekeli hi koxe kumbe hi nkamanyana. Swi lava hi lwa hi “matimba hinkwawu” kuringana malembe yotala. (2 Pet. 1:5) Leswo aswi yendleke hi leswi hingani nkama wotala antiyisweni. Swi lava hi tirha hi matimba leswaku hi cinca leswi hinga swona hi le ndzeni. Kuni swilo swo karhi leswi hi faneleke hiswi yendla leswaku hi kota kufikelela kucinca koloko. Ahi voneni swin’wana swa swona.

NDLELA YOCINCA LESWI HINGA SWONA HI LE NDZENI

11. Yehovha angahi pfunisa kuyini leswaku hi cinca leswi hinga swona hi le ndzeni?

¹¹ Xa kusungula ka leswi hi faneleke hiswi yendla i kukhongela. Hi fanele hi khongela kufana ni mupisalema lweyi angate: “Oh Xikwembu, basisa mbilu ya mina, naswona veka moya wa nyiwana, wa kutiya, ndzeni ka mina.” (Pis. 51:10) Hi fanele hi pfumela leswaku swa laveka kuva hi cinca hi le ndzeni kutani hi kombela Yehovha leswaku ahi pfuna. I yini lexingahi kholwisaka leswaku Yehovha atahi pfuna leswaku hi cinca? Hinga tiyisiwa hi marito lawa Yehovha angama vula hi Vayisrayele lava a va li swipandza nhloko lava a va hanya nkameni wa Ezekiyele. Yena a te: “Naswona nitava nyika mbilu yin’we, ni kuva nyika moya lowumpsha. Nita susa mbilu ya ribye anyameni ya vona, kutani niva nyika mbilu ya nyama”. (Ezek. 11:19.) Yehovha a atiyimisele kupfuna Vayisrayele lava leswaku va cinca. Hi kufanana, na hina a tiyimisele kuhi pfuna.

12-13. a) Hi kuya hi Tipisalema 119:59, i mpsini leswi hi faneleke hi yanakanyisisa hi swona? b) Hi swihi swivutiso leswi u faneleke u tivutisa swona?

¹² Xin’wana xa lisima lexi lavekaka i kuyanakanyisisa. Loko hi li karhi hi lerha Rito la Xikwembu siku ni siku, hi fanele hi tinyika nkama wa kuyanakanyisisa swinene hi leswi hiswi lerhaka. Hi kuyendla leswi, hita kota kuvona mimpimiso ni matitwela lawa hi faneleke hima cinca. (Lerha Tipisalema 119:59; Hev. 4:12; Yak. 1:25) Hi fanele hi xiya mimpimiso ni mintlhaveko ya hina leyi kuceteliweke hi mavonelo ya misava naswona hi pfumela loko kuni lomu hi tsaneke kona leswaku hi lwela ku kululamisa.

¹³ Tivutisi leswi: ‘Ni ni matshoho yokarhi ambilwini ya mina?’ (1 Pet. 2:1) ‘Ni titwa ni yampsa kutlula van’wana hi mhaka ya lomu ni humaka kona, djondzo ni male leyi ningana yona?’ (Swi. 16:5) ‘Niva tekela hansi vanhu lava pfumalaka swilo leswi mina ninga naswo kumbe lava vanga va lixaka leli hambaneke ni la mina?’ (Yak. 2:2-4) ‘Na vila hi swilo leswi misava ya Sathana yiswi humesaka?’ (1 Yoh. 2:15-17) ‘Naswi tsakela kutihungata hi swilo leswingani madzolonga kumbe kutikhoma kobiha?’ (Pis. 97:10; 101:3; Amosi 5:15) Loko u tihlamula swivutiso leswi, uta vona laha u faneleke u tirhela kona. Loko hiswi kota kucinca mimpimiso yoleyo leyingani matimba, hita tsakisa Tatana wa hina wa le tilweni.

14. Hi mhaka muni swili swa lisima kulanga vanghanu lavanene?

¹⁴ Xin’wana lexi lavekaka i kulanga vanghanu lavanene. Vanghanu va hina vangahi hlohlotela nahiswi vona kumbe na hingaswi voni. (Swi. 13:20) Vanhu lava vahi rhendzeleke axikolweni ni le ntirhweni avangehi pfuni kupimisa hi ndlela leyi tsakisaka Xikwembu. Hambiswilitanu, hingaswi kota kukuma vanghanu lavanene aminhlanganwini ya Wukreste. Kona hita khutaziwa, hi ‘kombana lirhandzu ni mintirho leyinene’. — Hev. 10:24, 25.

“TIYANI KUPFUMELENI”

15-16. Sathana a zama kucinca mapimiselo ya hina hi tindlela tihi?

¹⁵ Khumbuka leswaku Sathana atiyimisele kucinca ndlela leyi hi pimisaka ha yona. Yena a tirhisa mixaka hinkwayu ya mavonelo ya misava leyi leswaku a helisa nkucetelo lowunene lowu Rito la Xikwembu linga na wona ka ndlela leyi hi pimisaka ha yona.

¹⁶ Sathana a tama a tirhisa xivutiso xa kufana ni lexi axi tirhiseke ka Eva a jaradi la Edeni. Yena a te: “Hakunene i ntiyisu leswaku Xikwembu xite . . . ?” (Gen. 3:1) Ka misava leyi fumiwaka hi Sathana, swi tolovelekile kutwa swivutiso leswingaha pfuxaka kukanakana ka swilo leswi hi kholwaka ka swona. Swin’wana swa swona hi leswi: ‘Hakunene i ntiyiso leswaku Xikwembu axiswi pfumeleli leswaku munhu ava ni vavasati vavanyingi? Hakunene i ntiyiso leswaku Xikwembu axiswi tsakeli kutlangeliwa ka masiku ya kuvelekiwa ni kudla khesemusi ni kutlangela lembe la nyiwani? Hakunene i ntiyiso leswaku Xikwembu xi lava leswaku u yala kucheliwa ngati? Hakunene i ntiyiso leswaku Xikwembu xa lirhandzu xi lava leswaku hinga tipatsi ni varhandziwa va hina lava susiweke bandleni?’

17. Hi fanele hi yendla yini loko munhu wokarhi ahi yendla swivutiso hi xikongomelo xa kuhi yendla hi kanakana ka leswi hiswi kholwaka, naswona hikuya hi Vakolosa 2:6, 7, litava lihi vuyelo la kona?

¹⁷ Hi fanele hi kholwa swilo leswi hiswi djondzaka. Loko hinga tikumi tinhlamulu ta swivutiso swa lisima leswi yelanaka ni swilo leswi hi swi kholwaka, hingaha sungula kukanakana leswaku leswi hiswi kholwaka i ntiyiso. Kukanakana koloko kungaha cinca mimpimiso ya hina kutlhela kudlaya kupfumela ka hina. Kutani hi fanele hi yendla yini? Rito la Xikwembu lihi byela leswaku hi hundzula kupimisa ka hina ‘hitakota kutwisisa leswi kurhandza lokunene ka Xikwembu, lokukhensekaka ni kuhetiseka, kunga swona.’ (Rhom. 12:2) Loko hi djondza Bibele nkama ni nkama, hita kota kuyitwisisa kahle mintiyiso leyi hiyi djondzeke. Hi ta kholwiseka hi kuhelela leswaku minawu ya Yehovha yi lulamile. Hi ndlela leyi, kufana ni nsinya lowungani timintsu leti tiyeke, hi tava hi dzime timintsu hi ‘tiya akupfumeleni’. — Lerha Vakolosa 2:6, 7.

18. I mpsini leswingatahi sirhelela ka swilo swobiha leswi vangiwaka hi misava ya Sathana?

¹⁸ Mun’wana ni mun’wana wa hina ani wutihlamuleli la kulwela kutiyisa lipfumelo la yena. Kutani ahi tameni hi cinca munhu lweyi hinga yena hi le ndzeni. Khongela nkama ni nkama, u kombela moya wa Yehovha leswaku wuku pfuna. Yanakanyisisa swinene, u tama u kambela mimpimiso ya wena ni leswi swiku susumetelaka kuyendla swilo. Lavetela vanghanu lavanene, lwela kuva kusuhi ni vanhu lavangataku pfuna leswaku u hundzula mapimiselo ya wena. Hi kuyendla leswo, utava u tiponisa ni kutisirhelela ka swilo swobiha swa misava ya Sathana, utlhela u ‘helisa ni swihingakanyo hinkwaswu leswi switlakukeke, leswi swisivelaka vanhu kutiva Xikwembu.’ — 2 Kor. 10:5.