Mareferensiya ya Xibukwana xa Minhlangano ya Mahanyelo ni Ntirho
3 KUYA KA 9 KA DEZEMBRO
XUMA XINGA KA RITO LA XIKWEMBU | MINTIRHO 9-11
“Wanuna wa Tihanyi A Hundzuka Muchumayeli wa Kuhiseka”
Bandla ‘ali ni kurhula’
VAXANISI lava hlundzukeke va fike Damaska naswona xikongomelo xa vona axi bihile. Avati yimisele kufika va teka valala va vona makaya ya vona, kunga vadjondzisiwa va Yesu, vava boha, vava poyila kutani vava kokovisa ivi va famba na vona Yerusalema leswaku vaya thethisiwa hi huvo ya Sanedri.
Sawulo, murhangeli wa vona, se a apfumelelane ni kudlayiwa ka mun’wana wa vadjondzisiwa va Yesu lweyi a hisekaka. Phela ahali kuhlalela loko Vayuda lava hisekelaka swobiha va b’andzetela Stefano hi maribye anze a fa. (Mint. 7:57–8:1) Leswi Sawulo aangase kolwa hi kuhlasela valandzeli va Yesu lava ava tshama Yerusalema, ave murhangeli wa vaxanisi va Vakreste. Aati yimisele kuhelisa ntlawa wa vanhu lowu awu li ni khombo lowu awu vuliwa “Ndlela.” — Mintirho 9:1, 2; vona kwadru lelinge: “Xikhundlha Lexi Sawulo A A Ri Na Xona eDamaska,” ka tluka 61.
w16.06 tl. 7 par. 4
Tlangela Yehovha Tani hi Muvumbi wa Hina
Loko Yehovha a vona vanhu, anga voni ndlela leyi va langutekaka ha yona. Kambe, a kambisisa mbilu, kunga ndlela leyi hinga swona a ndzeni. (Lerha 1 Samuwele 16:7b.) Yehovha a kombise leswi loko a vumba bandla la Wukreste. A hlawule vanhu votala lava van’wana va vona vangaha tekiwaka vanga faneleki leswaku va va ni vuxaka na yena ni N’wana wa yena. (Yoh. 6:44) Hi xikombiso, mun’wana wa vanhu volavo aku li Mufarisi lweyi a vuliwaka Sawulo ‘musandzi ni muxanisi ni mupfukeli.’ (1 Tim. 1:13) Kambe Yehovha a kambisise mbilu ya Sawulo naswona angamu vonanga a li vumba lelinga pfuniki nchumu. (Swi. 17:3) Handle ka leswo, Yehovha a vone leswaku Sawulo anga vumbiwa a va ‘xitirho lexi hlawuliweke’ leswaku a chumayela “vamatiko, ni ka tihosi, ni ka Vaisrayele.” (Mint. 9:15) Yehovha a tlhele a hlawula van’wana lavangata vumbiwa leswaku va va ‘swibya swa lisima,’ kupatsa ni lava ava li swidakwa leswikulu, vanhu lavati khomaka hi ndlela yo biha ni vayivi. (Rhom. 9:21; 1 Kor. 6:9-11) Loko va li karhi va djondza Matsalwa, va tiyise lipfumelo la vona ka Yehovha ni kumu pfumelela leswaku ava vumba.
Bandla ‘ali ni kurhula’
Yanakanya ndlela leyi vanhu va hlamaleke ha yona ni kuhlundzuka loko va vona Sawulo a sungula kuchumayela hita Yesu amasinagogeni! Vati vutise leswi: “Xana munhu lweyi ahi yena lweyi aaringeta kuhelisa lavakhongelaka vito lero Yerusalema ke?” (Mint. 9:21) Loko Sawulo a hlamusela lexi yendleke leswaku a hundzuka, ‘a vakombise leswaku Yesu i Mesiya’ hi ndlela leyi kholwisaka. (Mint. 9:22) Kambe leswo aswi vuli leswaku mun’wana ni mun’wana la hlamuseliwaka mhaka hilaha kutwisisekaka ato vhela a hundzuka ivi a tshika ndlela leyi a kulisiweke ha yona kumbe a tshika kuti kukumuxa. Hambiswilitano, Sawulo anga godolanga.
Lavetela Xuma xa Moya
Bandla ‘ali ni kurhula’
Loko Yesu a nyimisa Sawulo andleleni yoya Damaska, angamu vutisanga a ku: “Hayini u xanisa vadjondzisiwa va mina?” Kambe hilaha swi kombisiweke hakona laha henhla, a te: “Unixanisela yini?” (Mint. 9:4) Ina, Yesu wa kutwa kuvava loku twiwaka hi valandzeli va yena loko va xanisiwa. — Mat. 25:34-40, 45.
Loko u xanisiwa hi mhaka ya lipfumelo la wena ka Kreste, tiyiseka leswaku Yehovha na Yesu vaxi tiva xiyimo lexi u langutanaka na xona. (Mat. 10:22, 28-31) Swinga yendleka wunga susiwi swoswi ndzingo wolowo. Kambe tsundzuka leswaku Yesu amu vonile Sawulo loko a hlanganyela a kudlayiweni ka Stefano naswona amu vonile loko a kokovisela vadjondzisiwa va Yena votshembeka makaya ya vona, ava yisa Yerusalema. (Mint. 8:3) Kambe Yesu anga yendlanga nchumu hi nkama wolowo. Kambe Yehovha a tirhise Kreste leswaku a nyika Stefano ni vadjondzisiwa lavan’wana matimba yohambeta va tshama va tshembekile.
nhlamuselo yodjondza ha yona ya Min 10:6 ka nwtsty
Simoni, muchuki: Muchuki a atirhisa swikhumba swa swiharhi, a atirhisa swa kuchelachela leswaku a hisa kumbe kususa mavoya, nyama leyi saleke ka xikhumba kumbe furha. A agama a chela xihoko ka xikhumba lexo a kuva xi lunghekela kutirhisiwa kuyendla mpahla hi xona. Kuchuka swikhumba aswi nunhwa ngopfu naswona aswi lava leswaku kutirhisiwa mati yotala, swinga yendleka kuve leswo swi yendleke leswaku Simoni a tshama kusuhi ni lwandle, kumbexana kule ni doropa la Yopa. Hi kuya hi Nawu wa Moxe, munhu lweyi a atirha hi swikhumba swa swiharhi a atekiwa anga basanga hi nkama wokarhi. (Lv 5:2; 11:39) Hikolaho, Vayuda votala avava langutela hansi vachuki va swikhumba hambi kutshama na vona avangaswi lavi. Phela, hi kufamba ka nkama Talmude kunga buku la minawu ya Vayuda li vule leswaku ntirho wa muchuki awu li hansi swinene loku wu fanisiwa ni wa kuhlengeleta chaka la swiharhi. Kambe, Petro angaswi pfumelelanga swoleswo swimu sivela kutshama na Simoni. Kuyendla leswo swi yendle leswaku a lunghekela xiyavelo lexi aataxi kuma kunga kuyendzela Wamatiko a kaya ka yena. Vadjondzi van’wana va teka rito la Xigriki (byr·seusʹ) “muchuki” ku li vito leli Simoni a ativiwa hi lona.
10 KUYA KA 16 KA DEZEMBRO
XUMA XINGA KA RITO LA XIKWEMBU | MINTIRHO 12-14
“Barnaba na Pawulo va Yendla Vadjondzisiwa aTindhawini ta le Kule”
“Vatala Kutsaka ni Moya Wokwetsima”
Hayini moya lowokwetsima wu hlawule Barnaba na Sawulo hi kukongoma leswaku “vaya ntirhweni” lowu? (Mint. 13:2) Bibele alihi byeli. Kambe ha tiyiseka leswaku i moya lowokwetsima wu kongomiseke leswaku va hlawuliwa. Aku na lexi kombisaka leswaku vaprofeta ni vadjondzisi va le Antiyoka va yalile loko va hlawuliwa. Kambe va pfumelelane ni kuhlawuliwa ka vona. Yanakanya ndlela leyi Barnaba na Sawulo va tsakeke ha yona hi kutiva leswaku vamakwerhu volavo ‘vatitsone swakudla va tlhela va khongela, vavatlhanteka mavoko, kutani vavapfulela tindlela,’ kunga li na lweyi ava navelelaka swobiha! (Mint. 13:3) Na hina, hi fanele hi seketela lava nyikiwaka malunghelo anhlengeletanweni ya Xikwembu kupatsa ni lava hlawuliwaka kuva valanguteli abandleni. Matshan’weni ya kuva teka vanga faneleki, hi fanele hi ‘vaxixima swinene hi rirhandzu, hikolaho ka ntirho wa vona.’ — 1 Tes. 5:13.
‘Vavulavula na vangachavi nchumu vatitshembele Yehovha’
Akusunguleni, Pawulo na Barnaba va fike va humula aIkoniya, kunga doropa leli ndhawuko wa Magriki awu dzime timitsu swinene naswona awu li lin’wana la madoropa lawa ama li ya lisima ka xifundzha xa Galatiya amfun’weni wa Roma. Doropa leli ali ni Vayuda votala lava ava xiximiwa, swin’we ni vanhu votala lava hundzukeleke ka wukhongeli la Vayuda. Hi kuya hi ntolovelo wa vona, Pawulo na Barnaba va nghene sinagogeni kutani va sungula kuchumayela. (Mint. 13:5, 14) “Vadjondzisa kona, kukondza kupfumela vunyingi lebyikulu la Vayuda ni la Vagirika.” — Mint. 14:1.
w14 15/9 tl. 13 mapar. 4-5
Tirhela Yehovha hi Kutshembeka Kunga Khataliseki “Maxangu Lamanyingi”
Ndzhaku koyendzela Derbe, Pawulo na Barnaba “vatlhelela Listra, ni le Ikoniya, ni le Antiyoka, na vali karhi vatiyisa timbilu ta vajondzisiwa, vavakhongotela kutiyisela kupfumeleni, vaku: ‘Amfun’wini wa Xikwembu, hifanele kunghena hi maxangu lamanyingi.’” (Mint. 14:21, 22) Loko uma twa hi khambi losungula marito wolawo, mangati komba manga twali. Phela, mhaka ya kulangutana ni “maxangu lamanyingi” ayinga khutazi, ayi vanga gome. Pawulo na Barnaba vati ‘tiyisise kuyini timbilu ta vajondzisiwa’ hi kuva byela leswaku avata langutana ni maxangu yotala?
Nhlamulo hingayi kuma loko hima kambisisa kahle marito ya Pawulo. Anga vulanga a ku: “Hi fanele hi tiyisela maxangu manyingi.” Kuhamba ni leswo, a te: “Amfun’wini wa Xikwembu, hifanele kunghena hi maxangu lamanyingi.” Hikolaho Pawulo a tiyise vadjondzisiwa hi kukandzihisa hakelo leyi tsakisaka leyingata kumiwa hi lava tshamaka va tshembekile. Hakelo yoleyo ayinga li norho. Yesu a te: “Lweyi angatatiyisela kufika makumu, hi yena lweyi angataponisiwa.” — Mat. 10:22.
Lavetela Xuma xa Moya
w08 15/5 tl. 32 par. 7
Tipontu ta Lisima ta Buku la Mintirho
12:21-23; 14:14-18. Heroda a yamukele kudzuneka loku faneleke kuyisiwa ka Xikwembu ntsena. Leswo swi hambanile ni leswi Pawulo na Barnaba vaswi yendleke hikuva ava pfumelanga kudzunisiwa tani hi leswi aswingava faneli! Ahi fanelanga hi navela kudzunisiwa hikolaho ka swilo swihi na swihi leswi hiswi yendlaka antirhweni wa Yehovha.
nhlamuselo yodjondza ha yona ya Min 13:9 ka nwtsty
Sawulo, anga yena Pawulo: Kusukela laha kuya mahlweni, Sawulo a sungula kutiviwa tani hi Pawulo. Mupostola lweyi a psaliwe tani hi Muheberu lweyi anga ni mfanelo yova Muroma. (Min 22:27, 28; Flp 3:5) Hi mhaka leyo, kusukela aha li mutsongo a ali ni mavito mambirhi, la Xiheberu i Sawulo kasi la Xiroma i Pawulo. Aswi tolovelekile ka Vayuda nkameni wolowo kuva munhu ava ni mavito mambirhi, ngopfungopfu ka lava ava tshama handle ka tiko la Israyele. (Min 12:12; 13:1) Hi xikombiso, maxaka man’wana ya Pawulo ama li ni vito la Xiheberu ni la Xiroma kumbe la Xigriki. (Rhm 16:7, 21) Tani hi “mupostola wa vamatiko,” Pawulo a nyikiwe ntirho wochumayela mahungu yotsakisa ka vanhu lavanga liki Vayuda. (Rhm 11:13) Switi komba ingi a hlawule kutirhisa vito la yena la Xiroma leswaku ata yamukeleka kahle ka vona. (Min 9:15; Ga 2:7, 8) Van’wana va vule leswaku a hlawule vito la Xiroma leswaku a khuzela Sergiyo Pawulo, kambe leswo a hi ntiyiso hikuva Pawulo anga cincanga vito la yena hambiloko a suke a Kipra. Van’wana va vula leswaku Pawulo a papalate kutirhisa vito la yena la Xiheberu hikuva hi malerhela ya Xigriki vito la yena li fana ni la rito leli kombetelaka ka munhu (kumbe xiharhi) lweyi a gwiraka loko a famba. — Vona nhlamuselo yodjondza ha yona ya Min 7:58.
Pawulo: Ka Matsalwa ya Wukreste ya Xigriki, a vito lelinge Pauʹlos, leli taka hi ka la Xilatini lelinge Paulus, leli vulaka “Tsongo”, li humelela makhambi ya 157 loko li tirhisiwa kukombetela ka Pawulo. Li tlhela li humelela kan’we loku li kombetela ka Hosana ya Kipra Sergiyo Pawulo. — Min 13:7.
17 KUYA KA 23 KA DEZEMBRO
XUMA XINGA KA RITO LA XIKWEMBU | MINTIRHO 15-16
“Hi Kutirhisa Rito la Xikwembu Va Teke Xiboho hi Vun’we”
“Vaphikizana hi Matimba”
Luka a ye mahlweni a ku: “Kambe Pawulo na Barnaba vahambana ngopfu na vona mhakeni leyi, vaphikizana na vona [“vavanuna van’wana”] hi matimba; kutani [madoda] malulamisa leswaku Pawulo na Barnaba vataya Yerusalema ni van’wana va Antiyoka, kuyavutisa mhaka leyi ka vapostola ni ka vakulukumba.” (Mint. 15:2) ‘Kuphikizana hi matimba’ loku veke kona kuswi veke livaleni leswaku lava nyimaka ni mhaka ya kuyimba ni lavanga nyimiki na yona ava tiyiseka hi leswi avaswi pfumela, kutani madoda ya bandla ya le Antiyoka ma tsandzekile kuyendla xiboho mhakeni leyo. Leswaku kuva ni kurhula ni vun’we, madoda wolawo ma yendle xiboho xa wutlhari xa leswaku mhaka yoleyo yi yisiwa “ka vapostola ni ka vakulukumba” aYerusalema, lava ava li swirho swa ntlawa lowu rhangelaka. Xana hi djondza yini ka madoda wolawo ya le Antiyoka?
w12 15/1 tl. 5 mapar. 6-7
Vakreste Va Ntiyiso Va Xixima Rito la Xikwembu
Buku la Amosi 9:11, 12 hi lona liva pfuneke kutlhantlha xikarhato lexi axi li kona. Marito wolawo lama tshahiweke ka Mintirho 15:16, 17, ma li: “Ni pfuxa yindlo ya Davhida leyingawa. Nitapfuxa ni marhumbi ya yona, nitlhela niyiyimisa, leswaku vanhu lavan’wana hinkwavu vatakota kulava Hosi [Yehovha], vona vamatiko hinkwavu lava ningava vitana lesvaku vava vanhu va mina hakunene.”
Kambe mun’wana angaha yala mhaka leyo a ku, ‘ndzimana leyi ayi vuli swona leswaku vanhu Vamatiko lava veke Vakreste ava fanelanga va yimbisiwa.’ Leswo i ntiyiso; kambe Vakreste lavanga Vayuda avata va vayi twisisile mhaka leyo. Avanga voni vanhu Vamatiko lava yimbeke tani hi ‘vanhu vamatiko’ kambe tani hi vamakwavo. (Ekso. 12:48, 49) Hi xikombiso, ka Bibele la Septuagint la Bagster, Estere 8:17 li li: “Vanhu votala Vamatiko ava yimbisiwa, kutani va hundzuka Vayuda.” Hi mhaka leyo, loko Matsalwa ma profete leswaku lava saleke va yindlu ya Israyele (Vayuda ni vanhu Vamatiko lava veke swirho swa Wukhongeli la Xiyuda) swin’we ni “vanhu va matiko hinkwawo” (Vamatiko lavanga yimbangiki) avata va vanhu van’we lava vitaniwaka hi vito la Xikwembu, mhaka leyo yi twisiseke hi kuvevuka. Hikolaho, loko vanhu Vamatiko va lava kuva Vakreste aswinga bohi leswaku va yimbisiwa.
‘Mabandla matiyisiwa’
Pawulo na Timotiya va tirhe xikan’we malembe yotala. Tani hi varhumiwa ava yendlela ntlawa lowu rhangelaka mintirho yo hambanahambana. Bibele li li: “vali karhi vahundza madoropeni lawa, vanyiketa vamakwavu milawu leyingavekiwa hi vapostola ni vakulukumba va le Yerusalema”. (Mint. 16:4) Aswi kanakanisi leswaku mabandla amawu landzela nkongomiso lowo, lowu awu huma ka vapostola ni vakulukumba lava ava li Yerusalema. Hikolaho koyingisa nkongomiso lowo, mabandla ama ‘tiyisiwa kupfumeleni, mayandza siku rin’wana ni rin wana.’ — Mint. 16:5.
Lavetela Xuma xa Moya
w12 15/1 tl. 10 par. 8
Djondza Kurindza ka Vapostola Va Yesu
I yini leswi hingaswi djondzaka ka mhaka leyi? Xiya leswaku ndzhaku ka loko Pawulo a khome ndlela leyi yaka Asiya moya wa Xikwembu wumu yalelile. Kutani, Yesu a sivele Pawulo ndzhaku ka loko a li kusuhi ni kufika aBitiniya. Hi wugamu, ndzhaku ka loko a fike aTrowasi, Yesu a lerise Pawulo leswaku aya Makedoniya. Tani hi Nhloko ya bandla, Yesu angahi kongomisa hi ndlela leyi fanaka namuntlha. (Kol. 1:18) Hi xikombiso, swingaha yendleka u pimisa kuphayona kumbe kurhurha u ya laha kunga ni xilaveko lexikulu xa vachumayeli va Mfumo. Kambe Yesu angahaku kongomisa hi kutirhisa moya wa Xikwembu ntsena ndzhaku ka loko se u yendle xokarhi leswaku u fikelela xikongomelo xa wena. Hi xikombiso: Mufambisi wa movha angawu djikisa wuya xineneni kumbe ximatsini ntsena loko movha wuli kufambeni. Hilaha kufanaka, Yesu angahahi kongomisa leswaku hi yengesela leswi hiswi yendlaka antirhweni wa hina wochumayela ntsena loko hiti mexa ni kuyendla xokarhi kuva hi fikelela swikongomelo swa hina.
Nhlamuselo yodjondza ha yona ya Min 16:37 ka nwtsty
hina hinga Varoma: Kunga vayakitiko va Roma. Pawulo a ali Muroma kumbexana na Silasi. Nawu wa Varoma awu vula leswaku Muroma mun’wana ni mun’wana a ali ni mfanelo yothethisiwa hi ndlela leyinene naswona a anga fanelanga a khatisiwa mahlweni ka vanhu angase gweviwa. Kuva Muroma, aswi yendla munhu ava ni timfanelo ni malunghelo yokarhi kun’wana ni kun’wana laha a aya kona ndzeni ka mfumo wa Roma. Muroma a afanele ava hansi ka nawu wa Roma kungali ka nawu wa doropa leli a tshamaka ka lona. Loko a hehliwa, aswili ka yena kupfumela kuthethisiwa hi kuya hi nawu wa lomu a atshama kona; kambe a atlhela ava ni mfanelo yoyingiseliwa hi huvo ya le Roma. Loko kuli nandzu wa wukulu a ali ni mfanelo yotwiwa hi hosi. Mupostola Pawulo a chumayele ngopfu ndzeni ka mfumo wa Roma. Ka marungula manharhu, hi kuma leswaku yena a tirhise timfanelo ta yena tani hi Muroma. Ka rungula la kusungula kuve aFilipiya laha a byeleke vativi va nawu leswaku ava tshove timfanelo ta yena hi kumu ba. — Kuva u kuma swiyendlakalo swin’wana swimbirhi, vona tinhlamuselo todjondza ha tona ka Min 22:25; 25:11.
24 KUYA KA 30 KA DEZEMBRO
XUMA XINGA KA RITO LA XIKWEMBU | MINTIRHO 17-18
“Tekelela Mupostola Pawulo Akuchumayeleni ni le Kudjondziseni”
Tinhlamuselo todjondza ha tona ta Min 17:2, 3 ka nwtsty
a ahlamulana: Pawulo angava byelanga ntsena mahungu yotsakisa. A ahlamusela ni kuva kholwisa hi kulandza Matsalwa, kunga Matsalwa lawa ma huhuteliweke ya Xiheberu. A angoma lerha ntsena kambe a atlhela ama hlamusela ni kuyanakanyisa na vona hi wona, naswona a atwananisa tinhlamuselo ta yena ni swiyimo swa vanhu va kona. Rito la Xigriki di·a·leʹgo·mai li hlamuseliwa tani hi “kuhlamulana; kukombisana.” Li kombisa kubulisana ka vanhu. Rito leli la Xigriki li tlhela li tirhisiwa ka Min 17:17; 18:4, 19; 19:8, 9; 20:7, 9.
hi kukombisa hi tinhlamuselo: Rito la Xigriki hi kukongoma li vula “kuveka tlhelweni na tlhelweni (kuveka kusuhi na kusuhi).” Leswi swingaha vula leswaku hi vukheta Pawulo a aringanisa swiprofeto mayelana na Mesiya swa Matsalwa ya Xiheberu ni leswi humeleleke Yesu, kutani a kombisa ndlela leyi Yesu a hetisiseke swiprofeto swoleswo.
nhlamuselo yodjondza ha yona ya Min 17:17 ka nwtsty
bazara: A bazara la Atena (Xigriki a·go·raʹ) leli ali kumeka an’walungu wumpeladlambu wa doropa la Acrópole, ali kule kolomuya ka 5 wa maghitari kumbe 50.000 m2. Bazara leli alinga li ndhawu ya kuxavisa ni kuxava swilo ntsena. Ali li ntsindza wa swa mabindzu, politika ni mahanyelo ya Varoma. Vanhu va Atena ava rhandza kuhlangana kona leswaku va bulisana hi swilo swotala.
nhlamuselo yodjondza ha yona ya Min 17:22, 23 ka nwtsty
ka Xikwembu Lexingativiwiki: Marito ya Xigriki lamange A·gnoʹstoi the·oiʹ ama tsaliwe ka alitari yokarhi adoropeni la Atena. Vanhu va Atena ava ni xihlonipho ka swikwembu swotala hi kuswi yakela titempele ni tiyalitari totala, hambi ka swikwembu leswingo pimisiwa, swofana ni xikwembu xa Ndhuma, xa Kutitsongohata, xa Ntamu, xa Kukholwisa ni xa Ntwelawusiwana. Va yakele ni “Xikwembu Lexingativiwiki” alitari; kumbexana va yendle leswi hi kuchava kukwateliwa hi xikwembu xokarhi hi kuxi siya handle hi kuvangaxi phati. Hi kuyaka alitari leyi, vanhu ava pfumela leswaku akuli ni Xikwembu lexi vangaxi tiviki. Kutani hi wutlhari, Pawulo a tirhise alitari leyi tani hi xisekelo xa leswaku a chumayela vayingiseli va yena hi Xikwembu xa Ntiyiso, lexi avangaxi tivi.
Lavetela Xuma xa Moya
w08 15/5 tl. 32 par. 5
Tipontu ta Lisima ta Buku la Mintirho
18:18 — Hi xihi xihlambanyo lexi Pawulo axi yendleke? Swidjondzi swin’wana swi ringanyeta leswaku Pawulo a ayendle xihlambanyo xa kuva Munaziri. (Tinhl. 6:1-21) Hambiswilitano, Bibele ali vuli leswaku axi li xihi xihlambanyo lexi Pawulo axi yendleke. Kuyengetela kolaho, Matsalwa ama vuli leswaku Pawulo a yendle xihlambanyo lexi mahlweni kumbe ndzhaku ka kuva a hundzuke Mukreste. Nakambe ama vuli leswaku Pawulo a asungulile kumbe kuheta masiku yakwe ya wunaziri. Kunga khataliseki hinkwaswo leswo, kuyendla xihlambanyo lexo akunga li xidjoho.
nhlamuselo yodjondza ha yona ya Min 18:21 ka nwtsty
loko Xikwembu xiswirhandza: Marito lawa ma kandzihisa leswaku hi fanele hi rhangisa kurhandza ka Xikwembu loko hi li karhi hi yendla kumbe kukunguhata kuyendla swokarhi. Mupostola Pawulo a ahlayisa tshinya leli la nawu ka miyanakanyo ya yena. (1Ko 4:19; 16:7; Hv 6:3) Mudjondzisiwa Yakobo na yena a khutaze valerhi va papela la yena a ku: ‘Loko Hosi [Yehovha] yiswirhandza, hitapfuka hiyayendla leswi kumbe leswiya.’ (Yk 4:15) Marito lawa ahi fanelanga hima vula hi nomu ntsena; kambe mun’wana ni mun’wana lweyi a vulaka a ku ‘loko Yehovha aswi rhandza’ na swi suka mbilwini, a fanele a zama kuyendla swilo hi kufambisana ni kurhandza ka Yehovha. Aswi bohi leswaku minkama hinkwayo hi vula marito lawa hi rito leli twalaka kambe ma fanele ma vuliwa swi suka mbilwini minkama hinkwayo. — vona tinhlamuselo todjondza ha tona ya Min 21:14; 1Ko 4:19; Yk 4:15 ni ka Xibukwana Xo Pfuneta Ku Dyondza Rito Ra Xikwembu, laha kunge “Vito Ra Xikwembu eMatsalweni Ya Vukreste Ya Xigriki”.
31 KA DEZEMBRO KUYA KA 6 KA JANEIRO
XUMA XINGA KA RITO LA XIKWEMBU | MINTIRHO 19-20
‘Tilanguteleni Mi Tlhela Milangutela’ ni Ntlhambi Hinkwawo
w11 15/6 matl. 20-21 par. 5
“Risani Bandla la Xikwembu”
Mupostola lweyi a tsale leswaku vakulukumba ava fanele va ‘risa ntlhambi wa Xikwembu lowunga xikarhi ka vona’. Aswi li swa lisima ngopfu ka vona kuva va tiva leswaku ntlhambi i wa Yehovha na Yesu Kreste. Madoda lawo amatati hlamulela hi ndlela leyi vati languteleke ha yona tinyempfu ta Xikwembu. Hi xikombiso, ahinge munghanu wa wena lwenkulu aku kombele leswaku umu salela ni vana va yena. Xana awungatava hlayisa ni kuva nyika swakudla? Loko mun’we wa vona o sungula kuvabya, xana awungatamu yisa ka dokodela? Hi ndlela leyi fanaka, madoda abandleni ma fanele ma risa ntlhambi ‘wa Xikwembu lowu xingatikumela wona hi rifu ra N’wana wa xona.’ (Mint. 20:28) Madoda maswi tsundzuka leswaku nyempfu ha yin’we yi xaviwe hi ngati ya lisima ya Kreste Yesu. Naswona, ma ni wutihlamuleli lophamela, losirhelela ni lokhatalela ntlhambi.
w13 15/1 tl. 31 par. 15
Madoda ya Bandla — ‘Matirhisana Na Hina Leswaku Hitakuma Kutsaka’
Kuva murisi swi lava kutirha hi matimba. Minkama yin’wana, Madoda ama yetleli hi leswi ma karhatekaka hi ntlhambi wa Xikwembu kumbe hikolaho koseketela vapfumelikulorhi hi le moyeni. (2 Kor. 11:27, 28) Hambiswilitano, madoda ma hetisisa wutihlamuleli la wona hi kuhelela ni hi kutsaka, hilaha Pawulo a yendleke ha kona. A tsalele Vakorinto a ku: ‘nitanyiketa swa mina hi kutsaka, naswona nitatinyiketa hi xiviri xa mina kumipfuna’. (2 Kor. 12:15) Hakunene, hikolaho korhandza vamakwavo va yena, Pawulo a hete nkama wotala a li karhi ava tiyisa. (Lerha 2 Vakorinto 2:4; Fil. 2:17; 1 Tes. 2:8) Aswi hlamalisi leswi vamakwerhu avamu rhandza ngopfu Pawulo! — Mint. 20:31-38.
“Aningavi na Nandzu Loko Mun’we wa N’wina Aya Kuloveni”
Wutomi la Pawulo ali hambanile ni la lava hi kufamba ka nkama avata khoma ntlhambi hi tihanyi. Aati tirhela leswaku anga rhwexi ndzhwalo van’wana abandleni. Leswi angaswi yendlela vapfumelikulorhi aangaswi yendleli kuti vuyelisa. Pawulo a khutaze madoda ya le Efesa leswaku ma rhangisa swilaveko swa van’wana kunga li swa wona. Ama byele leswi: ‘Mifanele kupfuna lavatsaneke, naswona mitsundzuka marito ya Hosi Yesu, lawa angamahlaya hi xiviri xa yena loko aku “kunyika i nkateko lowutlulaka kunyikiwa.”’ — Mint. 20:35.
Lavetela Xuma xa Moya
‘Rito ra Hosi Rihangalaka hi Matimba ni Kutiya’ Kunga Khataliseki Kukanetiwa
Swinga yendlaka leswaku siku ni siku Pawulo a achumayela a li a Salão lelikulu la xikola xolexo kusukela hi 11:00 anze kolomuya ka 16:00. (Mint. 19:9, nhlamuselo ya le hansi ya NW) Swinga yendleka leswaku hi nkama lowu vanhu avanga khomekanga hikuva ava humula leswaku va dla naswona dlambu ali hisa ngopfu. Loko kuli leswaku Pawulo a hete malembe mambirhi a li karhi a chumayela hi ndlela yoleyo, ata va a hete mawora lama tlulaka 3.000 na a chumayela. Kutani lexi i xivangelo xin’wana lexinga yendla leswaku rito la Yehovha li hambeta li hangalaka hi matimba li tlhela li tiya. Pawulo a atirha ngopfu naswona a afambisana ni xiyimo. Aati twananisa ni xiyimo leswaku kuchumayela ka yena kupfuna vanhu va muganga lowo. Xana vuyelo li ve lihi? ‘Hinkwavo lavayakeke tikweni ra Aziya, Vayuda ni vamatiko, vatwa rito ra Hosi.’ (Mint. 19:10) Hakunene a chumayele hi kuhelela!
‘Rito ra Hosi Rihangalaka hi Matimba ni Kutiya’ Kunga Khataliseki Kukanetiwa
Kutsongohatiwa ka vana va Sevha kuyendle leswaku vanhu votala va chava Xikwembu naswona leswo swi yendle leswaku votala va va vapfumeli ni kutshika mintirho ya wungoma. Ndhavuko wa le Efesa awu nghene hi nhloko ka wungoma. Wuloyi ni switshungulo aswi tolovelekile swin’we ni kuloyana hi marito lama tsaliweke. Vaefesa votala va boheke kuhumesa mabuku ya vona ya wungoma kutani vama hisa mahlweni ka vanhu hinkwavo — hambileswi mabuku lawa ama durha ngopfu loko hima ringanisa hi mali ya namuntlha. Luka a li: “Hi ndlela yoleyo rito ra Hosi rihangalaka hi matimba, riya ritiya.” (Mint. 19:17-20) Leswo aku li wumboni la leswaku ntiyiso wu hlule mavunwa ni madimona! Vanhu volavo votshembeka vahi vekele xikombiso lexinene namuntlha. Na hina namuntlha hi hanya amisaveni leyi dzimeke timintsu ka wungoma. Loko ho kuma leswaku hi ni nchumu lexi fambisanaka ni wungoma, hi fanele hi yendla leswi Vaefesa vangaswi yendla — hi tekela kuxi cukumeta! Onge hinga yendla hinkwaswo leswi hingaswi kotaka leswaku hi fambela kule ngopfu ni minkhuva yoleyo leyi nyenyetsaka.