Mareferensiya ya Xibukwana xa Minhlanganu ya Mahanyelo ni Ntirho
1 KUYA KA 7 KA ABRIL
XUMA XINGA KA RITO LA XIKWEMBU | 1 VAKORINTO 7-9
“Kutshama Unga Chadanga I Nyiko ya Lisima”
w11 15/1 matl. 17-18 par. 3
Yendlela Yehovha Swotala na Ungase Chada
Hakanyingi loko munhu angase chada a ni nkama wotala ni tshunxeko lowukulu kutlula munhu lweyi a chadeke. (1 Kor. 7:32-35) Kutani munhu lweyi a kalaka anga chadanga a pfulekeliwe hi mukhandlu woyendla swotala ngopfu antirhweni wa Yehovha, ni kukombisa lirhandzu ka votala ni kuyaka wuxaka leli tiyeke na Yehovha. Vakreste vohlaya nyana va vone vuyelo la kutshama voxe kutani va yendle xiboho ‘xoyamukela mhaka leyi’ ya kunga chadi kumbexana kuringana nkama wokarhi. Swinga yendleka van’wana avanga tivekiselanga kunga chadi, kambe swiyimo swa vona swi cincile. Va yanakanyisise kahle hi swiyimo swa vona kutani va vone leswaku avataswi kota kutshama na vanga chadanga hi kupfuniwa hi Yehovha. Hi ndlela leyo va yamukele kucinca loku kutani va titshamela voxe. — 1 Kor. 7:37, 38.
w08 15/7 tl. 27 par. 1
Tipontunkulu ta Mapapila Lama Yaka ka Vakorinto
7:33, 34 — Xana i yini swilo ‘swa misava’ leswi nuna kumbe nsati va vilelaka hi swona?
Pawulo a vulavula hi swilo swa wutomi la siku ni siku, leswi nuna na nsati va faneleke va tikarhatela swona. Swilo swa kona i swakudja, swa kuyambala ni yindlo yoyetlela ka yona. Kambe aswi katsi swilo swobiha swa misava leyi, leswi Vakreste va faneleke vaswi papalata hi kuhelela. — 1 Yohane 2:15-17.
w96 15/10 matl. 12-13 par. 14
Loko Ungase Chada Unga Tirhela Yehovha na Unga Kavanyetiwi
Mukreste lweyi a titshamelaka yexe kambe a tirhisaka xiyimo xa yena xokala anga chadanga leswaku a hlongolisa swikongomelo swa wutiyanakanyi anga ‘yendli swona leswitlulisaka’ Vakreste lava chadeke. A titshamela yexe kunga li ‘hikolaho ka Mfumu’ kambe hikolaho ka swivangelo swa yena swa wutiyanakanyi. (Matewu 19:12) Wansati kumbe wanuna wokala anga chadanga a fanele ‘atikarhatela swa Hosi’, a tikarhatela ‘kutsakisa Hosi’ ni ‘kutinyiketa kutirhela Hosi, angayanakanyi swin’wana.’ Leswi swi vula kutinyiketela kutirhela Yehovha na Kreste Yesu na anga hingeletiwi ha nchumu. Loko Vakreste lavanga voxe voyendla leswi, hikona va ‘yendlaka swona leswitlulisaka’ Vakreste lava chadeke.
Lavetela Xuma xa Moya
Tinhlamuselo ta le Hansi
Minkama yin’wana Vakreste van’wana va tiyendlela xiboho xa kuhambana ni vanuna kumbe vasati va vona hambiloko vanga tikhomanga hi ndlela yobiha hi tlhelo la masangu. (1 Vakorinto 7:11) Mukreste angaha pimisa kuhambana ni nuna kumbe nsati wa yena loko a li ka swiyimo leswi landzelaka.
• Kuyala kuhlayisa munti: Nuna a yala kuhlayisa ndjangu wa yena la kakuva nsati ni vana va sokola hi ndlala hi kupfumala male ya swakudla. — 1 Timotiya 5:8.
• Kubiwa kumbe kuhluphiwa: Nuna kumbe nsati a hela hi kubiwa la kakuva wutomi la yena li va nghozini. — Vagalatiya 5:19-21.
• Kuyalisiwa kugandzela Xikwembu: Nuna kumbe nsati a yendla leswaku swinga koteki leswaku munghanu wa yena wa wukati a tirhela Yehovha. — Mintirho 5:29.
w00 15/7 tl. 31 par. 2
Unga Tshama na U Basile ka Timhaka ta Masangu
Kutani vampsha ava fanelanga va tsutsumela kuchada loko vaha li ka nkama lowu kunavela ka timhaka ta masangu kusungulaka kukula. Awukati li lava leswaku munhu a tiboha naswona kuhanya hi kupfumelelana ni wutihlamuleli lelo swi lava munhu lweyi a wupfeke. (Genesa 2:24) Swa yampsa u rindza kufikela loko se ‘uhundzile ka wurhumbuki la wumpsha’, kunga nkama lowu kunavela ka kuyendla timhaka ta masangu kunga kukulu naswona kunga yendlaka leswaku ungaswi koti kuyendla swiboho leswinene. (1 Vakorinto 7:36) Hlalelani xidjoho xa kona ni wuphukuphuku la kona loko munhu lweyi a kuleke, lweyi a navelaka kuchada, a tinghenisa ka kutikhoma hi ndlela yobiha hi tlhelo la masangu ntsena hi leswaku angamu kumi wochada na yena!
8 KUYA KA 14 KA ABRIL
XUMA XINGA KA RITO LA XIKWEMBU | 1 VAKORINTO 10-13
“Xikwembu Xatshembeka”
w17.02 matl. 29-30
Swivutiso swa Valerhi
Mupostola Pawulo a tsale leswaku Yehovha ‘angakala angapfumeli leswaku mihlangana ni ndzingo lowu wumihlulaka’. (1 Kor. 10:13) Xana leswi swi vula leswaku Yehovha a rhanga hi kukambela miringo leyi hinga kotaka kuyi tiyisela a gama a hlawula leyi hingayi tiyiselaka leswaku yihi wela?
▪ Loko mavonela lawa ma li ntiyiso ahi kambisiseni leswi manga vulaka swona ka hina. Ndzhaku ka loko n’wana wa yena a file hi kutisunga makwerhu mun’wana waxinuna a tivutisile a ku: ‘Xana Yehovha a rhange hi kukambela loko nkatanga na mina ahitaswi kota kutiyisela kulahlekeliwa hi n’wana wa hina hi ndlela leyi? Xana hi weliwe hi ndzingo lowu hileswi Yehovha aswi voneke kahali mahlweni leswaku ahitawu tiyisela?’ Xana kuni xivangelo xa kutwala xopfumela leswaku Yehovha a lawula swilo hi ndlela leyi?
Kukambisisa hi wuyenti marito ya Pawulo ka 1 Vakorinto 10:13 swi yendla hi fikelela magamu lawa: Akuna xivangelo ni xin’we xa Matsalwa xokholwa leswaku Yehovha a rhanga hi kukambela leswi hinga kotaka kuswi tiyiselela a gama a hlawula ndzingo lowu faneleke wuhi wela. Ahi kambisiseni swivangelo swinharhu leswinga yendla hi fikelela magamu lawa.
Xosungula, Yehovha a nyike vanhu tshunxeko wa kutihlawulela. Kutani a lava leswaku hi tihlawulela ndlela leyi hi lavaka kuhanya ha yona. (Det. 30:19, 20; Yoxu. 24:15) Loko hi hlawula ndlela leyinene,Yehovha atahi kongomisa. (Swi. 16:9) Kambe ke loko hi hlawula ndlela yobiha, hita boheka kulangutana ni mavuyelo ya kona yobiha. (Gal. 6:7) Xana loko Yehovha awo hlawula miringo leyi faneleke yihi wela, ahita vula leswaku hakunene hi ni tshunxeko wotihlawulela hi kuhelela?
Xa wumbirhi, Yehovha angahi vhikeli ka “nkama ni xiyendlakalo leswi kalaka swinga nyimeliwanga”. (Ekl. 9:11) Timhangu tochavisa tingahahi wela hikolaho ka leswi hinga ka ndhawu yokarhi hi nkama lowunga liki wunene. Yesu a tshame a vulavula hi nghozi leyi dlayeke 18 wa vanhu loko va weliwa hi xihondzo. Yesu aswi kombisile leswaku nghozi liya akungali kurhandza ka Yehovha. (Luka 13:1-5) Xana impela swa twala kupimisa leswaku Xikwembu xi kheta leswaku i mani lweyi a faneleke a hanya kumbe kufa loko kuhumelela mhangu leyingo tiyendlekela? Aswi twali!
Xa wunharhu, mun’wana ni mun’wana wa hina wa khumbeka ka mhaka ya kutshembeka. Khumbula leswaku Sathana a tlhontlhe wutshembeki la hinkwavo lava tirhelaka Yehovha hi kuvula leswaku ahinge tshembeki ka yena loko hi weliwa hi miringo. (Yobo 1:9-11; 2:4; Nhla. 12:10) Loko Yehovha awohi vhikela ka miringo yin’wana hileswi a vonaka leswaku ahingeyi koti kuyi tiyisela, Sathana a atava a vula ntiyiso loko a ku hi tirhela Yehovha ntsena hi kulava kuvuyeliwa.
Xa wumune, aswi bohi kuva Yehovha a tiva nchumu xin’wana ni xin’wana lexingata humelela awuton’wini la hina. Loko kuli leswaku Yehovha a hlawula miringo leyi faneleke yihi wela, leswo swi vula leswaku yena a tiva xin’wana ni xin’wana lexingata yendleka awuton’wini la hina. Kambe leswo aswi kona aBibeleni. Vhela Xikwembu xi ni matimba ya kutiva swilo hinkwaswo leswingata humelela ka wumundzuku la hina. (Esa. 46:10) Kambe Bibele li kombisa leswaku Xikwembu xi hlawula leswi xi lavaka kuswi tiva mayelana ni wumundzuku la hina. (Gen. 18:20, 21; 22:12) Xi yendla leswo hikuva xi xixima tshunxeko wa hina wotihlawulela loko xi li karhi xi tirhisa matimba ya xona yotiva swilo kahali mahlweni. Kunene leswi hi leswi hiswi nyimelaka ka Xikwembu lexi tirhisaka matimba ya xona hi ndlela leyi faneleke. — Det. 32:4; 2 Kor. 3:17.
Kutani hi fanele hima twisisa kuyini marito ya Pawulo lamange: ‘Xikwembu . . . xingakala xingapfumeli leswaku mihlangana ni ndzingo lowu wumihlulaka’? Ka ndzimana leyi, Pawulo a vulavula hi leswi Yehovha aswi yendlaka loko hi li karhi hi langutana ni ndzingo kungali loko wungasehi wela. Marito ya mupostola lweyi mahi tiyisekisa leswaku kunga khataliseki miringo leyi hinga kumanaka na yona, loko hi tshemba Yehovha atahi pfuna. (Pis. 55:22) Marito lawa ya Pawulo lamahi chavelelaka ma sekeliwe ka mintiyiso yimbirhi ya xisekelo.
Wosungula, miringo leyi hi kumanaka na yona yi ‘tolovelekile ka vanhu.’ Leswi swi vula leswaku ni vanhu van’wana va weliwa hi miringo leyi hi langutanaka na yona. Hingayi tiyisela miringo leyi loko ntsena hi tiseketela ka Xikwembu. (1 Pet. 5:8, 9) Loko a vula marito ya 1 Vakorinto 10:13, Pawulo a avulavula hi miringo leyi weleke Vayisrayele loko va li amananga. (1 Kor. 10:6-11) Vayisrayele votshembeka avataswi kota kutiyisela miringo liya hikuva ayi tiyiseleka avan’hwini. Pawulo a vule ka 4 leswaku “van’wana va vona” ava yingisanga. Lexi vavaka hi leswaku Vayisrayele van’wana va hluliwile hi kunavela kobiha hileswi va tsandzekeke kutshemba Xikwembu.
Wa wumbirhi, “Xikwembu xatshembeka”. Ndlela leyi Xikwembu xi tirhisaneke ha yona ni malandza ya xona ka wurunguli la Bibele yi kombisa leswaku xi kombisa lirhandzu la xona lotshembeka “ka lavaxirhandzaka ni kuhlayisa swileriso swa xona”. (Det. 7:9) Nakambe wurunguli li kombisa leswaku minkama hinkwayo Xikwembu xi hetisisa switshembiso swa xona. (Yoxu. 23:14) Tani hi leswi Yehovha a tshembekaka kusukela khale, lavamu rhandzaka ni kumu tshemba vanga tiyiseka leswaku ata hetisisa switshembiso swa yena leswimbirhi loko vo langutana ni miringo: (1) Ange pfumeleli ndzingo ni wun’we wu kula la kakuva hingahaswi koti kuwu tiyisela, naswona (2) ‘atahinyika ndlela yohuma, leswaku hikota kuyitiyisela’ miringo.
Yehovha ava nyikisa kuyini ndlela yohuma lavamu tshembaka loko va li miringweni? I ntiyiso leswaku loko Xikwembu xiswi lava xingayi susa miringo yoleyo. Kambe tsundzuka marito ya Pawulo lamange: “Xitaminyika ndlela yohuma, leswaku mikota kuswitiyisela.” Kambe minkama yotala Yehovha ahi nyika “ndlela yohuma” hi kuhi nyika leswi hiswi lavaka leswaku hi kota kutiyisela. Vona tindlela tin’wana leti Yehovha angahi nyikaka tona leswaku hi huma amiringweni:
▪ Yehovha ‘ahichavelela maxangwini hinkwawu ya hina’ (2 Kor. 1:3, 4) Yehovha anga rhulisa miyanakanyo ya hina, timbilu ta hina ni matitwela ya hina hi kutirhisa Rito la yena, moya wokwetsima ni swakudja swa moya leswi hlonga lotshembeka lihi phamelaka swona. — Mat. 24:45; Yoh. 14:16, Rhom. 15:4.
▪ Yehovha ahi kongomisa hi kutirhisa moya wokwetsima. (Yoh. 14:26) Loko hi li miringweni, moya wokwetsima wungahi pfuna kukhumbula rungula lokarhi la le Bibeleni kumbe matshinya ya minawu ya Bibele leswaku hi kota kuyendla swiboho hi wutlharhi.
▪ Yehovha anga tirhisa tintsumi leswaku tihi pfuna. — Hev. 1:14.
▪ Yehovha angahi pfuna hi kutirhisa vamakwerhu leswaku ‘vahitiyisa swinene’ hi marito ni hi swiyendlo swa vona. — Kol. 4:11.
Kutani ke, hingama twisisa kuyini marito ya Pawulo lamanga ka 1 Vakorinto 10:13? Yehovha angahi hlawuleli miringo leyi hi faneleke hi langutana na yona. Hambiswilitanu, loko hi tshuka hi kumana ni miringo, hinga tiyiseka hi leswi: loko himu tshemba hi kuhelela, Yehovha ange pfumeleli leswaku hi weliwa hi miringo hi ndlela leyi swinga kotekiki kuva munhu wa nyama ayi tiyisela. Atahi nyika ndlela yohuma leswaku hi kota kutiyisela. Kunene leswo swahi chavelela!
Lavetela Xuma xa Moya
w04 1/4 tl. 29
Swivutiso swa Valerhi
Hayini 1 Vakorinto 10:8 yi vula leswaku kudlayiwe 23.000 wa Vayisrayele hi siku lin’we hikolaho kotikhoma hi ndlela yobiha hi timhaka ta masangu, kuve Tinhlayo 25:9 yi vula leswaku kudlayiwe 24.000 wa vona?
Kuni swivangelo swo hambanahambana leswinga vaka swiyendle leswaku kunyikeliwa tinhlayo timbirhi ta lava dlayiweke. Xivangelo lexi vevukaka kuxi twisisa hi leswaku nhlayo ya kona yi le xikarhi ka 23.000 ni 24.000. Kutani leswo swi pfumelela leswaku kuvulavuliwa hi tinhlayo hatimbirhi.
Vona nchumu xin’wana lexinga vaka xi yendle kunyikeliwa tinhlayo timbirhi. Mupostola Pawulo a tshahe mhaka ya Vayisrayele loko va li aXitimi tani hi xikombiso lexi Vakreste va le Korinto ava fanele va tibasopisa ka xona, tani hi leswi ntalo wa vanhu va doropa leli ava tikhoma hi ndlela yobiha hi timhaka masangu. A tsale leswi: ‘Hingatshukeni hinghena vuwoswini, kufana ni leswi van’wana va vona vayendliseke swona, kutani hi siku rin’we kulove vanhu va makume mambirhi ya makhulu na manharhu (23.000).’ Pawulo a nyikele nhlayo ya 23.000 tani hi nhlayo leyi kongomeke ya lava dlayiweke hi Yehovha hikolaho kotikhoma hi ndlela yobiha hi tlhelo la masangu. — 1 Vakorinto 10:8.
Kambe Tinhlayo ndzima 25 yihi byela leswaku “Israyele atinghenisela akugandzeleni ka Bali wa Peyori, kutani Yehovha ahlundzukela Israyele.” Kutani Yehovha a lerhise Moxe leswaku a dlaya “varhangeli hinkwavo va vanhu”. Moxe hi tlhelo la yena a rhuma vayavanyisi leswaku va hetisisa xilerhiso lexo. Akuheteleleni, loko Finiyasi a dlaya Muyisrayele mun’wana lweyi a ngheniseke wansati wa Mumidiyani anxaxeni wa Vayisrayele, ‘khombo linyimisiwa’. A wurunguli li gimeta mhaka hi ndlela leyi: “Lavafeke hikolaho ka khombo leli avaringana 24.000.” — Tinhlayo 25:1-9.
A nhlayo leyi nyikeliwaka ka buku la Tinhlayo handle kokanakana yi katsa “varhangeli hinkwavo va vanhu” lava dlayiweke hi vayavanyisi swin’we ni lava dlayiweke hi Yehovha hi kukongoma. Kunene swingava swi yendlekile leswaku nhlayo ya varhangeli lava dlayiweke hi vayavanyisi ayi fika 1.000, la kakuva nhlayo hinkwayo ya lava dlayiweke yi khwela yiya fika 24.000. Kunga khataliseki leswaku varhangeli lava na vona va tikhome hi ndlela yobiha hi tlhelo la masangu, kumbe vayo hlanganyela ka nkhuvu lowu veke kona ntsena kumbe vayo pfumelela vamakwavo vaswi yendla, mhaka hi leswaku vave ni nandzu wa ‘kutinghenisela akugandzeleni ka Bali wa Peyori’.
Mayelana ni rito lelinge ‘kutinghenisela’, buku lin’wana la kuhlamusela Bibele li vula leswaku linga vula “kutiboha ni munhu mun’wana.” Vayisrayele ava li vanhu lava tinyiketeleke ka Yehovha, kambe loko va ‘tinghenisela akugandzeleni ka Bali wa Peyori’ wuxaka la vona lelinene ni Xikwembu li tsemekile. Loko se kuhundze kolomu ka 700 wa malembe, Yehovha hi kutirhisa muprofeta Hosiya a byele Vayisrayele a ku: “Kambe vona vaye ka Bali wa Peyori; vatinyiketele ka nchumu xolexo xa tingana, Kutani vava lavanyenyetsaka kufana ni nchumu lexi vaxirhandzaka.” (Hosiya 9:10) Hinkwavo lava yendleke swilo leswi ava lulameliwa hi kudlayiwa hi Xikwembu. Hikolaho Moxe a tsundzuxe Vayisrayele a ku: “Matihlo ya n’wina mavone leswi Yehovha aswiyendleke amhakeni ya Bali wa Peyori; Yehovha Xikwembu xa n’wina, adlaye vanhu hinkwavo axikarhi ka n’wina lava avalandzela Bali wa Peyori.” — Deteronoma 4:3.
w15 15/2 tl. 30
Swivutiso swa Valerhi
Xana swo boha leswaku muchumayeli waxisati a funengeta nhloko loko a fambisa djondzo ya Bibele swin’we ni muchumayeli waxinuna?
▪ Ka “Swivutiso swa Valerhi” ka Murindzi wa 15 ka Julho wa 2002 hi Xiputukezi, kuhlamuseliwe leswaku makwerhu waxisati a fanele kufunengeta nhloko loko a fambisa djondzo ya Bibele ni muchumayeli waxinuna, kunga khataliseki leswaku muchumayeli lweyi waxinuna a khuvuliwile kumbe angase khuvuliwa. Kambe loko kukambisisiwile mhaka leyi hi wuyenti kuvoniwe leswaku kufanele kucinciwa nyana nkongomiso lowu.
Loko makwerhu waxisati a fambisa djondzo ya Bibele leyi se yi tiyeke ni muchumayeli waxinuna lweyi a khuvuliweke, handle kokanakana makwerhu waxisati a fanele a funengeta nhloko. Hi kuyendla tanu, makwerhu waxisati a kombisa kuhlonipha lunghiselelo la Yehovha la wunhloko lelinga kona ka Bandla la Wukreste, hikuva a yendla ntirho lowu hi ntolovelo awuta yendliwa hi makwerhu waxinuna lweyi anga na yena. (1 Kor. 11:5, 6, 10) Kumbe makwerhu waxisati anga kombela makwerhu lweyi waxinuna kuva a li yena a fambisaka djondzo leyo loko a faneleka ni kuswi lunghekela.
Hi tlhelo lin’wana, loko makwerhu waxisati a fambisa djondzo ya Bibele leyi se yi tiyeke ni muchumayeli waxinuna wokala anga khuvuliwanga naswona kungali nuna wa yena, anga boheki kufunengeta nhloko hikuya hi Matsalwa. Hambiswilitanu, swinga yendleka leswaku hambi ka xiyimu lexi, vamakwerhu van’wana vaxisati va lava kufunengeta nhloko hikolaho ka lipfalu la vona.
22 KUYA KA 28 KA ABRIL
XUMA XINGA KA RITO LA XIKWEMBU | 1 VAKORINTO 14-16
“Xikwembu Xita va ‘Swilo Hinkwaswu ka Vanhu Hinkwavu’”
w98 1/7 tl. 21 par. 10
“Lifu Lita Helisiwa”
“Makumu” ma vula magamu ka Kufuma ka Kreste ka 1.000 wa malembe, loko Yesu hi kutitsongohata ni kutshembeka a tlhelisa Mfumu ka Xikwembu tlhelo B’ava wa yena. (Nhlavutelo 20:4) Xikongomelo xa Xikwembu xa ‘kuhlanganisa swivumbiwa hinkwaswu, swa le matilweni ni swa laha misaveni, nhloko ya swona ava Kriste’ xita va xi hetisekile. (Vaefesa 1:9, 10) Kambe, kusungula Kreste atava a helise ‘vuhosi hinkwabyu, ni kufuma hinkwaku, ni matimba hinkwawu’ leswi lwaka ni kurhandza ka Xikwembu. Leswi aswi katsi ntsena kulovisiwa lokungatava kona hi Armajedoni. (Nhlavutelo 16:16; 19:11-21) Pawulo a li: “Kriste afanele kufuma, kukondza Xikwembu xiveka valala hinkwavu hansi ka minkondzo ya yena. Kutani nala lweyi wohetelela lweyi angatahelisiwa i rifu.” (1 Vakorinto 15:25, 26) Kunene, hinkwaswu leswi vangiweke hi xidjoho xa Adamu swin’we ni lifu switava swi susiwile. Kutani Xikwembu xita va xi humese vafi “masirheni” hi kuva pfuxa. — Yohane 5:28.
kr tl. 237 par. 21
Mfumu wa Xikwembu Wuta Yendla Kurhandza ka Xona aMisaveni
Kambe kuvuliwa yini hi vuyelo leli talaka kuva kona la mavabyi, kunga vuyelo la xidjoho leli hinga kotiki kuli gega, a lifu? Lifu i ‘nala wa hina wohetelela’, kunga nala lweyi hi wugamu a hlulaka vanhu hinkwavo lavanga hetisekangiki, hambi swi hlwela kumbe swinga hlweli. (1 Kor. 15:26) Kambe xana lifu leli i nala wochavisa ka Yehovha? Vona leswi Esaya aswi profeteke: ‘Atali helisela wugamu lifu, naswona Yehovha, Hosi Leyikulu Leyifumaka, atasula minhloti atinghoheni hinkwato.’ (Esa. 25:8) Xana waswi kota kuvona nkama lowo hi mimpimiso? Swilahlo, masirha, kurila hi kuvaviseka swita hela! Kuhambana ni leswo kutava ni minhloti ya kutsaka loko Yehovha a hetisisa xitshembiso xa yena xotsakisa xopfuxa lava feke! (Lerha Esaya 26:19.) Hi wugamu, swilondza hinkwaswu leswi vangiweke hi lifu swita holisiwa.
w12 15/9 tl. 12 par. 17
Kurhula Kuringana 1.000 wa Malembe ni Kutlula
Akuna ndlela yin’wana yoyampsa yohlamusela ndlela leyi wutomi lingata va xiswona ndzhaku ka 1.000 wa malembe, kutlula marito lamange “leswaku Xikwembu xiva swilo hinkwaswu ka vanhu hinkwavu.” Xana leswo swi vula yini? Yanakanya hi nkama lowu hundzeke aEdeni loko vanhu lava hetisekeke, Adamu na Evha, avaha li xiphemu xa ndjangu wa Yehovha worhula ni lowu awuli ni wun’we. Yehovha Mufumi wa Wuyaku hinkwalo, a afuma hi kukongoma swivumbiwa hinkwaswu leswi aswi vumbeke, swa le tilweni ni swa la misaveni. Swivumbiwa leswi aswi kota kuvulavula na yena hi kukongoma, swimu gandzela ni kukatekisiwa hi yena. Yehovha a ali “swilo hinkwaswu ka vanhu hinkwavu.”
Lavetela Xuma xa Moya
w12 1/9 tl. 9, kwadru
Xana Mupostola Pawulo A Tsimbise Vavasati Kuvulavula Loko va li aMinhlanganwini?
Mupostola Pawulo a tsale a ku: “Vavasati vafanele kumiyela tinhlengeletanwini”. (1 Vakorinto 14:34) Xana a alava kuvula yini hi marito lawa? Xana a adzela vavasati ingi hi loko vanga na wutivi? Aswi tanu. Kahlekahle, minkama yotala Pawulo a vulavule hi vavasati tani hi lava nyikaka djondzo leyinene ka van’wana. (2 Timotiya 1:5; Tito 2:3-5) Ka papila la yena leli ali tsaleleke Vakorinto, Pawulo anga tsundzuxanga vavasati kuhela leswaku va ‘miyela’ kambe a tsundzuxe ni van’wana lava avali ni nyiko yovulavula hi tirimi ni kuprofeta leswaku va ‘miyela’ loko mupfumelikuloni a li karhi a vulavula. (1 Vakorinto 14:26-30, 33) Swingaha yendleka vavasati van’wana lava ava li Vakreste, hi kuhisekela ngopfu lipfumelo la vona lelimpsha, ava tsemerhisa muvulavuli aminhlanganwini leswaku vamu vutisa swivutiso hilaha akuli mukhuva andhawini yoleyo. Leswaku kupapalatiwa kunga hleleki loku, Pawulo ava khutaze leswaku “vavutisa vanuna va vona kaya.” — 1 Vakorinto 14:35.
it-1 matl. 1197-1198
Mirhi Lowunga Boliki
Hi kuhlanganisiwa na Yesu hi kupfuka loku fanaka ni ka yena, lavangata fuma na yena vangata pfuxiwa tani hi swivumbiwa leswinga ni mimirhi ya moya ntsena kambe vata tlhela va nyikiwa mimirhi leyi swinga kotekiki leswaku yi fa ni leyi swinga kotekiki leswaku yi bola kumbe yi lovisiwa. Loko vatava va hanyile la misaveni, va tirhele Xikwembu hi kutshembeka ni kufa na vali ni mimirhi ya nyama leyi bolaka, vata nyikiwa mimirhi ya moya leyinga boliki, hilaha Pawulo aswi vekaka alivaleni ha kona ka 1 Vakorinto 15:42-54. Handle kokanakana kungafi swi hlamusela xiyimu xa wutomi leli va tiphinaka hi lona, leli swinga kotekiki leswaku li hela ni leli swinga kotekiki leswaku li lovisiwa. Kambe kunga boli swi voneka swi yelana ni mirhi lowu Xikwembu xiva nyikaka wona, kunga mirhi lowu swinga kotekiki leswaku wu bola, kuwonheka kumbe kulovisiwa. Kutani swi voneka ingi Xikwembu xiva nyika matimba ya leswaku mimirhi ya vona yi tshamela kutipfuxeta, leswaku swinga lavi va tiseketela hi matimba ya wutomi lama taka hi ka swihlovo swin’wana, hilaha swi yendlekaka ha kona ka swivumbiwa leswin’wana swa Xikwembu, swa nyama ni swa moya. Leli i wumboni leli khumbaka mbilu la ndlela leyi Xikwembu xiva tshembaka ha yona. Hambiswilitanu, kuva ni mimirhi leyi swinga kotekiki leswaku yi lovisiwa ni leyi yi tipfuxetaka hi yoxe aswiva yendli vangaha lawuliwi hi Xikwembu. Na vona, kufana na Kreste Yesu Nhloko ya vona, vaya mahlweni va tiveka hansi ka nkongomiso wa Yehovha, B’ava wa vona. — 1Ko 15:23-28.
29 KA ABRIL KUYA KA 5 KA MAIO
XUMA XINGA KA RITO LA XIKWEMBU | 2 VAKORINTO 1-3
“Yehovha, ‘Xikwembu Lexi Kuchavelela Hinkwaku Kuhumaka ka Xona’”
w17.07 tl. 13 par. 4
“Mirila ni Lavarilaka”
B’ava wa hina lweyi anga ni timpsalu na yena a tshame a twa kuvava hikolaho kofeliwa hi vanhu lava a ava rhandza vofana na Abrahama, Isaka, Yakobe, Moxe na Hosi Davhida. (Tinhl. 12:6-8; Mat. 22:31, 32; Mint. 13:22) Rito la Xikwembu lahi tiyisekisa leswaku Yehovha a rindzele hi kunavela lokukulu nkama lowu angata pfuxa malandza ya yena. Nakambe Yehovha wama xuva malandza ya yena lama feke. (Yobo 14:14, 15) Mata tiphina hi wutomi naswona matava ni lihanyu lelinene. Nakambe vona leswaku N’wana wa Xikwembu lweyi a rhandzekaka ngopfu, “lweyi aarhandzeka hi ndlela yohlawuleka”, a fe lifu lovava swinene. (Swi. 8:22, 30) Ahingeswi koti kukuma marito yohlamusela kuvava loku Yehovha a kutweke loko n’wana wa yena a fa. — Yoh. 5:20; 10:17.
w17.07 tl. 15 par. 14
“Mirila ni Lavarilaka”
I ntiyiso leswaku swinga tika kukuma marito yochavelela munhu lweyi a feliweke. Hambiswilitanu, Bibele li li: “lirimi la lavakutlhariha ladaha.” (Swi. 12:18) Vamakwerhu votala va kume marito lama chavelelaka ka broxura lelinge Loko U Feriwa Hi Loyi U N’wi Rhandzaka. Kambe hakanyingi lexi pfunaka ngopfu i ‘kurila ni lava rilaka’. (Rhom. 12:15) Gaby lweyi a feliweke hi nuna a li: “Ni phofula ndlela leyi ni titwaka ha yona hi kurila. Kutani swa ni chavelela loko vanghanu va mina va rila na mina. Naswi vona leswaku na vona va twa kuvava kufana na mina.”
Lavetela Xuma xa Moya
w16.04 tl. 32
Swivutiso Swa Valerhi
I yini “xitiyisekiso” ni “mfungu” leswi mutotiwa ha mun’we aswi yamukelaka ka Xikwembu? — 2 Kor. 1:21, 22.
▪ Xitiyisekiso: Hi kuya hi buku lin’wana la tinhlamuselo, rito la Xigrika leli hundzuluxeliweke liku “xitiyisekiso” ka 2 Vakorinto 1:22, i “rito leli tirhisiwaka ka swilo swa nawu ni le ka mabindzu” leli vulaka “xiphemu xosungula xa hakelo, nchumu lexi nyikeliwaka tani hi xitiyisekiso”. Xitiyisekiso lexi “i xiphemu xa ntsengo wa male lexi hakeliwaka mahlweni, lexi axi nyika munhu mfanelo yova n’winyi wa leswi xaviweke hambi loko angase hakela ntsengo hinkwawu wa male ya nxavo, kumbe lexi axi tiyisekisa ntwananu axikarhi ka vanhu vambirhi.” Loko swita mhakeni ya Vakreste lava totiweke, a hakelo leyi heleleke yi hlamuseliwa ka 2 Vakorinto 5:1-5 tani hi mirhi wa moya lowu swinga kotekiki kuwu lovisa. Nakambe hakelo ya kona yi katsa xihiwa xa kungafi. — 1 Kor. 15:48-54.
Hi lirimi la Xigrika la manguva lawa, kuni rito leli yelanaka ni lelinge xitiyisekiso leli vulaka xitlan’wana, lexi yambalisiwaka wansati lweyi a tshembisiwaka wukati. Lexi i xifaniso lexi fanelekaka ka lavangata va xiphemu xa nsati wa Kreste wofanekisela. — 2 Kor. 11:2; Nhla. 21:2, 9.
▪ Mfungu: Aminkameni ya khale, a xifungu kumbe selo axi tirhisiwa tani hi nsayino kumbe assinatura leli ali tiyisekisa leswaku nchumu xokarhi xi lumba munhu wokarhi, ni kukombisa kutiya ka mhaka yokarhi kumbe ntwananu axikarhi ka vanhu. Loko swita mhakeni ya Vakreste lava totiweke, vona va “fungiwa” kumbe va namaketiwa xifungu kumbe selo hi ndlela yofanekisela hi moya lowokwetsima tani hi lava lumbaka Xikwembu. (Efe. 1:13, 14) Kambe munhu a fungiwa lohetelela na kusale nkama wokarhi angase fa kumbe na kusale kutsongo leswaku Nhlomulu lowukulu wu sungula. — Efe. 4:30; Nhla. 7:2-4.
w10 1/8 tl. 23
Xana Awuswi Tiva?
Xana Mupostola Pawulo Angahava A Ayanakanya Yini Loko A Vulavula Hi “Nchololoko Wa Kuhlula”?
▪ Pawulo a tsale leswi: “Xikwembu . . . [xihikongomisa] ka nchololoko wa kuhlula nahi longoloka na Kreste, naswona ha hina, xihangalasa nun’hwelo wa kutiviwa ka xona wutwiwa andhawini yin’wana ni yin’wana! Hikuva ka Xikwembu hi nun’hwelo wonandziha wa Kreste axikarhi ka lavaponisiwaka ni le xikarhi ka lavalovaka; ka lavohetelela hi nun’hwelo wa lifu lowu yisaka akufeni, ka lavosungula hi nun’hwelo wa wutomi lowu yisaka awuton’wini.” — 2 Vakorinto 2:14-16.
Mupostola Pawulo a avulavula hi mukhuva wa Varhoma wa kuchololoka aswitaratwini nava dzunisa ndhuna ya vona ya nyimpi hi leswi yi hluleke valala va tiko anyimpini. Ka swiyendlakalo leswo, swilo leswi phangiweke ni swib’ochwa swa nyimpi aswi vekiwa mahlweni ka xitshungu naswona akudlayiwa tihomu tani hi magandzelo, na xitshungu xi li karhi xi hoyozela ni kubela minkulungwana ndhuna leyi hluleke ni vuthu la yona. Loko nchololoko lowu wa kuhlula wu hela akudlayiwa tihomu leti naswona ingi ni swib’ochwa swotala aswi dlayiwa na swona.
Marito lamange “nun’hwelo wonandziha wa Kreste” ma vula wutomi ka van’wana kasi ka van’wanyana ma vula lifu. Hikuya hi The International Standard Bible Encyclopedia (Enciclopédia Bíblica Padrão Internacional) marito wolawo yofanekisela “swinga yendleka ma susiwe ka mukhuva wa Varhoma wa kuhisa b’aso hi nkama lowu va chololokaka. Nun’hwelo lowu awu huma loko kuhisiwa b’aso awu vula kuhlula ka vahluli kambe hi nkama wun’we awu vula lifu ka swib’ochwa leswinga khomiwa.”