Swivutiso Swa Valerhi

Hi vamani lava ava li maphoyisa ka Tempele ya Vayuda naswona ava tirha yini?

Valevhi van’wana lava avangali vaprista ava yendla mintirho yin’wana ya kufana ni kuva maphoyisa. Ava kongomisiwa hi ndhuna ya tempele. Loko a tlhamusela ntirho lowu awu yendliwa hi maphoyisa lawa, mutsali mun’wana wa Muyuda lweyi a vitaniwaka Philo a te: “Van’wana va vona [Valevhi] ava vonelela minyanghwa leyi vanhu ava nghena hi yona loko vaya tempeleni. Van’wana ava vonelela ndhawu ya kukwetsima. Ava tiyiseka leswaku akuna munhu lweyi a nghenaka ka ndhawu ya kukwetsima na anga pfumeleliwanga hambi hi mphazamu. Van’wana ava vonelela matlhelweni ka tempele wusiku ni nhlikanhi na va yendla hi kucincana.”

A Sanedri ayi kombela maphoyisa lawa leswaku mayi pfuna loko swi laveka. Ntlawa lowu, hi wona woxe awu pfumeleliwa hi mfumu wa Rhoma leswaku wu tirhisa matlharhi.

Xidjondzi xa Bibele Joachim Jeremias, xi tlhamusele leswaku ankama maphoyisa manga khoma Yesu, ama vutisile swaku hi mhaka muni mangamu khomanga na a djondzisa atempeleni. Loko akungana maphoyisa lawa ama tirha atempeleni, Yesu na anga yendlanga xivutiso lexi. Xidjondzi lexi xi pimisa swaku kuve maphoyisa ya tempele lawa ama lava kumu khoma ankama na a huma atempeleni. (Yoh. 7:32, 45, 46) Hi nkama wun’wana, aSanedri yi rhumele ndhuna ya tempele ni maphoyisa man’wana akuva vaya khoma vapostolo vava tisa aSanedri. Swinga yendleka kuve maphoyisa ya tempele lawa manga kokovisa Pawulo mamu humesa tempeleni. — Mint. 4:1-3; 5:17-27; 21:27-30.