Ku Fana Na Zadoki, U Nga Chavi Nchumu

1-2. A ku li mani Zadoki? (1 Tikronika 12:22, 26-28)

PIMISA hi mhaka leyi: Xitshungu lexi tlulaka 340.000 wa vavanuna va patsanile hi nkama lowu Davhida a nga va hosi aIsrayele. Xitshungu lexi xi hete masiku manharhu na xi li ka ntshava a kusuhi ni Hebroni. Phela vona a va tsakile hintamu, a va bula, va hlekelela va tlhela va yimbelela tinsimu va dzunisa Yehovha. (1 Tik. 12:39) Ndzeni ka xitshungu lexi a ku ni jovhem lin’wani leli vitaniwaka Zadoki. Phela Yehovha a yendle swaku hi swi tiva swaku a jovhem leli a li li kona ka xitshungu lexiya. (Lerha 1 Tikronika 12:22, 26-28.) Se a ku li mhaka Zadoki?

² Zadoki a a li muprista lweyi a a tirha ni Muprista Wamukulu Abiyatari. Yehovha a nyike Zadoki wutivi ni wutlharhi la ku kota ku twisisa ku rhandza ka yena. (2 Sa. 15:27) Loko vanhu va lava ku tiva wutivi la Yehovha ni wutlharhi la yena a va vutisa Zadoki. Zadoki a a li wanuna lweyi a a nga chavi nchumu. Ka djondzo leyi hi ta vona swaku hi nga mu tekelelisa ku yini Zadoki.

3. a) Hi mhaka muni swi lava hi tiya nhlana hi nga chavi? b) Hi ta djondza hi yini ka nhlokomhaka leyi?

³ Ka masiku ya wugamu lawa hi hanyaka ka wona, Sathana a yendla hinkwaswu leswi a nga swi kotaka swaku a hlasela vanhu va Yehovha. (1 Pe. 5:8) Se nkama lowu hi nyimelaka swaku Yehovha a helisa Sathana ni misava leyi ya ku biha, hi fanele hi tiya nhlana hi nga chavi nchumu. (Ps. 31:24) Se swoswi a hi voneni tindlela tinharhu leti hi nga mu tekelelaka hi tona Zadoki ka mhaka leyi ya ku kala a nga chavi nchumu.

SEKETELA MFUMU WA XIKWEMBU

4. Hi mhaka muni swi lava swaku vanhu va Yehovha va tiya nhlana swaku va seketela Mfumu wa Xikwembu? (Vona mufoto.)

⁴ Leswi hi nga vatirheli va Yehovha hi seketela Mfumu wa Xikwembu hi timbilu ta hina hinkwatu. Minkama ya yinyingi swi lava hi nga chavi ku yendla leswo. (Mat. 6:33) Hi xikombiso, ka nkama lowu hi hanyaka ka wona swi lava hi tiya nhlana swaku hi yingisa Yehovha ni kuva hi chumayela mahungu ya Mfumu wa Xikwembu. (1 Tes. 2:2) Funtshi swi lava swaku hi nga chavi ku kala hi nga tipeti ka timhaka ta politika. (Yoh. 18:36) Vanhu va ku tala lava tirhelaka Yehovha, va lahlekeliwe hi minchumu ya vona, va khomiwa hi ndlela ya ku biha ni ku tlhela va petiwa madjele hi mhaka leswi va kalaka va nga seketeli timhaka ta politika ni ku kala va nga yi nyimpini.

5. Hi mhaka muni a swi lava Zadoki a nga chavi kuva a seketela Davhida?

⁵ Zodoki a nga yanga Hebroni ntsena swaku a ya va ka fexta leli nga yendliwa nkama Davhida a nga va hosi, kambe yena a fambe Hebroni na a lunghekelile ku lwa nyimpi. (1 Tik. 12:38) Yena a a tinyimiselile ku ya pfuna Davhida leswaku a vhikela Vayisrayele ka valala va yena. Swi nga yendleka Zadoki a a li sonchwa leli a li nga na xiperiyensiya kambe a a nga chavi nchumu.

6. I yini leswi Davhida a nga swi yendla kuva a va xikombiso xaxinene ka Zadoki? (Tipisalema 138:3)

⁶ I yini leswi nga pfuna Zadoki swaku a va sonchwa la ku kala li nga chavi? Yena a a hanyisana ni vavanuna va matimba, lava a va nga chavi nchumu; se a djondzile swinene ka xikombiso xa vavanuna volavo. Hi xikombiso, Davhida a ve ‘murhangeli wa masonchwa’ naswona a a nga chavi nchumu. Phela hi leswo swi nga yendla Vayisrayele va mu seketela swaku a va hosi. (1 Tik. 11:1, 2) Minkama hinkwayu Davhida a a tshemba Yehovha loko a lwa ni valala va yena. (Ps. 28:7; lerha Tipisalema 138:3.) Kambe ku ni vanhu van’wani lava nga va xikombiso xaxinene ka Zadoki, va ku fana na Yoyada ni n’wana wa yena Benaya lava na vona a va li masonchwa. Van’wani va nga va xikombiso xaxinene ka Zadoki kuve 22 wa varhangeli lava nga seketela Davhida. (1 Tik. 11:22-25; 12:26-28) Phela kuve hi mhaka ya vavanuna lavayani va ku tshembeka swi nga koteka swaku Davhida a vekiwa swaku a va hosi. Phela vona va yendle hinkwaswu leswi va nga swi kota swaku va mu vhikela.

7. a) Hi swini swikombiso swa vanhu lava tirhelaka Yehovha ka nkama wa hina leswi nga hi pfunaka kuva hi nga chavi? b) I yini leswi u nga swi djondza ka leswi nga yendlekela makwerhu lweyi a nga kombisiwa ka vhidiyo?

⁷ Na hina hi nga tiya nhlana loko hi djondza hi swikombiso swa vanhu va Yehovha lava nga tiyisela swikarhatu va tlhela va seketela Mfumu wa Xikwembu. Hosi ya hina Yesu Kreste a yalile ku tipeta ka swa politika. (Mat. 4:8-11; Yoh. 6:14, 15) Yena minkama hinkwayu a a tshemba Yehovha leswaku a mu tiyisa a tlhela a mu nyika ntamu lowu a wu laveka swaku a yendla leswi nga swinene. Namuntlha hi ni swikombiso swa majovhem lawa ma nga yala ku ya nyimpini ni ku seketela timhaka ta politika. Se swi ngo yini u tinyika nkama wa ku djondza hi swiperiyensiya swa majovhem wolawo leswi kumekaka ka jw.org?a

TINYIMISELI KU PFUNA VAMAKWERHU

8. I ka swiyimu muni lani swi lavaka swaku madoda ma nga chavi?

⁸ Tanihi vanhu va Yehovha, ha swi rhandza ku pfuna van’wani. (2 Ko. 8:4) Kambe minkama yin’wani a swi vevuki ku yendla leswo. Hi xikombiso, loko ku ni nyimpi swi lava madoda ma pfuna vamakwerhu bandleni hi ku va tiyisa, va va nyika Bibele ni mabuku man’wani ni ku tlhela va va pfuna hi ku va nyika swakudla, mpahla ni swilo swin’wani. Phela madoda ma ti rhandza tinyempfu ta Yehovha. Hi mhaka leyo, wona ma tinyimisele ku yendla xin’wani ni xin’wani hambi ku veka wutomi la wona nghozini swaku ma kota ku va pfuna loko va lava ku pfuniwa. (Yoh. 15:12, 13) Se loko madoda ma yendla leswo, hi nga vula swaku ma tekelela xikombiso xa Zadoki.

9. Hi ku ya hi 2 Samuwele 15:27-29, i yini leswi Davhida a nga kombela swaku Zadoki a swi yendla? (Vona mufoto.)

⁹ Wutomi la Davhida a li li nghozini hikusa n’wana wa yena Absalomu a a lava ku mu dlaya swaku a mu tekela wuhosi. (2 Sa. 15:12, 13) Swi lave Davhida a baleka a suka Yerusalema hi xihantla! Yena a byele vatirhi va yena a ku: “A hi fambeni, a hi balekeni hikusa a hi nga ta pona ka Absalomu!” (2 Sa. 15:14) Nkama lowu na va li ku balekeni, Davhida a swi vone swi yampsa swaku ku sala munhu aYerusalema leswaku a ta mu tisela marungula ya leswi a swi ta sala swi yendliwa hi Absalomu. Se a rhumele Zadoki ni vaprista van’wani swaku va tlhela va ya Yerusalema leswaku va ta mu byela hinkwaswu leswi a swi yendleka. (Lerha 2 Samuwele 15:27-29.) Kambe vanhu lava Davhida a nga va rhuma a va fanele va tivonela hintamu, hikusa leswi a a va rhume swona a swi ni nghozi. Pimisa hileswi Absalomu wanuna lweyi a a ni mona a tlhela a pimisa hi yena ntsena a a ta va yendla swona loko a yo tshuka a swi tsumbula swaku Zadoki ni vaprista van’wani a va li lahayani swaku va yisela Davhida mahungu naswona a va nyima na Davhida.

10. Zadoki ni vanhu van’wani va mu vhikelise ku yini Davhida?

¹⁰ Hambileswi Davhida a a li ni mavonelo, a swi lava a kombela ku pfuniwa hi Zadoki ni vanghanu va yena va ku tshembeka. (2 Sa. 15:32-37) A swi lava Huxayi a yendla ingi a nyima na Absalomu a tlhela a mu byela swaku va nga mu hlaselisa ku yini Davhida. Ku vula ntiyiso leswo a swi ta yendla swaku Davhida a tilunghiselela ku hlaseliwa. Kambe loko Absalomu a vona se swi fanelile ku landzela leswi a nga byeliwa hi Huxayi, Huxayi a byele Zadoki na Abiyatari leswi Absalomu a nga swi boha. (2 Sa. 17:8-16) Ku sukela kolanu, va vhele va rhumela marungula ka Davhida va mu gwela leswi Absalomu a nga swi boha. (2 Sa. 17:17) Hi ku pfuniwa hi Yehovha, Zadoki ni vaprista van’wani va swi kotile ku vhikela Davhida. — 2 Sa. 17:21, 22.

11. Hi nga xi tekelelisa ku yini xikombiso xa Zadoki loko hi pfuna vamakwerhu?

¹¹ A hi nge vamakwerhu va hina bandleni va le ka xiyimu xa ku chavisa naswona va lava swaku hi va pfuna. Hi nga xi tekelelisa ku yini xikombiso xa Zadoki, hi nga chavi nchumu? 1) Landzela minkongomiso. Loko u li ka xiyimu xa ku karhata i swa lisima swaku u lwela ku twanana ni vamakwerhu ni van’wani ni ku tlhela u yingisa minkongomiso leyi taka hi Betele. (Heb. 13:17) Madoda minkama hinkwayu ma fanele ma khumbuka minkongomiso ya nhlengeletanu ya ku fana ni ku tivhikela ka swidzedze kumbe tinghozi ta ntumbuluku. (1 Ko. 14:33, 40) 2) Nyima u tiyile u nga chavi nchumu, kambe tivoneli. (Swiv. 22:3) Rhanga hi ku pimisa na u nge se yendla nchumu. U nga tiveki nghozini na swi nga bohi. 3) Tshemba Yehovha. Khumbuka leswaku Yehovha a ni mhaka na wena naswona a lava ku ku pfuna. Yehovha a nga ku pfuna hi ku ku nyika matimba lawa ma lavekaka leswaku u kota ku pfuna vamakwerhu bandleni ni ku va sirhelela loko va lava ku pfuniwa.

12-13. I yini leswi u nga swi djondza ka leswi nga yendliwa hi makwerhu Viktor na Vitalii? (Vona mufoto.)

¹² Vona leswi nga yendliwa hi makwerhu Viktor na makwerhu Vitalii, lava va nga pfunisa ka ku nyika vamakwerhu swakudla ni mati aUcrânia. Makwerhu Viktor a li: “A hi lavetela swakudla ka tindhawu hinkwatu naswona nkama na hi yendla leswo lomu a hi li kona a hi twa vanhu na va duvulela hi swibamu. Ku ni makwerhu lweyi a a li ni xitolo xa ku xavisa swakudla; se a nyikele hi swakudla swoleswo swaku swi pfuna vamakwerhu. Ku va a yendle leswo swi pfune swaku vamakwerhu va tama va hanya ka nkama wolowuyani wa ku karhata. Siku lin’wani na hi li ka movha na hi heleketa swakudla ka vamakwerhu, ku we bomba kusuhi ni lomu a hi li kona. Hi siku lolelo hi khongele swinene hi kombela swaku Yehovha a tama a hi pfuna kuva hi tiya, hi nga chavi ku tama hi pfuna vamakwerhu.”

¹³ Vitalii a li: “Swi lave swaku hi nga chavi. Ka liyendzo la hina la ku sungula leli nga teka 12 wa mawora, a ni khongela ka Yehovha nkama hinkwawu.” Vitalii a kombise swaku a nga chavi funtshi a a ni wutlharhi. Yena a te: “ Ni kombele ka Yehovha swaku a ni nyika wutivi ni ku tiveka hansi. A ni fambisa movha ka xitaratu lexi nga pfumeleliwa hi mfumu ntsena. A lipfumelo la mina li tiye hintamu loko ni vone vamakwerhu va tirha xikan’we. Va tirhe xikan’we ka ku suselela swilo leswi a swi li xitaratwini, funtshi va hi pfunile hi ku hi nyika swakudla ni mpahla naswona va hi pfune ku tlakulela minchumu va yi peta ka movha wa hina leswaku hi ya nyikela ka vamakwerhu. Va tlhele va hi pfuna hi ku hi nyika swakudla swaku hi dla ni ndhawu ya ku yetlela nkama na hi li ku fambeni.”

TAMA U TSHEMBEKA KA YEHOVHA

14. Hi titwisa ku yini loko munhu lweyi hi mu rhandzaka a tshika Yehovha?

¹⁴ Nchumu wun’wani wa ku vavisa hintamu wu tlhela wu karhata ku wu tiyiselela, hi loko xaka kumbe munghanu wa wena lweyi u mu rhandzaka hintamu a tshika ku tirhela Yehovha. (Ps. 78:40; Swiv. 24:10) Loko u mu rhandza hintamu munhu yelweyo swi nga ha ku karhatela ku tiyisela xiyimu xolexo. Se loko na wena u li ka xiyimu xa ku fana, xikombiso xa Zadoki xi nga ku tiyisa.

15. Hi mhaka muni a swi lava Zadoki a tiya nhlana swaku a tama a tshembeka ka Yehovha? (1 Tihosi 1:5-8)

¹⁵ Zadoki a tame a tshembeka ka Yehovha nkama lowu munghanu wa yena Abiyatari a nga yendla xiboho xa ku kala a nga tshembeki ka Yehovha. Leswo swi yendleke nkama Davhida a a li kusuhi ni ku fa. N’wana wa yena Adoniya a zame tindlela hinkwatu swaku ku va yena lweyi a a ta va hosi a pfaleta Davhida, hambileswi Yehovha a a tshembise swaku a hosi leyi a yi ta landzela a ku ta va Solomoni. (1 Tik. 22:9, 10) Abiyatari a yendle xiboho xa ku seketela Adoniya. (Lerha 1 Tihosi 1:5-8.) Hi ku yendla leswo, Abiyatari a a ngo kombisa ku kala ku tshembeka ka Davhida ntsena, a a tlhela a nga tshembeki ni ka Yehovha! Indjhe wa swi pimisa leswi Zadoki a nga vavisekisa xiswona nkama a nga vona leswo swi yendleka? Phela se a ku hundza ku tlula 40 wa malembe, na a tirha na Abiyatari ka ntirho wa wuprista. (2 Sa. 8:17) Va tirhe xikan’we ka ntirho wa ku tlakula “Areka ya Xikwembu xa ntiyiso.” (2 Sa. 15:29) Phela hivambirhi va seketele Davhida hosi ya vona va tlhela va yendla mintirho ya yinyingi ka ntirho wa Yehovha. — 2 Sa. 19:11-14.

16. I yini leswi swi nga ha vaka swi pfune Zadoki swaku a tama a tshembeka?

¹⁶ Zadoki a tame a tshembeka ka Yehovha hambileswi munghanu wa yena Abiyatari a a tshike ku tshembeka ka Yehovha ni ku va a djikela hosi Davhida. Davhida a a swi tiva swaku minkama hinkwayu a nga tshemba Zadoki. Loko Davhida a swi tsumbulile swaku Adoniya a a va djikelile, a lange Zadoki, Natani na Benaya swaku va ya veka Solomoni swaku a va hosi. (1 Tih. 1:32-34) A hi kanakani swaku Zadoki a tiyisiwile hi xikombiso xa Natani ni vatirhi va ku tshembeka va Yehovha lava va nga seketela Hosi Davhida. (1 Tih. 1:38, 39) Nkama Solomoni a nga va hosi a lange “Zadoki swaku a pfaleta Abiyatari.” — 1 Tih. 2:35.

17. U nga mu tekelelisa ku yini Zadoki loko munhu lweyi u mu rhandzaka a tshika Yehovha?

¹⁷ U nga xi tekelelisa ku yini xikombiso xa Zadoki loko munhu lweyi u mu rhandzaka a tshika ku tirhela Yehovha? Swi kombisi hi ku helela swaku wena u lava ku tshembeka ka Yehovha. (Yox. 24:15) Yehovha a ta ku nyika ntamu lowu u wu lavaka swaku u kota ku yendla swaswinene. Se khongela ka yena u tlhela u tama u va munghanu wa vanhu lava tshembekaka ka Xikwembu. Yehovha wa ku vona ku tshembeka ka wena funtshi a ta ku hakela hi mhaka ya leswo. — 2 Sa. 22:26.

18. U djondze yini ka xiperiyensiya xa makwerhu Marco na Sidse?

¹⁸ Vona leswi nga yendlekela Marco ni nsati wa yena Sidse. Vana va vona va xisati lava se va nga kula va yendle xiboho xa ku tshika ku tirhela Yehovha. Marco a li: “Ku sukela siku leli munhu a psalaka n’wana, a sungula ku mu rhandza swinene naswona a sungula ku yendla hinkwaswu leswi a nga swi kotaka swaku a mu vhikela ka swilo leswi nga vekaka wutomi la yena nghozini. Phela hi leswo swi yendlaka mbilu ya mupsali yi vava loko a vona n’wana wa yena a tshika ku tirhela Yehovha. Kambe Yehovha minkama hinkwayu a tinyimisele ku hi pfuna swaku hi tiyisela; loko mina ni hela ntamu nsati wa mina a va ni matimba ya ku ni tiyisa, kasi loko yena a hela ntamu hi mina ni mu tiyisaka.” Sidse a li: “Phela a hi nga ta swi kota ku tiyisela xiyimu lexi loko Yehovha a a nga hi nyiki ntamu. Ni vaviseke hintamu hi ku pimisa swaku ni ni nandzu hileswi vana va mina va nga tshika ku tirhela Yehovha. Kambe ni game ni khongela ni gwela Yehovha leswi ni titwisaka xiswona. Loko se ku hundze nkamanyana, makwerhu wa xisati lweyi se a a li khale na hi vonanile a ni telile swaku a ta bula na mina. Yena a veke voko la yena ka makatla ya mina a tlhela a ni txuvuka a ku, ‘khumbuka Sidse, leswi swi nga yendleka a hi nandzu wa wena!’ Hi ku pfuniwa hi Yehovha na swi kota ku tama ni tsaka nkama lowu ni mu tirhelaka.”

19. U tinyimisele ku yendla yini?

¹⁹ Yehovha a lava swaku lava mu tirhelaka va nyima va tiyile va tlhela va nga chavi nchumu ku fana na Zadoki. (2 Tm. 1:7) Kambe Yehovha, a nga lavi swaku hi tshemba matimba ya hina. A lava hi tshemba matimba lawa yena a hi nyikaka wona. Loko u tshuka u kumana ni swikarhatu leswi karhataka hintamu ku swi tiyisela, kombela ku pfuniwa hi Yehovha. Tiyiseka swaku Yehovha a ta ku pfuna swaku u va munhu wa ku kala a nga chavi ku fana na Zadoki! — 1 Pe. 5:10.