Yesu — Muprista Wa Hina Wamukulu A Hi Twisisa Kahle

1-2. a) Hi mhaka muni Yehovha a rhumele Yesu lani misaveni? b) Hi ta bula hi yini ka nhlokomhaka leyi? (Vaheberu 5:7-9)

KOLOMU ka 2.000 wa malembe lama nga hundza, Yehovha a rhumele N’wana wa yena wa ku rhandzeka swaku a ta lani misaveni. Hi mhaka muni? A yendle leswo swaku swi koteka kuva hi suseliwa xidjoho ni lifu a tlhela a helisa wubihi leli nga vangiwa hi Sathana. (Yoh. 3:16; 1 Yo. 3:8) Xin’wani lexi nga yendla Yehovha a rhumela N’wana wa yena lani misaveni, hileswi a a lava ku mu lunghiselela swaku a va Muprista Wamukulu wamunene lweyi a hi twisisaka kahle, a twaka ku vava loku hi ku twaka a tlhela a hi twela wusiwana. Phela Yesu a sungule ku va Muprista Wamukulu nkama lowu a nga tsakamisiwa hi 29 E.C.a

² Ka nhlokomhaka leyi, hi ta vona leswaku wutomi la Yesu lani misaveni li mu lunghiselelise ku yini swaku a va Muprista Wamukulu lweyi a hi twisisaka. I swa lisima ku twisisa leswo hikusa swi yendla swaku swi hi vevukela ku va hi tshinela ka Yehovha hambiloko hi tshuka hi hela ntamu hi mhaka swihoxo swa hina. — Lerha Vaheberu 5:7-9.

N’WANA WA KU RHANDZEKA WA XIKWEMBU A TA MISAVENI

3-4. Wutomi la Yesu li txintxise ku yini nkama a nga ta lani misaveni?

³ Ku tala ka hina hi tshama hi kumana ni ku txintxa ka swiyimu awuton’wini, swa ku fana ni ku rhurha hi suka ka ndhawu leyi hi yi rhandzaka hintamu hi siya maxaka ni vanghanu va hina. Ku txintxa koloko ku nga ha karhata hintamu; kambe a ku na munhu lweyi a nga tshama a yendla ku txintxa kakukulu, ka ku fana ni loku Yesu a nga ku yendla. Phela a ku li yena ntsumi ya ku sungula ni ya lisima hintamu amatilweni. Yesu a a rhandziwa hi Yehovha funtshi a a tsakile swinene hileswi a a tirha kusuhi na kusuhi ni Papayi wa yena. (Ps. 16:11; Swiv. 8:30) Hambileswo, Vafilipiya 2:7 yi vula swaku Yesu a a tinyimisele ku ‘tshika swilo hinkwaswu leswi a a li na swona’ tilweni, a ta lani misaveni a ta hanya ni vanhu lava nga ni xidjoho.

⁴ Pimisa hi leswi wutomi la Yesu a li li xiswona nkama na wa ha ku psaliwa. Vapsali va yena a va li swisiwana; hi vula leswo hi mhaka munyikelo lowu va nga wu yendla atempeleni nkama lowu a nga psaliwa. (Lev. 12:8; Luk. 2:24) Handle ka leswo, nkama lowu Heroda lweyi a a li hosi ya ku biha a nga tiva swaku Yesu a psaliwile, a lavetele tindlela ta ku mu dlaya. Leswaku va mu ponisa, vapsali va yena va mu tekile va baleka na yena va ya tshama Gibita swa nkamanyana. (Mat. 2:13, 15) Phela wutomi la Yesu lani misaveni a li hambanile swinene ni nkama lowu a a li matilweni!

5. I mpsini leswi Yesu a nga swi vona nkama na a li lani misaveni, naswona leswo swi mu pfunise ku yini swaku a va Muprista Wamukulu lweyi a hi twisisaka? (Vona mufoto.)

⁵ Nkama lowu Yesu a a li lani misaveni a vone vanhu va ku hambanahambana na va hlupheka. Na yena Yesu a feliwe hi vanhu lava a a va rhandza; swi tikomba na mun’we wa vanhu volavo ku li Yosefa papayi wa yena wa lani misaveni. Nkama na a yendla ntirho wa yena wa ku chumayela, Yesu a vone vanhu lava a va ni nhlokonho, a va fe matihlo, a va khwanyale swirho ku patsa ni vapsali lava a va twa ku vava hileswi va nga feliwa hi vana va vona. Yesu a a va twela wusiwana vanhu volavo. (Mat. 9:2, 6; 15:30; 20:34; Mar. 1:40, 41; Luk. 7:13) I ntiyiso leswaku Yesu a a ku vona ku hlupheka ka vanhu nkama a a li matilweni. Kambe lani misaveni a yi twisise kahle ndlela leyi vanhu a va titwa hi yona loko va kumana ni swikarhatu. (Esa. 53:4) Leswi nga mu yendlekela lani misaveni, swi mu pfune ku twisisa ndlela leyi hi titwaka hi yona, ku karhateka ka hina ni swikarhatu swa hina. Ku fana na hina, Yesu a a karhala, a karhateka ni ku xukuvala.

YESU A NI MHAKA NI VANHU

6. Swifananiso leswi Esaya a nga swi tirhisa swi hi djondzisa yini hi ntwelawusiwana wa Yesu? (Esaya 42:3)

⁶ Nkama lowu Yesu a a chumayela, a swi kombisile swaku a a ni mhaka ni vanhu lava a va hluphiwa. Hi ku yendla leswo, a hetisise wuprofeta. Ka Matsalwa ya Xiheberu, vanhu va ku ganya ni lava nga ni matimba minkama yin’wani va fanisiwa ni jardim leli regariwaka kahle ni minsinya yayikulu ya ku tiya. (Ps. 92:12; Esa. 61:3; Yer. 31:12) Kambe swisiwana ni lava hluphiwaka, va fanisiwa ni swilo leswi swi kalaka swi nga na lisima, swa ku fana ni lihlanga la ku khotsiwa ni ngoti ya motso leyi nga kusuhi ni ku timeka. (Lerha Esaya 42:3; Mat. 12:20) Hi ku kongomisiwa hi Yehovha, Esaya a tirhise swifananiso swoleswo kuva a vulavula hi lirhandzu ni ntwelawusiwana lowu Yesu a a ta wu komba vanhu lava a va voneliwa hansi, lava a va nga nyikiwi lisima.

7-8. Yesu a swi hetisise ku yini leswi Esaya a nga swi profeta?

⁷ Matewu a kombise swaku Yesu a hetisise a wuprofeta la Esaya leli nge: “A nge li tshovi lihlanga leli nga khotseka naswona a nge yi timi ngoti ya motso leyi tuvikaka.” Masingita man’wani lawa Yesu a nga ma yendla ma pfune vanhu lava a va hluphiwa, lava swi nga yendlekaka a va titwa ku fana ni lihlanga leli nga khotseka ma tlhela ma pfuna vanhu lava a va nga na ntshembo, lava a va titwa ku fana ni motso lowu nga kusuhi ni ku timeka. Hi xikombiso, khambi lin’wani Yesu a tlhangane ni wanuna lweyi a a ni nhlokonho. Swi nga yendleka wanuna lweyi a a nga na ntshembo wa ku hanyisiwa leswaku a tlhela a tipatsa ni maxaka ni vanghanu va yena. (Luk. 5:12, 13) Yesu a tlhele a tiva wanuna lweyi a a fe tindleve naswona a a nga swi koti ku vulavula kahle. U pimisa swaku a a titwisa ku yini wanuna lwiyani loko a vona vanhu na va bula, va hlekelela kambe yena a nga swi twi leswi a va swi vula? (Mar. 7:32, 33) Kambe a hi leswo ntsena.

⁸ Ka masiku ya Yesu, Vayuda va vanyingi a va kholwa swaku vanhu lava a va vabya ni lava a va limalile a vo khatisiwa hi mhaka swidjoho swa vona kumbe swa vapsali va vona. (Yoh. 9:2) Leswo a swi yendla leswaku vanhu lava a va vabya va nga hlupheki hi mavabyi ya vona ntsena, kambe ni hileswi a va voneliwa hansi funtshi na vona a va titwa va nga li va lisima. Yesu a hetisise leswi Esaya a nga swi profeta, hi ku hanyisa vanhu volavo a tlhela a va komba swaku a va li va lisima ka Xikwembu. Ku tiva leswo swi hi tiyisekisa hi yini?

9. Hi swi tivisa ku yini swaku Muprista wa hina Wamukulu wa hi twisisa? (Vaheberu 4:15, 16)

⁹ Lerha Vaheberu 4:15, 16. Rito la Xigriki leli nga hundzuluxeliwa li va “ntwelawusiwana” ka ndzimana 15, li vula ku twa ku vava ni ku vaviseka loku munhu mun’wani a ku twaka. Mupostolo Pawulo a tirhise rito la ku fana ka Vaheberu 10:34 na a vulavula hi ndlela leyi hi titwaka hi yona hi lava va nga pfaleliwa madjele. Loko hi lerha hi masingita lawa Yesu a nga ma yendla, swi vhela swi tikomba swaku a a va twela wusiwana vanhu. Yena a a ngo sindziseka ku yendla leswo, kambe a a yendla leswo hileswi a a ni mhaka ni vanhu a tlhela a lava ku va pfuna. Hi xikombiso, a a ta swi kota ku hanyisa wanuna lweyi a a ni nhlokonho na a li kule, kambe a vone swi yampsa ku yendla hi ku mu khumba. Swi nga yendleka se a ku hundza malembe ya manyingi na wanuna lwiyani a nga khumbiwi hi munhu! Xikombiso xin’wani i nkama lowu Yesu a nga hanyisa wanuna lweyi a a fe tindleve; hi lirhandzu a mu tekile a ya ka ndhawu ya ku rhula lani a ku nga na vanhu. Handle ka leswo, nkama Mufarisi mun’wani a nga vulavula hi ndlela ya ku biha hi wansati lweyi a a tisolile lweyi a nga hlambisa Yesu minenge hi mihloti ya yena a tlhela a yi limpa hi misisi, Yesu a mu nyimelelile wansati lwiyani. (Mat. 8:3; Mar. 7:33; Luk. 7:44) Yesu a nga zanga a fambela kule ni vanhu lava a va vabya kumbe lava a va yendle swidjoho swaswikulu. Ku vula ntiyiso, a a swi lava hintamu leswaku va ya ka yena funtshi a swi kombisile swaku a a va rhandza swinene. Phela leswo swi hi tiyisekisa leswaku Yesu wa hi twela wusiwana na hina.

HI TEKELELA MUPRISTA WA HINA WAMUKULU NAMUNTLHA

10. I mpsini leswi hi swi yendlaka swoswi leswaku hi pfuna lava nga fa matihlo ni tindleve? (Vona mafoto.)

¹⁰ Tanihi valandzeli va Yesu, hi yendla hinkwaswu hi nga swi kotaka leswaku hi kombisa lirhandzu, ntwelawusiwana ni leswaku hi ni mhaka ni van’wani. (1 Pe. 2:21; 3:8) I ntiyiso leswaku a hi swi koti ku hanyisa lava nga fa tindleve ni lava kalaka va nga voni, kambe hi yendla hinkwaswu leswaku hi va pfuna swaku va va vanghanu va Yehovha. Hi xikombiso, mabuku ya hina ma kumeka hi ku tlula 100 wa tirimi ta mavoko, naswona leswaku ku pfuneka lava swi va karhatelaka ku vona, mabuku ya hina ma kumeka hi braille hi ku tlula 60 wa tirimi. Funtshi ku ni ma audiyo lama tlhamuselaka leswi yendlekaka ndzeni ka vhidiyo hi ku tlula 100 wa tirimi. Hinkwaswu leswi swi yendleliwa ku pfuna lava va nga fa tindleve ni lava kalaka va nga voni swaku va swi kota ku va vanghanu va Yehovha na Yesu.

11. Nhlengeletanu ya Yehovha yi mu tekelelisa ku yini Yesu? (Mintirho 2:5-7, 33) (Vona mafoto.)

¹¹ Nhlengeletanu ya Yehovha yi yendla hinkwaswu yi nga swi kotaka kuva yi pfuna vanhu va mixaka hinkwayu. Khumbuka swaku nkama lowu Yesu a nga pfuxiwa a chulule moya wa ku kwetsima ka hinkwavu lava a va li kona ka fexta la Pentekoxta swaku mun’wani ni mun’wani a kota ku twa mahungu ya ku tsakisa hi “lirimi la yena.” (Lerha Mintirho 2:5-7, 33.) Hi ku kongomisiwa hi Yesu, nhlengeletanu yi humesa mabuku hi ku tlula 1.000 wa tirimi funtshi tin’wani ta tirimi toleto to vulavuliwa hi mintlawa yayitsongo ya vanhu. Hi xikombiso, tirimi tin’wani leti vulavuliwaka América do Norte ni América do Sul to vulavuliwa hi vanhu vavatsongo. Hambileswo, ku ni mabuku hi ku tlula 160 wa tirimi toleto swaku lava va ti vulavulaka va kota ku twa mahungu ya ku tsakisa. Funtshi ku ni mabuku hi ku tlula 20 wa tirimi ta Roma naswona vanhu va vanyingi lava vulavulaka tirimi toleto se va mu tirhela Yehovha.

12. I yini swin’wani leswi nhlengeletanu ya Yehovha yi swi yendlelaka vanhu?

¹² Nhlengeletanu ya Yehovha a yo pfuna vanhu leswaku va twa mahungu ya ku tsakisa ntsena, kambe yi tlhela yi pfuna vamakwerhu lava nga weliwa hi tinghozi ta ntumbuluku. Timboni ta Yehovha ta tinyingi ta tinyikela leswaku ti pfuna vamakwerhu volavo. Nhlengeletanu yi tlhela yi yaka tindhawu leti vanhu va gandzelaka Yehovha ka tona ni ku djondza swilo swa swinyingi hi ndlela leyi Yehovha a va rhandzaka hi yona.

MUPRISTA WA HINA WAMUKU U A NGA KU PFUNA

13. Yesu a nga hi pfunisa ku yini?

¹³ Leswi Yesu a nga murisi wa hina wamunene, a yendla hinkwaswu swaku a hi nyika leswi hi swi lavaka kuva hi tiyisa wunghanu la hina na Yehovha. (Yoh. 10:14; Efe. 4:7) Minkama yin’wani hi mhaka swiyimu swa hina swa wutomi, hi nga ha titwa ku fana ni ngoti ya motso leyi nga kusuhi ni ku timeka kumbe lihlanga leli nga khotseka. Swi nga ha yendleka hi hela ntamu hi mhaka leswi hi vabyaka hintamu, hi mhaka swihoxo leswi hi nga swi yendla kumbe hileswi hi nga tlulana minenge ni makwerhu wa hina. Ka swiyimu swa ku fana ni leswo, swi nga ha hi karhatela ku pimisa hi ntshembo lowu hi nga na wona wa nkama lowu taka. Kambe khumbuka swaku Yesu wa swi vona swikarhatu leswi u kumanaka na swona funtshi wa swi twisisa leswi u titwisaka xiswona. Leswi a ku twelaka wusiwana a tlhela a va ni mhaka na wena, a swi lava hintamu ku ku pfuna. Hi xikombiso, a nga tirhisa moya wa ku kwetsima swaku wu ku nyika matimba loko u hela ntamu. (Yoh. 16:7; Tit. 3:6) Handle ka leswo, Yesu a nga tirhisa “tinyiko” leti nga vanhu kumbe madoda a tlhela a tirhisa vamakwerhu van’wani swaku va ku tiyisa, va ku seketela va tlhela va ku pfuna. — Efe. 4:8.

14. I yini leswi hi faneleke hi swi khumbuka loko hi tshuka hi hela ntamu?

¹⁴ Loko u tshuka u hela ntamu, khumbuka leswaku Yesu i Muprista wa hina Wamukulu ni leswaku leswo swi lava ku vula yini ka wena. Khumbuka leswaku Yehovha a nga yo rhumela Yesu leswaku a ta lani misaveni kuva a ta hi kutsula ntsena, kambe a mu rhumele leswaku a mu lunghiselela kuva a swi twisisa kahle swikarhatu leswi hi kumanaka na swona. Loko hi tshuka hi hela ntamu hi mhaka ku tsana ka hina kumbe swidjoho swa hina, Yesu minkama hinkwayu a tinyimisele ku hi pfuna “loko hi lava ku pfuniwa.” — Heb. 4:15, 16.

15. I mpsini swi nga pfuna makwerhu Stefano ku tlhelela bandleni?

¹⁵ Yesu a tlhela a kongomisa vanhu va yena lava lavetelaka va tlhela va pfuna lava nga tshika ku tirhela Yehovha. (Mat. 18:12, 13) Vona leswi nga yendlekela Stefano.b Ndzhaku ka loko a hete 12 wa malembe na a susiwe bandleni, a ye mintlhanganwini. A li: “A swi ni vevukelanga, kambe a ni swi navela ku tlhela ni lumba ndjangu wa Yehovha lowu nga ni lirhandzu. Madoda lawa ma nga bula na mina, ma ni yendle ni chunseka; minkama yin’wani a ni titwa ni nga pfuni nchumu hileswi a ni tshike ku tirhela Yehovha naswona a ni lava ku godola. Kambe vamakwerhu va ni khumbukise swaku Yehovha na Yesu a va lava swaku ni tama ni tiyisela. Nkama ni nga tlhelela bandleni, bandla hinkwalu li ni yamukelile hi lirhandzu, mina ni ndjangu wa mina. Hi ku famba ka nkama, nsati wa mina a sungule ku djondza Bibele naswona swoswi hi tirhela Yehovha tanihi ndjangu.” Muprista wa hina Wamukulu lweyi a nga ni lirhandzu, a tsaka swinene loko a vona vanhu lava tisolaka na va pfuniwa ku tlhelela bandleni.

16. Hi mhaka muni u mu khensa Yehovha hileswi u nga ni Muprista Wamukulu lweyi a ku twisisaka?

¹⁶ Nkama Yesu na a li lani misaveni, a pfune vanhu va vanyingi lava a va lava ku pfuniwa. Ninamuntlha hi nga tiyiseka leswaku minkama hinkwayu a ta hi pfuna; naswona ku nga li khale ka misava ya nyuwani, a ta hi susela xidjoho ni ku kala ku hetiseka. Phela hi mu khensa swinene Yehovha, Xikwembu lexi nga tala hi lirhandzu ni ntwelawusiwana, lexi nga hi nyika Muprista Wamukulu wamunene lweyi a hi twisisaka, ku nga N’wana wa yena Yesu Kreste.