“Zamani Ku Hlayisa Ku Twanana”

MUPOSTOLO Pawulo a byele Vakreste va bandla la Efeza a ku: “Hi lirhandzu, ma twanana hi mhaka ya moya wa ku kwetsima. Se zamani ku hlayisa ku twanana loku, hi ku hanyisana hi ku rhula ni van’wani.” — Efe. 4:2, 3.

Hina vanhu va Yehovha ha “twanana” hi ku pfuniwa hi moya wa ku kwetsima. Leswo swi vula swaku ku twanana loku hi nga na kona ku ta hi ka moya wa ku kwetsima. Kambe hilani Pawulo a nga vula hi kona, hi fanele hi yendla minzamu kuva hi tama hi twanana. Mukreste mun’wani ni mun’wani a fanele a yendla xanchumu leswaku hi tama ‘hi twanana hi mhaka ya moya wa ku kwetsima.’

Hi xikombiso, loko munhu o ku nyika movha wa nyuwani, hi wena u faneleke u wu hlayisa. Se loko movha wolowo a wo tshuka wu wonheka a swi nga ta twala ku va u lumbeta lweyi a nga ku nyika wona kuve hi wena u kalaka u nga wu hlayisanga kahle.

Hi ku fana, hambileswi ku twanana loku hi nga na kona ku taka hi ka Xikwembu, hinkwerhu hi fanele hi yendla leswi hi nga swi kotaka swaku hi ku hlayisa. Hi nga yendla leswo hi ku va hi hanyisana hi ku rhula ni vamakwerhu va hina. Se i swinene ku tivutisa hi ku: ‘Ku nga va leswaku ni yendla leswi ni nga swi kotaka leswaku ku va ni ku rhula bandleni?’

‘ZAMA KU HLAYISA KU TWANANA’ LOKU HI NGA NA KONA

Hilani Pawulo a nga vula hi kona, minkama yin’wani swi lava hi tirha hi matimba leswaku hi tama hi va ni ku twanana loku taka hi ka moya wa ku kwetsima. Leswo swi laveka hintamu, ngopfungopfu loko makwerhu a hi kwatisa. Kambe indjhe swi lava leswaku minkama hinkwayu hi ya vulavula ni makwerhu swaku hi lunghisa mhaka? Nada. Tivutisi: ‘Ku ya vulavula na yena swi ta lunghisa mhaka kumbe swi to yendla swaku yi ya yi kula?’ Minkama yin’wani a xaxinene xa ku xi yendla i ku huma ka swona kumbe ku mu rivalela makwerhu wa kona. — Swiv. 19:11; Mar. 11:25.

Mafoto: Makwerhu a langa ku rivalela makwerhu mun’wani. 1. A bongeliwa hi makwerhu mun’wani. 2. A pimisa hi leswi makwerhu a nga mu yendlela swona. 3. A lerha Bibele a tlhela a pimisa hi leswi a swi djondzaka. — Tivutisi: ‘Ku vulavula hi mhaka leyi swi ta lunghisa mhaka kumbe swi ta yendla swaku yi ya yi kula?’

Hilani mupostolo Pawulo a nga vula hi kona, a hi tameni hi “lehiselana mbilu hi lirhandzu.” (Efe. 4:2) Buku lin’wani li vula swaku marito ya ndzimana leyi ma vula swaku hi fanele hi “yamukela van’wani xileswi va nga tshamisa xiswona.” Leswo swi vula ku pfumela leswaku vamakwerhu na vona va phazama ku fana na hina. I ntiyiso swaku hinkwerhu hi zama ku “yambala wumunhu la nyuwani.” (Efe. 4:23, 24) Kambe a nga kona ni mun’we wa hina lweyi a kotaka ku yendla leswo hi ku helela. (Rom. 3:23) Loko hi swi twisisa leswo, swi ta hi vevukela ku tama hi lehiselana mbilu, hi rivalelana hi tlhela hi “hlayisa ku twanana” loku hi nga na kona.

Hi ta va hi “hanyisana hi ku rhula” ni vamakwerhu loko hi va rivalela hi tlhela hi khohlwa swilo leswi va nga hi kwatisa hi swona. Rito la Xigriki leli nga hundzuluxeliwa li va “ku hanyisana hi ku rhula” ka Vaefeza 4:3, li hundzuluxeliwe li va ‘ku tlhanganisa’ ka Vakolosa 2:19. Rito leli li kombetela ka ku tlhanganisa marhambu. Hilani ku fanaka, loko hi hanyisana hi ku rhula ni hi lirhandzu ni vamakwerhu swi ta yendla leswaku hi tama hi va vanghanu hambiloko vo tshuka va yendla nchumu lexi hi kalaka hi nga xi rhandzi.

Se loko makwerhu a ku kwatisa, zama ku mu twisisa ku nga li ku txuvuka ntsena swihoxo swa yena. (Kol. 3:12) Leswi hinkwerhu hi nga ni xidjoho, na wena swi nga yendleka ku ni lweyi u nga mu kwatisa ka swin’wani. Ku khumbuka leswo, swi ta ku pfuna leswaku u yendla hinkwaswu leswi u nga swi kotaka leswaku u “hlayisa ku twanana” loku hi nga na kona.