Bibele Li Li Yini Hi Ku Va Wanuna Ni Wansati Va Tshama Xikan’we Na Va Nga Chadanga?
Nhlamulu ya Bibele
Bibele li vula swaku Xikwembu xi lava swaku vanhu va “baleka wuntunga la swa masangu.” (1 Vatesalonika 4:3) Ka Bibele, rito leli nge “wuntunga la swa masangu” li patsa wumbuya, ku va wanuna a famba masangu ni wanuna, wansati ni wansati va famba masangu xikan’we ni masangu lawa ma yendliwaka hi wanuna ni wansati lava kalaka va nga chadanga.
Hi mhaka muni Xikwembu xi lava swaku wanuna ni wansati va rhanga hi ku chada na va nga se tshama xikan’we?
Xikwembu hi xona xi nga sungula muchadu. Hi xona xi nga chadisa wanuna wa ku sungula ni wansati wa ku sungula. (Genesa 2:22-24) Xikwembu a xi nga lavi swaku wanuna ni wansati va tshama xikan’we na va nga chadanga.
Xikwembu xa swi tiva leswi nga yendlaka vanhu va tsaka. Xi yendle muchadu swaku wanuna ni wansati va twanana wu tlhela wu vhikela ndjangu hinkwawu. Pimisa hi xikombiso lexi: Loko u xava nchumu xitolo, va nga ha ku nyika phepha leli kombisaka swaku u nga xi vekisa ku yini nchumu xa kona hi ndlela yayinene. Hilani ku fanaka, minawu ya Xikwembu yi djondzisa lava nga chada swaku va nga yendla yini kuva va tsaka. Funtshi minawu ya Xikwembu minkama hinkwayu yi pfuna lava va yi yingisaka. — Esaya 48:17, 18.
Ku fana ni leswi loko u xava nchumu xitolo, va nga ha ku nyikaka phepha leli kombisaka leswi u faneleke u xi vekisa xiswona, minawu ya Xikwembu yi djondzisa lava va nga chada swaku va nga yendla yinileswaku va tsaka
Loko wanuna ni wansati va famba masangu na va nga chadanga a swi nga ta va fambela kahle. Hi xikombiso, wansati a nga ha kuma nyimba ya ku kala a nga yi nyimelanga, hinkwavu va nga ha kuma mavabyi lawa ma tlulelanaka hi ku famba masangu, ni mavabyi lawa ma khumbaka mimpimiso.
Xikwembu xi yendle swaku wanuna ni wansati va kota ku psala loko va famba masangu. Ka Xikwembu wutomi la kwetsima. Hi mhaka leyo, ku psala vana i nyiko ya lisima hintamu. Xikwembu xi lava swaku hi yi nyika lisima nyiko yoleyo, hi ku yingisa minawu leyi xi nga yi veka ndzeni ka muchadu. — Vaheberu 13:4.
Swi li yini hi ku va wanuna ni wansati va tshama xikan’we na va nge se chada swaku va vona swaku va fanelana?
Lexi nga ta yendla wanuna ni wansati va tsaka ka muchadu wa vona a hi ku rhanga va tshama xikan’we swaku va vona swaku va fanelana. Kambe lexi nga ta yendla swaku muchadu wa vona wu tiya, i ku va va tiboha va tlhela va tirhisana swaku va hlula swikarhatu.a Phela muchadu hi wona wu bohaka wanuna ni wansati. — Matewu 19:6.
Lava nga chada va nga yendla yini swaku va tsaka?
A ku na ndjangu lowu kalaka wu nga na swikarhatu, kambe lava nga chada va nga tsaka loko va yingisa minawu ya Bibele. Vona swikombiso swin’wani:
Rhangisa leswi rhandziwaka hi nuna kumbe nsati wa wena. — 1 Vakorinto 7:3-5; Vafilipiya 2:3, 4.
Rhandzanani mi tlhela mi hloniphana. — Vaefeza 5:25, 33.
Pimisa kahle na u nge se vulavula. — Swivuriso 12:18.
Lehisa mbilu u tlhela u rivalela hi xihantla. — Vakolosa 3:13, 14.
a Vona nhlokomhaka leyi nge: “Ndjangu Lowu Nga Tsaka — Ku Nyima Ni Leswi Mi Nga Twanana Swona.”