A Bibele Li Li Yini Hi Mageyi?

Nhlamulu ya Bibele

Xikwembu xi yendle wanuna ni wansati swaku va famba masangu ntsena loko va chadile. (Genesa 1:27, 28; Levhitika 18:22; Swivuriso 5:18, 19) Bibele ya va sola lava fambaka masangu na va nga chadanga, ku patsa ni wanuna lweyi a fambaka masangu ni wanuna mun’wani. (1 Vakorinto 6:18) Leswo swi patsa ku khomakhoma swirho swa masangu swa munhu mun’wani ni ku famba masangu hi nomo kumbe hi ndzhaku.

Hambileswi Bibele li kalaka li nga pfumelelani na swona swaku wanuna a famba masangu ni wanuna mun’wani, kumbe wansati a famba masangu ni wansati, yona a yi hi byeli swaku hi fanele hi va nyenya vanhu volavo. Kambe handle ka leswo Vakreste hinkwavu va byeliwa swaku va fanele va ‘hlonipha vanhu hinkwavu’. — 1 Pedru 2:17, Biblia fácil de ler.

Ku nga va leswaku munhu a nga psaliwa na a li geyi?

Bibele a li vulavuli hi hi ku kongoma hi ku navela loku munhu a psaliwaka na a li na kona, hambileswi li vulaka swaku hinkwerhu hi psaliwa na hi nga swi lavi a ku landzela a minawu ya Xikwembu. (Varoma 7:21-25) Bibele a li vulavuli hintamu hi ku navela loku mageyi ma nga na kona, kambe li sola a mahanyelo ya wona ya ku biha.

U nga yendla yini leswaku u tsakisa Xikwembu hambiloko u li ni ku navela ka ku va geyi?

Bibele li li: “U nga mandiwi hi muzimbha wa wena, dlaya ku navela kun’wani ni kun’wani ka ku famba masangu loku kalaka ku nga li nawini.” (Vakolosa 3:5) Leswaku u dlaya ku navela ku yendla swa ku biha, u fanele u fuma mimpimiso ya wena. Loko u tshamela ku pimisa hi swilo swaswinene u nga swi kota ku baleka ku navela ka ku yendla swilo swa ku biha. (Vafilipiya 4:8; Yakobe 1:14, 15) A ku sunguleni swi nga ha ku karhatela hintamu; kambe u nga swi kota. Xikwembu xi tshembisa swaku xi ta hi pfuna kuva hi ‘txintxa mapimiselo ya hina ma va ya nyuwani.’ — Vaefeza 4:22-24.

Vanhu va vanyingi lava kalaka va nga li mageyi funtshi va lavaka ku yingisa minawu ya Bibele, na vona va kumana ni swikarhatu swa ku fana. Leswo swi patsa vanhu lava kalaka va nga chadanga ni vanhu lava nga chada ni munhu lweyi hi mhaka ya mavabyi kumbe swiyimu swin’wani, swi kalaka swi nga mu pfumeleli kuva a famba masangu. Se vanhu lava va nga ha langa ku kala va nga fumiwi hi ku navela loku va nga na kona, ku nga na mhaka swikarhatu leswi va kumanaka na swona. Vona va swi kota ku tshama na va tsakile, funtshi hambi vanhu lava nga ni ku navela ka wugeyi va nga swi kota ku yendla swa ku fana swaku va tsakisa Xikwembu. — Deteronoma 30:19.