Indjhe Wukhongeli Hinkwalu La Fana? Indjhe Wukhongeli Hinkwalu La Xi Tsakisa Xikwembu?

Nhlamulu ya Bibele

Ihim, a hi wukhongeli hinkwalu leli fanaka. A Bibele li ni swikombiso swa wukhongeli leli kalaka li nga xi tsakisi Xikwembu. Ku ni mixaka yimbirhi ya wukhongeli leli kalaka li nga xi tsakisi Xikwembu.

Muxaka wa ku sungula: Wukhongeli leli gandzelaka swikwembu swa mavunhwa

A Bibele li vula swaku a wukhongeli leli gandzelaka swikwembu swa mavunhwa “a li pfuni nchumu,” (Yeremiya 10:3-5; 16:19, 20) Yehovhaa a byele Vayisrayele a ku: “A mi fanelanga mi va ni swikwembu swin’wani loku ku nga li mina.” (Eksoda 20:3, 23; 23:24) Loko Vayisrayele va gandzela swikwembu swin’wani, “Yehovha a [a] va kwatela hintamu.” — Tinhlayo 25:3; Levhitika 20:2; Vayavanyisi 2:13, 14.

Ni swoswi Xikwembu a xi swi lavi swaku hi gandzela “swikwembu swa mavunhwa.” (1 Vakorinto 8:5, 6; Vagalatiya 4:8) Xi byela hinkwavu lava lavaka ku xi gandzela swaku va tshika ku tipatsa ni wukhongeli la mavunhwa, xona xi li: “humani xikarhi ka vona, mi tihambanisa na vona”. (2 Vakorinto 6:14-17) Loko ku li swaku wukhongeli hinkwalu la fana naswona la xi tsakisa Xikwembu, hi mhaka muni xi vula swaku hi fanele tihambanisa ni wukhongeli la mavunhwa?

Muxaka wa wumbhirhi: Wukhongeli leli gandzelaka Xikwembu xa ntiyiso hi ndlela leyi kalaka yi nga xi tsakisi

Minkama yin’wani, Vayisrayele a va gandzela Xikwembu na va yendla swilo leswi a swi yendliwa hi vanhu lava a va gandzela swikwembu swa mavunhwa. Kambe Yehovha, a a nga swi tsakeli loko va patsa wugandzeli la ntiyiso ni la mavunhwa. (Eksoda 32:8; Deteronoma 12:2-4) Nkama Yesu na a li lani misaveni a laye varhangeli va wukhongeli hi mhaka ya leswi a va xi gandzelisa swona Xikwembu, vona a va lava ku voniwa na va li vagandzeli va Xikwembu kambe a va nga na “mhaka ni leswi nga swa lisima hintamu ka Nawu, ku nga ku lulama, timpsalu ni ku tshembeka.” — Matewu 23:23.

Ninamuntlha, i wukhongeli leli djondzisaka ntiyiso ntsena leli tsakisaka Xikwembu. A ntiyiso wolowo wu kumeka ka Bibele. (Yohani 4:24; 17:17; 2 Timotiya 3:16, 17) Wukhongeli leli djondzisaka swilo leswi kalaka swi nga li kona ka Bibele li hambanisa vanhu ni Xikwembu. Li djondzisa swaku Xikwembu i vanhu vanharhu lava nga patsiwa ka ndhawu yin’we va va mun’we, ni swaku loko munhu a fa moya wa yena wu tama wu hanya ni swaku vanhu lava nga fa va tama va xanisiwa hi ku hisiwa hi ndzilu. Phela a tidjondzo leto hinkwatu ti sukela ka vanhu lava a va gandzela swikwembu swa mavunhwa. A muxaka lowu wa wukhongeli a hi wa nchumu hikusa wu tshika ku djondzisa minawu ya Xikwembu wu djondzisa swihena swa vanhu. — Marka 7:7, 8.

Xikwembu xi nyenya wukhongeli leli nga ni wukanganyisi. (Tito 1:16) Wukhongeli li fanele li pfuna vanhu swaku va tirhisa leswi va swi djondza ka wutomi la vona, leswaku va ta kota ku va vanghanu va Xikwembu, ku nga li ku landzela swinawanawani ni swihena swa vanhu ntsena. Hi xikombiso a Bibele li li: “Lweyi a pimisaka swaku a tirhela Xikwembu kambe a nga li fumi lirimi la yena wa tikanganyisa, naswona wugandzeli la yena a li pfuni nchumu. Wugandzeli leli nga basa hi ku ya hi Xikwembu lexi nga Papayi wa hina hi leli: Ku hlayisa vana lava kalaka va nga na vapsali ni vavasati lava nga feliwa hi vanuna va vona lava nga nhlomulweni, ni ku tshama na hi nga na xivati xa misava.” (Yakobe 1: 26, 27) Phela loko Bibele li tirhisa rito leli nge “wugandzeli leli nga basa” li vulavula hi wukhongeli leli kalaka li nga na wukanganyisi.