Ndjangu na wu txuvuka tiyindlo ta vavhizinyu leti nga wonheteliwa hi xidzedze

Bibele Li li Yini Hi Swidzedze?

Nhlamulu ya Bibele

Bibele li djondzisa leswaku Xikwembu a hi xona xi vangaka tinghozi ta ntumbuluku leti nga kona namuntlha, naswona xi karhateka swinene loko xi vona vanhu lava xanisekaka hi mhaka ya tona. Se xi ta tirhisa Mfumu wa xona ka nkama lowu taka leswaku xi ta helisa swilo hinkwaswu leswi hi yendlaka hi hluphela, ku patsa ni tinghozi toleto. Kambe na leswo swi nge se yendleka, Xikwembu xa va tiyisa vanhu hinkwavu lava kumanaka ni tinghozi ta ntumbuluku. — 2 Vakorinto 1:3.

Hi swi tivisa ku yini swaku Xikwembu a xi tirhisi swidzedze swaku xi khatisa vanhu namuntlha?

Bibele li vula swaku ka nkama lowu nga hundza Xikwembu xi ma tirhisile matimba ya ntumbuluku swaku xi helisa vanhu va ku kala va nga yingisi. Kambe leswi Xikwembu a xi swi yendla hi nkama wolowo swi hambanile ni swidzedze kumbe tinghozi tin’wani ta ntumbuluku leti nga kona namuntlha.

Swidzedze leswi nga kona namuntlha swi dlaya vanhu hinkwavu. Kambe ku hambana ni leswo, loko Xikwembu xi lava ku yavanyisa vanhu hi ku tirhisa matimba ya ntumbuluku, a xi nga dlayi vanhu hinkwavu. Hi xikombiso, nkama lowu xi nga helisa madoropa ya Sodoma ni Gomora, xi vhikele Lota lweyi a a li wanuna wa ku lulama ni vana va yena vambirhi va tintombhi. (Genesa 19:29, 30) Xikwembu xi vone timbilu ta vanhu lavayani, xi gama xi helisa ntsena lava xi nga vona swaku a va yendla swilo swa ku biha. — Genesa 18:23-32; 1 Samuwele 16:7.
Swidzedze leswi swi nga kona namuntlha swi yendleka swa kola na kola. Swi hambanile ni masiku ya khale hikusa loko Xikwembu xi lava ku tirhisa matimba ya ntumbuluku leswaku xi khatisa vanhu a xi rhanga hi ku va tivisa. Lava a va yingisa a va pona. — Genesa 7:1-5; Matewu 24:38, 39.
Swidzedze swin’wani swi vangiwa hi vanhu. Hi mhaka muni hi vula leswo? Hikusa vanhu van’wani va wonha ntumbuluku naswona va yaka ka tindhawu leti tolovelaka ku tala mati, ku tsekatseka ka misava kumbe ka tindhawu leti maxelo ma kalaka ma nga li kahle. (Nhlawutelo 11:18) Se a swi twali ku nyika nandzu Xikwembu hi swilo leswi vanhu va ngo tivangela hi voxe. — Swivuriso 19:3.

Indjhe swidzedze swi kombisa swaku hi hanya ka minkama ya wugamu?

Ina, Bibele se a li swi vulile swaku “ka masiku ya wugamu” a ku ta va ni swidzedze ni swin’wani.” (Matewu 24:3; 2 Timotiya 3:1) Hi xikombiso loko Yesu a vulavula hi leswi a swi ta yendleka ka masiku ya hina a te: “Ku ta pfumaleka swakudla ni misava yi ta tsekatseka ka tindhawu ta ku hambanahambana.” (Matewu 24:7) Leswo swi kombisa swaku ku nga li khale Xikwembu xi ta helisa hinkwaswu leswi hi yendlaka hi hlupheka, ku patsa ni tinghozi ta ntumbuluku. — Nhlawutelo 21:3, 4.

Xikwembu xi va pfunisa ku yini lava nga kumana ni swidzedze kumbe swin’wani?

Xikwembu xi tirhisa Bibele swaku xi tiyisa lava nga kumana ni tinghozi. A Bibele li hi tiyisekisa swaku Xikwembu xi ni mhaka na hina naswona loko xi hi vona na hi hlupheka a xi tsaki. (Esaya 63:9; 1 Pedru 5:6, 7) Li tlhela li vulavula hi xitshembiso xa Xikwembu xa leswaku ku ta va ni nkama lowu hi nga ta hanya na tinghozi ta ntumbuluku ti nga ha li kona. — Vona kwadru leli nge “Tindzimana ta Bibele leti nga tiyisaka lava nga kumana ni swidzedze.”
Xikwembu xi pfuna lava kumanaka ni tinghozi hi ku tirhisa lava xi tirhelaka. Xikwembu xi tirhisa vanhu va xona va lani misaveni lava tekelelaka xikombiso xa Yesu leswaku va pfuna lava weliwaka hi tinghozi. Wuprofeta lin’wani la Bibele li vule leswaku Yesu a a ta tiyisa “lava nga vaviseka timbilu” ni “lava rilaka.” (Esaya 61:1, 2) Vanhu va Xikwembu va tikarhatela ku yendla swa ku fana. — Yohani 13:15.

Xikwembu xi tlhela xi tirhisa vatirheli va xona swaku xi pfuna lava nga weliwa hi tinghozi hi ku va nyika leswi va swi lavaka. — Mintirho 11:28-30; Vagalatiya 6:10.

Timboni ta Yehovha na ti lunghisa munti a Porto Rico — Timboni ta Yehovha na ti pfuna lava nga kumana ni xidzedze a Porto Rico

Indjhe Bibele li nga hi pfuna swaku hi tilunghiselela na swidzedze swi nge se fika?

Ina. Hambileswi Bibele li kalaka li nga li buku leli vulavulaka hi leswi hi nga swi yendlaka na ku nge se humelela nghozi, li nga hi pfuna ka mhaka leyi. Hi xikombiso:

Hamba planu la leswi u nga ta swi yendla. Bibele li li: “Munhu wa ku tlhariha a vona khombo kutani a tumbela.” (Swivuriso 22:3) Se i wutlharhi ku tiva leswi hi nga ta swi yendla loko ku humelela nghozi swa kola na kola. Tshama na u lunghise paxta la wena la emergência leswaku u li tirhisa loko ku tshuka ku humelela nghozi, funtshi bulisana ni ndjangu wa wena hi leswi mi nga ta swi yendla ni lomu mi nga ta kumana kona loko ku tshuka ku humelela nghozi.
Li nyiki lisima wutomi ku tlula swilo leswi u nga na swona. Bibele li li: “A hi tanga ni nchumu lani misaveni naswona a hi nga ta famba ni nchumu.” (1 Timotiya 6:7, 8) Hi fanele hi tinyimisela ku luzekeliwa hi swilo hinkwaswu leswaku hi ponisa wutomi la hina loko ku tshuka ku humelela tinghozi. Na hi khumbuka swaku a wutomi i la lisima ku tlula swilo leswi hi nga na swona. — Matewu 6:25.

Tindzimana ta Bibele leti nga tiyisaka lava nga kumana ni swidzedze

Genesa 18:25: ‘[Xikwembu xi] nge tshuki xi dlaya wa ku lulama ni lava yendlaka swa ku biha . . . Indjhe Muyavanyisi wa misava hinkwayu a nge yendli swa ku lulama ke?’

Leswi ndzimana leyi yi vulaka swona: Xikwembu minkama hinkwayu xi yendla swa ku lulama, hi mhaka leyo xona a xi na nandzu loko vanhu lava yendlaka swaswinene va fa loko ku humelela tinghozi ta ntumbuluku.

Tipisalema 46:1, 2: “Xikwembu i ndhawu ya ku tumbela ni matimba ya hina, ku pfuniwa loku kumekaka hi ku hantlisa hi nkama wa mahlomulu. Hi mhaka leyo a hi nga ta chava hambiloko misava yi txintxa.”

Leswi ndzimana leyi yi vulaka swona: Ku nga na mhaka swaku ku yendleka yini, minkama hinkwayu hi nga tshemba swaku Xikwembu xi ta hi nyika ntamu.

Esaya 63:9: “Nkama hinkwawu lowu a va twa ku vava, na yena a a twa ku vava.”

Leswi ndzimana leyi yi vulaka swona: Xikwembu xa ku twa ku vava loku na hina hi ku twaka naswona a xi tsaki loko hi hlupheka.

Yohani 5:28, 29: “Nkama wa ta lowu hinkwavu lava nga ka masirha va nga ta twa rito la [Yesu] se va huma.”

Leswi ndzimana leyi yi vulaka swona: Hi ni ntshembo wa ku tlhela hi vona vanghanu ni maxaka ya hina lawa ma nga fa hikusa Xikwembu xi ta nyika Yesu matimba ya ku pfuxa lava nga fa.

1 Pedru 5:6, 7: “Tivekeni hansi ka voko la matimba la Xikwembu . . . na mi txukumetela ku vilela ka n’wina hinkwaku ka xona, hikusa xi ni mhaka na n’wina.”

Leswi ndzimana leyi yi vulaka swona: Xikwembu xi ni mhaka hintamu na hina funtshi xi lava leswaku hi khongela ka xona hi xi byela hinkwaswu leswi hi vilelisaka.

Nhlawutelo 21:4: “ [Xikwembu] xi ta limpa mihloti hinkwayu ka matihlo ya vona, lifu a li nga ha ta va kona, hambi nkosi, ku rila ni ku twa ku vava a swi nge he vi kona. Swilo swa ku sungula swi hundzile.”

Leswi ndzimana leyi yi vulaka swona: Xikwembu xi ta helisa ku hlupheka hinkwaku ku patsa ni tinghozi ta ntumbuluku.