NDZIMA 8
U Nga Yendla Yini Swaku U Va Ni Vanghanu Vavanene?
“Loko ni kwatile ni lava munhu leswaku ni ta tiphofula, loko ni karhatekile ni lava munhu leswaku a ta ni chavelela, kasi loko ni tsakile ni lava munhu leswaku ni ta bula na yena hi leswi nga ni tsakisa. Ka mina ku va ni munghanu i xilaveko.” — Brittany.
Ku tolovela ku vuliwa swaku swivanani swi lava vanhu va ku tlanga na swona, kasi a majovhem ma lava vanghanu. Hi kwini ku hambana?
Mupangalati i munhu lweyi u tshamaka na yena.
Munghanu i munhu lweyi a nga ni mahanyelo ya ku fana ni ya wena.
Handle ka leswo, Bibele li vula swaku “munghanu wa ntiyiso a ni lirhandzu minkama hinkwayu, i makwenu wa ntiyiso loko u li ku karhatekeni.” (Swivuriso 17:17) Ndzimana leyi, yi vulavula hi wunghanu lalikulu swinene la ku tlula a wunghanu leli a wu li na lona na wa ha li mutsongo!
Ntiyiso wa mhaka: Loko hi ya hi kula, hi lava vanghanu lava nga ni
1. Wumunhu lalinene
2. Mahanyelo lawa ma fambisanaka ni minawu ya Bibele
3. Lava ku pfunaka ku yendla swaswinene
Xivutiso: U nga va kumisa ku yini vanghanu lava nga ni wumunhu la ku fana ni la wena? A hi kambisiseni hi kahle swilo leswi swa swinharhu.
Xivangelo Xa Ku Sungula: Wumunhu Lalinene
Leswi u faneleke u swi tiva. A hi vanhu hinkwavu lava vulaka swaku i vanghanu, va nga vanghanu hikakunene. Hambi hi Bibele li vula swaku “ku ni vanghanu lava nga lunghekela ku phatlulelana.” (Swivuriso 18:24) Marito lawa ma nga tikomba ma nga li ntiyiso. Kambe pimisa hi leswi: U tshama u va ni “munghanu” lweyi a nga ku xolola? Kumbe a nga hangalasa mavunhwa hi wena kumbe ku ku hleva? Phela swilo leswo swi nga ku yendla u nga ha va tshembi vanghanu va wena.a Khumbuka leswaku loko swi ta ka vanghanu, swa yampsa u va ni vanghanu vavatsongo kambe na va li vanene!
Leswi u nga swi yendlaka. Langa vanghanu lava nga ni mahanyelo lawa swi nga swinene ku ma tekelela.
“Hinkwavu va vulavula kahle hi munghanu wa mina Fiona. Na mina ni lava va vulavula kahle hi mina. Funtshi ni lava ku va ni ndhuma ya ku fana ni ya yena. Swa ni tsakisa leswo.” — Yvette, a nga ni 17 wa malembe.
Zama ku yendla leswi.
1. Lerha Vagalatiya 5:22, 23.
2. Ti vutisi leswi: ‘Vanghanu va mina va kombisa “mihandzu ya moya wa ku kwetsima”?’
3. Tsala mavito ya vanghanu va wena vavakulu. U gama u tsala wumunhu la vona a tlhelweni ka mavito ya vona.
Vito
․․․․․
Wumunhu
․․․․․
U nga yendla leswi: Loko ku li swaku ho khumbuka swilo swa ku kala swi nga li swinene ntsena, swi komba swaku se wu fikile nkama wa leswaku u txintxa vanghanu va wena!
Xivangelo Xa Wumbirhi — Mahanyelo Lawa Ma Fambisanaka Ni Minawu Ya Bibele
Leswi u faneleke u swi tiva. Loko u lambhele ku kuma vanghanu, swi nga yendlaka u nga kumi vanghanu vavanene. Bibele li li: “Lweyi a tirhisanaka ni swiphunta, a swi nga ta mu fambela kahle.” (Swivuriso 13:20) A rito leli nge xiphunta, a li vulavuli hi munhu lweyi a kumaka manota yamatsongo xikola kumbe wa ku kala a nga tivi nchumu. Kambe li tlhamusela vanhu va nga ni mahanyelo ya ku kala ma nga li kahle naswona va xandzukaka. Phela vanghanu va ku tshamisa leswo a wu va vileli!
Leswi u nga swi yendlaka. Tiva ku langa, u nga vi munghanu wa mun’wani ni mun’wani. (Tipisalema 26:4) Leswi a swi vuli ku va ni xikheto, kambe swi vula ku vona “ku hambana xikarhi ka wa ku lulama ni lweyi a kalaka a nga lulamanga, ni xikarhi ka lweyi a tirhelaka Xikwembu ni lweyi a kalaka a nga xi tirheli.” — Malakiya 3:18.
“Na va khensa vapsali va mina hileswi va nga ni pfuna ku kuma vanghanu va kahle va ntanga ya mina naswona va nga ni wughanhu lalinene na Yehovha.” — Christopher, 13 wa malembe.
Hlamula swivutiso leswi landzelaka:
Loko ni li xikarhi ka vanghanu va mina, ni chava swaku va nga ni sindzisa ku yendla minchumu ya ku biha?
□ Ina
□ Ihim
Am Na chava ku kombisa vanghanu va mina ka vapsali va mina hi ku pimisa swaku a va nga ta va tsakela?
□ Ina
□ Ihim
U nga yendla leswi: Loko u hlamule swaku ina ka swivutiso leswi lani henhla, lava vanghanu lava mahanyelo ya vona ma kongomisiwaka hi Bibele naswona va nga swikombiso swaswinene.
Xivangelo Xa Wunharhu: Lava Ku Pfunaka Ku Yendla Swaswinene
Leswi u faneleke u swi tiva. Bibele li vula swaku “Vanghanu va ku biha va wonha mintirho yayinene.” (1 Vakorinto 15:33) Ntombhi yin’wani leyi vitaniwaka Laura yi li: “A vakolega va mina va le xikolweni a va lava ni yendla swilo hi ku ya hi leswi vona va swi lavisaka xiswona. Se leswi a ni titwa ni li noxe, ni tibohele ku yendla leswi a va swi lava swaku va ni yamukela ni va munghanu wa vona.” Laura a twisise swaku loko u txintxa mahanyelo ya wena hi mhaka vanhu van’wani, u fana ni tintxuva, u ya lomo va lavaka ku ku yisa kona. U faneliwa hi swa ku yampsa ku tlula leswo!
Leswi u nga swi yendlaka. Fambela kule ni vanhu lava ku sindzisaka swaku wu txintxa wutomi la wena u hanya ku fana na vona. Loko u yendla leswo swi nga yendleka vanghanu va wena va pumbeka kambe u ta titwa kahle. Naswona u ta pfula swipfalu swaku u va ni vanghanu va nyuwani vavanene lava nga ta ku pfuna swaku u va munhu wa kahle. — Varoma 12:2.
“Clint, mun’we wa vanghanu va mina lava ni va rhandzaka wa ringanisela naswona wa twisisa, phela hi yena a ni tiyisaka minkama ya yinyingi.” — Jason, 21 wa malembe.
Tivutisi swivutiso leswi landzelaka:
Indje ni tolovela ku yambala ni ku vulavula hi ndlela ya ku kala yi nga li yona swaku ni tsakisa vanghanu va mina?
□ Ina
□ Ihim
Ni ya ka tindhawu ta ku kala ti nga tshamisekanga ta ku a ni nga ta ya loko a ku nga li hi mhaka vanghanu va mina?
□ Ina
□ Ihim
Leswi u nga swi yendlaka: Loko u hlamule u ku ina ka swivutiso leswi, kombela vapsali va wena kumbe munhu mun’wani lweyi a nga mukulu swaku a ku pfuna. Kasi loko u li Mboni ya Yehovha, lava doda u li byela swaku a wu tsakela ku va li ku pfuna ku langa vanghanu lava nga ta ku pfuna swaku u va munhu wa kahle.
DJONDZA SWIN’WANI SWA KU YELANA NI MHAKA LEYI KA VHOLUMI 2, NDZIMA 9
Indjhe munghanu wa wena kumbe mbilu ya wena, swi ku sindzisa swaku u yendla swa ku biha? Vona lexi nga ku pfunaka!
[Ntlhamuselo wa le hansi]
a Vhela hinkwerhu ha phazama. (Varoma 3:23) Hambileswo, loko munghanu wa wena a ku kwatisa kambe a tisola hi mbilu hinkwayu, khumbuka leswaku “lirhandzu li mbhonya swidjoho swa swinyingi.” — 1 Pedru 4:8.
NDZIMANA LEYI NGA KHOMA MHAKA
“Ku ni munghanu lweyi a namarhelaka ngopfu ku tlula makwavu.” — Swivuriso 18:24.
LESWI U NGA SWI YENDLAKA
Vana ni mahanyelo yamanene, u ta swi vona swaku lava va tikarhatelaka ku va ni mahanyelo yamanene va ta lava ku va vanghanu va wena. Lava hi vona vanghanu va ntiyiso!
SE A WU SWI TIVA . . . ?
Hambileswi Xikwembu xi kalaka xi nga na xikheto, kambe xa va langa lava va nga ta va vayendzi ka “tenda la xona.” — Tipisalema 15:1-5.
YENDLA LESWI!
Swaku ni va ni vanghanu vavanene ni ta ․․․․․
A ni tsakela ku va tiva ku yampsa vanhu vavakulu ka mina ka mina, va ku fana na ․․․․․
Ni tsakela ku vutisa vapsali va mina mayelana ni mhaka leyi ․․․․․
U SWI VONISA KU YINI?
● Hi lini wumunhu leli u li nyikaka lisima ka munghanu, naswona hi mhaka muni?
● Hi lini wumunhu leli hi faneleke hi lwela ku va na lona swaku hi va vanghanu vavanene?
[Marito lama nga ka pajina]
“Nkama lowu vapsali va mina va nga ni byela swaku ni tihambanisa ni van’wani va vanghanu va mina, ni tibyele leswi, a na ha lavi vanghanu van’wani, na tsaka hi volava ni nga na vona. Kambe xitsundzuxu xa vona a xi li kahle, hi ku famba ka nkama, ni swi vonile swaku a va li vanyingi vanghanu va ku yampsa.” — Cole
[Kwadru li nga ka pajina 61]
Zama Ku Yendla Leswi
Bula ni vapsali va wena hi ndlela ya ku va ni vanghanu. Va vutisi swaku a va ni vanghanu va ku tshamisa ku yini nkama lowu a va ringana na wena. Ku nga va swaku va tisola hi vanghanu lava a va li na vona. Loko ku li swaku va tisola, hi mhaka muni? Va vutisi swaku wena u nga swi kotisa ku yini ku kala u nga weli ka nghozi yoleyi ya yin’we.
Tivisa vanghanu va wena ka vapsali va wena. Loko ku li swaku wa chava ku yendla leswo, tivutisi leswi: ‘Ni titwisa xileswi hi mhaka muni?’ Ku nga va hi mhaka leswi vanghanu va wena va kalaka va nga li kahle se wu chava swaku vapsali va wena a va nga ta va yamukela? Loko ku li leswo, swi lava u langa vanghanu va ku yampsa.
Vana muyingiseli wa munene. Kombisa leswaku u ni mhaka ni vanghanu va wena ni ndlela leyi va titwaka hi yona. — Vafilipiya 2:4.
Rivalela. U nga nyimeli leswaku va hetiseka. “Hinkwerhu ha phazama minkama ya yinyingi.” — Yakobe 3:2.
U nga lavi ku tshama na u ni munghanu wa wena nkama hinkwawu. A swi lavi swaku mi tshama mi li xikan’we minkama hinkwayu. Vanghanu va ntiyiso hi lava va ku pfunaka nkama lowu lavaka ku pfuniwa. — Ekleziyaxta 4:9, 10.
[Mufoto lowu nga ka pajina ]
Loko u yendla hinkwaswu leswi vanghanu va wena va swi lavaka leswaku va kota ku ku yamukela, u fana ni tintxuva, u ya lomo va lavaka ku ku yisa kona