Yesu A Va Mesiya

Yohani a a chumayela leswaku ku ni munhu mun’wani wa lisima ku tlula yena, lweyi a nga kusuhi ni ku humelela. Nkama lowu Yesu a nga tlhanganisa 30 wa malembe a ye ka Nambu wa Yordani lani Yohani a a tolovela ku tsakamisa vanhu kona. Yesu a kombele ku tsakamisiwa kambe Yohani a te:

— Yesu, mina a ni nge ku tsakamisi, hi wena u fanelaka u ni tsakamisa.

Yesu a ku:

— Yohani, Yehovha a lava leswaku u ni tsakamisa.

Se va game va pela ka Nambu wa Yordani. Yohani a tsakamise Yesu a peta muzimbha wa yena hinkwawu ka mati. Nkama lowu Yesu a nga huma a yendle xikhongelo se matilo ma pfuleka, moya wa ku kwetsima wu xika henhla ka yena na wu fana ni xituvani ku gama ku twakala a rito la Yehovha li ku:

— Wena u N’wana wa mina, lweyi ni mu rhandzaka hintamu naswona na ku yamukela.

Hi nkama wolowo Yesu a ve Kreste kumbe Mesiya. Phela ka nkama lowuyani Yesu se a a li prontu swaku a yendla ntirho lowu a a nyikiwe wona hi Yehovha. Loko se a tsakamisiwile Yesu a ye mananga a fika a heta 40 wa masiku. Loko a vuyile a ye ka Yohani a ya vulavula na yena. Nkama Yohani a nga mu vona na a ta, a te:

— Vonani Xinyempfani xa Xikwembu lexi nga ta susa xidjoho lani misaveni.

Yohani a vitane Yesu hi Xinyempfani xa Xikwembu hikusa a a lava leswaku vanhu va swi tiva leswaku Yesu a a li Mesiya. Kambe wa swi tiva swaku ku humelele yini nkama lowu Yesu na a li mananga? Hi ta swi vona ka xitoriya lexi landzelaka.