Yesu A Pfuxa Lazaru

Yesu a a ni vanghanu vanharhu, lava a va tshama ka doropa la Betaniya. Mavito ya vona a ku li Lazaru ni vamakwavu va yena vavambirhi, Marta na Mariya. Siku lin’wani Yesu a a li ka doropa leli a li kumeka kule ni Betaniya. Se na a li koseniyani, a yamukele mahungu lawa a ma ta hi ka Marta na Mariya. Vona va rhume munhu leswaku a ya byela Yesu a ku:

— Lazaru a vabya hintamu, hi kombela u ta hi ku hantlisa.

Kambe Yesu a nga tekelanga ku famba. Loko se ku hundze masiku mambirhi, yena a byele vadjondzisiwa va yena a ku:

— A hi fambeni Betaniya, Lazaru a le ku yetleleni, ni ta ya mu pfuxa.

Se vadjondzisiwa va te:

— Loko a li ku yetleleni, a ta pfuka.

Nkama a nga vona swaku vadjondzisiwa va yena a va swi twisisanga, Yesu a te:

— Lazaru a file.

Loko Yesu a fike Betaniya, se a swi yendla 4 wa masiku na Lazaru a file. Marta na Mariya ni vanhu van’wani a va rila hi mhaka ya ku fa ka Lazaru. Nkama lowu Marta a nga twa swaku Yesu a le ku teni a ye a ya kumana na yena a fika a ku:

— Hosi, loko a wu li lani, makwerhu a a ta va a nga fanga.

Yesu a ku:

— Makwenu wa wena a ta tlhela a hanya Marta. Wa kholwa ka leswo?

Marta a ku:

— Ina Yesu, na kholwa swaku a ta pfuxiwa nkama lowu taka.

Yesu a ku:

— Marta, hi mina ni pfuxaka vafi ni tlhela ni va nyika wutomi.

Se Marta a game a suka a ya byela Mariya swaku Yesu a a fikile. Mariya a tsutsumile a ya lani Yesu a a li kona, naswona vanhu van’wani va mu landzile. Yena a fike a khizama phambheni ka Yesu, na a rila hintamu, a ku:

— Hosi, loko a wu li lani, makwerhu a a ta va a nga fanga.

Nkama Yesu a nga vona Mariya na a rila hintamu, na yena a sungule ku rila. Se nkama lowu vanhu va nga swi vona leswo, va te:

— Vonani, phela Yesu a a mu rhandza hintamu Lazaru.

Vanhu van’wani a va tivutisa swaku hi mhaka muni Yesu a nga yendlanga nchumu swaku a hanyisa Lazaru nkama na a vabya. Se swoswi ke, i yini leswi Yesu a a ta swi yendla?

Yesu a fambile lani Lazaru a a lahliwe kona, se a va byela swaku va susa ribye leli a li pfalile lani a a lahliwe kona. Marta a gama a ku:

— Se ku hundza 4 wa masiku Lazaru na a file. Swi nga yendleka se a sungula ku nun’hwa.

Kambe va game va susa ribye, hilani Yesu a nga vula hi kona. Yesu a khongele a ku:

— Papayi, na ku khensa hikusa u ni yingisile, na swi tiva swaku wa ni yingisa nkama hinkwawu. Kambe ni vulavula hi mhaka ya vanhu lava nga nyima lani, leswaku va ta kholwa leswaku hi wena u nga ni rhuma lani misaveni.

Loko Yesu a game ku khongela, a vule hi rito la ku tlakuka a ku:

— Lazaru, huma.

Se ku humelele nchumu xa ku hlamalisa, Lazaru a humile hi le sirheni. Yesu a game a rhuma vanhu swaku va susa tipanu leti a ti bohelele Lazaru.

Vanhu va vanyingi lava nga vona singita lolelo, va sungule ku kholwa ka Yesu. Kambe van’wani va fambile va ya byela Vafarisi hinkwaswu leswi nga yendleka. Se Vafarisi va kwate hintamu, lakaku se a va lava ku dlaya Lazaru na Yesu. Na swi nga tiviwi hi munhu, Yudasi Skariyota, lweyi a a li mun’we wa vapostolo va 12, a fambile a ya vulavula ni Vafarisi a ku:

— Loko ni mi byela lomu Yesu a nga kona, mi ta ni nyika male muni?

Se Vafarisi va ku:

— Hi ta ku nyika 30 wa mamoweda ya prata.

Ku sukela kolanu, Yudasi a a lavetele tindlela ta ku va a nyikela Yesu ka Vafarisi.