Paxkwa La Wugamu La Yesu

Lembe ni lembe Vayuda a va tlangela Paxkwa hi diya 14 ka Nisani. Vona a va yendla leswo, leswaku va khumbuka siku leli Yehovha a nga va humesa hi lona aGibita. Hi lembe la 33, Yesu ni vapostolo va yena va tlangele Paxkwa. Nkama lowu va nga gama ku dla, Yesu a byele vapostolo va yena a ku:

— Mun’we ka n’wina a ta ni djikela.

Vapostolo va hlamalile hintamu, va gama va vutisa Yesu va ku:

— I mani lweyi a nga ta yendla leswo?

Yesu a hlamula a ku:

— Hi lweyi ni nga ta mu nyika pawu leli.

Yesu a nyike pawu Yuda Skariyota, se Yuda a gama a suka a famba. Loko Yuda Skariyota a fambile, Yesu a game a yendla xikhongelo a divhidira pawu a nyika vapostolo va yena, a gama a ku:

— Loko mi dla pawu leli, khumbukani muzimbha wa mina, lowu ni nga ta wu nyikela hi mhaka ya n’wina.

Yesu a game a yendla xikhongelo xin’wani se a teka kopo ya vhinyu a nyika vapostolo a ku:

— Loko mi phuza vhinyu leli, khumbukani ngati ya mina, leyi ni nga ta yi nyikela leswaku Yehovha a mi rivalela swidjoho swa n’wina. Na mi tshembisa leswaku n’wina mi ta va tihosi na mina atilweni. Lembe ni lembe yendlani swa ku fana ni leswi leswaku mi ni khumbuka.

Hambi hi namuntlha valandzeli va Yesu va tlhangana leswaku va khumbuka leswi Yesu a nga swi yendla. Ntlhanganu lowu wu vitaniwa Ku Khumbuka Lifu La Yesu.

Loko se swi helile, vapostolo va sungule ku holovisana, hileswaku i mani wa lisima hintamu ka vona. Yesu a va byele a ku:

— A munhu wa lisima, hi lweyi a kalaka a nga tivoni na a yampsa ku tlula van’wani.

Yesu a tlhele a byela vapostolo va yena a ku:

— N’wina mi vanghanu va mina. Phela ni mi byela swilo hinkwaswu leswi Papayi a lavaka leswaku ni mi byela. Swoswinyana, ni ta tlhela ni famba ni ya tilweni ka Papayi wa mina. Se n’wina mi ta sala lani. Leswaku vanhu hinkwavu va swi tiva leswaku mi vadjondzisiwa va mina. Mi fanele mi rhandzana ku fana ni leswi ni nga mi rhandzisa xiswona.

Hi wugamu Yesu a yendle xikhongelo, yena a kombele Yehovha leswaku a vhikela valandzeli va yena hinkwavu, ni ku va pfuna leswaku va tirha xikan’we va tlhela va hanyisana kahle hi ku rhula. Yesu a tlhele a khongela leswaku vanhu hinkwavu va tiva vito la Yehovha. Yesu ni vapostolo, va sungule ku yimbelela Yehovha hi tinsimu, va gama va famba. Se a ku li kusuhi ni ku fika nkama wa leswaku Yesu a khomiwa.