Yesu A Phamela Vanhu Va Vanyingi

Khambi lin’wani, vapostolo va yendle liyendzo la ku ya chumayela, se va vuye na va karhalile. Yesu a va tekile a khwela na vona boti a ya ka xidoropani xa Betisayida leswaku va ya humula. A kusuhi ni lwandle, Yesu a vone vanhu va vanyingi lava a va mu landzela. Hambileswi yena a a lava ku va ni vapostolo va yena ntsena, a va yendlele swilo swaswinene hinkwavu. Ka siku leliyani hinkwalu, a hanyise lava a va vabya ni ku djondzisa vanhu hinkwavu hi Mfumu wa Xikwembu. Loko se li chonile vapostolo va ye ka Yesu va fika va ku:

— Vanhu se va fa hi ndlala, swa yampsa va ya tilavela swakudla.

Se Yesu a byele vapostolo va yena swaku vanhu a va nga fanelanga va famba. Vapostolo a va fanele va va nyika swakudla. Vona va hlamale hintamu hi ku twa leswo, va ku:

— Hosi, u lava leswaku hi ya va xavela mapawu?

Mun’wani wa vadjondzisiwa va Yesu lweyi a vitaniwaka Filipi a te:

— Hambi ho va ni male ya yinyingi, a swi nge koteki ku va xavela mapawu vanhu lava hinkwavu.

Yesu a vutise vapostolo swakudla leswi a va li na swona. Andre a te:

— Ho va ni 5 wa mapawu ni tihlampfi timbirhi, a swi nga ta va yenela.

Se Yesu a kombele leswaku va tisa mapawu ni tihlampfi leti a ti li kona. Yena a kombele vanhu hinkwavu swaku va tshama hansi, hi magrupu ya 50 ni 100. Yesu a game a teka mapawu lawayani ni tihlampfi, a txuvuka henhla a sungula ku khongela. A game a va nyika swakudla leswiyani vadjondzisiwa va yena swaku va phakela vanhu. 5000 wa vanhu lava a va li kona na ku nga patsiwe vavasati ni vana, va dle swakudla leswiyani va xurha. Vapostolo va game va hlengeleta swakudla leswi a swi salile swi tata 12 wa mindzhava. Phela leswi Yesu a nga swi yendla swa hlamalisa a hi swona?

Vanhu va hlamale hintamu hi leswi Yesu a nga swi yendla, naswona a va lava leswaku Yesu a va hosi ya vona. Kambe yena a a swi tiva swaku ka Yehovha a wu nga se fika nkama wa leswaku a va hosi. A byele vanhu swaku va famba, a tlhela a byela vadjondzisiwa va yena swaku va tlulela Lwandle la Galileya. Vapostolo va nghene ka boti se Yesu a khwele ka ntshava a li yexe. Wa swi tiva swaku hi mhaka muni? Hikusa a a lava ku khongela ka Yehovha. Hambileswi a a ni swa swinyingi swa ku swi yendla a a tinyika nkama wa ku khongela.