Kombisa Wunene

I Mpsini Leswi Yesu A Nga Swi Yendla?

VHIDIYO: Yesu A Hanyisa Wanuna Wa Ku Fa Matihlo

1. Sixtira VHIDIYO, kumbe u lerha Yohani 9:1-7. U gama u hlamula swivutiso leswi landzelaka:

1. I mpsini leswi Yesu a nga swi yendla ku sungula, a hanyise wanuna lweyi a a fe matihlo kumbe a sungule hi ku mu chumayela? — Vona Yohani 9:35-38.

2. Hi mhaka muni leswi Yesu a nga swi yendla swi pfune wanuna lweyi a a fe matihlo swaku a yingisela mahungu ya ku tsakisa?

Hi Djondza Yini Ka Leswi Yesu A Nga Swi Yendla?

2. Munhu lweyi hi bulaka na yena a ta lava ku hi yingisela loko a vona swaku hi ni mhaka na yena.

Tekelela Xikombiso Xa Yesu

3. Tiveki ka xiyimu xa lweyi u bulaka na yena. Zama ku tiva leswi a titwisaka xiswona.

1. Tivutisi leswi: ‘I mpsini leswi mu karhataka? I mpsini leswi nga mu pfunaka? Naswona i mpsini leswi nga mu tsakisaka?’ Loko u yendla leswo swi ta ku vevukela ku mu pfuna u tlhela u mu komba wunene.

2. Kombisa swaku u ni mhaka ni leswi a titwisaka xiswona hi ku mu yingisela. Loko munhu a ku byela leswi a titwisaka xiswona kumbe a ku byela hi xikarhatu lexi a kumanaka na xona, u nga txintxi mabulu.

4. Vulavula hi ndlela yayinene ni hi xihlonipho. Loko u mu twela wusiwana munhu lweyi u vulavulaka na yena u tlhela u swi lava ku mu pfuna swi ta tikomba ka ndlela leyi u vulavulaka hi yona. Langa kahle marito ya wena u tlhela u tivonela ka leswi u swi vulaka ni leswi u nga ta swi vulisa xiswona. Funtshi u nga vuli swilo leswi nga ha kwatisaka munhu lweyi u bulaka na yena.

5. Mu pfuni. Zama ku vona leswi u nga swi yendlaka swaku u mu pfuna ka xikarhatu lexi a kumanaka na xona. Phela loko u mu komba wunene munhu lweyi u bulaka na yena, a ta swi lava hintamu ku bula na wena.