Mavunhwa Lawa Ma Nga Yendla Swaku Vanhu Va Nga Xi Tivi Xikwembu

LESWI VANYINGI VA KHOLWAKA KA SWONA

A wukhongeli leli tivulaka Vakreste la ku fana ni “Igreja Katolika, Igreja Ortodoxa ni Vaprotextanti li kholwa swaku Xikwembu i vanhu vanharhu lava va nga patsana, ku nga Papayi, N’wana ni Moya wa Ku Kwetsima. Hi ku ya hi tidjondzo ta vona a hi swikwembu swinharhu swa ku hambana kambe i xikwembu xin’we lexi nga ni 3 wa vanhu.” — Nova Enciclopédia Británica.

LESWI BIBELE LI SWI VULAKA

Yesu lweyi a nga N’wana wa Xikwembu a nga zanga a vula swaku wa ringana ni Papayi wa yena kumbe swaku yena ni Papayi wa yena i munhu mun’we. Ku hambana ni leswo, a vule swaku ‘a a ya ka Papayi, hikusa Papayi i mukulu ka yena.’ (Yohani 14:28) Yesu a tlhele a ku: “Ni ya ka Papayi wa mina lweyi a nga Papayi wa n’wina, ni le ka Xikwembu xa mina lexi nga Xikwembu xa n’wina.” — Yohani 20:17.

Moya wa ku kwetsima a hi munhu. Hi vula leswo hikusa Bibele li vula swaku ka nkama wa Vapostolo ku ve ni vanhu ‘lava nga tala hi moya wa ku kwetsima’ naswona Yehovha a vule leswaku ‘a a ta nyika vanhu hinkwavu moya wa yena wa ku kwetsima.’ (Mintirho 2:1-4, 17) Se leswo swi kombisa swaku moya wa ku kwetsima a hi Xikwembu kambe i matimba ya Xikwembu.

HI MHAKA MUNI LESWO SWI LI SWA LISIMA?

Tintivi ta Katolika leti vitaniwaka Karl Rahner na Herbert Vorgrimler, ti tlhamusela swaku “a djondzo ya swaku Xikwembu i vanhu vanharhu ka munhu mun’we, a swi nge koteki ku yi twisisa loko munhu a nga tlhamuseliwanga hi Xikwembu hi ndlela ya ku hlamalisa funtshi hambiloko munhu o tlhamuseliwa, a nge swi koti ku yi twisisa hi ku helela.” Indjhe swi nga koteka ku rhandza munhu lweyi hi kalaka hi nga mu tivi funtshi hi kalaka hi nga mu twisisi? Nada! Leswo swi hi yendla hi swi vona swaku a djondzo ya leswaku Xikwembu i vanhu vanharhu ka munhu mun’we yi yendla swaku vanhu va nga xi tivi Xikwembu va tlhela va nga xi rhandzi.

Marco, lweyi hi nga vulavula hi yena ka nhlokomhaka ya ku sungula a vule swaku a djondzo ya leswaku Xikwembu i vanhu vanharhu lava nga patsana a yi mu hambanisa ni Xikwembu. Yena a li: “A ni pimisa swaku Xikwembu a xi swi lavi leswaku ni xi tiva, swaku xi kule na mina ni leswaku a xi swi lavi swaku ni va munghanu wa xona.” Kambe leswo a hi swona leswi Bibele li swi djondzisaka hikusa lona li vula leswaku “Xikwembu a hi Xikwembu xa mpfilumpfilu.” (1 Vakorinto 14:33) Xikwembu a xi hi fihleli swaku hi xona mani funtshi xa swi lava swaku hi xi tiva. Hi mhaka leyo Yesu a nga te: “Hi gandzela [Xikwembu] lexi hi xi tivaka.” — Yohani 4:22.

Marco a li: “Nkama ni nga djondza swaku Xikwembu a hi 3 wa vanhu lava nga patsana ka ndhawu yin’we, ni sungule ku xi rhandza funtshi ni sungule ku va munghanu wa xona.” Phela loko hi vona Yehovha na a li Munhu wa hikakunene ku nga li Xikwembu lexi kalaka xi nga twisiseki swaku xi tshamise ku yini, swi ta hi vevukela ku va hi mu rhandza. Bibele li li: “Lweyi a kalaka a nga na lirhandzu a nga xi tivi Xikwembu, hikusa Xikwembu i lirhandzu.” — 1 Yohani 4:8.