Mavunhwa Lawa Ma Yendlaka Vanhu Va Pimisa Swaku Xikwembu Xi Ni Mbilu Ya Ku Biha

LESWI VANYINGI VA KHOLWAKA KA SWONA

Buku lin’wani la Igreja Katolika li vula swaku “loko munhu a fa na a li mudjohi, moya wa yena wu yisiwa a infernu ku nga ndhawu leyi moya wa munhu yelweyo wu hisiwaka ka ndzilu lowu pfurhaka minkama hinkwayu funtshi hi nkama wa ku kala wu nga heli.” Naswona varhangeli va wukhongeli lin’wani va vula swaku a infernu i ndhawu leyi hambanisaka munhu hi ku helela ni Xikwembu.

LESWI BIBELE LI SWI VULAKA

Bibele li vula swaku “munhu lweyi a djohaka hi yena a nga ta fa.” (Ezekiyele 18:4) Naswona lava nga fa “a va tivi nchumu.” (Ekleziyaxta 9:5) Se leswi munhu a faka ni leswi loko se a file a kalaka a nga tivi nchumu, swi kotekisa ku yini kuva a hluphiwa a infernu hi ku hisiwa hi “ndzilu wa ku kala wu nga heli?” Naswona swi kotekisa ku yini kuva a twa ku vava hileswi a nga kule ni Xikwembu?

A marito lawa ma nga hundzuluxeliwa ka Mabibele man’wani ma va “infernu,” hi Xiheberu ni Xigriki ma vula sirha. Hi xikombiso, wuprofeta lin’wani leli vulavulaka hi Yesu li li: “Hikusa a wu nge ni tshiki aSirheni [“a infernu,” hi ku ya hi Bibele la Antônio Pereira de Figueiredo].” (Mintirho 2:27) Hinkwerhu ha swi tiva swaku nkama Yesu a nga fa, a nga zanga a yisiwa ka ndhawu leyi pfurhaka ndzilu leswaku a khatisiwa hi Xikwembu kambe a lahliwe asirheni.

HI MHAKA MUNI LESWO SWI LI SWA LISIMA?

Ku pimisa swaku Xikwembu xi ni mona swi yendla swaku vanhu va nga xi rhandzi funtshi va nga lavi ku va vanghanu va xona. Rocío, lweyi a tshamaka México a li: “Nkama na na ha li mutsongo ni djondzisiwe swaku Xikwembu xi khatisa vanhu hi ku va hisa hi ndzilu a infernu. Se leswo a swi ni chavisa hintamu funtshi a ni pimisa swaku Xikwembu xi ni mbilu ya ku biha. A ni tibyela swaku Xikwembu xi rhandza ku khatisana naswona a xi swi koti ku va lehisela mbilu kumbe ku va tsetselela vanhu van’wani.”

Nkama Rocío a nga tiva leswi Bibele li swi vulaka hi vanhu lava va nga fa ni swaku Yehovha a va yavanyisisa ku yini vanhu, a txintxe leswi a a swi pimisa hi Xikwembu. Yena a li: “A swi fana ni loko a no susiwa ndzhwalu wa ku tika ka makatla ya mina. Phela swoswi na swi tiva swaku Xikwembu xi ni mhaka na hina, swaku swi nga koteka kuva ni xi rhandza ni swaku xona xi fana ni papayi lweyi a nga ni lirhandzu lweyi a hi navelelaka swilo swaswinene.” — Esaya 41:13.

Vanhu va vanyingi va khongela hi mhaka leswi va chavaka ku hisiwa hi ndzilu a infernu kambe a hi swona leswi Xikwembu xi swi lavaka, xi lava swaku hi xi tirhela hi mhaka leswi hi xi rhandzaka ku nga li hi mhaka ya ku chava. Phela Yesu a te: “U fanele u rhandza Yehovha Xikwembu xa wena.” (Marka 12:29, 30) Naswona loko hi tama hi djondza hi Yehovha hi ta ya hi swi twisisa swaku Yehovha a nga yendli swilo swa ku biha funtshi hi ta tiyiseka swaku a ta va yavanyisa hi ndlela yayinene vanhu hinkwavu ka nkama lowu taka. Ku fana ni munghanu wa Yobo lweyi a vitaniwaka Elihu, na hina hi ta tiyiseka swaku “Xikwembu xa ntiyiso a xi nge tshuki xi yendla swa ku biha, Lweyi Wa Matimba Hinkwawu a nge yendli swa ku biha!” — Yobo 34:10.