Wutomi la mina a li ya li biha hintamu

WUTOMI LA MINA LA KHALE:

Ni psaliwe aLos Angeles, a Califórnia, Estados Unidos ka ndhawu leyi a ku dzahiwa hintamu ku tlhela ku tshama swigevenga swa swinyingi. Vapsali va mina a va ni 6 wa vana mina a ni li wa wumbirhi ka vona.

Nkama hi nga kula hi wona, mamani a a li wa kereke ya evangélica naswona a a hi yendla hi va ka kereke ya yena. Hambileswo nkama ni nga kula nyana ni sungule ku hanya wutomi lin’wani, hi ma Domingo a ni ya kerekeni kambe hi xikarhi ka vhiki a ni ya mafexteni ni dzaha ni tlhela ni rhandza vavasati.

A ni nga hlweli ku kwata naswona lexi a ni xi kuma kusuhi na mina a ni xi tirhisa swaku ni lwa hi xona. Leswi a ni swi djondza kerekeni a swi nga ni pfuni, a ni tolovela ku vula swaku: “Ku khatisa i ka Hosi naswona yi tirhisa mina swaku yi yendla swoleswo.” Nkama na ni li xikola hi ma 1960 ni ve ka ntlawa wa politika lowu a wu vitaniwa Panteras Negras naswona a wu tiviwa hi ku lwela timfanelo ta vanhu. Ni tlhele ni va ka ntlawa lowu a wu lwela timfanelo ta lava va djondzaka xikola. A hi yendla switereka, hi mhaka leswo minkama yin’wani a xikola a xi pfaliwa.

Nakambe a swi tikomba ingi ku tereka a swi li switsongo ka mina, hi mhaka leyo ni sungule ku yendla minchumu ya ku biha hintamu. Hi xikombiso siku lin’wani mina ni vanghanu va mina hi ye hi ya sixtira filmi leli a li kombisa leswi valandi va nga hluphekisa xiswona aEstados Unidos, se hi sungule ku holovisa valungu lava a va li kolanu hi tlhela hi va ba. Se hi game hi ya ka tindhawu leti a ku tshama valungu leti a ti li kusuhi swaku hi ya va holovisa hi tlhela hi va ba.

Nkama na ni li jovhem, mina ni vamakwerhu va mina se a hi tiviwa hi ku va swigevenga swaswikulu, a hi ni timhaka ta tinyingi ni maphoyisa. Mun’we wa vamakwerhu va mina wamutsongo a a li wa ntlawa wa swigenvenga swaswikulu naswona minkama hinkwayu mina a ni li na vona. Wutomi la mina a li ya li biha hintamu.

BIBELE LI TXINTXISE KU YINI WUTOMI LA MINA:

Vapsali va munghanu wa mina a va li Timboni ta Yehovha, va ni rhambe swaku ni ya mintlhanganwini naswona ni pfumelile. Loko ni fike mintlhanganwini ni hlamalile hintamu, hikusa vanhu hinkwavu a va ni Mabibele ya vona lawa a va ma tirhisa loko mintlhanganu yi ya yi famba, majovhem a ma veka madixkursu naswona swi ni hlamalisile hintamu ku tiva swaku vito la Xikwembu i Yehovha naswona a lava swaku hi li tirhisa. (Tipisalema 83:18) A bandleni a ku ni valungu ni va landi kambe a ku nga na xikheto.

Ku sunguleni mina a ni nga swi rhandzi ku djondza Bibele ni Timboni ta Yehovha kambe a no rhandza ku ya mintlhanganwini. Ka wusiku lin’wani na ni li ka mintlhanganu ya Timboni ta Yehovha, vanghanu va mina lava va li swigevenga va ye ka fexta lani va nga ba jovhem lin’wani anze li fa hi mhaka ya leswi li nga yala ku va nyika djeki la lona la napa, hi mundzuku ka kona va tikhuzile hileswi va nga dlaya jovhem leliyani naswona a va nga swi voni ku li nchumu wa ku biha leswi va nga swi yendla, va patse ni ku hleka loko va li tribunali. Va vanyingi ka vona va yisiwe djele swaku va ya tshama wutomi la vona hinkwalu, mina ni tsake hintamu hileswi ni kalaka ni nga fambanga na vona ka wusiku leliyani. Ni tinyimisele ku txintxa wutomi la mina ni tlhela ni sungula ku djondza Bibele.

Leswi se a ni ni mavonelo ya ku biha hi valungu a swi ni hlamalisa leswi Timboni ta Yehovha ti hanyisaka xiswona. Hi xikombiso nkama Mboni ya mulungu yi nga yendza yi siye vana va yona ni makwerhu wa xisati wa mulandi, naswona ndjagu wun’wani wa valungu wu pfumele ku tshama ni jovhem lin’wani la mulandi leli a li nga na ka ku tshama kona. Ni game ni tiyiseka swaku hikakunene Timboni ta Yehovha ti hanya hi ku landza marito lawa Yesu a nga ma vula ka Yohani 13:35 lawa ma nge: “Hinkwavu va ta tiva swaku mi vadjondzisiwa va mina loko mi rhandzana.” Ni vone swaku hikakunene ni kume ndjangu wa ntiyiso.

Nkama na ni djondza Bibele ni swi vonile swaku a ni fanele ni txintxa ndlela leyi a ni pimisa hi yona, a swi nga lavi ni txintxa mapimiselo ya mina ni va munhu wa ku rhula ntsena kambe a ni fanele ni kholwa swaku leli hi lona wutomi la ku yampsa. (Varoma 12:2) Hi ku tsongokutsongo ni kulise wunghanu la mina na Yehovha se hi Janeiro wa 1974 ni tsakamisiwile ni va Mboni ya Yehovha.

Hambiloko se ni tsakamisiwile a swi lava ni tama ni tikarhata swaku ni tshika ku va ni xikwatisani. Hi xikombiso siku lin’wani na ni li ku chumayeleni hi munti ni munti ku ni lweyi a nga yiva a radiyu la mina ka movha se ni gama ni mu txatxa, na ni nge se mu kuma a li tshikeletelile. Loko ni byele van’wani hi leswi ni nga li kumisa xiswona radiyu la mina, doda lin’wani li ni vutise li ku: “Stephen a wu ta va u yendle yini loko a wu yo mu kuma lweyi a a yive radiyu?” Xivutiso lexo xi ni yendle ni pimisa, xi tlhela xi ni yendla ni lava ku tama ni tikarhata swaku ni va munhu wa ku rhula.

Hi Outubro wa 1974 ni sungule ku tirha ka nkama hinkwawu swaku ni djondzisa vanhu Bibele naswona a ni heta 100 wa mawora hi wheti, hi ku famba ka nkama ni sungule ku pfunisa ka sede la Timboni ta Yehovha aBrooklyn, Nova York. Hi 1978 ni tlhelele aLos Angeles swaku ni ya hlayisa mamani wa mina lweyi a a vabya, loko se ku hundze malembe mambirhi ni game ni chada na Aarhonda. Yena a ni pfune hintamu ku hlayisa mamani wa mina anze a fa, hi ku famba ka nkama mina na Aarhonda hi ye ka Xikola xa Giliyadi naswona loko xikola xi helile va hi veke swaku hi ya tirha a Panamá lani hi tirhaka kona tani hi vamisiyonariyu anze swoswi.

Ku sukela ni tsakamisiwa ni yendlekeliwe hi minchumu ya yinyingi leyi a yi ta va yi ni kwatisile, ni zame ku kala ni nga ha va kwateli vanhu lava a va zama ku ni pfuka kumbe ni fambela kule na vona. Vanhu va vanyingi ku patsa ni nsati wa mina va tsaka hileswi se ni kotaka ku tikhoma loko ni yendlekeliwa hi minchumu ya ku fana ni leyi, minkama yin’wani hambi hi mina na hlamala. Na swi tiva swaku a ni koti ku yendla leswo hi ntamu wa mina kambe leswo swi kombisa swaku hikakunene Bibele li ni matimba ya ku txintxa wutomi la vanhu. — Vaheberu 4:12.

NI PFUNEKISE KU YINI:

Bibele li ni pfune ku vona swaku ni hanyela yini li tlhela li ni djondzisa ku va munhu wa ku rhula. Swoswi a na ha hluphi vanhu kambe ni va pfuna swaku va va vanghanu va Yehovha, funtshi hambi kolega wa mina wa xikola lweyi a hi nyenyana hintamu ni mu djondzise Bibele, hi ku famba ka nkama a tsakamisiwile naswona hi tshame xikan’we ka munti wun’we, namuntlha hi vanghanu vavakulu hintamu. Mina ni nsati wa mina se hi pfune vanhu va ku tlula 80 swaku va va Timboni ta Yehovha hi ku djondza Bibele na vona.

Ni mu khensa hintamu Yehovha hileswi a nga ni pfuna ku va ni wutomi la ku tsakisa a tlhela a ni nyika vamakwerhu va misava hinkwayu.