Tama U Tshemba Nhlengeletanu Ya Yehovha

1. I mpsini leswi a swi yendliwa leswaku mabandla ma kongomisiwa ka minkama ya vapostolo?

LOKO Yehovha a nyika vanhu va yena ntirho, a nyimela leswaku va wu yendla hi ndlela yayinene ni hi nawu wa kona. (1 Ko. 14:33) Hi xikombiso, Yehovha a lava leswaku mahungu ya ku tsakisa ma chumayeliwa amisaveni hinkwayu. (Mat. 24:14) Yehovha a veke Yesu leswaku ku va yena lweyi a rhangelaka ntirho lowu. Na yena Yesu a yendla hinkwaswu leswaku ntirho lowu wu yendliwa hi ndlela yayinene ni hi nawu wa kona. Aminkameni ya vapostolo, loko mabandla ma vekiwa ka tindhawu ta ku hambanahambana, a ku tlhela ku vekiwa madoda leswaku ma nyikela minkongomiso ma tlhela ma rhangela. (Min. 14:23) A Yerusalema a ku ni ntlawa wa madoda lowu a wu patsa vapostolo ni madoda man’wani ya ku wupfa lawa a ma yendla swiboho ma tlhela ma swi rhumela ka mabandla hinkwawu leswaku ma swi landzela. (Min. 15:2; 16:4) Phela leswi minkongomiso yoleyo a yi landzeliwa, “mabandla a ma tiyisiwa lipfumelo naswona a ma ya ma tala siku ni siku.” — Min. 16:5.

2. Ku sukela hi 1919, Yehovha a va nyikisa ku yini nkongomiso vanhu va yena?

² Ninamuntlha Yehovha wa ha tama a kongomisa vanhu va yena ku fana ni khale. Ku sukela hi 1919, Yesu a tirhisa ntlawa wawutsongo wa vamakwerhu va xinuna lava nga totiwa leswaku va rhangela ntirho wa ku chumayela va tlhela va hi nyika swilo leswi hi pfunaka ku tiyisa wunghanu la hina na Yehovha.a (Luk. 12:42) Phela swa tikomba swaku Yehovha wa wu katekisa ntirho wa vamakwerhu lava. — Esa. 60:22; 65:13, 14.

3-4. a) Nyikela xikombiso xa ndlela leyi hi pfunekaka hi yona hileswi hi kongomisiwaka hi Yesu. b) Hi ta djondza hi yini ka nhlokomhaka leyi?

³ Loko mun’wani ni mun’wani wa hina a wo yendla leswi a swi lavaka, a hi nga ta swi kota ku hetisisa ntirho wa ku chumayela lowu Yesu a nga hi nyika wona. (Mat. 28:19, 20) Hi xikombiso, pimisa hi loko bandla lin’wani ni lin’wani a li nga nyikiwanga teritoriyu la lona! Mun’wani ni mun’wani a a ta chumayela lomu a ku lavaka. Leswo a swi ta yendla swaku tindhawu tin’wani ti chumayeliwa hintamu kuve tin’wani a ti nga ta chumayeliwa. Ku nga va leswaku u pimisa hi tindlela tin’wani leti hi nga pfunekaka hi tona hileswi Yesu a hi rhangelaka?

⁴ Ku fana ni leswi Yesu a a kongomisa vadjondzisiwa va yena nkama lowu na a li lani misaveni, ni swoswi wa ha tama a yendla swoleswo ka nhlengeletanu ya Yehovha. Se ka nhlokomhaka leyi hi ta djondza hi xikombiso xa Yesu ni swaku a nhlengeletanu ya Yehovha yi xi landzelelisa ku yini xikombiso xa yena swoswi. Hi ta tlhela hi vona swaku hi nga yendla yini leswaku hi tama hi hlonipha hi tlhela hi tshemba nhlengeletanu ya Yehovha.

NHLENGELETANU YA HINA YI LANDZELA XIKOMBISO XA YESU

5. Hi yini ndlela leyi nhlengeletanu yi mu tekelelaka hi yona Yesu? (Yohani 8:28)

⁵ Yesu a djondze ka Papayi wa yena leswi a a fanele a swi yendla ni leswi a a fanele a swi vula. Hi ku landzela xikombiso xa Yesu, nhlengeletanu ya Yehovha hi ku tirhisa Bibele yi hi djondzisa ku tiva leswi nga swinene ni leswi kalaka swi nga li swinene, yi tlhela yi hi komba ndlela leyi hi faneleke hi hanya hi yona leswaku hi tsakisa Xikwembu. (Lerha Yohani 8:28; 2 Tm. 3:16, 17) Nhlengeletanu ya Yehovha nkama ni nkama yi hi khumbukisa leswaku hi fanele hi lerha Bibele hi tlhela hi hanya hi leswi hi swi djondzaka. Se hi pfunekisa ku yini hi ku va hi yendla leswo?

6. Hi pfunekisa ku yini loko hi djondza a Bibele?

⁶ Hi pfuneka hintamu loko hi djondza Bibele hi ku tirhisa mabuku ya nhlengeletanu. Hi xikombiso, hi fananisa leswi hi swi djondzaka ka Bibele ni minkongomiso leyi nhlengeletanu ya Yehovha yi hi nyikaka yona. Se loko hi vona swaku a minkongomiso yoleyo yi susiwe ka Bibele, leswo swi yendla swaku hi ya hi yi tshemba hintamu a nhlengeletanu ya Yehovha. — Rom. 12:2.

7. Yesu a a chumayela hi yini, naswona nhlengeletanu ya Yehovha yi xi landzelelisisa ku yini xikombiso xa yena?

⁷ Yesu a chumayele “mahungu ya ku tsakisa ya Mfumu wa Xikwembu.” (Luk. 4:43, 44) Yesu a byele vadjondzisiwa va yena swaku na vona a va fanele va chumayela mahungu ya ku tsakisa ya Mfumu wa Xikwembu. (Luk. 9:1, 2; 10:8, 9) Ninamuntlha, hina hinkwerhu hi landzelelaka nkongomiso wa nhlengeletanu ya Yehovha, hi chumayela mahungu ya ku tsakisa ya Mfumu wa Xikwembu ku nga na mhaka swaku hi tshama kwini ni leswaku hi wihi ntirho lowu hi wu yendlaka ka nhlengeletanu ya Yehovha.

8. Hi wini nkateko lowu hi nga na wona?

⁸ Hi ni nkateko wawukulu wa ku va hi bula ni vanhu van’wani hi Mfumu wa Xikwembu. Phela nkateko lowo a wu kumiwi hi mun’wani ni mun’wani. Hi xikombiso, nkama Yesu na a li lani misaveni a nga ma pfumelelanga madimoni swaku ma vulavula hi yena. (Luk. 4:41) Ninamuntlha, munhu na a nge se pfumeleliwa leswaku a chumayela ni Timboni ta Yehovha, a fanele a rhanga hi ku hanya hi ndlela leyi tsakisaka Yehovha. Se hina hi kombisa swaku ha wu khensa nkateko lowu hi nga na wona wa ku chumayela mahungu ya ku tsakisa, hi ku chumayela ka xiyimu xin’wani ni xin’wani lexi hi nga ka xona loko hi pfulekeliwa hi nkama. Ku fana na Yesu, lexi hi xi lavaka hintamu i ku byala hi tlhela hi regara a mbewu ya ntiyiso ka timbilu ta vanhu. — Mat. 13:3, 23; 1 Ko. 3:6.

9. Nhlengeletanu ya Yehovha yi yendla yini swaku yi djondzisa vanhu hi vito la Xikwembu?

⁹ Yesu nkama lowu na a li lani misaveni a djondzise vanhu hi vito la Xikwembu. Siku lin’wani a khongele ka Papayi wa yena Yehovha a ku: “Ni va djondzisile vito la wena.” (Yoh. 17:26) Nhlengeletanu ya Yehovha na yona yi tekelela xikombiso xa Yesu hi ku yendla hinkwaswu yi nga swi kotaka swaku yi djondzisa van’wani leswaku va tiva vito la Xikwembu. A Bibele la Wuhundzuluxeli La Misava Ya Nyuwani na lona li yendla ntirho wa lisima hintamu ka mhaka leyi ya ku va vanhu va tiva vito la Xikwembu, hikusa ka lona ku tlheliseliwe a vito la Yehovha hinkwaku lomu a li humelela kona nkama lowu ku nga tsaliwa Bibele, funtshi wuhundzuluxeli leli la kumeka hi kolomu ka 270 wa tirimi ni ku tlula na li helelile kumbe hi swiyenge. Loko u khoma Bibele leli u pfula ka Xiyengetelo A4 ni A5 u ta kuma swivangelo swa ku twala leswi kombisaka swaku hi mhaka muni a vito la Yehovha li tlheliseliwe lomu a li kumeka kona khale. Kasi ka Xiyengetelo C ka Bibele La Ku Djondza Hi Lona hi Xiputukezi, ku kombisiwa swaku hi mhaka muni a vito la Xikwembu li fanele li humelela ka 237 wa makhambi ka Matsalwa ya Xigriki.

10. U djondze yini ka leswi nga vuliwa hi wansati lwiya wa Mianmar?

¹⁰ Ku fana na Yesu, na hina hi lava ku djondzisa vanhu va vanyingi swaku va tiva a vito la Xikwembu. Hi xikombiso, wansati mun’wani wa Mianmar lweyi a nga ni 67 wa malembe, nkama lowu a nga byeliwa vito la Xikwembu a sungule ku rila a gama a ku: “Leli ku ve khambi la ku sungula ka wutomi la mina lani ni nga tiva swaku vito la Xikwembu i Yehovha. . . . Phela u ni djondzise nchumu wa lisima hintamu wa ku a ni nga wu tivi.” Hilani swi nga mu yendlekela hi kona wansati lweyi, a ku djondza hi vito la Xikwembu swi nga txintxa wutomi la vanhu.

TAMA U KOMBISA SWAKU WA YI NHLONIPHA NHLENGELETANU YA YEHOVHA

11. Madoda ma nga swi kombisisa ku yini leswaku ma yi hlonipha nhlengeletanu ya Yehovha? (Vona mufoto.)

¹¹ Madoda ma nga swi kombisisa ku yini swaku ma yi hlonipha nhlengeletanu ya Yehovha? Loko ma yamukela nkongomiso, ma wu lerha kahle ma tlhela ma yendla hinkwaswu leswi ma nga swi kotaka leswaku ma wu landzelela. Hi xikombiso, madoda ma yamukela nkongomiso wa ndlela leyi ma faneleke ma yi yendla hi yona mintlhanganu, ndlela leyi ma faneleke ma khongela hi yona loko ma li mintlhanganwini; kambe ma tlhela ma yamukela nkongomiso wa ndlela leyi ma faneleke ma wu hlayisa hi yona ntlhambi wa Yehovha. Phela loko madoda ma yendla hinkwaswu leswaku ma landzelela nkongomiso, swi yendla leswaku vamakwerhu abandleni va vona leswaku Yehovha wa va rhandza naswona wa va hlayisa.

12. a) Hi mhaka muni hi fanele hi yingisa madoda? (Vaheberu 13:7, 17) b) Hi mhaka muni hi nga fanelanga hi txuvuka hintamu swihoxo swa vamakwerhu lava hi rhangelaka mabandleni?

¹² Loko madoda ma hi nyika nkongomiso hi fanele hi wu landzela hi ku swi rhandza. Loko hi yendla leswo swi ta ma vevukela madoda ku tama ma yendla ntirho wa wona wa ku rhangela bandla. Bibele li hi kutxa kuva hi yingisa hi tlhela hi tiveka hansi ka lava rhangelaka. (Lerha Vaheberu 13:7, 17.) Kambe a ku yendla leswo minkama yin’wani ku nga va xikarhatu, hi mhaka ku lava va rhangelaka a va hetisekanga. Se loko hi tshamela ku veka tihlo ka swihoxo leswi va swi yendlaka hi tshika ku vona wumunhu lalinene leli va nga na lona, hi ta va hi seketela valala. Hi mhaka muni hi vula leswo? Hi mhaka ku a valala va lava leswaku hi kanakana swaku Xikwembu xi tirhisa nhlengeletanu ya xona swaku xi hi kongomisa. Se loko hi sungula ku pimisa swilo swa ku biha hi madoda, hi nkama wolowo hi nga ha sungula ku pimisa swilo swa ku biha hi nhlengeletanu hi tlhela hi nga ha yi tshembi. Se hi nga yendla yini leswaku hi tsumbula mavunhwa lawa valala va ma hangalasaka hi tlhela hi fambela kule na wona?

U NGA PFUMELELI MUNHU A KU YENDLA U NGA HA YI TSHEMBI NHLENGELETANU YA YEHOVHA

13. Valala va Yehovha va zamisa ku yini ku yendla leswaku nhlengeletanu ya yena yi tikomba ingaku yi bihile?

¹³ Phela valala va Yehovha va zama ku yendla minchumu yayinene leyi yendliwaka hi nhlengeletanu ya Yehovha yi tikomba ingaku yi bihile. Hi xikombiso, hi djondzile ka Bibele leswaku Yehovha a lava leswaku hinkwavu lava mu tirhelaka va va vanhu va ku basa amuzimbheni, ka mahanyelo ya vona va tlhela va mu gandzela hi ndlela leyi yena a yi tsakelaka. Yehovha a lava leswaku munhu lweyi a nga ni mahanyelo ya ku biha a tlhela a yala ku tisola ka wona a susiwa bandleni. (1 Ko. 5:11-13; 6:9, 10) Phela leswi hi yendlaka hinkwaswu leswaku hi yingisa nawu lowu, valala va vula leswaku hina hi vanhu lava kalaka va nga rhandzi munhu, vanhu lava yavanyisaka vanhu van’wani va tlhela va nga na mhaka ni munhu lweyi a tikombaka a hambanile na hina.

14. I mani lweyi a hangalasaka mavunhwa hi nhlengeletanu?

¹⁴ Tiva lweyi a hangalasaka mavunhwa hi nhlengeletanu ya Yehovha. Sathana Davulosi hi yena lweyi a hangalasaka mavunhwa hi nhlengeletanu. Phela Bibele li vula swaku yena i “papayi wa mavunhwa.” (Yoh. 8:44; Gen. 3:1-5) Se a swi fanelanga swi hi hlamalisa ku va a tirhisa vanhu swaku va hangalasa mavunhwa hi nhlengeletanu ya Yehovha. Leswo hi swona leswi nga yendleka ka Yesu ni ka Vakreste va nkama wa vapostolo.

15. I mpsini leswi varhangeli va wukhongeli va nga swi yendla ka Yesu ni ka vadjondzisiwa va yena?

¹⁵ Hambileswi Yesu N’wana wa Xikwembu a a nga na xidjoho naswona a nga yendla masingita ya ku hlamalisa swinene, Sathana a tirhise vanhu van’wani leswaku va hangalasa mavunhwa hi Yesu. Hi xikombiso, varhangeli va wukhongeli va byeletele vanhu swaku Yesu a a tirhisa matimba ya “hosi ya madimoni” leswaku a yendla masingita. (Mar. 3:22) Nkama Yesu na a thethisiwa, varhangeli va wukhongeli va mu lumbete leswaku a a rhuketela Xikwembu naswona va hlohlotele xitshungu leswaku xi mu dlaya. (Mat. 27:20) Hi ku famba ka nkama, vadjondzisiwa va Yesu va chumayele mahungu ya ku tsakisa naswona valala va vona va ‘pfuxe mpfilumpfilu naswona va hlohlotele vanhu’ leswaku va xanisa vadjondzisiwa volavo va Yesu Kreste. (Min. 14:2, 19) A Murindzi wa 1 ka Dezembro wa 1998 loko a tlhamusela buku la Mintirho 14:2 a li: “Vanhu lava seketelaka Sathana va lwisana ni leswi Vakreste va swi chumayelaka va tlhela va vulavula minchumu ya ku biha hi vona leswaku vanhu va nga va yingisi va tlhela va va nyenya.”

16. I mpsini leswi hi faneleke hi swi khumbuka loko hi tshuka hi twa mavunhwa hi nhlengeletanu ni vamakwerhu lava rhangelaka?

¹⁶ Sathana a ngo yo hangalasa mavunhwa ka nkama wa Vakreste va ku sungula ntsena, ni swoswi wa ha tama a ma hangalasa. Bibele li vula swaku Sathana a ‘kanganyisa misava hinkwayu.’ (Nhl. 12:9) Se loko u tshuka u twa mavunhwa hi nhlengeletanu ya Yehovha kumbe hi vanhu lava va rhangelaka, khumbuka swaku leswo a swo sungula hi hina, swi humelelile hambi hi ka Yesu ni vadjondzisiwa va yena. Yesu a vule swaku a vanhu a va ta lwisana ni vanhu va Yehovha namuntlha va tlhela va va hembela; funtshi hi swona leswi hi swi vonaka swi yendleka namuntlha. (Mat. 5:11, 12) Se hina a hi nga ta ma kholwa mavunhwa wolawo loko hi khumbuka swaku i mani lweyi a ma hangalasaka hi tlhela hi yendla xan’wanchumu swaku hi tivhikela ka wona. Se vona swaku hi nga tivhikelisa ku yini ka mavunhwa wolawo.

17. Hi nga yendla yini swaku hi tivhikela ka switoriya swa mavunhwa? (2 Timotiya 1:13) (Vona kwadru leli nge “U Nga Yendla Yini Loko U Tshuka U Twa Switoriya Swa Mavunhwa?”)

¹⁷ U nga yingiseli switoriya swa mavunhwa. Mupostolo Pawulo a vule leswi hi faneleke hi swi yendla loko hi tshuka hi twa switoriya swa mavunhwa. A byele Timotiya leswaku ‘a laya vanhu van’wani leswaku va nga yingiseli switoriya swa mavunhwa.’ (1 Tm. 1:3, 4; 4:7) Phela xin’wanani xi nga ha rhola nchumu hansi xi xi peta non’wini, kambe munhu wamukulu leswi a swi twisisaka swaku ku yendla leswo swi ni nghozi a nge tshuki a swi yendlile. Na hina a hi swi yingiseli switoriya swa mavunhwa hikusa ha swi tiva leswaku swi ta hi ka mani. Hi yendla hinkwaswu leswaku hi yingisela “marito yamanene” ya ntiyiso. — Lerha 2 Timotiya 1:13.

18. Hi nga swi kombisisa ku yini swaku ha yi tshemba nhlengeletanu ya Yehovha?

¹⁸ Ka nhlokomhaka leyi hi yo vona tindlela tinharhu ntsena leti nhlengeletanu ya Yehovha yi tekelelaka Yesu hi tona, kambe nkama lowu u yaka u djondza Bibele zama ku vona tindlela tin’wani leti nhlengeletanu ya Yehovha yi tekelelaka xikombiso xa Yesu hi tona. Pfuna van’wani ka bandla la wena swaku va yi nyika lisima nhlengeletanu ya Yehovha va tlhela va yi tshemba. Naswona tama u kombisa swaku wa yi nyika lisima nhlengeletanu ya Yehovha hi ku tirhela Yehovha hi ku tshembeka u tlhela u va kusuhi ni nhlengeletanu leyi Yehovha a yi tirhisaka leswaku a hetisisa ku rhandza ka yena. (Ps. 37:28) Hinkwerhu a hi tameni hi swi nyika lisima ku tirha ni vamakwerhu lava rhandzaka Yehovha va tlhela va tshembeka ka yena.