Khoma Swi Tiya Ka Ntiyiso

1. U titwisa ku yini hileswi u tivaka ntiyiso?

HINA hi tirhelaka Yehovha ha wu rhandza ntiyiso lowu nga ka Rito la Xikwembu. (Rom. 10:17) Naswona ha kholwa swaku Yehovha a veke bandla swaku li va “pilari ni xiseketelo xa ntiyiso.” (1 Tm. 3:15) Se leswaku hi tama hi va ka ntiyiso lowu, hi fanele hi va tshemba lava Yehovha a nga va veka swaku va hi rhangela abandleni, hikusa hi vona va hi pfunaka swaku hi twisisa mintiyiso leyi hi yi rhandzaka leyi yi nga ka Bibele. — Heb. 13:17.

2. Hi ku ya hi Yakobe 5:19, i yini leswi swi nga ha humelelaka loko hi djondze ntiyiso?

² Kambe hambileswi hi rhandzaka mintiyiso ya Bibele hi tlhela hi pfumela minkongomiso leyi hi yi kumaka ka nhlengeletanu ya Yehovha, Sathana Davulosi a nga ha hi djikisa. (Lerha Yakobe 5:19.) Phela Sathana a a ta tsaka hintamu loko a hi vona hi tshika ku tshemba Bibele kumbe minkongomiso leyi hi yi kumaka ka lava rhangelaka. — Efe. 4:14.

3. Hi mhaka muni hi fanele hi khoma swi tiya ka ntiyiso? (Vaefeza 6:13, 14)

³ Lerha Vaefeza 6:13, 14. A ka ha choti kule swaku Sathana a hangalasa mavunhwa swaku a yendla matiko hinkwawu ma lwa na Yehovha. (Nhl. 16:13, 14) Naswona hi nkama wolowo Sathana ni wurhongo a nga ta li kuma hi ku yendla hinkwaswu leswi a nga swi kotaka swaku a kanganyisa na hina. (Nhl. 12:9) Se hina hi fanele hi djondza na ka ha li swoswi swaku hi tiva ku hambanisa mavunhwa ni ntiyiso hi tlhela hi hanya hi ntiyiso. (Rom. 6:17; 1 Pe. 1:22) Phela leswaku hi pona ka nhlomulu wawukulu lowu wu nga ku teni, hi fanele hi wu tiva kahle ntiyiso.

4. Hi ta djondza hi yini ka nhlokomhaka leyi?

⁴ Ka nhlokomhaka leyi hi ta vona minchumu yimbirhi ya lisima leyi yi nga ta hi pfuna ku vona ntiyiso lowu taka hi ka Bibele ni ku pfumela nkongomiso lowu taka hi ka nhlengeletanu ya Yehovha. Hi ta tlhela hi vona tipontu tinharhu leti ti nga ta hi pfuna ku tama hi khomelela ka ntiyiso.

SWILO LESWI NGA TA HI PFUNA KU VONA NTIYISO

5. Ku chava Yehovha swi nga hi pfunisa ku yini ku vona ntiyiso?

⁵ Ku chava Yehovha. Swi vula yini ku chava Yehovha? A ku chava Yehovha swi vula ku va hi mu rhandza hintamu Yehovha lakakuva hi nga yendli nchumu lexi nga ta kwatisa mbilu ya yena. Se leswaku hi mu tsakisa Yehovha swi lava hi tiva ku hambanisa a ntiyiso ni mavunhwa, hi tlhela hi tiva ku hambanisa swilo leswi mu tsakisaka ni swilo leswi kalaka swi nga mu tsakisi. (Swiv. 2:3-6; Heb. 5:14) Kambe leswi hi hanyaka ka misava leyi vanhu va yendlaka minchumu leyi kalaka yi nga mu tsakisi Yehovha, swi lava hi tiya hi nga chavi vanhu kumbe hi marito man’wani, hi nga chavi hintamu vanhu lakakuva loko va hi kombela ku yendla nchumu xa ku xa mu kwatisa Yehovha hi va tsakisa hi tshika ku tsakisa Yehovha.

6. I mpsini leswi nga yendleka hileswi 10 wa vavanuna lava nga ya kambela tiko va nga chava Vakanana?

⁶ Loko hi chava hintamu vanhu ku tlula Yehovha hi nga tshuka hi tsukula ntiyiso. Vona leswi nga yendlekela a Vayisrayele nkama lowu ku nga rhumiwa 12 wa vanhu swaku va ya kambela Tiko la Xitshembiso. Nkama lowu va nga vuya, a 10 wa vona va byele xitshungu xa Vayisrayele swaku ‘a va nga ta swi kota ku lwa ni vanhu lavayani.’ (Tin. 13:27-31) Phela va yendle leswo hikusa a va chava Vakanana ku tlula Yehovha. I ntiyiso swaku vhela Vakanana a va ni matimba ku tlula Vayisrayele, kambe ku vula swaku a ve nge swi koti ku nghena ka tiko leliyani a swo fana ni loko va vula swaku Yehovha a nga na matimba ya ku va pfuna swaku va nghena ka tiko la Kanana. Loko a va pimise hi Yehovha ni leswi a nga va yendlela swona ka nkama lowu wu nga hundza, na va nga zanga va rhurhumela hi ku chava hi ndlela liyani. Kambe ku hambana ni vavanuna lavayani va 10, Kalebe na Yoxuwa a va mu chava Yehovha. Hi leswo swi nga va yendla va byela Vayisrayele va ku: “Loko ho tsakisa Yehovha, a ta hi yisa ka tiko leli, a hi nyika lona.” — Tin. 14:6-9.

7. Hi nga yendla yini swaku hi tama hi chava Yehovha? (Vona mufoto.)

⁷ Leswaku hi tama hi chava Yehovha swi lava swaku hi mu tsakisa ka xin’wani ni xin’wani lexi hi xi yendlaka. (Ps. 16:8) Loko u djondza hi swikombiso swi nga ka Bibele tivutisi: ‘Loko a ni li ka xiyimu xa ku tani a ni ta swi yendlisa ku yini? Hi xihi xiboho a ni ta xi teka?’ Hi xikombiso, loko a wo va kona nkama 10 wa vavanuna lava nga ya kambela tiko va nga tisa relatoriyu la ku chavisa va vula swaku a va nga ta ya swi kota ku hlula Vakanana, a wu ta va u yendle yini? A wu ta va u ma kholwile mavunhwa wolawo? Kumbe leswi a wu ta va u mu rhandza hintamu Yehovha a wu ta nyima na Yoxuwa na Kalebe? Ku tala ka Vayisrayele va chavile, hi mhaka leswo a va nghenanga ka Tiko la Xitshembiso. — Tin. 14:10, 22, 23.

8. Yehovha a lava swaku hi va vanhu va ku tshamisa ku yini naswona hi mhaka muni?

⁸ Ku tiveka hansi. Yehovha a djondzisa ntiyiso lava tivekaka hansi. (Mat. 11:25) Se leswi hina hi tivekaka hansi hi pfumele ku djondza ntiyiso. (Min. 8:30, 31) Kambe hi fanele hi tivonela leswaku hi nga tibyeli, hikusa loko ho tibyela hi nga ha pimisa swaku mavonelo ya hina hi wona ma nga yamanene ku tlula leswi hi byeliwaka hi nhlengeletanu ya Yehovha ni leswi Bibele li swi vulaka.

9. I yini lexi nga ta hi pfuna ku tama hi tiveka hansi?

⁹ Leswaku hi tama hi tiveka hansi swi lava swaku hi khumbuka swaku hi vatsongo hintamu loko hi ringanisiwa ni Xikwembu. (Ps. 8:3, 4) Funtshi swi lava swaku hi khongela leswaku hi tiveka hansi. Yehovha a ta hi pfuna swaku hi rhangisa mimpimiso ya yena hi ku tirhisa Rito la yena ni nhlengeletanu ya yena. Ka djondzo ya wena ya Bibele, txuvuka kahle tipontu ta lisima leti ti nga ta ku pfuna ku vona swaku Yehovha wa va rhandza lava tivekaka hansi ni swaku a nyenya lava tikulisaka. Tivoneli swinene swaku u nga tibyeli, kambe u tama u tiveka hansi hambiloko u kuma mintirho yayikulu ka nhlengeletanu ya Yehovha.

LESWI NGA HI PFUNAKA KU TAMA HI KHOMELELA KA NTIYISO

10. I vamani lava Yehovha a nga va tirhisa khale swaku a kongomisa vanhu va yena, naswona a tirhisa vamani swoswi?

¹⁰ Tshemba nhlengeletanu ya Yehovha. A nkameni wa Vayisrayele, Yehovha a tirhise Moxe na Yoxuwa leswaku va rhangela a Vayisrayele. (Yox. 1:16, 17) Naswona nkama lowu Vayisrayele a va yingisa Moxe na Yoxuwa a va katekisiwa. Hi ku famba ka nkama, ka nkama wa vapostolo Yehovha a tirhise 12 wa vapostolo naswona loko se ku hundze nkama a tirhise vapostolo lava ni madoda man’wani lawa a ma li Yerusalema swaku va rhangela ka bandla la Wukreste. (Min. 8:14, 15) Se nkama lowu vamakwerhu nkama lowuyani a va yingisa leswi a va byeliwa hi vamakwerhu lava rhangelaka, “mabandla a ma tiyisiwa lipfumelo naswona a ma ya ma tala siku ni siku.” (Min. 16:4, 5) Se na hina namuntlha loko hi yingisa leswi vamakwerhu lava rhangelaka a nhlengeletanu ya Yehovha va hi byelaka swona, a swilo swi ta hi fambela kahle, kambe loko hi nga yendli leswo Yehovha a nga ta tsaka. Vona leswi nga yendlekela Vayisrayele nkama a va ya ka Tiko la Xitshembiso.

11. Ku yendleke yini hi vanhu lava nga djikela Moxe? (Vona mufoto.)

¹¹ Nkama lowu Vayisrayele a va li ndleleni ya tiko leli a va tshembisiwe lona, van’wani va vona lava a va hloniphiwa va sungule ku djikela Moxe va tlhela va solasola ntirho lowu a a nyikiwe wona hi Yehovha, va vula leswi: “Vanhu hinkwavu va kwetsima naswona Yehovha a le xikarhi ka vona.” (Tin. 16:1-3) Hambileswi ‘vanhu hinkwavu a va kwetsima’, Yehovha a a lange Moxe swaku a rhangela Vayisrayele. (Tin. 16:28) Vanhu volavayani a va vulanga leswo hi mhaka leswi a va ni mhaka ni xitshungu kumbe a vo lava ku xi pfuna, kambe a va yendla leswo hi mhaka leswi a va lava ku hloniphiwa ni ku nyikiwa lisima hi Vayisrayele hinkwavu. Yehovha a nga tsakanga hi leswo hikusa a a swi vona na va djikela yena hi ku kongoma. Hi mhaka leyo, a va dlayile vona ni hinkwavu lava va nga va seketela. (Tin. 16:30-35, 41, 49) Ninamuntlha loko hi nga yingisi lava Yehovha a nga va langa swaku va hi rhangela, Yehovha a nga ta tsaka.

12. I ntxini xi hi yendlaka hi tshemba nhlengeletanu ya Yehovha?

¹² Hina hi tshemba nhlengeletanu ya Yehovha. Hi mhaka muni? Hikusa lava rhangelaka ka nhlengeletanu a va pimisi kambirhi loko swi lava va txintxa nchumu. Hi xikombiso, loko swi lava va txintxa a matwisiselo ya hina hi tindzimana ta Bibele kumbe swi lava va txintxa leswi nhlengeletanu yi swi yendlisaka xiswona swilo vona va txintxa loko va twisisa swaku Yehovha hi leswo a swi lavaka. (Swiv. 4:18) Kambe a vo suketana va pfuka va ku ‘namuntlha hi lava ku txintxa swilo leswi,’ kambe va rhanga hi ku twisisa swaku Yehovha a lava swaku hi yendla yini swaku va tsakisa mbilu ya Yehovha funtshi va rhanga hi ku kambela Bibele va ta vona swaku leswi hi swona leswi Yehovha a swi lavaka, ku nga leswi na hina hi fanelaka hi swi yendla, loko hi lava ku yendla swiboho hi rhanga hi ku kambela Bibele.

13. a) Marito lawa ma nga ka 2 Timotiya 1:13 ma lava ku vula yini? b) Marito lawa hi nga ma tirhisa ndjhani ka wutomi la hina?

¹³ 2 Timotiya 1:13 yi li: “Tama u khoma swi tiya ka marito yamanene.” “Marito yamanene” lawa Pawulo a nga vulavula hi wona, i swilo hinkwaswu leswi hi swi djondzaka ka Bibele. (Yoh. 17:17) Se hina ha kholwa ka swona hinkwaswu naswona ha swi pfumela hinkwaswu leswi nhlengeletanu ya Yehovha yi hi djondzisaka swona. Loko hi yendla leswo Yehovha a ta hi katekisa.

14. I yini leswi nga yendla Vakreste va bandla la Tesalonika va tshika ku khomelela ka “marito yamanene”?

¹⁴ Ku nga humelela yini loko hi nyima ku khomelela ka “marito ya yamanene”? Hi xikombiso, ka nkama wa Vakreste va ku sungula ku hangalake mavunhwa lawa a ma vula swaku siku la Yehovha se li fikile. Swi nga yendleka a va pimisa swaku karta lolelo li ta hi ka mupostolo Pawulo. Na va nga zanga va kambisisile mhaka yoleyo, Vakreste va le Tesalonika va sungule ku kholwa mavunhwa wolawo, kambe a va ta va va nga kholwanga loko a va khumbuke leswi Pawulo a nga va djondzisa na va li xikan’we. (2 Tes. 2:1-5) Pawulo a va pfunile swaku va nga kholwi ka xin’wani ni xin’wani lexi a va ta xi twa. Naswona leswaku a va pfuna ka nkama lowu taka, ka karta la wumbirhi leli a nga va tsalela lona a game hi marito lawa ma nge: “Hi lawa marungula ya mina Pawulo, lawa ni nga ma tsala hi voko la mina, ku nga karimbu la makarta ya mina hinkwawu; lawa i matsalelo ya mina.” — 2 Tes. 3:17.

15. I mpsini leswi hi nga swi yendlaka swaku hi nga kanganyisiwi hi mavunhwa ya misava leyi? Nyikela xikombiso. (Vona mafoto.)

¹⁵ Hi djondza yini ka leswi Pawulo a nga swi byela Vakreste va le Tesalonika? Hi djondza swaku loko hi twa nchumu hi fanele hi xi kambela kahle, leswaku hi vona swaku xa fambisana ni leswi Bibele li swi vulaka kumbe a xi fambisani. Vona leswi nga yendleka a khale ka União Soviética. Vamakwerhu va yamukele karta leli a li tikomba ingi li ta hi sede mundial. Leswi a li tsalisiwe xiswona karta leliyani a swi yendla ingi hikakunene li ta hi ka vamakwerhu. Kambe vamakwerhu lava va nga li yamukela va li kambisise kahle va gama va tsumbula swaku nada a li nga ti hi kona, hikusa a li va chunsa swaku va nga ti hambela ntlawa wa vona va nga boheki ku landzela leswi a swi ta hi sede mundial. Se na hina namuntlha hi fanele hi pfula matihlo hikusa valala va hina va nga ha tirhisa mateknolojiya swaku va zama ku hi hambanisa. Se leswaku va nga swi koti ku hi hambanisa swi lava swaku loko hi twa nchumu hi rhanga hi ku xi kambela kahle leswaku hi vona swaku hikakunene swa fambisana ni leswi Bibele li djondzisaka swona kumbe nada. — 2 Tes. 2:2; 1 Yo. 4:1.

16. Hi ku ya hi Varoma 16:17, 18, hi fanele hi yendla yini loko munhu abandleni a vula swilo swa ku a hi ntiyiso?

¹⁶ Tlanga ni vanhu lava va khomelelaka ka ntiyiso. Yehovha a lava leswaku hina lava hi mu tirhelaka hi mu tirhela hi ku twanana. Se leswaku leswo swi koteka swi lava swaku hinkwenu hi khomelela ka mintiyiso leyi hi yi djondzaka ka Bibele. Kutani loko ko tshuka ku humelela munhu lani bandleni a sungula ku djondzisa minchumu ya ku hambana ni mintiyiso leyi, Yehovha a lava hi ‘fambela kule na yena’ hikusa hi wugamu hi nga ha sungula ku kholwa leswi a swi vulaka hi gama hi tsukula nhlengeletanu ya Yehovha. — Lerha Varoma 16:17, 18.

17. Ku ta yendleka yini loko hi tama hi khomelela ka ntiyiso?

¹⁷ Loko hi tiva ntiyiso ni ku khomelela ka wona lipfumelo la hina li ta tiya, funtshi Yehovha a ta hi vhikela. (Efe. 4:15, 16) A hi nga ta kanganyisiwa hi mavunhwa ya Sathana funtshi Yehovha a ta hi hlayisa ka nhlomulu wawukulu. Se tama u khomelela ka ntiyiso! Loko u khomelela ka ntiyiso, Yehovha a ta ku pfuna swaku u hlula mavunhwa lawa Sathana a ma tirhisaka namuntlha naswona “Xikwembu xa ku rhula xi ta va na wena.” — Filp. 4:8, 9.