Indjhe Loko Swiharhi Swi Fa Swi Ya Tilweni?

Nhlamulu ya Bibele

A Bibele li djondzisa leswaku ka swilo hinkwaswu leswi hanyaka, ko va vanhu vatsongo ntsena lava nga ta pfuxiwa leswaku va ya hanya tilweni. (Nhlawutelo 14:1, 3) Lava nga ta pfuxeliwa ku ya hanya tilweni va ta va tihosi ni vaprista naswona va ta fuma na Yesu. (Luka 22:28-30; Nhlawutelo 5:9, 10) Se vanhu va ku tala va ta pfuxiwa swaku va hanya paradesini kola misaveni. — Tipisalema 37:11, 29.

Bibele a li swi vuli swaku loko swiharhi swi fa swi ya tilweni; funtshi leswo swa twala hikusa swiharhi swi nge swi koti ku yendla leswi lavekaka swaku swi ‘vitaneliwa ku ya tilweni.’ (Vaheberu 3:1) Hi xikombiso, a swi nge djondzi hi Xikwembu, swi kombisa lipfumelo ka Xikwembu kumbe ku yingisa minawu ya xona. (Matewu 19:17; Yohani 3:16; 17:3) Ko va vanhu ntsena lava va nga yendleliwa ku hanya wutomi la ku kala li nga heli. — Genesa 2:16, 17; 3:22, 23.

Kuva munhu a ya tilweni swi lava leswaku a rhanga hi ku pfuxiwa. (1 Vakorinto 15:42) Bibele li vulavula hi ku pfuxiwa ka vanhu va vanyingi. (1 Tihosi 17:17-24; 2 Tihosi 4:32-37; 13:20, 21; Luka 7:11-15; 8:41, 42, 49-56; Yohani 11:38-44; Mintirho 9:36-42; 20:7-12) Kambe a li vulavuli hi ku pfuxiwa ka swiharhi, lo vulavula hi ku pfuxiwa ka vanhu ntsena.

Ku yendleka yini loko swiharhi swi fa?

Bibele li djondzisa leswaku a wutomi la vanhu ni wutomi la swiharhi la fana. Nkama Xikwembu xi nga yendla vanhu ni swiharhi xi tirhise swilo swimbirhi, ku nga “wuthulu la misava” ni “ku hefemula ka wutomi”. — Genesa 1:24; 2:7; Tinhlayo 31:28.

Ku nga va leswaku swiharhi swa djoha?

Bibele li tlhela li djondzisa leswaku vanhu ni swiharhi va fa. (Eksoda 19:13) Loko vanhu ni swiharhi va fa va tlhelela ka wuthulu la misava. (Ekleziyaxta 3:19, 20) Hi marito man’wani, va tshika ku va kona.

Indjhe swiharhi swa djoha?

Nada. Ku djoha swi vula ku pimisa kumbe ku yendla swilo leswi Xikwembu xi vulaka swaku swi bihile. Nkama lowu munhu a djohaka o yendla xiboho xa leswi a lavaka ku swi yendla; se leswi swiharhi swi kalaka swi nga pimisi a swi nge swi koti ku yendla leswo. (2 Pedru 2:12) Hambileswi swi kalaka swi nga djohi, swiharhi a swi na wutomi la ku kala li nga heli, swa fa hi ku famba ka nkama.

Ku nga va leswaku i swinene ku hlupha swiharhi?

Nada. Hambileswi Xikwembu xi nga nyika matimba vanhu leswaku va fuma swiharhi, a swi vuli swona leswaku va fanele va swi hlupha. (Genesa 1:28; Tipisalema 8:6-8) Phela Xikwembu xi ni mhaka ni swiharhi hinkwaswu, hambi hi swinyanyani swaswitsongo. (Yonasi 4:11; Matewu 10:29) Xikwembu xi byele vanhu va xona leswaku va fanele va swi hlayisa kahle swifuyu. — Eksoda 23:12; Deteronoma 25:4; Swivuriso 12:10.

Tindzimana leti vulavulaka hi swiharhi

Genesa 1:28: “Se Xikwembu xi va katekisa xi ku: ‘Psalanani mi va vanyingi mi tata misava, mi yi fuma, mi fuma tihlampfi ta lwandle ni swiharhi leswi hahaka swa matilo ni swiharhi hinkwaswu leswi fambafambaka henhla ka misava.’”

Ntlhamuselo: Xikwembu xi nyike vanhu matimba ya ku fuma swiharhi.

Ekleziyaxta 3:19, 20: “Hikusa lani vanhu va gamelaka kona ni swiharhi swi gamela kolanu; hinkwaswu swi fikeliwa hi magamu lama fanaka. Leswi xin’we xi fisaka swona ni lexin’wani xi fisa swoleswo; hikusa hinkwaswu swi ni matimba man’we ya wutomi. Hi mhaka leyo munhu a nga swi tluli swiharhi, hikusa hinkwaswu a swi pfuni nchumu. Hinkwaswu swi ya ka ndhawu yin’we. Hinkwaswu swi sukela ka wuthulu naswona hinkwaswu swi tlhelela ka wuthulu.”

Ntlhamuselo: Loko vanhu ni swiharhi va fa, hinkwavu va tlhelela ka wuthulu.

Swivuriso 12:10: “Lweyi wa ku lulama a hlayisa swifuyu swa yena.”

Ntlhamuselo: Vanhu va ku lulama va swi hlayisa kahle swiharhi swa khwati ni leswi va swi fuyaka.

Matewu 10:29: “Swinyanyani swimbirhi swaswitsongo a swi xavisiwi hi sentavhu lin’we ke? Kambe a xi kona ni xin’we xa swona lexi nga ta wa hansi kambe Papayi wa n’wina a nga xi voni.”

Ntlhamuselo: Xikwembu xi ni mhaka ni swiharhi hinkwaswu, ku patsa ni swinyanyani swaswitsongo.