4 Wa Majovhem Lawa Ma Nga Yingisa Yehovha

Hosi Nebukadinazara a a lava leswaku vavanuna van’wani va le Yuda va mu tirhela. Hi mhaka leyo, a rhume wanuna lweyi a vitaniwaka Axipenazi leswaku a ya langa majovhem lawa a ma nga tshameli ku vabya funtshi a ma tlharihile. Majovhem lawa a ma ta djondzisiwa mintirho leyi a yi yendliwa aBabilona ku ringana malembe manharhu. A swi lava leswaku va djondzisiwa ku lerha, ku tsala ni ku vulavula lirimi leli a li tirhisiwa aBabilona, funtshi a va ta dla swakudla leswi a swi dliwa hi hosi. Mavito ya majovhem lawa ma nga langiwa a ku li Daniyele, Ananiya, Mixayele na Azariya. Axipenazi a va nyike mavito man’wani ya nyuwani ku nga Beltexazara, Xadraki, Mexaki na Abedinigo. Indjhe leswi va nga djondzisiwa swona aBabilona a swi ta wonha wuxaka la vona na Yehovha?

Majovhem lawayani ya 4 a ma tinyimiselile ku yingisa Yehovha. A ma swi tiva swaku Vababilona a va dla swakudla leswi Nawu wa Yehovha a wu nga va pfumeleli swaku vona va dla. Hi mhaka leyo, va vulavule na Axipenazi swaku va nga dli swakudla swa hosi. Se Axipenazi a va hlamulile a ku:

— Loko mo kala mi nga dli swakudla swa hosi, se hosi yi vona swaku mi wondzile naswona mi tikomba ingi ma vabya, yona yi ta ni dlaya!

Se Daniyele a ye a ya vulavula ni wanuna lweyi a a va rhangela a ku:

— Hi kombela leswaku u hi nyika matsavu ni mati ku ringana 10 wa masiku, loko se ku hundze 10 wa masiku hi fananisi ni majovhem lawa ma dlaka swakudla swa hosi.

Wanuna lweyi a nga yalanga.

Loko se ku hundze 10 wa masiku, Daniyele ni vanghanu va yena a va tikomba va sasekile va tlhela va va ni matimba ku tlula majovhem lawa man’wani. Yehovha a tsake hintamu hi ku vona ku yingisa ka vona. A tlhele a nyika Daniyele wutlharhi la leswaku a tlhamusela milorho.

Loko se va hete ku djondzisiwa, Axipenazi a teke majovhem lawa a ma yisa ka Nebukadinazara. Hosi yi bule na wona kambe yi vone swaku Daniyele, Mixayele, Ananiya na Azariya a va ni wutlharhi funtshi a va yingisela kahle. A lange majovhem lawa swaku ma tirha ka yindlo ya yena. Minkama hinkwayu a hosi a yi va kombela swaku va nyikela mavonelo ya vona swaku ku lulamisiwa timhaka ta lisima. Yehovha a pfune Daniyele ni vanghanu va yena leswaku va va ni wutivi la linyingi ku tlula vavanuna lava a va vhumbata ka yindlo ya hosi.

Daniyele, Mixayele, Ananiya na Azariya a va li kule ni mindjangu ya vona. Hambileswo, a va mu khohlwanga Yehovha. Se wena ke, indjhe u ta tama u mu khumbuka Yehovha hambiloko u li kule ni vapsali va wena?