Yesu A Langa Sawulo

Sawulo a psaliwe ka doropa la Tarsu. Yena a a li Mufarisi funtshi a a yi tiva kahle Minawu ya Vayuda. Kambe yena a a va nyenya hintamu Vakreste. A a khomela vavanuna ni vavasati lava a va li Vakreste makaya ya vona a va peta djele. Nkama lowu vanhu va nga dlaya Stefano hi maribye, Sawulo na yena a a li kolanu kambe a nga yendlanga nchumu, a yo nyima a va txuvuka.

Sawulo a a va nyenya hintamu Vakreste lakaku a ze a kombela mpfumelelo ka muprista wamukulu leswaku a ya Damaxka a ya khoma Vakreste lava a va tshama koseniyani. Nkama na a li kusuhi ni Damaxka ku sungule ku voninga hintamu amatlhelweni ka yena ku tlhela ku phatima, se Sawulo a wa hansi. Yena a game a twa rito leli a li ku:

— Sawulo u ni hluphela yini?

Sawulo a vutisa a ku:

— Hi wena mani?

Yesu a hlamula a ku:

— Hi mina Yesu. Ni lava leswaku u ya aDamaxka. Loko u fika, u ta tiva leswi u faneleke u swi yendla.

Hi nkama wolowo Sawulo a fe matihlo. Vavanuna lava a a famba na vona va mu khome hi voko anze Damaxka. Phela aDamaxka a ku tshama Mukreste wa ku tshembeka lweyi a a vitaniwa swaku i Ananiya. Yesu a humelele ka Ananiya a ku:

— Famba kaya ka Yudasi, ka ndlela leyi vitaniwaka Lulama u ya lavetela Sawulo.

Ananiya a ku:

— Ni twe vanhu va vanyingi va vulavula hi Sawulo, yena a lava ku khomela valandzeli va wena hinkwavu a va peta djele.

Yesu a hlamula a ku:

— Famba ka yena, mina ni lange Sawulo swaku a chumayela mahungu ya ku tsakisa ka tindhawu ta tinyingi.

Ananiya a fambile a ya kumana na Sawulo, yena a fike a mu byela a ku:

— Yesu a ni rhume leswaku ni ta ku hanyisa matihlo.

Se Sawulo a game a famba na Ananiya na a hanyisiwe matihlo. A fike a djondza hi Yesu a tlhela a va mudjondzisiwa. Loko Sawulo a tsakamisiwile, a sungule ku chumayela ka ndhawu leyi a ku gandzeliwa ka yona Yehovha, na a li xikan’we ni Vakreste van’wani. Pimisa hi leswi Vayuda va nga hlamalisa xiswona loko va vona Sawulo na a chumayela hi Yesu.

Sawulo a tshame 3 wa malembe na a chumayela aDamaxka. Kambe Vayuda va sungule ku mu nyenya hintamu, lakakuva va sungula ku yendla maplanu swaku va mu dlaya. Vamakwerhu va bandla lolelo loko va tive maplanu wolawo ya ku biha, va pfune Sawulo swaku a baleka. Vona va mu pete ka ndzhava wawukulu va boha ndzhava hi goda, va gama va wu xikisa hi ka mbhoxo lowu a wu kumeka ka muru wa doropa.

Nkama Sawulo a nga fika Yerusalema, a lave ku tipatsa ni Vakreste van’wani. Kambe vona a va mu chava. Se mudjondzisiwa mun’wanyani lweyi a a vitaniwa Barnaba a pfune Sawulo. A mu tekile a famba na yena ka vapostolo a fika a va tlhamusela swaku Sawulo a a txintxile hikakunene. Se Sawulo a game a sungula ku chumayela mahungu ya ku tsakisa ni bandla la Yerusalema. Hi ku famba ka nkama, Sawulo a sungule ku vitaniwa swaku hi yena Pawulo.