Va Chumayele Na Va Nga Chavi Nchumu

A ku ni wanuna lweyi a a limalile, yena a a tshama nyanghweni ka tempele a kombela male. Siku lin’wani, Pedru na Yohani va ye tempeleni, se wanuna lweyi a kombele male ka vona. Pedru a te:

— Mina ni ta ku nyika nchumu wa lisima hintamu ku tlula male. Hi vito la Yesu, pfuka u famba!

Se wanuna lweyi a sungule ku famba. Ku tala ka vanhu lava va nga swi vona va hlamale hintamu funtshi va ve vadjondzisiwa va Yesu.

Kambe vaprista ni Vasaduki va sungule ku va kwatela hintamu. Va va tekile va ya tribunali. Se a tribunali va vutise Pedru na Yohani swaku i mani lweyi a nga va nyika matimba ya ku hanyisa wanuna lwiyani, se Pedru a va hlamulile a ku:

— I Yesu Kreste, wanuna lweyi mi nga mu dlaya.

Se vaprista ni Vasaduki va va byele swaku a va nga ha fanelanga va vulavula hi Yesu. Kambe Pedru na Yohani va te:

— A hi nga ta tshika ku vulavula hi Yesu. Hi ta tama hi vulavula hi yena.

Nkama va nga va tshika, Pedru na Yohani va fambile va ya byela vadjondzisiwa lavan’wani hinkwaswu leswi nga yendleka. Se hinkwavu va khongelile va kombela Yehovha leswaku a va pfuna. Yehovha a va nyike moya wa ku kwetsima leswaku va tama va chumayela na va nga chavi nchumu, va tlhela va hanyisa vanhu. Vadjondzisiwa a va ya va tala swinene, kambe leswo a swi va tsakisanga Vasaduki. Hi mhaka leyo, va khome vapostolo va va peta djele. Kambe niwusiku, ntsumi ya Yehovha yi pfule swipfalu swa djele yi gama yi va byela yi ku:

— Tlhelelani tempeleni mi ya djondzisa kohala.

Ka siku leli nga landzela, Vasaduki va tive swaku vapostolo a va humile djele naswona a va li ku djondziseni atempeleni.

Va tlhele va va khoma va va yisa tribunali. Se muprista wamukulu a te:

— A hi mi byelanga swaku mi nga vulavuli hi Yesu?

Kambe Pedru a va hlamule a ku:

— Hina hi yingisa Xikwembu tani hi mufumi wa hina ku tlula vanhu.

Se vavanuna lava a va li tribunali va kwate hintamu lakakuza va lava ni ku dlaya vapostolo. Kambe Mufarisi mun’wani lweyi a a vitaniwa Gamaliyele a te:

— Tivoneleni, swi nga yendleka Xikwembu xi li na vona. N’wina a mi lavi ku lwa ni Xikwembu a hi swona?

Vavanuna lava a va li tribunali va pfumelelane na yena Gamaliyele, se va tshike vapostolo va famba. Kambe na va nga se famba, va rhange hi ku va ba va tlhela va va byela swaku va nga ha chumayeli. Hambileswo, vapostolo va tame va chumayela na va nga chavi nchumu. Siku ni siku a va chumayela hi munti ni munti ni le tempeleni.