Djondzo Ya Le Ntshaveni

Loko Yesu se a lange 12 wa vapostolo va yena, a vone leswaku a ku ni vanhu va vanyingi lava a va mu nyimelile. Vanhu volavo a va ta hi ka tindhawu ta ku hambanahambana ta ku fana ni Galileya, Yudiya, Tiri, Sidoni ni Siriya. Van’wani va vona a va vabya, van’wani a va ni madimoni, kambe Yesu a va hanyisile hinkwavu, a gama a tshama a hamba dixkursu la yena leli vanhu va vanyingi va li tivaka hi Dixkursu La Le Ntshaveni. Ka dixkursu la yena, Yesu a tlhamusele leswi hi faneleke hi swi yendla leswaku hi va vanghanu va Xikwembu. A vule leswaku a swi nge koteki ku hanya na hi nga kongomisiwi hi Yehovha naswona hi fanele hi mu rhandza. Kambe a tlhele a ku a swi nge koteki ku vula swaku hi rhandza Xikwembu na hi nga va rhandzi vanhu van’wani. Yesu a vule swaku hi fanele hi va yendlela swaswinene vanhu hinkwavu.

Yesu a tlhele a ku:

— N’wina a mi fanelanga mi rhandza vanghanu va n’wina ntsena. Swi lava mi rhandza ni lava va mi nyenyaka ni ku tlhela mi rivalela vanhu van’wani. Loko munhu a ku kwatelile, famba u ya vulavula na yena u kombela leswaku a ku rivalela. Yendlela van’wani leswi u lavaka swaku va ku yendlela swona.

Yesu a tlhele a nyika vanhu xitsundzuxu lexi fambisanaka ni male, yena a te:

— I swa lisima ku va vanghanu va Yehovha ku tlula ku va ni male ya yinyingi, hikusa muyivi a nga fika a yi yiva kambe a nga kona lweyi a nga yivaka wunghanu la wena na Yehovha. Tshikani ku vilela hi leswi mi nga ta swi dla, leswi mi nga ta swi phuza ni leswi mi nga ta swi dloka. Vonani swinyanyani, Xikwembu xi swi nyika hinkwaswu leswaku swi dla. Ku tshamela ku vilela a swi pfuni munhu leswaku a hanya nkama wa ku leha. Khumbuka leswaku Yehovha wa swi tiva leswi hi swi lavaka.

Vanhu lavayani a va nga se tshama va twa munhu na a djondzisa swilo swa ku fana ni leswi Yesu a a swi djondzisa. Varhangeli va wukhongeli lava a va fanele va pfuna vanhu leswaku va tiva Xikwembu, a va nga va djondzisi nchumu vanhu. Kambe hi mhaka muni Yesu a a djondzisa kahle? Hi mhaka Yehovha a a mu pfuna kuva a tiva leswi a a fanele a swi djondzisa.