Vona A Va Xi Gandzelanga Xitatuwa

Loko se ku hundze nkama, Hosi Nebukadinazara a yendle xitatuwa xa woru xaxikulu, a gama a vitana vanhu hinkwavu va lisima va Babilona leswaku va ta vona xitatuwa. Ka vanhu lava a ku na Xadraki, Mexaki na Abedinigo. Hosi yi veke nawu yi ku:

— Loko mi twa muzika na wu chaya mi fanele mi khizama mi gandzela xitatuwa. Lweyi a kalaka a nga yendli leswo a fanele a petiwa ka xikhele lexi pfurhaka ndzilu.

Se ku nga va leswaku Xadraki, Mexaki na Abedinigo a va ta xi gandzela xitatuwa lexiyani kumbe a va ta tama va tshembeka ka Yehovha?

Nkama ku nga chayiwa muzika, vanhu hinkwavu va khizamile va gandzela xitatuwa kambe Xadraki, Mexaki na Abedinigo a va swi yendlanga leswo. Vavanuna van’wani va swi vonile swaku a va khizamanga va gama va ya byela hosi. Se Hosi Nebukadinazara a rhume vavanuna lavayani leswaku va ya teka Xadraki, Mexaki na Abedinigo, a fika a ku:

— Ni ta mi nyika nkama wa leswaku mi pimisa, loko mo tlhela mi yala ku gandzela xitatuwa ni ta mi txukumetela ka xikhele xa ndzilu. Naswona a ku na Xikwembu lexi nga ta mi ponisa ka mina.

Vona va hlamulile va ku:

— Hina a hi lavi nkama leswaku hi pimisa, Xikwembu xa hina xi ta hi ponisa. Hambi xi nga hi ponisi a hi nga ta xi gandzela xitatuwa.

Nebukadinazara a kwatile hintamu lakakuza a ku:

— Hlanganyetani xikhele xa ndzilu xi phindhiwa ka 7 xi hisa hintamu ku tlula masiku man’wani. Mi gama mi boha vavanuna lava mi va hoxa ndzeni ka xikhele.

Se masonchwa ma yendle leswi hosi yi nga swi vula.

A xikhele a xi hisa hintamu lakaku masonchwa man’wani ma file hi ku va ma tshinela kusuhi na xona. Nkama lowu hosi yi nga txuvuka a ndzeni ka xikhele yi vone 4 wa va vanuna na va fambafamba. Se yi chavile hintamu, yi gama yi vutisa yi ku:

— Hina hi pete 3 wa vavanuna ndzeni ka xikhele a hi swona? Kambe ni vona 4 wa vona ndzeni ka xikhele, mun’we wa vona a fana ni ntsumi.

Nebukadinazara a tshinele kusuhi ni xikhele xa ndzilu a gama a byela Xadraki, Mexaki na Abedinigo leswaku va huma. Nkama va nga huma, vanhu hinkwavu va hlamalile hikusa va vone leswaku majovhem lawa ya 3 a ma nga pshanga hi ndzilu. Phela hambi hi mpahla ya vona, misisi ya vona ni muzimbha wa vona a swi zanga hi ku psha hambi hi ka kutsongo naswona a va nga nun’hwi ximusi.

Se Nebukadinazara a te:

— Xikwembu xa Xadraki, Mexaki na Abedinigo xi ni matimba ku tlula swikwembu leswin’wani hinkwaswu. Xi swi kotile ku rhumela ntsumi leswaku yi ya ponisa majovhem lawa. Phela a ku na Xikwembu xa ku fana ni lexi.

Hi nga djondza yini hi xikombiso xa Xadraki, Mexaki na Abedinigo? Hi djondza leswaku hi fanele hi tshama hi tshembekile ka Yehovha ku nga na mhaka leswi swi nga ha yendlekaka.