Rahabi A Tumbete Vakambeli

Nkama lowu vakambeli va nga fika aYeriko va ye ka munti wa wansati lweyi a a vitaniwa Rahabi. Kambe loko hosi yi swi tivile yi rhumele masonchwa leswaku ma ya khoma vakambeli. Loko masonchwa ma fikile, Rahabi a byele vakambeli leswaku va tumbela. A gama a byela masonchwa a ku:

— Vakambeli a va li kona lani. Kambe se va fambile kumbe loko mi tsutsuma mi nga va kuma.

Loko masonchwa ma sukile ma famba Rahabi a byele vakambeli a ku:

— Na swi tiva swaku Yehovha a lava ku nyikela doropa leli ka Vayisrayele, kambe ni mi kombela nchumu xin’we, ni kombela mi ponisa va ndjangu wa mina.

Se vakambeli va tshembisa Rahabi va ku:

— Ha ku tshembisa swaku hinkwavu lava va nga ta va kona ka yindlo ya wena va ta pona, ntsena swi lava u boha goda leli la ku pshuka ka janela la wena.

Se vakambeli va hume hi ka janela va baleka leswaku va ya tumbela ka tintshava ku ringana masiku manharhu. Va game va ya tlhangana na Yoxuwa, se ku ve hi nkama wolowo Vayisrayele va nga tlulela Nambu wa Yordani. A doropa la ku sungula leli Vayisrayele va nga li dumela ku ve doropa la Yeriko. Yehovha a rhume Vayisrayele leswaku va rhendzeleka kan’we hi siku ka doropa kambe a swi lava leswaku va yendla leswo 6 wa masiku se hi siku la wu 7 va rhendzeleke ka 7 ka doropa hinkwalu. Vaprista va gama va chaya timhondzo, se Vayisrayele va vanga guwa hintamu se a muru wa doropa wu wa hansi, kambe a yindlo ya Rahabi leyi a yi li henhla ka muru wa doropa a yi wanga. Rahabi a a tshemba Yehovha ni ku tlhela a yendla leswi vakambeli va nga mu byela swona. Hi mhaka leyo yena ni ndjangu wa yena va ponile.