A Ku Li Mani Yobo?

Indjhe munhu wamunene wa humeleliwa hi swikarhatu? Vona leswi nga humelela Yobo, yena a a tshama ka tiko la Uza. Yobo a a ganyile hintamu, funtshi a a ni ndjangu wawukulu. Yena a a li wanuna wamunene, naswona a a li munghanu wa Xikwembu. Yobo a a pfuna swisiwana a tlhela a pfuna vavasati lava nga feliwa hi vavanuna ni swivanani leswi nga feliwa hi vapsali.

Yobo a a nga swi tivi swaku Sathana a mu bedjelile. Kambe Yehovha a a swi tiva, hi mhaka leyo a vutise Sathana a ku:

— Hi mhaka muni u bedjela Yobo? Phela a ku na munhu wa ku fana na yena amisaveni hinkwayu. Minkama hinkwayu wa ni yingisa, funtshi a yendla minchumu yayinene.

Se Sathana a hlamula a ku:

— Vhela wa ku yingisa hikusa minkama hinkwayu u tshamela ku mu vhikela. A wu mu tshiki a yendlekeliwa hi nchumu xa ku biha naswona u mu nyika minchumu ya yinyingi ya ku fana ni masimu ni swifuyu. Kambe hi nga ringisa ku mu susela minchumu hinkwayu leyi a nga na yona, u swi vona kumbe a nga ta tshika ku va munghanu wa wena.

Se Yehovha a ku:

— Hi swona, yendla leswi u swi lavaka. Kambe u nga mu dlayi.

Kasi hi mhaka muni Yehovha a tshike Sathana a yendla leswo? Hi mhaka a a mu tshemba hintamu Yobo. A a swi tiva swaku Yobo a a ta tama a va munghanu wa yena hambiloko swilo swi karhata ka wutomi la yena.

Se Sathana a sungula ku mu yendlela swilo swa ku biha Yobo. Ku sungula a yendle swaku swifuyu hinkwaswu swa Yobo swi hisiwa swi tlhela swi yiviwa. A tlhela a yendla swaku vatirhi hinkwavu va Yobo va dlayiwa. Kambe a nga gamelanga lanu, a yendle swa ku biha hintamu, a yendle leswaku vana hinkwavu va Yobo va fa. Vona a va li kaya na va yendla fexta, se yindlo yi wa henhla ka vona. Yobo a vaviseke hintamu, ni xa ku xi yendla a nga xi tivi. Kambe hambileswi a nga kumana ni swikarhatu leswo, Yobo a tame a va munghanu wa Yehovha.

Sathana a wa ha lava swaku Yobo a hlupheka. Se a yendle leswaku muzimbha wa yena wu tala hi marhumba lawa a ma vava hintamu. Yobo a a nga swi tivi swaku hi mhaka muni swilo swoleswo swi mu humelela. Hambileswo, a tame a va munghanu wa Yehovha. Hi mhaka leyo a yendle leswaku Yehovha a tsaka hintamu.

Sathana a game a yendla leswaku 3 wa vanghanu va Yobo va ya vulavula mavunhwa ka Yobo. Vanghanu va yena va vule leswaku Yobo a a yendlile swilo swa ku biha naswona Xikwembu a xo mu khatisa hi mhaka ya swona. Se Yobo a game a hlamula swaku a a nga yendlanga nchumu xa ku biha. Kambe Yobo a sungule ku pimisa leswaku a ku li Yehovha lweyi a a mu yendlela swilo swa ku biha. Lakaku a za a ku:

— Xikwembu a xi ni yendleli swilo swaswinene.

Wanuna mun’wani lweyi a vitaniwaka Elihu, a a tshame kusuhi na vona a va yingisela na a miyelile a ku ntsem. Se a gama a ku:

— Leswi mi swi vulaka a hi ntiyiso. Hina swi nga ha yendleka hi nga swi twisisi swaku hi mhaka muni Yehovha a tshika swilo leswi swa ku biha swi yendleka, kambe a hi nge vuli swaku Yehovha hi yena a yendlaka swilo swa ku biha. Phela Yehovha wa swi vona hinkwaswu leswi yendlekaka naswona minkama hinkwayu a pfuna vanhu loko va kumana ni swikarhatu.

Se Yehovha a vulavula na Yobo a ku:

— Hi mhaka muni u ni lumbeta? A wu yi twisisi ndlela leyi ni nga yendla matilo ni misava hi yona, se u nga swi twisisisa ku yini leswi ku humelelaka?

Se Yobo a hlamula a ku:

— Ohoo Yehovha, Hosi yanga, ni rivaleli. Na swi tiva swaku hi wena u nga tlakuka amisaveni hinkwayu. Mina no va munhu ntsena wa ku kala a nga tivi nchumu. Ni rivaleli ka leswi ni nga swi hlaya.

Se Yehovha a game a hanyisa Yobo ka mavabyi ya yena a tlhela a mu nyika minchumu ya yinyingi ya ku tlula ni leyi a a li na yona khale. Yobo a hanye malembe ya manyingi na a tsakile. Wa swi tiva swaku hi mhaka muni Yehovha a mu yendlele swilo leswo hinkwaswu Yobo? Hi mhaka Yobo a a yingisa Yehovha minkama hinkwayu, hambiloko swi karhata. Se wena ke, a wu swi lavi ku tsakisa Yehovha? Loko u lava ku tsakisa Yehovha, yendla hinkwaswu leswi u nga swi kotaka leswaku u tama u va munghanu wa yena hambiloko u kumana ni swikarhatu.